LISAUN ESTUDU 31
KNANANUK 12 Maromak Kbiit Boot, Jeová
Saida mak Jeová halo ona atu salva ita husi sala no mate?
“Maromak hadomi tebes mundu toʼo fó nia Oan-Mane mesak.”—JOÃO 3:16.
OBJETIVU
Ita sei aprende oinsá Jeová ajuda ita atu luta hasoru sala no oinsá nia loke dalan mai ita atu livre husi sala no moris ba nafatin.
1-2. (a) Sala mak saida, no oinsá mak ita bele luta hasoru sala? (Haree mós “Esplikasaun ba fraze”.) (b) Iha lisaun neʼe no lisaun sira tuirmai, ita sei aprende kona-ba saida? (Haree mós “Nota ba lee-naʼin sira” iha livru neʼe.)
MAROMAK Jeová nia domin ba Ita mak oinsá? Ita bele hetan resposta hodi estuda kona-ba saida mak Jeová halo ona atu salva Ita husi sala no mate. Sala a mak hanesan inimigu neʼebé aat, no Ita labele manán ida-neʼe ho Ita-nia kbiit rasik. Loroloron ita halo sala, no ita mate tanba sala. (Rom 5:12) Maibé iha liafuan diʼak. Jeová sei salva ita husi sala no mate!
2 Maizumenus durante tinan 6.000, Jeová ajuda ema atu luta hasoru sala. Tanbasá? Tanba nia hadomi ita. Nia hadomi ema husi tempu uluk kedas, tan neʼe nia halo ona buat barak atu ajuda ita bainhira ita monu ba sala. Jeová hatene katak sala lori ba mate, no nia lakohi ita atu mate. Nia hakarak ita moris ba nafatin. (Rom 6:23) Iha lisaun neʼe, ita sei aprende kona-ba pergunta tolu: (1) Oinsá Jeová fó esperansa ba ema sala-naʼin? (2) Ema sala-naʼin iha Bíblia nia tempu halo saida atu Jeová simu sira? (3) Saida mak Jesus halo atu salva ema husi sala no mate?
OINSÁ JEOVÁ FÓ ESPERANSA BA EMA SALA-NAʼIN?
3. Oinsá mak Adão no Eva sai sala-naʼin?
3 Bainhira Jeová kria mane no feto primeiru, nia hakarak sira atu moris kontente. Nia fó sira hela-fatin neʼebé furak no moris kaben nuʼudar prezente. Nia mós fó sira knaar neʼebé lori kontente, neʼe mak halo nakonu mundu ho sira-nia jerasaun, no halo mundu tomak sai paraízu hanesan jardín Eden. Nia fó ba sira mandamentu ida deʼit. Nia fó avizu ba sira katak se sira la halo tuir mandamentu neʼe, sira sei mate. Hanesan ita hatene ona, iha anju aat ida neʼebé la hadomi Maromak no ema . Nia book Adão no Eva atu la halo tuir Maromak. Sira halo tuir anju aat neʼe duké tau fiar ba sira-nia Aman neʼebé hadomi tebes sira. Rezultadu mak sira halo sala. Buat neʼebé Jeová hatete sai loos duni. Husi tempu neʼebá, sira tenke simu konsekuénsia. Sira komesa sai ferik-katuas, no ikusmai mate.—Gén 1:28, 29; 2:8, 9, 16-18; 3:1-6, 17-19, 24; 5:5.
4. Tanbasá Jeová odi sala no ajuda ita luta hasoru ida-neʼe? (Roma 8:20, 21)
4 Jeová fó sai akontesimentu neʼe iha Bíblia atu hanorin ita lisaun importante. Neʼe ajuda ita komprende tanbasá Jeová odi tebes sala. Sala haketak ita husi Aman Jeová, no neʼe lori ba mate. (Isa 59:2) Satanás odi Jeová no ema, tan neʼe nia hakarak ema atu halo sala. Bainhira Adão no Eva halo sala, karik Satanás hanoin katak nia hapara ona Jeová nia hakarak ba ema. Maibé nia la komprende kona-ba Jeová nia domin. Jeová nunka troka ninia hakarak ba Adão no Eva nia jerasaun. Nia hadomi ema, tan neʼe nia halo kedas buat ruma neʼebé lori esperansa. (Lee Roma 8:20, 21.) Jeová hatene katak sei iha ema neʼebé hadomi nia no halo tuir nia. Nuʼudar Aman no Kriadór, nia fó dalan ba ema hanesan neʼe atu hakbesik ba nia no sai livre husi sala no mate. Saida mak Jeová halo atu kumpre ida-neʼe?
5. Horibainhira mak Jeová fó sai esperansa ba ema sala-naʼin sira? Esplika toʼok. (Génesis 3:15)
5 Lee Génesis 3:15. Jeová fó kedas esperansa ba ema bainhira nia hatete kona-ba saida mak sei akontese ba Satanás. Jeová hatete katak sei iha “bei-oan” ida neʼebé sei salva ema hotu. Bei-oan neʼe sei harahun tiha Satanás no hadiʼa problema hotu neʼebé mosu iha jardín Eden. (1 João 3:8) Maibé ulukliu, Satanás sei “hakanek” bei-oan neʼe, ka halo nia mate. Neʼe sei halo Jeová laran-kanek tebes. Maski nuneʼe, Jeová prontu atu tahan ida-neʼe hodi bele salva ema husi sala no mate.
EMA SALA-NAʼIN IHA BÍBLIA NIA TEMPU HALO SAIDA ATU JEOVÁ SIMU SIRA?
6. Saida mak fiar-naʼin sira hanesan Abel no Noé halo atu bele hakbesik ba Jeová?
6 Neineik-neineik Jeová hatudu ho klaru liután oinsá ema sala-naʼin bele hakbesik ba nia. Adão no Eva nia oan segundu Abel mak ema primeiru neʼebé tau fiar ba Jeová. Abel hasaʼe sakrifísiu tanba hadomi Jeová no hakarak halo Jeová kontente. Abel mak bibi-atan, tan neʼe nia oho ninia bibi-oan primeiru balu no fó neʼe ba Jeová nuʼudar sakrifísiu. Jeová sente oinsá? Nia “simu Abel no ninia sakrifísiu”. (Gén 4:4) Jeová mós kontente ho sakrifísiu husi ema neʼebé hadomi no tau fiar ba nia, hanesan Noé. (Gén 8:20, 21) Hodi simu sakrifísiu hanesan neʼe, Jeová hatudu katak ema sala-naʼin bele halo nia kontente no hakbesik ba nia. b
7. Saida mak ita aprende husi Abraão nia hahalok neʼebé prontu fó ninia oan nuʼudar sakrifísiu?
7 Abraão fiar metin ba Jeová. No Jeová husu nia atu halo buat neʼebé susar tebes, neʼe mak atu fó ninia oan Isaac nuʼudar sakrifísiu. Neʼe halo Abraão sente laran-susar tebes. Maski nuneʼe, nia halo tuir Jeová. Bainhira Abraão besik atu oho Isaac, Maromak hapara nia. Ezemplu neʼe hanorin lisaun importante kona-ba saida mak Jeová sei halo. Jeová prontu atu fó ninia Oan-Mane neʼebé nia hadomi nuʼudar sakrifísiu. Neʼe hatudu katak Jeová hadomi tebes ema.—Gén 22:1-18.
8. Ita aprende saida husi sakrifísiu oioin neʼebé Ukun-Fuan haruka? (Levítico 4:27-29; 17:11)
8 Tinan barak liu tiha, Jeová fó Ukun-Fuan ba nasaun Izraél atu hasaʼe sakrifísiu oioin hodi bele hamoos sira-nia sala. (Lee Levítico 4:27-29; 17:11.) Sakrifísiu sira-neʼe hatudu katak Jeová sei prepara sakrifísiu ida neʼebé diʼak liu atu bele salva ema husi sala iha dalan neʼebé kompletu. Maromak haruka ninia profeta sira atu hakerek kona-ba bei-oan neʼebé promete nanis ona, neʼe mak Maromak nia Oan-Mane mesak neʼebé sei hasoru terus no hetan kastigu-mate. Nia sei sai hanesan bibi-malae neʼebé ema hasaʼe nuʼudar sakrifísiu. (Isa 53:1-12) Imajina toʼok, Jeová halo arranju atu fó ninia Oan-Mane neʼebé nia hadomi nuʼudar sakrifísiu atu salva ema inklui Ita, husi sala no mate!
SAIDA MAK JESUS HALO ATU SALVA EMA?
9. Saida mak João Batista hatete kona-ba Jesus? (Ebreu 9:22; 10:1-4, 12)
9 Iha tinan 29 EC, João Batista haree Jesus husi Nazaré, no hatete: “Haree, nia mak Maromak nia Bibi-Oan neʼebé hamoos mundu nia sala!” (João 1:29) Liafuan neʼe hatudu katak Jesus mak “bei-oan” neʼebé promete nanis ona. Jesus sei fó ninia moris nuʼudar sakrifísiu. Ikusmai, bei-oan neʼebé Jeová promete nanis mosu mai ona hodi bele salva ema husi sala iha dalan neʼebé kompletu.—Lee Ebreu 9:22; 10:1-4, 12.
10. Oinsá mak Jesus hatudu katak nia ‘mai atu bolu’ ema sala-naʼin sira?
10 Jesus fokus atu ajuda ema neʼebé laran-kraik tanba sira-nia sala, no konvida sira atu laʼo tuir nia. Nia hatene katak sala mak hun ba ema nia problema hotu. Tan neʼe nia hakarak ajuda mane no feto neʼebé hasoru susar tanba halo sala. Hodi uza ilustrasaun, nia esplika: “Ema neʼebé isin-diʼak la presiza doutór, maibé ema moras presiza.” Nia hatutan tan: “Haʼu mai laʼós atu bolu ema diʼak, maibé atu bolu ema sala-naʼin.” (Mt 9:12, 13) No neʼe mak buat neʼebé Jesus halo. Bainhira feto ida fase Jesus nia ain ho matan-been, nia koʼalia ba feto neʼe ho laran-diʼak no perdua ninia sala. (Lc 7:37-50) Jesus mós hanorin lia-loos importante ba feto Samaria ida iha bee-posu, maski nia hatene katak feto neʼe moris hamutuk ho mane neʼebé laʼós ninia kaben. (João 4:7, 17-19, 25, 26) Rezultadu husi sala mak mate. Maibé Maromak fó kbiit ba Jesus atu fó moris-hiʼas ba ema neʼebé mate ona.—Mt 11:5.
11. Tanbasá ema neʼebé halo sala sente kmaan kuandu besik ba Jesus?
11 Ita bele komprende tanbasá ema neʼebé halo sala sente kmaan kuandu besik ba Jesus. Nia hatudu laran-diʼak no komprende sira-nia sentimentu, tan neʼe sira la taʼuk atu hakbesik ba nia. (Lc 15:1, 2) Jesus mós gaba sira neʼebé hatudu fiar no fó bensaun ba sira. (Lc 19:1-10) Jesus hatudu laran-sadiʼa hanesan ninia Aman. (João 14:9) Liuhusi liafuan no hahalok, Jesus hatudu katak ninia Aman mak laran-sadiʼa, hadomi ema, no hakarak ajuda ema ida-idak atu manán hasoru sala. Jesus ajuda ema sala-naʼin neʼebé hakarak troka sira-nia hahalok no laʼo tuir nia.—Lc 5:27, 28.
12. Jesus hatete saida kona-ba ninia mate?
12 Jesus hatene katak nia sei fó ninia moris nuʼudar sakrifísiu. Dala barak nia hatete ba ninia dixípulu sira katak ema sei entrega nia ba inimigu sira-nia liman no nia sei mate iha ai-riin. (Mt 17:22; 20:18, 19) Nia hatene katak ninia sakrifísiu sei hamoos mundu nia sala, hanesan buat neʼebé João Batista temi no profeta sira fó sai nanis ona. Jesus mós hatete katak depois fó tiha ninia moris, nia sei “dada ema oioin” ba nia. (João 12:32) Ema sala-naʼin bele halo Jeová kontente hodi simu Jesus nuʼudar sira-nia Naʼi no laʼo tuir ninia ain-fatin. Se sira halo nuneʼe, ikusmai sira bele ‘livre husi sala’. (Rom 6:14, 18, 22; João 8:32) Jesus brani no prontu hetan terus no mate atu salva ita.—João 10:17, 18.
13. Oinsá mak Jesus mate, no neʼe hanorin saida mai ita kona-ba Jeová? (Haree mós dezeñu.)
13 Jesus nia belun ida faʼan nia. Tuirmai ninia inimigu sira kaer nia, insulta nia, duun matak nia, tesi-lia ba nia, no fó-terus ba nia. Ikusmai soldadu sira prega nia ba ai-riin. Nuʼudar Jesus tahan moras hotu neʼebé nia sente, ninia Aman sente moras liu fali buat neʼebé Jesus sente. Jeová hadomi tebes ninia Oan, no nia mós iha forsa no kbiit atu hapara susar neʼebé ninia Oan hasoru. Maibé tanbasá nia la halo ida-neʼe? Neʼe tanba domin ba ema. Jesus hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.”—João 3:16.
Jeová sente moras tebes bainhira husik ninia Oan mate atu salva ita husi sala no mate (Haree parágrafu 13)
14. Jesus nia sakrifísiu hanorin saida mai ita?
14 Jesus nia sakrifísiu prova duni katak Jeová hadomi tebes Adão no Eva nia jerasaun. Neʼe katak Jeová hadomi tebetebes Ita. Jeová fó ninia Oan neʼebé nia hadomi nuʼudar sakrifísiu no tahan ninia laran-kanek atu salva Ita husi sala no mate. (1 João 4:9, 10) Sin, nia hakarak ajuda ita ida-idak atu luta hasoru sala, no manán!
15. Saida mak ita tenke halo atu hetan benefísiu husi Jesus nia sakrifísiu?
15 Jeová fó ninia Oan-Mane mesak nuʼudar prezente atu ita bele hetan perdua ba ita-nia sala. Maibé atu hetan perdua, ita presiza halo buat ruma. Neʼe mak saida? João Batista no Jesus Kristu hatete: “Arrepende imi-nia sala bá, tanba Ukun lalehan nian besik ona.” (Mt 3:1, 2; 4:17) Tan neʼe, se ita hakarak hakbesik ba Jeová no hetan perdua, ita tenke arrepende ita-nia sala. Maibé, arrepende sala envolve saida deʼit, no oinsá neʼe ajuda ita atu luta hasoru sala? Iha lisaun tuirmai ita sei aprende kona-ba neʼe.
KNANANUK 18 Agradese ba Jesus nia sakrifísiu
a ESPLIKASAUN BA FRAZE: Iha Bíblia, liafuan “sala” bele refere ba hahalok neʼebé la loos, no bainhira ita halo hahalok neʼebé la tuir Jeová nia matadalan. Maibé liafuan “sala” mós bele refere ba ita-nia kondisaun la perfeitu nuʼudar Adão nia bei-oan. Ita hotu mate tanba sala husi Adão.
