1-2. (a) Saida mak Maromak hatete ba apóstolu naʼin-tolu? Saida mak sira halo? (b) Iha lisaun neʼe, ita sei aprende saida?

 DEPOIS Páskua tinan 32 EC, apóstolu Pedro, Tiago no João haree vizaun furak ida. Iha foho aas ida nia leten, karik neʼe mak parte ida husi Foho Hermon, Jesus nakfila an iha sira-nia oin. Jesus nia “oin sai naroman hanesan loro-matan, no ninia roupa sai nabilan loos”. (Mt 17:1-4) Ikusmai iha vizaun neʼe, apóstolu sira-neʼe mós rona Maromak hatete: “Neʼe mak haʼu-nia Oan-Mane neʼebé haʼu hadomi, neʼebé halo haʼu-nia laran kontente. Rona nia bá.” (Mt 17:5) Apóstolu naʼin-tolu neʼe hatudu katak sira rona ba Jesus liuhusi dalan neʼebé sira halaʼo sira-nia moris. Ita hakarak banati-tuir sira.

² Iha lisaun antes neʼe, ita aprende ona katak atu rona ba Jesus ita presiza para atu halo buat balu. Iha lisaun neʼe, ita sei aprende buat rua neʼebé Jesus hatete katak ita presiza halo.

3. Tuir Mateus 7:13, 14, ita presiza halo saida?

³ Lee Mateus 7:13, 14. Jesus temi odamatan rua neʼebé lori ita ba dalan rua, dalan neʼebé luan no dalan neʼebé kiʼik. La iha dalan terseiru. Ita rasik presiza hili atu laʼo iha dalan ida-neʼebé. Neʼe mak desizaun importante neʼebé ita presiza halo tanba ita-nia moris depende ba ida-neʼe.

4. Esplika toʼok kona-ba dalan neʼebé luan.

 ⁴ Ita presiza hanoin-hetan diferensa entre dalan rua neʼe. Ema barak laʼo iha dalan neʼebé luan tanba fasil. Triste mak ema barak deside atu kontinua laʼo iha dalan neʼe no laʼo tuir deʼit ema seluk. Sira la komprende katak Diabu mak dada ema atu laʼo iha dalan neʼe, maibé dalan neʼe lori ita ba mate.​—1 Kor 6:9, 10; 1 João 5:19.

5. Ema balu halo saida atu bele hetan dalan kiʼik no laʼo iha dalan neʼe?

⁵ Jesus hatete katak ema uitoan deʼit mak sei hetan dalan neʼebé kiʼik no laʼo iha neʼebá. Tanbasá? Iha versíkulu tuirmai Jesus fó avizu kona-ba profeta falsu. (Mt 7:15) Ema balu dehan katak iha relijiaun rihun ba rihun neʼebé hatete katak sira hanorin lia-loos. Ema millaun ba millaun sai laran-kraik ka bilán ho ida-neʼe, tan neʼe sira lakohi buka dalan neʼebé lori ba moris. Maibé ita bele hetan dalan neʼe. Jesus hatete: “Se imi sempre halo tuir haʼu-nia liafuan, imi mak haʼu-nia dixípulu duni, no imi sei hatene lia-loos, no lia-loos sei halo imi livre.” (João 8:31, 32) Ita merese hetan gaba tanba la laʼo tuir deʼit ema seluk, maibé buka lia-loos. Ita estuda Bíblia atu buka-hatene saida mak Maromak hakarak ita atu halo, no Ita rona ba Jesus nia hanorin. Ita mós aprende katak Jeová haruka ita atu hasees an husi relijiaun falsu, no para atu selebra loron-boot sira neʼebé mai husi relijiaun falsu. Ita aprende katak la fasil atu halo mudansa hodi bele halo Jeová kontente. (Mt 10:34-36) Maski nuneʼe, Ita kontinua hakaʼas an tanba Ita hadomi Aman Jeová no hakarak nia simu Ita. Klaru katak nia kontente tebes ho Ita.​—Prov 27:11.

6. Tuir Salmo 119:9, 10, 45, 133, saida mak bele ajuda ita atu kontinua laʼo iha dalan kiʼik?

⁶ Bainhira ita komesa ona laʼo iha dalan neʼebé kiʼik, oinsá ita bele kontinua laʼo iha dalan neʼe? Hanoin toʼok ai-knanoik neʼe. Iha rai balu, ema monta besi iha dalan ninin atu proteje karreta no mós xofér. Besi sira-neʼe proteje atu xofér la lori karreta besik liu dalan ninin no monu ba rai naruk. Xofér sira la muramura katak besi sira-neʼe hanetik sira-nia liberdade. Jeová nia matadalan sira iha Bíblia mak hanesan besi sira-neʼe. Ninia matadalan sira proteje ita atu kontinua laʼo iha dalan kiʼik neʼe.​—Lee Salmo 119:9, 10, 45, 133.

7. Joven sira presiza hanoin oinsá kona-ba dalan neʼebé kiʼik?

⁷ Joven sira, dala ruma karik imi sente katak Jeová nia matadalan halo imi la livre. Satanás hakarak imi hanoin hanesan neʼe. Ema neʼebé laʼo iha dalan luan haree hanesan goza moris, no Satanás hakarak imi tau fokus ba ida-neʼe. Satanás hakarak imi hanoin katak imi la goza moris hanesan imi-nia kolega eskola sira ka ema sira neʼebé imi haree iha internét. Satanás hakarak imi hanoin katak Jeová nia matadalan hanetik imi atu moris kontente. * Maibé hanoin-hetan ida-neʼe: Satanás lakohi ema sira neʼebé laʼo iha dalan luan atu hatene kona-ba konsekuénsia aat neʼebé hein hela sira iha dalan nia rohan. Maibé Jeová hakarak imi atu hatene kona-ba moris diʼak neʼebé imi sei hetan se imi kontinua laʼo iha  dalan neʼebé lori ba moris.​—Sal 37:29; Isa 35:5, 6; 65:21-23.

8. Joven sira bele aprende saida husi irmaun Olaf?

⁸ Hanoin kona-ba esperiénsia husi irmaun joven ida naran Olaf. * Ninia kolega eskola sira tenta nia atu halo relasaun seksuál. Bainhira nia esplika katak Testemuña sira moris tuir Bíblia nia hanorin kona-ba morál, feto balu tenta liután nia atu halo relasaun seksuál ho sira. Maibé Olaf kaer metin ba buat neʼebé loos. Olaf mós hasoru susar seluk tan. Nia hatete: “Haʼu-nia mestre sira anima haʼu atu tama universidade tanba neʼe sei halo ema respeitu haʼu. Sira dehan katak se haʼu la bá universidade, haʼu sei la hetan susesu.” Saida mak ajuda Olaf tahan buat sira-neʼe? Nia hatete: “Haʼu hakbesik liután ba irmaun-irmán sira. Sira sai hanesan haʼu-nia família. Haʼu mós hakaʼas an liután atu estuda Bíblia. Bainhira haʼu estuda kleʼan liután Bíblia, haʼu fiar metin liután katak haʼu  hetan ona lia-loos. Rezultadu mak haʼu deside metin atu hetan batizmu.”

9. Sira neʼebé hakarak laʼo nafatin iha dalan kiʼik presiza halo saida?

⁹ Satanás hakarak hapara ita atu laʼo iha dalan neʼebé lori ba moris. Nia hakarak ita atu laʼo hamutuk ho ema seluk neʼebé laʼo iha dalan luan neʼebé lori ba mate. (Mt 7:13) Maibé se ita kontinua rona ba Jesus no mós haree dalan kiʼik neʼe nuʼudar protesaun ba ita, neʼe ajuda ita atu nafatin laʼo iha dalan neʼe. Agora mai ita koʼalia kona-ba buat seluk neʼebé Jesus hatete katak ita presiza halo.

10. Tuir Mateus 5:23, 24, Jesus haruka ita atu halo saida?

¹⁰ Lee Mateus 5:23, 24. Iha eskritura neʼe, Jesus koʼalia kona-ba ema Judeu nia toman importante ida. Imajina kona-ba ema ida neʼebé prontu ona atu entrega ninia sakrifísiu ba amlulik iha templu. No nia hanoin-hetan katak ninia maluk ida hirus hela nia, nia presiza husik hela animál neʼe no bá hasoru ninia maluk. Tanbasá? Saida mak importante liu fali hasaʼe sakrifísiu ba Jeová? Jesus esplika: “Halo dame uluk ho ó-nia maun-alin.”

11. Esplika toʼok kona-ba Jacob nia hakaʼas an atu hadame malu ho Esaú.

¹¹ Ita bele aprende kona-ba hadame malu hodi estuda kona-ba buat neʼebé akontese iha Jacob nia moris. Tinan 20 depois Jacob husik ninia hela-fatin, liuhusi anju ida, Maromak haruka Jacob fila fali ba ninia rai. (Gén 31:11, 13, 38) Maibé iha problema. Uluk ninia maun Esaú hakarak oho nia. (Gén 27:41) Jacob “taʼuk tebetebes no laran-taridu” se ninia maun rai hirus hela ba nia. (Gén 32:7) Saida mak Jacob halo atu hadame malu fali ho ninia maun? Primeiru, nia halo orasaun ho laran ba Jeová kona-ba neʼe. Tuirmai nia haruka prezente barak ba Esaú. (Gén 32:9-15) Ikusmai, bainhira Jacob hasoru Esaú, nia hatudu respeitu ba Esaú. Nia hakneʼak dala hitu, laʼós dala ida ka rua deʼit. Jacob hatudu haraik an no respeitu, tan neʼe nia hadame malu fali ho ninia maun.​—Gén 33:3, 4.

12. Ita bele aprende saida husi Jacob?

¹² Ita aprende lisaun kapás husi dalan neʼebé Jacob prepara an atu hasoru ninia maun Esaú no mós oinsá nia hakbesik ba Esaú. Jacob hatudu haraik an no husu Jeová nia ajuda. Tuirmai nia halo tuir ninia orasaun hodi hakaʼas an atu hadame malu ho ninia maun. Bainhira sira hasoru malu, Jacob la haksesuk malu ho Esaú kona-ba sé mak loos ka sala. Jacob nia planu mak atu halo dame ho ninia maun. Oinsá ita bele banati-tuir Jacob?

13-14. Saida mak ita presiza halo se ita hakanek maluk fiar-naʼin nia laran?

¹³ Se ita hakarak laʼo iha dalan neʼebé lori ba moris, ita presiza iha dame ho irmaun-irmán sira. (Rom 12:18) Ita presiza halo saida bainhira ita nota katak ita hakanek ita-nia maluk nia laran? Hanesan Jacob, ita tenke husu Jeová nia ajuda ho laran. Ita bele husu nia atu haraik bensaun ba ita-nia hakaʼas an atu hadame malu ho ita-nia irmaun-irmán sira.

¹⁴ Ita mós presiza analiza ita-nia an. Ita bele husu ita-nia an: ‘Haʼu prontu atu hatudu haraik an hodi husu deskulpa no  hadame malu ka lae? Jeová no Jesus sente oinsá se haʼu hakaʼas an atu buka dame ho irmaun-irmán sira?’ Resposta ba pergunta sira-neʼe bele motiva ita atu rona ba Jesus no hatudu haraik an hodi hakbesik ba ita-nia maluk fiar-naʼin hodi bele hadame malu. Ita bele halo tuir Jacob nia ezemplu.

15. Oinsá aplika prinsípiu iha Éfeso 4:2, 3 ajuda ita hadame malu ho maluk fiar-naʼin?

¹⁵ Imajina toʼok se Jacob hatudu hahalok foti an hodi haksesuk malu ho ninia maun, neʼe sei la lori rezultadu diʼak. Bainhira ita hakbesik irmaun ka irmán ruma atu hadame malu, ita presiza hatudu haraik an. (Lee Éfeso 4:2, 3.) Bíblia hatete: “Fasil liu atu manán sidade ida neʼebé iha moru aas duké manán belun neʼebé sai laran-kanek ona, no haksesuk malu bele haketak ema hanesan portaun neʼebé xave metin ho besi-lolon iha sidade neʼebé seguru.” (Prov 18:19) Bainhira ita husu deskulpa, neʼe sei book maluk fiar-naʼin atu hadame malu ho ita.

16. Ita presiza hanoin didiʼak kona-ba saida, no tanbasá?

¹⁶ Ita mós presiza hanoin didiʼak kona-ba ita-nia liafuan no mós dalan atu koʼalia ba ita-nia maluk. Bainhira ita prontu ona, ita tenke hakbesik ba ita-nia maluk fiar-naʼin neʼebé laran-kanek no ajuda nia atu iha fali relasaun diʼak ho ita. Foufoun, karik nia sei koʼalia liafuan neʼebé hakanek ita-nia laran. Fasil deʼit atu sai hirus ka koko atu defende an, maibé neʼe bele lori dame ka lae? Klaru katak lae. Hanoin-hetan katak importante liu atu haburas dame ho irmaun-irmán sira duké buka-hatene sé mak loos ka sala.​—1 Kor 6:7.

17. Ita bele aprende saida husi irmaun Gilbert?

¹⁷ Irmaun Gilbert hakaʼas an atu buka dame. Nia hatete: “Haʼu iha problema barak ho haʼu-nia oan-feto. Durante tinan rua, haʼu hakaʼas an atu koʼalia ba nia ho kalma, hodi nuneʼe ami bele iha relasaun diʼak.” Irmaun Gilbert halo saida tan? Nia hatete: “Antes haʼu koʼalia ho haʼu-nia oan-feto, haʼu halo orasaun no prepara an atu la sai hirus se nia koʼalia liafuan kroʼat. Haʼu tenke prontu atu fó perdua. Haʼu aprende katak haʼu la presiza prova katak haʼu mak loos, no haʼu komprende katak haʼu-nia responsabilidade  mak atu buka dame.” Rezultadu mak saida? Irmaun Gilbert hatete: “Agora haʼu sente dame iha laran tanba haʼu iha relasaun diʼak ho haʼu-nia oan-feto.”

18-19. Se ita hakanek maluk fiar-naʼin nia laran, ita presiza halo saida, no tanbasá?

¹⁸ Entaun, saida mak Ita presiza halo bainhira Ita hatene katak Ita hakanek maluk fiar-naʼin ida nia laran? Halo tuir Jesus nia konsellu atu buka dame. Fó sai ba Jeová kona-ba neʼe, no sadere ba ninia espíritu santu atu ajuda Ita buka dame. Se Ita halo nuneʼe, Ita sei sente kontente, no Ita hatudu ho klaru katak Ita rona ba Jesus.​—Mt 5:9.

¹⁹ Ita agradese tebes tanba Jeová fó ita matadalan kapás liuhusi Jesus Kristu, nuʼudar “ulun ba kongregasaun”. (Éf 5:23) Hanesan apóstolu Pedro, Tiago no João, mai ita hakaʼas an atu rona ba Jesus. (Mt 17:5) Ita aprende ona oinsá atu rona ba Jesus liuhusi buka dame ho maluk Kristaun neʼebé sai laran-kanek no mós kontinua laʼo iha dalan neʼebé lori ba moris. Se ita halo buat sira-neʼe, ita sei simu bensaun barak agora no mós moris kontente iha futuru.