1. Saida mak razaun ida Jesus kompara ninia dixípulu ho bibi-malae?

 JESUS kompara ninia relasaun diʼak ho ninia dixípulu sira ho relasaun besik entre bibi-atan ho bibi-malae sira. (João 10:14) Komparasaun neʼe diʼak duni. Bibi-malae hatene sira-nia bibi-atan no halo tuir bainhira rona bibi-atan nia lian. Turista ida haree ona ida-neʼe akontese. Nia hatete: “Ami hakarak hasai bibi-malae balu nia foto, tan neʼe ami koko atu bolu bibi sira besik mai. Maibé bibi sira la hakbesik ami tanba la koñese ami-nia lian. Tuirmai bibi-atan ida mai, bolu bibi sira-neʼe, no bibi sira laʼo tuir kedas nia.”

2-3. (a) Oinsá Jesus nia dixípulu sira hatudu katak sira rona ba ninia lian? (b) Iha lisaun neʼe no lisaun tuirmai, ita sei aprende saida?

² Esperiénsia neʼe fó-hanoin ita Jesus nia liafuan kona-ba ninia bibi-malae sira, katak ninia dixípulu sira. Nia hatete: “Sira sei rona haʼu-nia lian.” (João 10:16) Maibé Jesus hela iha lalehan. Oinsá mak ita bele rona ba nia? Dalan importante ida atu hatudu katak ita rona ba Jesus nia lian mak hodi aplika ninia hanorin iha ita-nia moris.​—Mt 7:24, 25.

³ Iha lisaun neʼe no iha lisaun tuirmai, ita sei aprende Jesus nia hanorin balu. Jesus hanorin ita kona-ba buat sira neʼebé ita tenke para atu halo no mós buat sira neʼebé ita tenke halo. Ulukliu ita sei koʼalia buat espesífiku rua neʼebé bibi-atan diʼak haruka ita atu la halo tan.

4. Tuir Lucas 12:29, saida mak bele halo ita “hanoin resin”?

⁴ Lee Lucas 12:29 no nota-rodapé. Jesus anima ninia dixípulu sira atu “para ona hanoin resin” kona-ba sira-nia presiza loroloron. Ita hatene katak Jesus nia konsellu sira mak sempre loos no diʼak. Ita hakarak aplika ida-neʼe, maibé dala ruma susar. Tanbasá?

5. Tanbasá ema balu hanoin resin kona-ba sira-nia presiza?

 ⁵ Ema balu karik hanoin resin kona-ba sira-nia presiza hanesan ai-han, roupa, no hela-fatin. Karik sira hela iha nasaun kiak no susar atu hetan serbisu. Tan neʼe, susar atu manán osan neʼebé natoon atu sustenta sira-nia família. Ka ema neʼebé manán osan ba família mak mate ona, no la iha ema neʼebé bele apoia família. Ka tanba pandemia COVID-19, karik ema balu tan lakon serbisu no la iha osan atu sustenta família. (Ecle 9:11) Se ita hasoru susar sira-neʼe ka susar seluk, oinsá mak ita bele halo tuir Jesus nia matadalan kona-ba para atu hanoin resin?

6. Esplika toʼok saida mak akontese ba apóstolu Pedro.

⁶ Loron ida, apóstolu Pedro no apóstolu sira seluk saʼe hela ró bainhira anin boot mosu iha Tasi Galileia no sira haree Jesus laʼo iha bee leten. Pedro hatete: “Naʼi, se neʼe mak Ita, haruka haʼu laʼo iha bee leten hodi toʼo Ita.” Jesus bolu Pedro hodi dehan: “Mai!” no Pedro sai husi ró no “laʼo iha bee leten hodi toʼo Jesus”. Maibé saida mak akontese tuirmai? “Kuandu Pedro haree anin boot, nia sai taʼuk no hahú atu mout, no nia hakilar: ‘Naʼi, salva haʼu!’” Jesus lolo liman  no salva Pedro. Importante atu hanoin-hetan katak se Pedro kontinua hateke ba Jesus, nia bele laʼo iha bee leten. Maibé bainhira Pedro hateke ba anin boot, nia sai taʼuk no duvida, tuirmai nia komesa mout.​—Mt 14:24-31.

7. Ita bele aprende saida husi Pedro nia ezemplu?

⁷ Ita bele aprende husi Pedro nia ezemplu. Bainhira Pedro sai husi ró no laʼo iha tasi leten, nia la hanoin katak nia sei sai taʼuk ba anin boot no mout. Nia hakarak atu kontinua laʼo iha tasi leten hodi toʼo ba Jesus. Maibé duké tau fokus ba ninia Naʼi, Pedro hanoin resin kona-ba anin boot neʼe. Ohin loron, ita presiza iha fiar atu tahan problema sira, hanesan Pedro mós presiza iha fiar atu laʼo iha tasi leten. Se ita la kontinua tau fokus ba Jeová no ninia promesa, ita-nia fiar bele sai fraku no ita komesa mout iha ita-nia laran-taridu. Entaun, bainhira ita hasoru problema boot ka kiʼik, ita tenke kontinua tau fokus ba Jeová no ninia kbiit atu ajuda ita. Oinsá?

8. Saida mak bele ajuda ita atu la hanoin resin kona-ba ita-nia presiza?

⁸ Duké hanoin resin kona-ba ita-nia problema, ita presiza tau fiar ba Jeová. Jeová promete katak nia sei tau matan ba ita-nia presiza se ita tau uluk ita-nia adorasaun ba nia. (Mt 6:32, 33) Nia sempre kumpre ninia promesa sira. (Deut 8:4, 15, 16; Sal 37:25) Jeová bele tau matan ba manu sira no mós ai-funan sira, entaun ita la presiza hanoin barak kona-ba saida mak ita sei han ka saida mak ita sei hatais. (Mt 6:26-30; Flp 4:6, 7) Domin book inan-aman atu tau matan ba sira-nia oan nia presiza, nuneʼe mós domin book ita-nia Aman iha lalehan atu tau matan ba ninia povu nia presiza. Sin, ita bele fiar metin katak Jeová sei tau matan ba ita.

9. Ita aprende saida husi feen-laʼen ida?

⁹ Hanoin toʼok esperiénsia ida neʼebé hatudu oinsá Jeová tau matan ba ita-nia presiza. Feen-laʼen pioneiru lori sira-nia karreta neʼebé tuan ona durante oras ida liu atu tula irmán balu iha kampu refujiadu hodi tuir reuniaun. Irmaun neʼe esplika: “Depois reuniaun, ami konvida irmán sira-neʼe atu han hamutuk, maibé tuirmai ami rekoñese katak ami la iha ai-han.” Feen-laʼen neʼe halo saida? Irmaun neʼe hatutan tan: “Bainhira ami toʼo iha uma, ami haree hahán plástiku rua iha ami-nia odamatan oin. Ami la hatene sé mak tau iha neʼebá. Jeová tau matan ba ami.” Iha tempu seluk, sira-nia karreta sai aat. Sira presiza karreta atu uza ba haklaken, maibé sira la iha osan atu hadiʼa. Sira lori sira-nia karreta ba bengkel atu buka-hatene presu atu hadiʼa karreta neʼe. Tuirmai, mane ida mai no husu: “Sé nia karreta mak neʼe?” Irmaun neʼe hatete katak neʼe ninia karreta no presiza atu hadiʼa. Mane neʼe hatete: “La problema. Haʼu-nia feen hakarak karreta ho modelu no kór hanesan neʼe. Ó hakarak faʼan ka lae?” Irmaun neʼe faʼan ninia karreta ba mane neʼe no nia uza osan neʼe atu sosa fali karreta seluk. Irmaun neʼe hatete: “Ami kontente tebes. Ami hatene katak ida-neʼe akontese tanba Jeová nia ajuda.”

10. Tuir Salmo 37:5, ita bele halo saida atu la hanoin resin kona-ba ita-nia presiza?

¹⁰ Bainhira ita rona ba bibi-atan diʼak no para hanoin resin kona-ba ita-nia presiza, ita bele fiar katak Jeová sei fó buat neʼebé ita presiza. (Lee Salmo 37:5; 1 Ped 5:7) Hanoin fali kona-ba situasaun neʼebé temi iha  parágrafu 5. Karik toʼo  agora, Jeová uza ulun ba família ka patraun atu ajuda ita tau matan ba ita-nia presiza loroloron. Maibé se ulun ba família labele tan halo ida-neʼe ka nia lakon ninia serbisu, Jeová bele tau matan ba ita iha dalan seluk. No ita bele fiar duni ida-neʼe. Mai ita hanoin kona-ba buat seluk neʼebé bibi-atan diʼak husu ita atu para hodi la halo tan.

11. Tuir Mateus 7:1, 2, Jesus haruka ita para atu halo saida? Tanbasá neʼe susar?

¹¹ Lee Mateus 7:1, 2 no nota-rodapé. Jesus hatene katak dala barak ninia rona-naʼin neʼebé la perfeitu iha toman atu tau fokus ba ema seluk nia fraku. Jesus dehan: “Para ona tesi-lia.” Karik ita koko makaʼas atu la tesi-lia ba maluk fiar-naʼin sira, maibé dala ruma ita falla. Se dala ruma, ita kritika ema seluk, ita presiza halo saida? Rona ba Jesus, no hakaʼas an atu para tesi-lia ba ema.

12-13. Oinsá mak medita kona-ba Jeová nia dalan atu trata David ajuda ita atu la tesi-lia ba ema?

¹² Ita bele hetan benefísiu se ita medita kona-ba Jeová nia ezemplu. Jeová tau fokus ba ema nia diʼak. Ita bele haree ida-neʼe husi dalan neʼebé Jeová trata Liurai David neʼebé halo sala boot. Porezemplu, David halo sala seksuál ho Bat-Seba, no mós haruka ema oho Bat-Seba nia laʼen. (2 Sam 11:2-4, 14, 15, 24) Rezultadu mak David lori susar ba ninia an no mós ninia família, inklui ninia feen sira seluk. (2 Sam 12:10, 11) Iha situasaun seluk, David la sadere ba Jeová no haruka ema atu rejistu tropa Izraél sira, maski Jeová la haruka nia atu halo nuneʼe. Karik nia halo nuneʼe tanba foti an no tau fiar ba ninia tropa neʼebé boot. Rezultadu mak ema Izraél naʼin-70.000 mate tanba moras-peste.​—2 Sam 24:1-4, 10-15.

¹³ Se Ita moris iha tempu neʼebá, Ita sei hanoin oinsá kona-ba David? Ita sei hanoin katak nia la merese atu simu Jeová nia laran-sadiʼa ka lae? Jeová la hanoin hanesan neʼe. Nia tau fokus ba David nia laran-metin no arrepende an ho laran. Rezultadu mak Jeová perdua David nia sala sériu sira-neʼe. Jeová hatene katak David hadomi tebes nia no hakarak halo buat neʼebé loos. Ita kontente tebes tanba Maromak sempre haree buat diʼak husi ita, loos ka lae?​—1 Reis 9:4; 1 Krón 29:10, 17.

14. Saida mak ajuda ema Kristaun atu la tesi-lia ba ema?

¹⁴ Jeová la ezije ita atu sai perfeitu, entaun ita mós labele ezije ema seluk atu sai perfeitu, maibé ita hakarak tau fokus deʼit ba ema nia hahalok diʼak. Dala barak fasil deʼit atu nota ema nia fraku no kritika sira. Maibé, se ita banati-tuir Jeová, ita sei kontinua iha relasaun diʼak ho ema seluk maski dala ruma ita hatene sira-nia fraku. Porezemplu, diamante neʼebé seidauk halo kabeer karik haree la furak, maibé ema neʼebé matenek hatene katak diamante neʼe sei haree furak no folin-boot bainhira halo kabeer tiha. Hanesan Jeová no Jesus, ita labele haree deʼit ba ema nia fraku, maibé ita presiza haree ema nia hahalok diʼak.

15. Oinsá mak hanoin kona-ba ema nia situasaun ajuda ita atu la tesi-lia ba ema?

¹⁵ Saida tan mak bele ajuda ita atu la tesi-lia ba ema? Koko imajina ema neʼe nia situasaun. Hanoin toʼok Jesus nia ezemplu. Loron ida iha templu, Jesus haree feto-faluk kiak ida tau osan kiʼik rua ba osan-fatin. Jesus la dehan: “Tanbasá mak  nia la hatama osan barak tan?” Duké tau fokus ba osan neʼebé feto neʼe fó, Jesus hanoin kona-ba feto neʼe nia motivu no situasaun, no Jesus gaba nia tanba nia fó buat hotu tuir ninia kbiit.​—Lc 21:1-4.

16. Ita bele aprende saida husi irmán Veronica?

¹⁶ Irmán Veronica nia esperiénsia hatudu tanbasá importante atu hanoin kona-ba ema seluk nia situasaun. Iha ninia kongregasaun, iha irmán ida neʼebé haboot ninia oan-mane mesak. Irmán Veronica hatete: “Haʼu hanoin sira naʼin-rua la tuir reuniaun no la bá haklaken beibeik. Tan neʼe, haʼu hanoin negativu kona-ba sira. Maibé loron ida haʼu haklaken ho irmán neʼe. Nia esplika situasaun susar neʼebé nia hasoru tanba presiza tau matan ba ninia oan neʼebé defisiente mentál. Nia hakaʼas an atu tau matan ba ninia oan nia presiza fíziku no espirituál. Dala ruma tanba ninia oan nia saúde, nia presiza tuir fali reuniaun iha kongregasaun seluk.” Irmán Veronica hatete: “Haʼu nunka imajina katak nia hasoru susar hanesan neʼe. Agora haʼu hafolin no respeitu nia tanba buat neʼebé nia halo atu serbí Jeová.”

17. Tiago 2:8 haruka ita halo saida? Oinsá ita bele halo nuneʼe?

¹⁷ Saida mak ita presiza halo se ita nota katak ita tesi-lia ba maluk fiar-naʼin ida? Ita tenke hanoin-hetan katak ita presiza  hadomi irmaun-irmán sira. (Lee Tiago 2:8.) No mós ita presiza halo orasaun ho laran ba Jeová atu husu ninia ajuda hodi ita para tesi-lia ba ema. Se ita tesi-lia ba ema ida, halo tuir buat neʼebé ita husu iha orasaun liuhusi buka oportunidade atu koʼalia ho ema neʼe. Karik neʼe sei ajuda ita atu koñese nia diʼak liután. Karik ita bele husu nia atu haklaken hamutuk ho ita ka konvida nia atu ransu hamutuk. Bainhira ita koñese irmaun-irmán sira, hakaʼas an atu banati-tuir Jeová no Jesus hodi tau fokus deʼit ba sira-nia diʼak. Hodi halo nuneʼe, ita hatudu katak ita rona ba bibi-atan diʼak hodi para atu tesi-lia ba ema.

18. Oinsá ita bele hatudu katak ita rona ba bibi-atan diʼak nia lian?

¹⁸ Bibi-malae sira rona ba bibi-atan nia lian, Jesus nia dixípulu sira mós rona ba ninia lian. Se ita hakaʼas an atu para hodi la hanoin resin kona-ba ita-nia presiza no para atu tesi-lia ba ema, Jeová no Jesus sei haraik bensaun ba ita-nia hakaʼas an. Maski ita mak parte ba “bibi-lubun kiʼik” ka “bibi-malae seluk”, mai ita kontinua rona no halo tuir bibi-atan diʼak nia lian. (Lc 12:32; João 10:11, 14, 16) Iha lisaun tuirmai, ita sei aprende buat rua neʼebé Jesus hatete katak ninia dixípulu sira presiza halo.