1. Jeová hatán ninia atan sira-nia orasaun iha dalan oinsá?

 ITA hatene ka lae katak Jeová bele uza Ita atu hatán ema nia orasaun? Jeová bele uza Ita maski Ita mak katuas kongregasaun, atan ba kongregasaun, pioneiru ka haklaken-naʼin. Jeová mós bele uza Ita maski Ita mak joven, ka ferik-katuas. Bainhira ema neʼebé hadomi Jeová husu ajuda ba nia, nia uza katuas sira no ninia atan sira atu sai “ajuda-naʼin neʼebé fó kmaan boot” ba ema neʼe. (Kol 4:11) Ita kontente atu bele serbí Jeová no irmaun-irmán sira iha dalan neʼe. Karik ita bele ajuda no fó kmaan ba ita-nia maluk sira kuandu mosu moras-peste, akontese dezastre ka bainhira ema fó-terus sira.

2. Tanbasá dala ruma susar atu ajuda ema durante mosu moras-peste?

² Moras-peste halo susar mai ita atu ajuda malu. Porezemplu, karik ita hakarak vizita ita-nia kolega, maibé la seguru atu halo nuneʼe. Karik ita hakarak konvida maluk sira neʼebé hasoru problema ekonomia atu han hamutuk, maibé situasaun la permite. Karik ita hakarak ajuda ema seluk, maibé susar tanba ita-nia família mós hasoru susar. Maski nuneʼe, ita nafatin hakarak atu ajuda irmaun-irmán sira no Jeová kontente bainhira ita halo buat neʼebé ita bele atu ajuda sira. (Prov 3:27; 19:17) Saida mak ita bele halo?

3. Ita aprende saida husi katuas sira iha Desi nia kongregasaun? (Jeremias 23:4)

³ Buat neʼebé katuas bele halo. Se Ita mak katuas ida, hakaʼas an atu koñese didiʼak bibi sira. (Lee Jeremias 23:4.) Irmán Desi b neʼebé temi ona iha lisaun antes neʼe  hatete: “Katuas sira iha haʼu-nia grupu haklaken sempre haklaken ho haʼu no maluk seluk no mós ransu ho ami.” Neʼe halo fasil ba katuas sira atu ajuda Desi kuandu pandemia COVID-19 komesa no ninia família balu mate tanba virus neʼe.

4. Tanbasá katuas sira bele ajuda Desi, no ita bele aprende saida?

⁴ Desi esplika: “Tanba haʼu haree katuas sira nuʼudar kolega, fasil liu atu fó sai haʼu-nia sentimentu no mós laran-taridu.” Katuas sira bele aprende saida? Tau matan didiʼak ba bibi sira antes mosu susar. Habelun ho sira. Se mosu moras-peste no Ita labele vizita sira, koko kontaktu sira iha dalan seluk. Desi hatete: “Dala ruma, katuas balu telefone ka haruka mensajen iha loron neʼebé hanesan. Eskritura neʼebé sira haruka kona duni haʼu maski loloos haʼu lee beibeik ona ida-neʼe.”

5. Oinsá katuas sira bele buka-hatene irmaun-irmán sira-nia presiza no ajuda sira?

⁵ Dalan ida atu buka-hatene irmaun-irmán sira-nia presiza mak hodi husu kona-ba sira-nia situasaun maibé la hamoe sira. (Prov 20:5) Sira iha hahán natoon, ai-moruk no buat seluk ka lae? Sira bele lakon serbisu ka labele tan selu aluga ka lae? Sira presiza ajuda atu prenxe formuláriu hodi husu ajuda husi governu ka lae? Desi simu ajuda sasán no hahán husi maluk fiar-naʼin sira. Maibé buat neʼebé ajuda tebes nia mak domin no anima husi Bíblia neʼebé katuas sira fó ba nia. Nia hatete: “Katuas sira halo orasaun ho haʼu. Maski haʼu la hanoin-hetan sira-nia liafuan, maibé haʼu hanoin-hetan haʼu sente oinsá iha tempu neʼebá. Neʼe hanesan Jeová hatete: ‘Ó la mesak.’”​—Isa 41:10, 13.

6. Oinsá mak irmaun-irmán sira bele ajuda malu? (Haree foto.)

⁶ Buat neʼebé ema seluk bele halo. Ita hakarak katuas sira tau matan didiʼak ba irmaun-irmán sira. Maibé Jeová mós husu ita hotu atu anima no ajuda malu. (Gal 6:10) Maski ita halo buat kiʼik deʼit atu ajuda ema neʼebé moras, neʼe bele duni anima sira. Labarik ida bele hakerek karta ka pinta dezeñu hodi anima irmaun-irmán sira. Joven ida bele bá kompras ka halo buat seluk atu ajuda irmán ida. Ema seluk iha kongregasaun  mós bele teʼin hahán no lori ba maluk sira neʼebé moras. Durante mosu moras-peste, irmaun-irmán hotu presiza hetan anima. Depois reuniaun hotu, diʼak atu dada lia ho irmaun-irmán sira maski iha Reuniaun-Fatin ka liuhusi vídeo konferénsia. Katuas sira mós presiza hetan laran-manas. Testemuña balu haruka karta atu fó obrigadu ba katuas sira neʼebé okupadu tebes durante mosu moras-peste. Diʼak tebes se ita ida-idak hakaʼas an atu “kontinua fó aten-brani ba malu no hametin malu”.​—1 Tes 5:11.

7. Susar saida mak mosu kuandu akontese dezastre?

⁷ Dezastre bele troka ema nia moris derrepente deʼit. Ema balu lakon sasán, uma, ka ema neʼebé sira hadomi mate. Neʼe mós bele akontese ba irmaun-irmán sira. Oinsá ita bele ajuda?

8. Saida mak katuas sira no ulun ba família bele halo antes dezastre akontese?

⁸ Buat neʼebé katuas bele halo. Katuas sira presiza ajuda irmaun-irmán sira atu prepara an antes dezastre akontese. Esplika saida mak irmaun-irmán sira presiza halo atu seguru nafatin no oinsá atu kontaktu katuas sira. Irmán Margaret neʼebé temi iha lisaun antes neʼe hatete: “Katuas sira fó avizu liuhusi kongregasaun nia presiza katak iha posibilidade atu ahi han ami-nia área. Sira mós hatete katak se autoridade haruka ami atu evakua kedas ka se situasaun sai perigu liu, ami tenke sai kedas.” Irmaun sira fó sai informasaun iha tempu neʼebé loos tanba semana lima liutiha ahi han área neʼe. Durante tempu adorasaun família, ulun ba família presiza koʼalia ho família kona-ba buat neʼebé ema ida-idak presiza halo. Se Ita no Ita-nia oan sira prepara an, Ita nafatin bele kalma maski akontese dezastre.

9. Oinsá mak katuas sira organiza atu fó ajuda antes no depois akontese dezastre?

⁹ Se Ita mak katuas ba grupu haklaken, diʼak atu buka-hatene irmaun-irmán sira-nia númeru kontaktu no hela-fatin no halo ida-neʼe antes dezastre akontese. Halo lista kona-ba informasaun sira-neʼe no kontinua hafoun lista neʼe. Hodi nuneʼe, bainhira akontese dezastre, Ita bele kontaktu sira no buka-hatene saida mak sira presiza. Lalais atu hatoʼo informasaun kona-ba haklaken-naʼin sira ba koordenadór ba grupu katuas neʼebé sei kontaktu katuas área. Se katuas sira serbisu hamutuk, sira bele ajuda iha dalan neʼebé diʼak liu. Depois ahi han tiha Margaret nia área, katuas área la toba durante oras 36. Nia organiza katuas sira atu kontaktu no tau matan ba irmaun-irmán naʼin-450 neʼebé presiza sai husi sira-nia uma. (2 Kor 11:27) Hodi halo nuneʼe, sira konsege prepara hela-fatin ba irmaun-irmán sira-neʼe.

10. Tanbasá importante ba katuas sira atu anima irmaun-irmán sira? (João 21:15)

¹⁰ Katuas sira presiza ajuda irmaun-irmán sira iha dalan espirituál no mós fó kmaan ba sira. (1 Ped 5:2) Bainhira akontese dezastre, katuas sira presiza konfirma katak irmaun-irmán sira seguru, iha hahán, roupa no hela-fatin. Maski fulan barak liutiha, irmaun-irmán sira-neʼe nafatin presiza ajuda iha dalan espirituál no mós presiza hetan kmaan. (Lee João 21:15.) Irmaun Harold neʼebé serbí nuʼudar membru ba Komisaun ba Sukursál no hasoru ona irmaun-irmán barak neʼebé  sai vítima ba dezastre hatete: “Presiza tempu atu bele sai diʼak fali. Karik sira-nia moris komesa sai normál fali, maibé sira kontinua hanoin kona-ba família no belun neʼebé mate, sasán folin-boot neʼebé lakon, ka situasaun perigu neʼebé sira hasoru. Memória sira-neʼe bele hamosu sentimentu triste. Neʼe mak normál, no la dehan katak sira-nia fiar fraku.”

11. Família sira nafatin presiza saida?

¹¹ Katuas sira presiza aplika konsellu neʼebé dehan: “Tanis ho sira neʼebé tanis.” (Rom 12:15) Katuas sira presiza fó-hanoin ba ema neʼebé hasoru ona dezastre katak Jeová no irmaun-irmán sira nafatin hadomi sira. Katuas sira presiza ajuda família sira atu kontinua halo orasaun, estuda Bíblia, tuir reuniaun no mós bá haklaken. Katuas sira mós bele anima inan-aman sira atu ajuda sira-nia oan tau fokus ba buat sira neʼebé labele lakon tanba dezastre. Inan-aman presiza fó-hanoin oan sira katak Jeová sei sempre sai sira-nia Belun no nia sei sempre ajuda sira. No esplika ba sira katak sira iha família iha mundu tomak neʼebé prontu atu ajuda sira.​—1 Ped 2:17.

12. Oinsá irmaun-irmán sira bele ajuda maluk neʼebé hetan dezastre? (Haree foto.)

¹² Buat neʼebé ema seluk bele halo. Se akontese dezastre besik Ita-nia área, husu ba katuas sira oinsá Ita bele ajuda. Karik Ita bele fó hela-fatin ba maluk sira neʼebé lakon sira-nia uma ka ba maluk sira neʼebé mai atu ajuda. Karik Ita bele lori hahán no sasán neʼebé haklaken-naʼin sira presiza. Se mosu dezastre iha fatin neʼebé dook, Ita nafatin bele ajuda. Oinsá? Ita bele halo orasaun ba sira. (2 Kor 1:8-11) Ita bele apoia serbisu atu ajuda ema durante dezastre hodi fó kontribuisaun ba serbisu iha mundu tomak. (2 Kor 8:2-5) Se Ita bele bá no ajuda iha fatin neʼebé hetan dezastre, husu katuas sira kona-ba buat neʼebé Ita bele halo atu ajuda. Se Ita hetan konvite atu ajuda, Ita sei hetan treinu balu hodi nuneʼe Ita bele ajuda iha tempu naran deʼit no iha fatin naran deʼit neʼebé presiza ajuda.

13. Susar saida mak irmaun-irmán sira hasoru iha rai neʼebé governu bandu Testemuña sira?

¹³ Iha rai neʼebé governu bandu ita-nia atividade, neʼe lori susar liután ba  irmaun-irmán sira. Irmaun-irmán sira-neʼe mós hasoru problema ekonomia, moras no ema neʼebé sira hadomi mate. Maibé tanba governu bandu ita-nia atividade, karik katuas sira la livre atu vizita no koʼalia ho maluk sira neʼebé presiza hetan anima. Neʼe akontese ba irmaun Andrei neʼebé temi ona iha lisaun antes neʼe. Irmán ida iha ninia grupu haklaken hasoru problema ekonomia no mós hetan asidente karreta. Irmán neʼe presiza hetan operasaun balu no labele serbisu. Maski governu bandu Testemuña sira no mós mosu pandemia, maibé katuas sira halo buat neʼebé sira bele halo atu ajuda irmán neʼe no Jeová hatene buat neʼebé akontese.

14. Oinsá mak katuas sira bele hatudu ezemplu diʼak hodi sadere ba Jeová?

¹⁴ Buat neʼebé katuas bele halo. Andrei halo orasaun no halo buat neʼebé nia bele halo. Oinsá Jeová hatán ninia orasaun? Jeová book irmaun-irmán oioin atu fó ajuda ba irmán neʼe. Irmaun-irmán balu tula irmán neʼe ba konsulta. Irmaun-irmán seluk fó osan atu ajuda nia. Jeová mak book sira atu ajuda irmán neʼe tuir sira-nia kbiit no nia haraik bensaun ba sira-nia hakaʼas an atu ajuda irmán neʼe. (Ebr 13:16) Katuas sira, kuandu governu bandu ita-nia atividade, ita bele husu ema seluk atu ajuda ita. (Jer 36:5, 6) Importante liu mak atu sadere ba Jeová. Nia bele ajuda ita atu tau matan irmaun-irmán sira.

15. Oinsá ita bele nafatin iha unidade ho irmaun-irmán sira maski hetan terus?

¹⁵ Buat neʼebé ema seluk bele halo. Kuandu governu bandu, karik ita presiza hasoru malu nuʼudar grupu kiʼik-kiʼik. Entaun importante liután atu mantein dame entre ita. Ita presiza luta hasoru Satanás, laʼós irmaun-irmán sira. Haluha deʼit ita-nia maluk nia sala, ka keta demora atu rezolve problema. (Prov 19:11; Éf 4:26) Prontu atu ajuda malu. (Tito 3:14) Dalan neʼebé maluk sira ajuda irmán neʼe lori impaktu boot ba grupu haklaken tomak. Sira sai besik liután hanesan família.​—Sal 133:1.

16. Tuir Koloso 4:3, 18, oinsá ita bele ajuda irmaun-irmán neʼebé ema fó-terus?

¹⁶ Irmaun-irmán rihun ba rihun nafatin serbí Jeová maski governu bandu ita-nia  atividade sira. Sira balu tama komarka tanba sira-nia fiar. Ita bele halo orasaun kona-ba sira no sira-nia família. Ita mós bele halo orasaun kona-ba sira neʼebé la taʼuk atu tama komarka tanba apoia irmaun-irmán sira neʼebé iha komarka laran. Sira anima irmaun sira-neʼe atu nafatin tau fiar ba Jeová, sira fó buat neʼebé irmaun-irmán sira presiza no mós defende sira iha tribunál. c (Lee Koloso 4:3, 18.) Hanoin-hetan katak Ita-nia orasaun bele ajuda irmaun-irmán sira-neʼe.​—2 Tes 3:1, 2; 1 Tim 2:1, 2.

17. Oinsá Ita bele prepara an antes ema fó-terus?

¹⁷ Ita no Ita-nia família bele prepara an ba terus neʼebé sei mosu. (Após 14:22) Keta imajina buat aat oioin neʼebé karik sei akontese. Maibé hametin Ita-nia relasaun diʼak ho Jeová no ajuda Ita-nia oan sira atu halo buat neʼebé hanesan. Kuandu Ita sente laran-taridu, fakar sai Ita-nia sentimentu ba Maromak. (Sal 62:7, 8) Halo diskusaun nuʼudar família kona-ba tanbasá mak Ita bele tau fiar ba Jeová. d Ita-nia preparasaun ba dezastre bele ajuda Ita no Ita-nia oan sira. Nuneʼe mós Ita bele ajuda Ita-nia oan hodi prepara an antes ema fó-terus ba sira. Sira sei sente aten-brani no sente kalma tanba Ita hanorin sira atu tau fiar ba Jeová.

18. Saida mak sei akontese iha futuru?

¹⁸ Maromak nia dame halo ita sente seguru. (Flp 4:6, 7) Jeová nia dame halo ita sente kalma, maski mosu moras-peste, akontese dezastre no ema fó-terus ita. Nia uza katuas sira atu tau matan ba ita. No nia fó ita oportunidade atu ajuda malu. Durante tempu dame neʼebé ita iha agora, ita bele prepara ba susar oioin neʼebé sei mosu, inklui durante “terus boot”. (Mt 24:21) Iha tempu neʼebá, ita presiza mantein ita-nia dame no mós ajuda ema seluk atu iha dame. Maibé depois terus boot, ita sei la hasoru tan susar sira neʼebé halo ita laran-taridu. Ita sei hetan moris neʼebé perfeitu no dame ba nafatin.​—Isa 26:3, 4.