1. Ita bele hetan benefísiu saida bainhira medita Jeová nia promesa kona-ba moris rohan-laek?

 JEOVÁ promete katak ema neʼebé halo tuir nia sei hetan “moris rohan-laek”. (Rom 6:23) Bainhira ita medita kona-ba buat neʼebé Jeová oferese, ita-nia domin ba nia sei aumenta liután. Hanoin toʼok kona-ba neʼe, ita-nia Aman iha lalehan hadomi tebes ita, tan neʼe nia halo arranju atu ita nunka ketak husi nia.

2. Oinsá mak promesa kona-ba moris rohan-laek ajuda ita?

² Maromak nia promesa kona-ba moris rohan-laek ajuda ita atu tahan susar agora. Maski inimigu sira ameasa atu oho ita, ita sei nunka husik ita-nia laran-metin ba Jeová. Tanbasá? Razaun ida mak se ita kontinua laran-metin ba Jeová toʼo mate, Jeová sei fó moris-hiʼas ba ita no ita iha esperansa atu moris ba nafatin. (João 5:28, 29; 1 Kor 15:55-58; Ebr 2:15) Tanbasá ita bele fiar metin katak ita sei moris ba nafatin? Hanoin toʼok razaun balu tuirmai.

3. Tanbasá ita bele fiar katak Jeová bele ajuda ita moris ba nafatin? (Salmo 102:12, 24, 27)

³ Ita hatene katak Jeová bele ajuda ita atu moris ba nafatin tanba nia mak Hun ba moris no nia moris ba nafatin. (Sal 36:9) Haree toʼok eskritura balu neʼebé hatudu katak Jeová sempre iha no sei iha ba nafatin. Salmo 90:2 hatete katak Jeová mak iha ona “husi uluk kedas no ba nafatin”. Salmo 102 mós fó sai pontu neʼebé atu hanesan.  (Lee Salmo 102:12, 24, 27.) Profeta Habakuk hakerek kona-ba ita-nia Aman iha lalehan: “Oh Jeová, Ita-Boot iha ona horiuluk kedas, loos ka lae? Oh haʼu-nia Maromak neʼebé Santu, Ita nunka mate.”​—Hab 1:12.

4. Ita presiza hanoin barak se ita la komprende didiʼak ideia kona-ba Jeová iha ba nafatin ka lae? Esplika toʼok.

⁴ Susar ba ita atu komprende katak Maromak “iha ba nafatin” ka lae? (Isa 40:28) Ema barak mós sente hanesan neʼe. Eliú hatete: “[Maromak nia] tinan sira barak tebes toʼo ema labele komprende.” (Job 36:26, nota) Maibé tanba deʼit susar ba ita atu komprende, la dehan katak neʼe la loos. Porezemplu, maski ita la komprende buat hotu kona-ba eletrisidade, maibé neʼe la dehan katak eletrisidade la eziste. Nuneʼe mós, maski ita sente susar atu komprende ho loloos oinsá mak Jeová sempre iha no sei kontinua iha, maibé neʼe la dehan katak Maromak labele moris tinan ba tinan ba nafatin. Lia-loos kona-ba ita-nia Kriadór la depende ba ita bele ka labele komprende kona-ba nia. (Rom 11:33-36) Nia iha ona antes universu neʼe eziste, inklui loro-matan no fitun sira. Bíblia dehan katak Jeová mak “Kriadór neʼebé halo mundu ho ninia kbiit”. Sin, Jeová iha ona antes nia “nahe lalehan hanesan hena”. (Jer 51:15; Após 17:24) Saida mak razaun seluk tanbasá ita bele fiar katak ita sei moris ba nafatin?

5. Feen-laʼen primeiru iha oportunidade saida?

⁵ Buat moris sira neʼebé Jeová kria iha mundu ikusmai mate, só ema deʼit mak Jeová kria atu moris ba nafatin. Nia fó ema oportunidade úniku atu nunka mate. Maibé Jeová fó avizu ba Adão: “Kona-ba ai-hun neʼebé hanaran nuʼudar ai-hun koñesimentu kona-ba buat diʼak no aat, ó labele han ninia fuan, tanba iha loron neʼebé ó han ai-fuan neʼe, ó sei mate duni.” (Gén 2:17) Se Adão no Eva halo tuir Jeová, sira sei la mate. Ita bele fiar katak ikusmai Jeová sei fó lisensa ba sira atu han ai-fuan husi “ai-hun moris nian”. No Jeová sei fó sira “moris ba nafatin”. b​—Gén 3:22.

6-7. (a) Saida tan mak hatudu katak Maromak kria ema laʼós atu mate? (b) Ita hakarak halo saida deʼit iha mundu foun? (Haree foto sira.)

⁶ Sientista balu fó sai evidénsia katak ita-nia kakutak bele rai informasaun  barak liu fali buat neʼebé ita bele aprende durante ita-nia moris agora. Neʼe interese tebes. Iha tinan 2010, informasaun husi jornál ida hatete katak ita-nia kakutak bele rai informasaun maizumenus giga millaun 2,5. Neʼe hanesan ho gravasaun ba programa televizaun durante maizumenus oras millaun tolu ka neʼe hanesan tinan 300 liu. Karik ita-nia kakutak bele rai informasaun barak liu fali ida-neʼe. Neʼe hatudu katak Jeová kria ita-nia kakutak ho kbiit atu rai informasaun barak liu fali buat neʼebé ita bele aprende durante tinan 70 ka 80.​—Sal 90:10.

⁷ Jeová mós kria ita ho hakarak neʼebé makaʼas atu kontinua moris. Bíblia dehan katak Maromak “tau ona tempu neʼebé la iha rohan iha ema sira-nia laran”. (Ecle 3:11) Tan neʼe mak ita haree mate nuʼudar inimigu. (1 Kor 15:26) Baibain kuandu ita moras todan, ita sei simu deʼit situasaun neʼe no rende an ka lae? Lae. Ita sei konsulta ho doutór no hemu ai-moruk atu kura moras neʼe. Tuir loloos, ita hakaʼas an atu halo buat ruma hodi labele mate. No bainhira ema neʼebé ita hadomi mate, maski nia mak joven ka idade, ita sente laran-triste ba tempu kleur. (João 11:32, 33) Klaru katak ita-nia Kriadór neʼebé domin sei la fó ita hakarak neʼe no mós abilidade atu kontinua moris se nia lakohi ema atu moris ba nafatin. Maibé ita iha razaun importante seluk atu fiar katak ita bele moris rohan-laek. Ita sei aprende kona-ba buat neʼebé Jeová halo ona iha tempu uluk no tempu modernu neʼebé hatudu katak Jeová la troka ninia hakarak.

8. Isaias 55:11 hanorin saida mai ita kona-ba Jeová nia hakarak?

⁸ Maski Adão no Eva halo sala no lori mate ba sira-nia oan no mós bei-oan, Jeová la troka ninia hakarak. (Lee Isaias 55:11.) Nia nafatin hakarak ema laran-metin sira atu moris rohan-laek. Ita hatene ida-neʼe tanba buat neʼebé Jeová hatete no halo hodi kumpre ninia hakarak.

9. Maromak promete saida? (Daniel 12:2, 13)

⁹ Jeová promete katak nia sei fó moris-hiʼas ba ema mate no fó sira oportunidade atu moris ba nafatin. (Após 24:15; Tito 1:1, 2) Job neʼebé laran-metin fiar katak Jeová hakarak tebes atu fó moris-hiʼas ba ema neʼebé mate. (Job 14:14, 15) Profeta Daniel hatene katak ema sei hetan moris-hiʼas no iha oportunidade atu moris ba nafatin. (Sal 37:29; lee Daniel 12:2, 13.) Ema Judeu iha Jesus nia tempu mós hatene katak Jeová sei fó “moris rohan-laek” ba ninia atan sira neʼebé laran-metin. (Lc 10:25; 18:18) Jesus temi beibeik promesa neʼe, no ninia Aman mós fó moris-hiʼas ba nia.​—Mt 19:29; 22:31, 32; Lc 18:30; João 11:25.

10. Moris hiʼas iha tempu uluk prova saida? (Haree dezeñu.)

¹⁰ Jeová mak Ida neʼebé fó moris no nia iha kbiit atu halo ema moris fali. Nia fó kbiit ba profeta Elias atu fó moris-hiʼas ba oan-mane husi feto-faluk iha Sarepta. (1 Reis 17:21-23) Depois neʼe, ho Maromak nia ajuda, profeta Eliseu fó moris-hiʼas ba oan-mane husi feto iha Sunem. (2 Reis 4:18-20, 34-37) Ezemplu sira-neʼe no mós ezemplu seluk prova katak Jeová iha kbiit atu fó moris-hiʼas ba ema. Bainhira iha rai, Jesus hatudu katak ninia Aman fó kbiit neʼe ba nia. (João 11:23-25, 43, 44) Agora Jesus iha ona lalehan no nia simu ona “kbiit tomak iha lalehan no rai”. Entaun nia bele kumpre promesa katak “ema hotu neʼebé iha rate laran” sei moris hiʼas atu hetan moris no iha esperansa atu moris ba nafatin.​—Mt 28:18; João 5:25-29.

11. Oinsá mak Jesus nia sakrifísiu loke dalan ba ita atu moris ba nafatin?

¹¹ Tanbasá mak Jeová husik ninia Oan-Mane neʼebé nia hadomi hetan terus makaʼas toʼo mate? Jesus fó sai razaun hodi dehan: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.” (João 3:16) Hodi fó ninia Oan-Mane nuʼudar sakrifísiu atu taka ita-nia sala, Maromak loke dalan ba ita atu bele hetan moris ba nafatin. (Mt 20:28) Apóstolu Paulo esplika kona-ba parte importante neʼe husi Maromak nia hakarak hodi hakerek: “Tanba mate mai liuhusi ema ida, nuneʼe mós moris-hiʼas husi mate mai liuhusi ema ida. Ema hotu mate tanba Adão, nuneʼe mós ema hotu sei hetan moris tanba Kristu.”​—1 Kor 15:21, 22.

12. Oinsá mak Maromak nia Ukun sei kumpre ninia hakarak ba ita?

¹² Jesus hanorin ninia dixípulu atu halo orasaun hodi husu Maromak nia Ukun atu mai no atu Maromak nia hakarak sai loos iha rai. (Mt 6:9, 10) Maromak nia hakarak ida mak atu ema moris ba nafatin iha rai. Atu kumpre ida-neʼe, Jeová hili ona ninia Oan-Mane nuʼudar Liurai ba Maromak nia Ukun. Maromak halibur daudaun ema naʼin-144.000 husi rai atu apoia Jesus kumpre Maromak nia hakarak.​—Apok 5:9, 10.

13. Agora daudaun Jeová halo saida, no ita presiza halo saida?

 ¹³ Ohin loron, Jeová halibur daudaun “ema-lubun boot” no treinu sira atu moris iha ninia Ukun okos. (Apok 7:9, 10; Tgo 2:8) Maski ema barak iha mundu neʼe haketak malu tanba odi malu no funu, “ema-lubun boot” hakaʼas an atu hasai tiha hahalok odi. Neʼe hanesan sira tuku sira-nia surik sai xarrua. (Miq 4:3) Duké hola parte iha funu no oho ema barak, sira ajuda ema atu hetan “moris neʼebé loloos” liuhusi hanorin ema kona-ba Maromak neʼebé loos no ninia hakarak. (1 Tim 6:19) Sira-nia família karik kontra sira ka sira hasoru problema ekonomia tanba apoia Maromak nia Ukun, maibé Jeová sei ajuda sira atu hetan buat neʼebé sira presiza. (Mt 6:25, 30-33; Lc 18:29, 30) Faktu sira-neʼe hatudu katak Maromak nia Ukun mak realidade no neʼe sei kontinua kumpre Maromak nia hakarak.

14-15. Oinsá mak Jeová nia promesa atu halakon mate sei sai loos?

¹⁴ Agora Jesus sai ona Liurai ba Maromak nia Ukun iha lalehan no sei kumpre Jeová nia promesa hotu. (2 Kor 1:20) Husi tinan 1914, Jesus domina daudaun ninia inimigu sira. (Sal 110:1, 2) Lakleur  tan Jesus no sira neʼebé ukun ho nia sei manán inimigu hotu no halakon buat aat hotu.​—Apok 6:2.

¹⁵ Durante Jesus nia Ukun ba Tinan Rihun Ida, ema mate sira sei moris fali no ema neʼebé halo tuir Jeová sei sai perfeitu. Depois hetan tiha koko ba dala ikus, ema sira neʼebé Jeová deside nuʼudar ema laran-loos, “sei simu rai nuʼudar sira-nian, no sira sei moris ba nafatin iha rai”. (Sal 37:10, 11, 29) Tuirmai ema sei kontente tanba ‘inimigu ikus neʼebé sei lakon mak mate’.​—1 Kor 15:26.

16. Saida mak razaun importante liu atu serbí Jeová?

¹⁶ Hanesan ita aprende ona, ita-nia esperansa atu moris ba nafatin bazeia ba Bíblia. Esperansa neʼe bele ajuda ita atu laran-metin nafatin durante loron ikus sira-neʼe neʼebé nakonu ho susar. Maibé atu halo kontente Jeová, ita tenke serbí nia laʼós deʼit tanba ita hakarak atu moris ba nafatin. Ita-nia razaun importante liu atu laran-metin ba Jeová no Jesus mak tanba ita hadomi tebes sira. (2 Kor 5:14, 15) Domin neʼe motiva ita atu banati-tuir sira no fó sai ita-nia esperansa ba ema seluk. (Rom 10:13-15) Bainhira ita aprende atu la hanoin an deʼit no hatudu laran-luak, Jeová sei hakarak atu sai ita-nia belun ba nafatin.​—Ebr 13:16.

17. Ita iha responsabilidade saida? (Mateus 7:13, 14)

¹⁷ Ita mós sei hetan moris rohan-laek ka lae? Jeová loke ona oportunidade neʼe ba ita. Agora ita iha responsabilidade atu kontinua laʼo iha dalan neʼebé lori ba moris. (Lee Mateus 7:13, 14.) Ita-nia moris sei sai oinsá bainhira ita moris ba nafatin? Ita sei hetan resposta ba pergunta neʼe iha lisaun tuirmai.