1, 2. (a) Oinsá mak ita hatene katak ema bele sai Maromak nia belun? (b) Ita sei koʼalia kona-ba saida iha lisaun neʼe?

HUSI tempu neʼebé ita foin moris toʼo ita mate, ita hotu presiza domin. Ita hotu presiza atu iha relasaun neʼebé diʼak no besik ho ema seluk. Liuliu, ita presiza domin husi Maromak Jeová. Ema barak sente katak susar ba ita atu iha relasaun neʼebé besik no diʼak ho Maromak, tanba ita la bele haree Maromak no nia mak Maromak neʼebé Aas Liu Hotu iha lalehan. Maibé ita la hanoin hanesan neʼe. Tanbasá?

² Tanba Bíblia hatudu katak iha duni ema la perfeitu neʼebé sai ona Maromak nia belun. Sira-nia ezemplu diʼak tebes ba ita atu haburas relasaun ho Maromak, tanba iha relasaun ho Maromak mak buat neʼebé importante liu hotu iha ita-nia moris. Ezemplu ida mak kona-ba Abraão. (Lee Tiago 2:23.) Oinsá mak nia bele haburas relasaun diʼak ho Jeová? Liuhusi fiar. Tan neʼe mak Bíblia bolu Abraão nuʼudar “aman ba sira hotu neʼebé iha fiar”. (Roma 4:11) Iha lisaun neʼe ita sei koʼalia hamutuk kona-ba Abraão  nia fiar, no husu ba ita-nia an, ‘Oinsá mak haʼu bele banati-tuir Abraão nia fiar hodi hametin haʼu-nia relasaun diʼak ho Jeová?’

3, 4. (a) Konta toʼok saida mak koko tebes Abraão nia fiar. (b) Tanbasá mak Abraão prontu halo tuir deʼit Jeová atu hasaʼe Isaac nuʼudar sakrifísiu?

³ Hanoin toʼok katuas ida ho idade maizumenus 125 laʼo hela atu saʼe ba foho leten. Neʼe mak buat neʼebé susar liu hotu iha ninia moris. Maibé susar neʼe laʼós tanba ninia idade. Tanba maski nia tinan 125 ona, maibé nia forte hela. ^[1] (Haree nota husi lisaun.) Iha ninia kotuk, ninia oan-mane ida, karik foin mak tinan 25, laʼo tuir hela nia. Ninia oan neʼe hulan hela ai atu ba sunu, ninia naran mak Isaac. Iha Abraão nia liman, nia kaer hela tudik ho buat ida atu sunu ahi. Jeová husu nia atu hasaʼe ninia oan-mane neʼe nuʼudar sakrifísiu ba Jeová!—Gênesis (Kejadian) 22:1-8.

⁴ Karik neʼe mak tempu neʼebé Abraão nia fiar hetan koko neʼebé boot liu hotu iha ninia moris tomak. Ema barak hatete katak Maromak laiha domin tanba nia husu Abraão atu hasaʼe ninia oan nuʼudar sakrifísiu, no sira dehan katak Abraão halo tuir deʼit tanba tuir loloos nia laiha domin ba ninia oan. Ema koʼalia hanesan neʼe tanba sira laiha fiar ka sira la komprende tansá mak fiar bele book ema halo buat ida-neʼe. (1 Korinto 2:14-16) Abraão halo tuir Maromak nia liafuan laʼós tanba nia la hanoin uluk, maibé tanba nia iha fiar neʼebé loos. Nia iha fiar katak Maromak Jeová nunka husu nia atu halo buat neʼebé mak bele estraga fali ninia moris. Abraão hatene katak halo tuir Jeová sei lori bensaun ba nia no ba ninia oan-mane doben neʼe. Oinsá mak Abraão bele iha fiar hanesan neʼe? Liuhusi koñesimentu no esperiénsia moris nian.

5. Karik liuhusi dalan saida mak Abraão aprende kona-ba Jeová, no koñesimentu neʼe halo nia sente oinsá?

⁵ Koñesimentu. Maski Abraão boot iha Ur, ema Kanaán nia sidade neʼebé baibain ema adora estátua deʼit, maibé Abraão koñese Maromak Jeová. Entaun, oinsá mak nia hatene Jeová, tanba ninia aman, Tera, mós adora estátua sira? (Josué [Yosua] 24:2) Bíblia la esplika oinsá mak Abraão koñese Jeová, maibé hatete deʼit katak Abraão mak jerasaun sia husi Sem, Noé nia oan. Sem mak ema neʼebé iha fiar boot ba Jeová no nia moris toʼo maizumenus Abraão tinan 150 mak nia foin mate. Maski Bíblia la fó-hatene ita katak Sem rasik mak hanorin Abraão kona-ba Jeová, maibé ita bele fiar katak Sem koʼalia ba nia família sira kona-ba Jeová, no karik liuhusi dalan hanesan neʼe mak Abraão aprende kona-ba Jeová. Koñesimentu neʼe book tebes Abraão nia laran atu hadomi Jeová no ajuda nia haburas ninia fiar ba Jeová.

6, 7. Oinsá mak Abraão rasik nia esperiénsia hametin ninia fiar?

⁶ Esperiénsia moris nian. Oinsá mak Abraão hametin ninia fiar ba Jeová liuhusi esperiénsia moris nian? Ema balu hatete katak buat neʼebé ita hanoin bele hamosu sentimentu, no sentimentu bele book ita atu halo buat ruma. Buat neʼebé Abraão aprende kona-ba Jeová book duni ninia sentimentu atu hatudu respeitu neʼebé kleʼan ba Jeová, “Maromak neʼebé Aas Liu Hotu, Ida neʼebé halo lalehan no rai”. (Gênesis [Kejadian] 14:22) Sentimentu neʼe mak Bíblia bolu nuʼudar “hamtaʼuk Maromak”, no atu haburas relasaun ho Maromak, presiza duni iha sentimentu neʼe. (Ebreu 5:7; Salmo [Mazmur] 25:14) Sentimentu neʼe mak book Abraão hodi halo tuir Jeová.

⁷ Maromak fó-hatene ba Abraão no Sara atu sai husi Ur no muda ba rai seluk. Iha  neʼebá sira sei hela deʼit iha tenda toʼo mate. Maski Abraão hatene katak nia sei hasoru perigu oioin, maibé nia hakarak atu halo tuir Jeová nafatin. No tanba ninia halo tuir neʼe mak Jeová fó bensaun ba nia no proteje nia. Porezemplu, bainhira ema lori tiha Abraão nia feen bonita, Sara, neʼe mós bele lori perigu ba Abraão tanba ema bele oho nia. Maibé Jeová proteje sira liuhusi milagre ida, no ida-neʼe akontese laʼós dala ida deʼit. (Gênesis [Kejadian] 12:10-20; 20:2-7, 10-12, 17, 18) Esperiénsia sira-neʼe hametin liután Abraão nia fiar.

8. Oinsá mak ita bele aumenta liután ita-nia koñesimentu no esperiénsia hodi hametin ita-nia relasaun ho Jeová?

⁸ Ita bele haburas relasaun hanesan neʼe ho Jeová ka lae? Bele. Se kompara ho Abraão, ohin loron ita iha koñesimentu no esperiénsia barak tebes neʼebé bele ajuda ita atu haburas relasaun ho Jeová, no ita bele hetan buat sira-neʼe husi Bíblia. (Daniel 12:4; Roma 11:33) Bíblia riku tebes ho koñesimentu kona-ba Jeová, no aprende kona-ba nia bele ajuda ita atu hatudu respeitu no hadomi nia. Tuirmai, neʼe bele book ita atu halo tuir nia. Bainhira ita halo tuir Jeová, ita mós bele haree rasik oinsá mak Jeová proteje no fó bensaun ba ita-nia moris hodi hametin liután ita-nia fiar. Kuandu ita mak serbí Jeová ho laran tomak, ita sei sente kontente, solok, no hakmatek. (Salmo [Mazmur] 34:8; Provérbios [Amsal] 10:22) Se ita-nia koñesimentu no esperiénsia moris nian mak aumenta liután, ita-nia fiar no relasaun ho Jeová mós sei sai metin liután.

9, 10. (a) Presiza halo saida atu bele hametin relasaun? (b) Saida mak hatudu katak Abraão hafolin no halo metin ninia relasaun ho Jeová?

⁹ Relasaun belun nian mak hanesan ho rikusoin ida. (Lee Provérbios [Amsal] 17:17.) ^[2] Relasaun neʼe la hanesan ho vazu neʼebé ita sosa, depois, rai hela deʼit toʼo rai-rahun mak nakonu iha leten. Maibé neʼe hanesan ai-funan furak ida neʼebé presiza tau matan no mantein didiʼak hodi bele sai buras liután. Abraão mós hafolin no mantein ninia relasaun neʼe ho Jeová. Oinsá mak nia halo nuneʼe?

¹⁰ Abraão sempre buka dalan atu hametin ninia fiar no halo tuir Jeová. Porezemplu, bainhira nia ho ninia família boot muda ba rai-Kanaán, nia buka nafatin Jeová nia matadalan atu ajuda nia halo desizaun sira. No bainhira nia tinan 99, tinan ida tan antes Isaac atu moris, Jeová fó mandamentu katak mane hotu iha Abraão nia família tomak tenke hetan sirkunsizaun. Abraão husu ka lae ba Jeová tanbasá mak tenke halo hanesan neʼe, ka nia buka razaun atu bele sees husi halo tuir Jeová nia mandamentu neʼe? Lae, nia tau fiar ba Jeová no “iha loron neʼe kedas” nia halo tuir buat neʼebé mak Jeová husu nia atu halo.—Gênesis (Kejadian) 17:10-14, 23.

11. Tanbasá mak Abraão hanoin barak kona-ba Sodoma no Gomorra, no oinsá mak Jeová ajuda nia?

 ¹¹ Maski iha buat kiʼik, Abraão mós iha toman atu halo tuir Jeová. Tan neʼe mak ninia relasaun ho Jeová sai metin ba beibeik. Nia sente livre atu fakar sai ninia hanoin ba Jeová, no husu Jeová nia ajuda bainhira nia la komprende pergunta susar balu. Porezemplu, bainhira nia hatene katak Jeová atu halakon sidade Sodoma no Gomorra, nia hanoin barak kona-ba karik ema diʼak sira mós sei mate hamutuk ho ema aat sira iha sidade rua neʼe. Karik mós tanba nia hanoin kona-ba ninia sobriñu Lot ho Lot nia família sira neʼebé hela iha Sodoma. Maibé Abraão mós iha fiar ba Jeová, “Juis ba raiklaran tomak”, tan neʼe nia koʼalia ba Jeová ho haraik an kona-ba ninia laran-susar neʼe. Jeová hanorin nia ho pasiénsia atu hatene katak Jeová mak Maromak neʼebé laran-sadiʼa. Nia bele haree ema hotu nia laran no nia mós buka atu salva ema laran-loos hotu antes nia atu tesi lia ba ema sira-neʼe.—Gênesis (Kejadian) 18:22-33.

12, 13. (a) Oinsá mak koñesimentu no esperiénsia moris nian ajuda Abraão? (b) Saida mak hatudu katak Abraão iha fiar ba Jeová?

¹² Ita bele fiar katak koñesimentu no esperiénsia neʼebé Abraão hetan, neʼe ajuda nia hodi hametin ninia relasaun ho Jeová. Tan neʼe mak bainhira Jeová husu nia atu hasaʼe Isaac, nia halo tuir deʼit tanba nia hatene katak Jeová mak Maromak neʼebé diʼak tebes, pasiénsia, laran-sadiʼa, bele tau fiar, no sempre proteje nia. Agora mai ita koʼalia fali kona-ba tempu neʼebé nia laʼo hela sai bá foho Moriá leten. Ba Abraão, nia iha duvida ka lae katak Jeová bele troka ninia hahalok derrepente atu sai fali siʼak-teen no laiha laran-sadiʼa tan ba nia? Abraão nunka taʼuk kona-ba ida-neʼe. Tanbasá mak ita bele hatete hanesan neʼe?

¹³ Antes atu saʼe ba foho, Abraão hatete ba ninia atan sira: “Imi hein lai iha neʼe ho kuda-burru, maibé haʼu no haʼu-nia oan-mane neʼe sei bá neʼebá hodi halo adorasaun depois fila fali mai imi.” (Gênesis [Kejadian] 22:5) Tanbasá mak Abraão koʼalia hanesan neʼe? Nia bosok ka lae bainhira nia hatete ba ninia atan sira katak nia ho Isaac sei fila fali mai, maibé tuir loloos nia hatene ona katak nia sei hasaʼe Isaac nuʼudar sakrifísiu? Lae, nia la koʼalia bosok, tanba eskritura esplika tanbasá mak Abraão koʼalia hanesan neʼe. (Lee Ebreu 11:19.) Abraão hatene katak “Maromak bele halo Isaac moris fali husi mate”. Nia fiar katak Maromak bele halo moris-hiʼas tanba uluk nia ho Sara kiuk, maibé ikusmai Jeová halo sira bele iha oan fali, maski sira idade loos ona. (Ebreu 11:11, 12, 18) Nia fiar katak laiha buat ida mak Jeová la bele halo. Tan neʼe mak nia fiar ho laran tomak katak saida deʼit sei akontese iha foho leten, ninia oan-mane neʼe sei moris fali, hodi nuneʼe Jeová nia promesa sira bele sai loos. Iha fatin, Bíblia bolu Abraão nuʼudar “aman ba sira hotu neʼebé iha fiar”!

14. Susar saida mak ita hasoru, oinsá mak Abraão nia ezemplu ajuda ita?

¹⁴ Oinsá ho ita? Ohin loron Maromak la  husu ita atu hasaʼe ita-nia oan nuʼudar sakrifísiu ba nia, maibé nia husu deʼit atu ita halo tuir ninia mandamentu sira. Dala ruma mandamentu sira-neʼe todan no karik ita la komprende tansá mak ita tenke halo tuir. Ita mós sente hanesan neʼe ka lae? Ba ema balu, karik haklaken mak buat neʼebé difisil tebes ba sira. Karik tanba moe ka haklaken ba ema neʼebé sira la koñese, neʼe buat susar ida ba sira. Balu tan sira sente susar tebes atu la sai hanesan ema sira neʼebé iha eskola ka serbisu fatin. (Êxodo [Keluaran] 23:2; 1 Tesalónika 2:2) Iha situasaun hanesan neʼe, ita sente hanesan Abraão ka lae neʼebé laʼo neineik saʼe ba foho Moriá leten? Se ita mak sente nuneʼe, lalika laran-tun, halo tuir Abraão ho ninia fiar! Ita mós bele banati-tuir fiar-naʼin sira husi tempu uluk, tanba neʼe bele ajuda ita atu hakbesik liután ba ita-nia Belun, Jeová.—Ebreu 12:1, 2.

15. Tanbasá mak ita bele fiar katak Abraão nunka arrepende kona-ba halo tuir Jeová?

¹⁵ Tuir ita-nia hanoin, Abraão arrepende ka lae kona-ba halo tuir Jeová? Bíblia hatete katak: “Abraão iis kotu no mate ho idade neʼebé boot no nia iha moris neʼebé kontente.” (Gênesis [Kejadian] 25:8) Bainhira nia tinan 175, ninia forsa fraku ona, maibé kuandu nia lembra fali ninia moris, nia sente katak nia iha duni moris neʼebé kontente. Neʼe tanba nia fokus ninia moris ba ninia relasaun ho Jeová deʼit. Maibé, bainhira ita lee liafuan neʼebé hatete katak Abraão kontente ona moris toʼo katuas, neʼe la dehan katak nia laiha hakarak atu moris tan iha futuru.

16. Solok saida deʼit mak Abraão sei hetan iha Paraízu?

¹⁶ Bíblia hatete katak Abraão “hein hela sidade neʼebé iha hun metin, no ida neʼebé halo planu ba sidade neʼe no harii sidade neʼe mak Maromak”. (Ebreu 11:10) Abraão fiar katak loron ida nia sei haree sidade neʼe, neʼe mak Maromak nia Ukun, atu ukun mundu tomak. No nia sei haree duni ida-neʼe akontese! Hanoin toʼok kona-ba Abraão nia solok bainhira nia moris fali iha Paraízu hodi kontinua hametin ninia relasaun ho Jeová. Karik nia sei kontente tebes atu haree katak maski nia mate ona, maibé ninia ezemplu kona-ba fiar ajuda ona Jeová nia atan barak. Iha mundu foun nia mós sei hatene katak dalan neʼebé nia atu hasaʼe Isaac mak ilas ida. (Ebreu 11:19) Nia mós sei hatene katak ninia triste iha tempu neʼebé nia atu hasaʼe Isaac, ajuda ona ema barak hodi komprende kona-ba Jeová nia sentimentu bainhira Jeová fó ninia Oan-Mane, Jesus Kristu, nuʼudar sakrifísiu. (João 3:16) Loos duni, Abraão nia ezemplu ajuda tebes ita hotu atu hafolin liután Jesus nia sakrifísiu nia folin, tanba neʼe mak domin boot liu hotu neʼebé Maromak fó ba ema!

17. Ita sei hakaʼas an atu halo saida, no iha lisaun tuirmai ita sei koʼalia kona-ba saida?

¹⁷ Mai ita ida-idak hakaʼas an atu banati-tuir Abraão nia fiar. Bainhira ita koñese liután Jeová no halo tuir nia, ita mós sei haree oinsá mak Jeová fó bensaun no proteje ita. Neʼe mak koñesimentu no esperiénsia moris neʼebé folin boot tebes. (Lee Ebreu 6:10-12.) Mai ita hakbesik ba ita-nia Belun Jeová ba nafatin! Iha lisaun tuir mai ita sei koʼalia tan kona-ba ezemplu tolu neʼebé bele ajuda ita atu sai Maromak nia belun.