1, 2. Oinsá mak David hatudu ninia laran-metin ba Jeová? (Haree dezeñu iha leten.)

SAUL ho ninia soldadu 3.000 buka hela David iha Judeia nia rai-fuik maran atu oho nia. Maibé kalan ida, David ho ninia ema sira buka-hetan fatin neʼebé Saul ho ninia ema sira hela bá. Iha kalan neʼe sira hotu toba-dukur. Entaun, David ho Abisai laʼo nonook tama ba tenda laran no hetan Saul toba hela. Abisai bisibisi ba David: “Husik haʼu sona metin [Saul] ba rai ho diman dala ida deʼit, no haʼu sei la presiza halo neʼe ba dala rua.” Maibé David la fó lisensa ba Abisai atu halo nuneʼe. David hatete ba nia: “Keta halo aat ba nia, tanba sé mak bele foti nia liman hasoru ema neʼebé Jeová hili no la simu sala kona-ba neʼe? . . . Tuir Jeová nia hanoin, haʼu labele duni atu foti haʼu-nia liman hodi kontra hasoru ema neʼebé Jeová hili!”—1 Samuel 26:8-12.

² Tanbasá mak David lakohi halo aat ba Saul? Tanba nia hatene katak dalan neʼebé nia trata Saul liga ho ninia laran-metin ba Jeová. Nia hatene katak Jeová mak hili Saul hodi sai ema Izraél nia liurai, tan neʼe nia tenke respeitu no la hanoin atu halo aat ba Saul. Ohin loron  mós hanesan, se ita hakarak hatudu laran-metin ba Jeová, ita tenke hatudu respeitu ba ema sira neʼebé nia uza.—Lee Miquéias (Mikha) 6:8. ^[1]

3. Oinsá mak Abisai hatudu ninia laran-metin?

³ Abisai hatudu respeitu ba David tanba nia hatene katak Jeová hili ona David sai liurai atu troka Saul. Bainhira David sai tiha liurai, nia monu ba sala boot. Nia toba ho Urias nia feen no tuirmai nia halo arranju ho Abisai nia alin Joab hodi uza funu mak oho Urias. (2 Samuel 11:2-4, 14, 15; 1 Crônicas [Tawarikh] 2:16) Karik Abisai hatene kona-ba buat neʼebé David halo, maibé nia respeitu nafatin David nuʼudar liurai. Iha tempu neʼebá Abisai mak xefe militár ida, no tuir loloos nia bele uza ninia pozisaun hodi sai fali liurai, maibé nia lakohi halo nuneʼe. Nia serbí nafatin David no proteje David husi ninia inimigu sira.—2 Samuel 10:10; 20:6; 21:15-17.

4. (a) Tanbasá mak David hatudu ezemplu neʼebé diʼak kona-ba laran-metin ba Maromak? (b) Saida mak ita sei koʼalia iha lisaun neʼe?

⁴ Iha David nia moris tomak nia laran-metin deʼit ba Jeová. Bainhira nia sei joven, jigante Golias koʼalia “sadik Maromak moris nia tropa sira”. Tanba David hakarak defende Jeová nia naran, ikusmai nia oho tiha ema Filístia neʼe. (1 Samuel 17:23, 26, 48-51) Iha tempu neʼebé nia sai ona liurai, nia monu ba sala-foʼer no oho ema, maibé bainhira profeta Natan fó konsellu ba nia, nia simu konsellu neʼe no arrepende ninia sala. (2 Samuel 12:1-5, 13) Toʼo nia katuas mós nia kontinua hatudu laran-metin ba Jeová. Ezemplu ida mak nia fó kontribuisaun ho laran-luak atu harii Jeová nia templu. (1 Crônicas [Tawarikh] 29:1-5) Iha David nia moris, nia halo duni sala neʼebé boot, maibé nia hatudu nafatin laran-metin ba Jeová. (Salmo [Mazmur] 51:4, 10; 86:2) Iha lisaun neʼe, ita sei koʼalia kona-ba David no ema sira neʼebé moris iha ninia tempu, ita sei haree toʼok sira fó sira-nia laran-metin liu ba sé, no presiza hahalok saida deʼit atu bele hatudu laran-metin.

5. Ita aprende saida husi Abisai nia hahalok?

⁵ Bainhira Abisai hakarak oho Saul, neʼe tanba nia iha laran-metin ba David. Maibé David la husik nia atu oho Liurai Saul tanba David hatene katak sala atu halo aat ba “ema neʼebé Jeová hili”. (1 Samuel 26:8-11) Husi neʼe ita bele aprende lisaun importante ida, neʼe mak: Bainhira ita atu foti desizaun kona-ba laran-metin ba sé, importante atu hanoin uluk Bíblia nia prinsípiu sira hodi ajuda ita foti desizaun neʼebé loos.

6. Maski la sala atu iha laran-metin ba ita-nia família ka belun, maibé ita tenke kuidadu kona-ba saida?

⁶ La sala atu hatudu laran-metin ba ema neʼebé ita hadomi, hanesan ita-nia belun, ka família. Maibé tanba ita ema sala-naʼin, ita-nia sentimentu bele lohi ita. (Jeremias [Yeremia] 17:9) Tan neʼe mak bainhira ita-nia belun ka família ida halo sala no husik lia-loos, ita tenke hanoin-hetan katak buat importante liu mak atu iha laran-metin ba Jeová liu fali laran-metin ba ema.—Lee Mateus 22:37.

7. Oinsá mak irmán ida hatudu laran-metin ba Jeová iha situasaun neʼebé susar tebes ba nia?

⁷ Se ita-nia família ida mak hasai husi kongregasaun, neʼe bele koko ita-nia laran-metin. Porezemplu, iha irmán ida naran Ana. ^[2] (Haree nota husi lisaun.) Loron ida ninia amá neʼebé kongregasaun hasai telefone nia. Ninia amá sente laran-triste tanba família hotu lakohi koʼalia ho nia, tan neʼe nia hakarak bá atu vizita Ana. Rona hanesan neʼe, Ana mós sente triste, no Ana promete ba nia katak Ana sei hakerek karta ida ba nia. Antes atu hakerek, Ana buka uluk Bíblia nia prinsípiu sira. (1 Korinto 5:11; 2 João 9-11) Iha Ana nia karta, nia esplika didiʼak ba ninia amá katak ninia amá mak hili hodi hakotu ninia relasaun ho família tanba nia lakohi arrepende an kona-ba sala neʼebé nia halo. Ana hakerek hanesan neʼe ba ninia amá: “Se amá hakarak atu halakon amá nia triste, iha dalan ida deʼit, neʼe mak fila fali bá Jeová.”—Tiago 4:8.

8. Hahalok furak saida mak bele ajuda ita laran-metin ba Jeová?

 ⁸ Maromak nia atan sira iha David nia tempu bele hatudu laran-metin ba nia tanba hahalok furak tolu. Hahalok sira-neʼe mak haraik-an, laran-diʼak, no aten-brani. Agora mai ita koʼalia kona-ba hahalok sira-neʼe ida-idak.

9. Tanbasá mak Abner koko atu oho David?

⁹ Bainhira David lori Golias nia ulun ba hasoru Liurai Saul, Jónatas no Abner mós iha neʼebá. Sira naʼin-rua mós hatene katak Maromak hakarak David mak atu sai liurai hodi troka Saul. Jónatas hakarak sai David nia belun no halo aliansa ho David. (1 Samuel 17:57–18:3) Maibé Abner lakohi halo nuneʼe. No ikusmai nia fó apoiu ba Saul atu oho David. (Salmo [Mazmur] 54:3; 1 Samuel 26:1-5) Bainhira Saul mate tiha, Abner lakohi nafatin atu hatudu haraik-an hodi apoia David. Duké hatudu laran-metin ba Jeová, Abner koko hodi fó fali ninia apoiu ba Saul nia oan seluk, Isboset. Laʼós neʼe deʼit, karik Abner mós hakarak hadau atu sai liurai mak nia toba ho Liurai Saul nia feen ida. (2 Samuel 2:8-10; 3:6-11) Tanbasá mak Jónatas ho Abner iha sentimentu neʼebé la hanesan kona-ba David? Tanba Jónatas laran-metin ba Jeová no haraik an, maibé Abner lae.

10. Tanbasá mak Absalão la laran-metin ba Maromak?

¹⁰ David nia oan Absalão mós tanba la haraik an mak nia la laran-metin ba Jeová. Bíblia hatete katak: “Absalão halo kuda-karreta liurai nian ba nia an rasik no sosa kuda sira no iha mane naʼin-50 halai iha ninia oin.” (2 Samuel 15:1) Nia bosok ema Izraél seluk hodi laran-metin ba nia. Nia mós koko atu oho ninia aman rasik maski nia hatene katak Jeová mak foti David hodi sai ema Izraél nia liurai.—2 Samuel 15:13, 14; 17:1-4.

11. Ita aprende saida husi Abner, Absalão, no Baruc?

¹¹ Se ema ida mak la haraik an no hakarak iha pozisaun, neʼe susar ba nia atu iha laran-metin ba Maromak. Ita bele fiar katak, iha Jeová nia povu nia leet, laiha ema ida mak hakarak sai hanesan Abner ka Absalão neʼebé hanoin an deʼit no laran aat. Maibé dala ruma ita-nia hakarak atu sai riku ka atu buka serbisu boot bele lori perigu ba ita-nia relasaun diʼak ho Jeová. Neʼe mak buat neʼebé akontese ba Jeremias nia sekretáriu, Baruc. Tanba nia hakarak atu buka deʼit sasán ruma, ikusmai neʼe halo nia lakon ninia solok atu serbí Jeová. Tan neʼe Jeová hatete ba nia: “Haree bá! Buat neʼebé haʼu harii ona, haʼu sei sobu, no buat neʼebé haʼu kuda ona, haʼu sei fokit. Haʼu sei halo nuneʼe iha rai neʼe tomak. Maibé ó buka nafatin buat boot sira ba ó-nia an. Keta buka tan buat hirak-neʼe.”  (Jeremias [Yeremia] 45:4, 5) Baruc mós rona ba Jeová. Ita mós tenke rona ba Jeová tanba lakleur tan Jeová atu halakon mundu aat neʼe!

12. Esplika toʼok tanbasá mak kuandu ita hanoin an deʼit la bele ajuda ita atu laran-metin ba Maromak.

¹² Irmaun ida husi rai-Méxiku naran Daniel, nia mós hasoru situasaun ida neʼebé koko tebes ninia laran-metin. Nia hakarak kaben ho feto ida neʼebé laʼós fiar-naʼin. Daniel dehan: “Toʼo haʼu foti ona serbisu pioneiru mós haʼu sei hakerek nafatin karta ba nia. Maibé ikusmai haʼu tenke haraik an hodi fó-hatene katuas kongregasaun neʼebé iha ona esperiénsia barak. Irmaun neʼe ajuda haʼu hodi komprende katak se haʼu hakarak iha laran-metin ba Jeová, haʼu presiza para labele hakerek tan karta ba nia. Haʼu halo orasaun dala barak ho matan-been, no haʼu deside duni la hakerek tan karta ba nia. Ho ida-neʼe, haʼu-nia solok mós komesa aumenta iha haʼu-nia serbisu haklaken.” Ikusmai Daniel kaben ho irmán diʼak ida no agora nia mós serbí daudaun nuʼudar katuas área nian.

13. Bainhira David monu ba sala, oinsá mak Natan hatudu ninia laran-metin ba Maromak no David?

¹³ Se ita mak laran-metin ba Jeová, dala ruma neʼe bele ajuda ita hatudu laran-metin ba ema seluk no ajuda sira. Ezemplu ida mak kona-ba profeta Natan, nia laran-metin ba Jeová, maibé laran-metin mós ba David. Bainhira David halo tiha sala ho Urias nia feen no oho Urias, Jeová haruka Natan ba korrije David. Tanba Natan halo tuir Jeová, ho aten-brani nia bá hasoru David. Hetan tiha David, nia uza matenek hodi koʼalia ba David ho laran-diʼak. Atu ajuda David, nia konta istória ida ba David kona-ba ema riku ida halo buat ida la ho justisa. Ema riku neʼe hadau ema kiak ida nia bibi-oan. Bainhira David rona kona-ba istória neʼe, nia sai hirus tebes ba buat neʼebé ema riku neʼe halo. Depois mak Natan hatete ba nia: “Ó mak mane neʼe!” Ho ida-neʼe David rekoñese katak nia halo sala ona kontra hasoru Jeová.—2 Samuel 12:1-7, 13.

14. Oinsá mak laran-diʼak bele ajuda ita laran-metin ba Jeová no ba ema seluk?

¹⁴ Laran-diʼak mós bele ajuda ita laran-metin ba Jeová no ema seluk. Porezemplu, karik ita iha evidénsia kona-ba irmaun ka irmán ida neʼebé monu ba sala boot. Karik tanba ema neʼe mak ita-nia kolega diʼak ka família ida, ita hakarak hatudu laran-metin ba nia. Maibé se ita mak taka deʼit ninia sala, neʼe bele halo ita la hatudu laran-metin ba Jeová, tanba ita tenke laran-metin ba Jeová liu fali laran-metin ba ema.  Entaun atu halo tuir Natan nia ezemplu, ita hakarak halo tuir Jeová hodi hatudu laran-diʼak ba ema neʼe. Husu ita-nia kolega ka família neʼe atu bá buka ajuda husi katuas kongregasaun sira. Se liu tiha tempu balu nia seidauk bá, ita rasik mak tenke bá fó-hatene katuas sira tanba neʼe envolve ita-nia laran-metin ba Jeová no ba ema neʼe. Se ita halo nuneʼe, ita hatudu katak ita laran-diʼak ba ita-nia kolega ka família neʼe tanba katuas sira sei ajuda nia atu iha fali relasaun diʼak ho Jeová, sira mós sei ajuda nia ho laran-maus no diʼak.—Lee Levítico (Imamat) 5:1; ^[3] Galásia 6:1.

15, 16. Tanbasá mak Husai presiza aten-brani atu nia bele laran-metin ba Maromak?

¹⁵ Liurai David iha belun laran-metin ida naran Husai. Bainhira ema hakarak foti Absalão atu sai liurai, neʼe koko tebes Husai nia laran-metin ba David no Maromak. Nia hatene katak Absalão lori soldadu barak tama ona iha Jeruzalein atu hadau David nia kadunan, no David halai tiha ona husi Jeruzalein. (2 Samuel 15:13; 16:15) Agora Husai atu halo saida? Fila kotuk ba David hodi apoia fali Absalão ka lae? Lae, maski nia hatene katak David idade ona no ema barak mós buka hela atu oho David, maibé nia sei hanoin-hetan katak Jeová mak foti David hodi sai liurai, tan neʼe nia laran-metin nafatin ba David. Nia ba hasoru David iha Foho Oliveira nian.—2 Samuel 15:30, 32.

¹⁶ Maibé David husu nia atu fila fali ba Jeruzalein, atu finje sai Absalão nia kolega hodi Absalão rona ba ninia konsellu duké rona ba Aitofel. Husai la taʼuk mate hodi halo tuir David, no neʼe hatudu katak nia iha laran-metin duni ba Jeová. David mós halo orasaun ba Jeová hodi ajuda Husai, no Jeová rona duni David nia orasaun, tanba Absalão rona duni ba Husai nia konsellu duké Aitofel nian.—2 Samuel 15:31; 17:14.

17. Tanbasá mak ita presiza aten-brani atu bele laran-metin?

¹⁷ Ohin loron ita mós presiza aten-brani atu bele laran-metin ba Jeová duké halo tuir deʼit família, kolega serbisu, ka ema husi governu sira-nia hakarak. Porezemplu, irmaun Taro husi rai-Japaun, husi kiʼik ninia hakarak mak atu halo ninia inan-aman kontente. Nia laran-metin tebes ba sira no halo tuir deʼit sira tanba nia hadomi tebes sira. Maibé sira la gosta nia estuda ho Testemuña ba Jeová no sira mós hakarak hapara nia. Neʼe halo nia triste tebes, tan neʼe mak susar tebes ba nia atu fó-hatene ba sira katak nia deside ona atu tuir reuniaun. Taro hatete: “Sira hirus tebes ho haʼu no sira bandu haʼu labele ba vizita sira ba tinan barak tebes. Haʼu halo orasaun atu aten-brani nafatin hodi kaer metin ba haʼu-nia desizaun neʼe. Agora sira sai mamar uitoan ona, no haʼu mós bele vizita beibeik fali sira.”—Lee Provérbios (Amsal) 29:25. ^[4]

18. Ita aprende saida husi lisaun neʼe?

¹⁸ Se ita mak halo tuir David, Jónatas, Natan, no Husai nia ezemplu hodi laran-metin ba Jeová, ita mós sei sente kontente tebes. Ita hakarak duni atu sees husi Abner no Absalão nia hahalok la laran-metin sira. Tanba ita ema sala-naʼin, dala ruma ita bele halo sala, maibé ita tenke hanoin-hetan nafatin katak importante tebes atu laran-metin ba Jeová.