1-3. (a) Tanbasá mak ita bele fiar katak ita mós bele sai Maromak nia belun? (b) Ita sei koʼalia kona-ba saida iha lisaun neʼe?

BÍBLIA hatete katak Abraão mak Maromak nia belun. (Isaías [Yesaya] 41:8; Tiago 2:23) No só nia mesak deʼit mak Bíblia temi nuneʼe. Se nuneʼe, ita bele dehan katak Abraão mesak mak bele sai Jeová nia belun ka lae? Lae, tanba Bíblia hatete katak ita hotu bele sai Maromak nia belun.

² Iha Maromak nia Liafuan, ita bele lee kona-ba mane no feto barak mak hamtaʼuk Jeová, tau fiar ba nia, no sai ninia belun diʼak. (Lee Salmo [Mazmur] 25:14.) ^[1] Apóstolu Paulo mós koʼalia kona-ba “sasin barak”, sira mak ema husi fatin oioin neʼebé mós sai ona Maromak nia belun.—Ebreu 12:1.

³ Mai ita koʼalia kona-ba Jeová nia belun diʼak naʼin-tolu neʼebé temi iha Bíblia: (1) Rute, feto-faluk joven ida husi rai-Moab; (2) Ezekias, liurai laran-loos husi rai Judá; no (3) Maria, Jesus nia inan neʼebé haraik an. Saida mak ita bele aprende husi dalan neʼebé sira ida-idak haburas sira-nia relasaun diʼak ho Maromak?

4, 5. Rute presiza foti desizaun susar saida, no tanbasá mak desizaun neʼe susar ba nia? (Haree dezeñu iha leten.)

⁴ Noemi ho ninia feto-foun naʼin-rua, Rute no Orpa, laʼo hela  husi rai-Moab atu bá rai-Izraél. Toʼo tiha dalan klaran, Orpa deside atu fila fali ba Moab. Maibé Noemi hakarak laʼo nafatin ba Izraél, ninia moris-fatin. Oinsá ho Rute? Nia bele hili dalan rua, primeiru, fila ba ninia rai-Moab, ka segundu bá hamutuk ho ninia banin-feto, Noemi, atu ba Belein.—Rute 1:1-8, 14.

⁵ Tuir loloos ba Rute, neʼe la problema ba nia atu fila ba Moab. Ninia família sei simu fali nia hodi tau matan ba nia. Nia mós koñese ema Moab nia língua no kultura tanba neʼe mak ninia língua no kultura rasik. Maibé, se nia fila ho Noemi ba Belein, neʼe bele sai problema ida ba nia. Tan neʼe Noemi husu ba nia atu hela deʼit iha Moab, tanba Noemi taʼuk katak nia la bele buka laʼen foun ida ka uma ida ba Rute. Entaun, saida mak Rute deside atu halo? Orpa “fila fali ona ba ninia povu no ninia maromak sira”. (Rute 1:9-15) Rute mós hakarak atu fila fali ba ninia ema no ninia maromak falsu sira ka lae? Lae.

6. (a) Rute foti desizaun matenek saida? (b) Tanbasá mak Boas gaba katak Rute hetan protesaun iha Jeová nia liras okos?

⁶ Karik liuhusi Rute nia laʼen neʼebé mate ona, ka liuhusi Noemi mak Rute aprende kona-ba Jeová. Jeová la hanesan duni ho ema Moab nia maromak sira. Tan neʼe mak Rute hakarak hadomi no adora Jeová. Tuirmai Rute foti desizaun matenek ida. Nia dehan ba Noemi: “Ita-nia povu sei sai haʼu-nia povu, no Ita-nia Maromak, haʼu-nia Maromak.” (Rute 1:16) Rute hadomi tebes Noemi, maibé nia hadomi liu Jeová. Tan neʼe mak Boas gaba Rute tanba Rute buka protesaun iha Jeová nia liras okos. (Lee Rute 2:12.) ^[2] Boas nia liafuan halo ita hanoin fali manu-oan nurak sira neʼebé subar iha manu-inan nia liras okos hodi proteje sira-nia an. (Salmo [Mazmur] 36:7; 91:1-4) Iha dalan neʼe duni mak Jeová proteje Rute. Nia fó kolen ba Rute tanba tau fiar ba nia. Ba Rute, desizaun neʼebé nia halo mak desizaun neʼebé diʼak tebes.

7. Tanbasá mak ita la presiza taʼuk atu dedika ita-nia an ba Jeová?

⁷ Ema barak aprende ona kona-ba Jeová, maibé sira sei duvida hela kona-ba buka protesaun iha nia. Sira sei laran-rua hela kona-ba atu dedika sira-nia an no hetan batizmu. Se ita mak iha hela situasaun hanesan neʼe, buka-hatene toʼok saida mak halo ita laran-rua. Tanba hakarak ka lakohi, ita serbí hela maromak ida. (Josué [Yosua] 24:15) Tan neʼe ita tenke halo desizaun neʼebé matenek hodi serbí Maromak neʼebé loos. Bainhira ita dedika ita-nia an ba Jeová, ita hatudu katak ita tau fiar ba nia no hakarak buka protesaun husi nia. Jeová sei ajuda ita atu kontinua serbí nia no tahan hasoru problema hotu neʼebé ita sei hasoru. Ida-neʼe mak dalan neʼebé nia tau matan ba Rute.

8. Konta toʼok kona-ba Ezekias nia moris.

⁸ Ezekias nia moris la hanesan ho Rute. Nia ema Izraél no moris mai dedika an tiha ona ba Jeová. Maibé iha ninia tempu, ema Izraél barak mak la moris tuir sira-nia dedikasaun ba Jeová. Ezemplu ida mak kona-ba ninia aman, Liurai Akaz. Nia ema aat tebes. Iha ninia ukun, nia lori ema judeu barak ba adora estátua, no nia mós la hatudu respeitu ba Jeová nia templu iha Jeruzalein. Bainhira Ezekias sei kiʼik, ninia aman Akaz mós sunu moris Ezekias nia maun-alin barak ba maromak falsu sira.—2 Reis (Raja-Raja) 16:2-4, 10-17; 2 Crônicas (Tawarikh) 28:1-3.

9, 10. (a) Tanbasá mak Ezekias mós bele sai ema neʼebé moruk? (b) Tanbasá mak ita la bele sai hirus ho Jeová? (c) Tanbasá mak hahalok husi família la bele determina ita atu moris oinsá iha futuru?

⁹ Akaz nia hahalok aat sira tuir loloos  bele book Ezekias sai moruk no kontra Jeová. Ohin loron, ema balu mós iha esperiénsia moris neʼebé moruk maibé karik la moruk liu Ezekias nian. Tan neʼe, sira sente katak sira iha razaun atu “sai hirus tebes hasoru Jeová” ka hasoru ninia organizasaun. (Provérbios [Amsal] 19:3) Ema balu tan, duun sira-nia família nia hahalok aat mak halo sira iha moris neʼebé ladiʼak, ka duun inan-aman nia hahalok mak book sira halo tuir. (Ezequiel [Yehezkiel] 18:2, 3) Ema baibain dehan: “Ai-fuan ida la monu dook husi ninia hun.” Maibé hanoin hanesan neʼe loos ka lae?

¹⁰ Husi Ezekias nia ezemplu, ita bele hatete katak hanoin hanesan neʼe laloos! Ema laiha kualkér razaun atu hirus ba Jeová, tanba Jeová nunka halo buat aat ba ema. (Jó [Ayub] 34:10) Karik dala ruma inan-aman nia hahalok bele duni book oan atu halo aat ka diʼak. (Provérbios [Amsal] 22:6; Koloso 3:21) Maibé neʼe la dehan katak hahalok husi família nian mak determina ita atu moris oinsá iha futuru, loos ka lae? Tanbasá mak ita koʼalia hanesan neʼe? Tanba Jeová kria ita ema ho liberdade, ita rasik mak hili atu halo buat diʼak ka aat. (Deuteronômio [Ulangan] 30:19) Oinsá mak Ezekias uza ninia liberdade neʼe?

11. Saida mak halo Ezekias sai liurai neʼebé diʼak tebes iha rai-Judá?

¹¹ Maski Ezekias nia aman mak liurai neʼebé aat tebes iha rai-Judá, maibé Ezekias la hanesan neʼe, nia sai ema neʼebé diʼak tebes. (Lee 2 Reis [Raja-Raja] 18:5, 6.) ^[3] Nia la husik ninia aman nia hahalok aat sira book nia atu halo aat. Nia hili atu halo tuir ezemplu diʼak husi Jeová nia profeta sira, hanesan Isaías, Miquéias, no Oseias. Nia halo tuir sira-nia konsellu ho laran. Buat sira-neʼe book nia hodi hadiʼa fali buat aat sira neʼebé ninia aman halo iha rai-Judá. Nia hamoos fali Jeová nia templu, husu Jeová fó perdua ba povu sira-nia sala, no harahun hotu estátua sira. (2 Crônicas [Tawarikh] 29:1-11, 18-24; 31:1) Bainhira Liurai Senaquerib husi rai-Asíria ameasa atu ataka Jeruzalein, Ezekias hatudu aten-brani no iha fiar neʼebé metin. Nia tau fiar ba Jeová atu proteje sira no nia mós hametin povu nia fiar liuhusi ninia liafuan no hahalok sira. (2 Crônicas [Tawarikh] 32:7, 8) Ikusmai tanba nia hatudu hahalok foti-an, nia  hetan konsellu, maibé nia hatudu haraik-an hodi hakribi ninia sala neʼe. (2 Crônicas [Tawarikh] 32:24-26) Husi neʼe ita bele haree duni katak Ezekias nunka husik ninia aman nia hahalok sira atu estraga ninia moris. Nia hatudu katak nia mak Jeová nia belun. Ninia ezemplu neʼe diʼak tebes ba ita hotu atu banati-tuir, loos ka lae?

12. Oinsá mak ema barak mós hakarak sai Jeová nia belun hanesan Ezekias?

¹² Ita moris iha mundu neʼebé aat no laiha domin. Tan neʼe iha ema barak mak boot iha família neʼebé inan-aman la hadomi no la tau matan didiʼak ba sira. (2 Timóteo 3:1-5) Maski irmaun-irmán balu mós mai husi família hanesan neʼe, maibé sira hili atu sai Jeová nia belun. Sira mós hanesan Ezekias, sira la husik família nia hahalok determina sira atu moris oinsá iha futuru. Maromak fó liberdade ba ema hotu, no ita bele uza ita-nia liberdade neʼe atu serbí Jeová, hahiʼi no fó glória ba nia hanesan Ezekias halo iha tempu uluk.

13, 14. Tanbasá mak Maria nia knaar haree hanesan knaar neʼebé todan, maibé nia hatán oinsá ba Gabriel nia liafuan sira?

¹³ Tinan atus hirak liutiha husi Ezekias nia tempu, iha mós feto joven haraik-an ida naran Maria. Nia simu knaar espesiál ida husi Jeová tanba nia iha relasaun neʼebé besik ho Jeová. Ninia knaar mak atu koʼus, fó moris, no haboot Maromak nia Oan-Mane mesak. Ita bele fiar katak Jeová hadomi no iha fiar ba nia mak Jeová fó knaar neʼe ba nia. Maibé bainhira Maria foin simu knaar neʼe, nia sente oinsá?

¹⁴ Bainhira ita hanoin kona-ba Maria nia knaar, karik ita hanoin deʼit kona-ba knaar neʼe mak priviléjiu boot duni, maibé karik ita ladún hanoin kona-ba Maria sente oinsá. Porezemplu, anju Gabriel fó-hatene Maria katak maski nia seidauk toba ho mane ida, nia sei sai isin-rua liuhusi milagre ida. Maibé iha tempu neʼebá, anju Gabriel la esplika ba Maria nia família no viziñu sira katak Maria nia isin-rua neʼe úniku tebes. Entaun, se sira mak hatene katak Maria sai isin-rua derrepente deʼit, sira sei hanoin oinsá? Oinsá mak nia bele esplika ba ninia namoradu katak nia nunka toba ho mane seluk? Liután neʼe, atu haboot, tau matan didiʼak, no hanorin Maromak nia Oan-Mane mak responsabilidade neʼebé boot tebes! Karik iha momentu neʼebá Maria nia hanoin runguranga tebes. Maibé ita hatene katak nia halo tuir deʼit Gabriel nia liafuan, tanba nia hatán: “Haree! Haʼu mak Jeová nia atan-feto! Halo buat hotu sai loos ba haʼu hodi tuir liafuan neʼebé Ita fó sai.”—Lucas 1:26-38.

15. Tanbasá mak Maria iha duni fiar?

¹⁵ Maria tau fiar duni ba Jeová. Nia haree  ninia an hanesan atan neʼebé prontu atu halo tuir deʼit ninia naʼi nia hakarak. Nia fiar katak ninia Naʼi, Jeová sei tau matan no proteje nia. Maibé Maria nia fiar neʼe mai husi neʼebé? Fiar laʼós ita moris mai iha kedas ona. Ita iha fiar tanba ita-nia hakaʼas an no mai husi Jeová nia bensaun. (Galásia 5:22; Éfeso 2:8) Saida mak hatudu katak Maria mós tanba hakaʼas an mak nia iha fiar neʼebé boot? Liuhusi dalan neʼebé nia rona no koʼalia.

16. Saida mak hatudu katak Maria mak ema neʼebé sempre rona ho didiʼak?

¹⁶ Dalan neʼebé Maria rona. Bíblia anima ita “tenke lalais atu rona, neineik atu koʼalia”. (Tiago 1:19) Maria mak ema neʼebé hanesan neʼe ka lae? Sin, nia ema hanesan neʼe duni. Evanjellu Lucas temi dala rua katak Maria rona ho laran kona-ba liafuan sira neʼebé nia rona, liuliu kona-ba Jeová. Nia mós medita didiʼak liafuan sira-neʼe. Ezemplu primeiru mak bainhira bibi-atan sira hatoʼo fali anju nia mensajen ba nia iha tempu Jesus foin moris. No ezemplu segundu mak iha tempu neʼebé Jesus tinan 12, Jesus koʼalia liafuan kleʼan ida ba nia. Iha situasaun rua neʼe, Maria rona liafuan sira ho didiʼak, rai hela iha ninia laran, no mós hanoin didiʼak kona-ba liafuan sira-neʼe.—Lee Lucas 2:16-19, 49, 51.

17. Ita bele aprende saida kona-ba Maria liuhusi dalan neʼebé nia koʼalia?

¹⁷ Dalan neʼebé Maria koʼalia. Bíblia la hakerek hotu Maria nia liafuan sira. Ninia liafuan naruk liu mak hakerek iha Lucas 1:46-55. Husi liafuan sira-neʼe ita bele haree katak nia hatene duni Eskritura Lia-Ebraiku. Tanba ninia liafuan sira-neʼe atu hanesan ho liafuan sira neʼebé Samuel nia inan, Ana temi iha orasaun. (1 Samuel 2:1-10) Se ita haree ba ninia liafuan sira, ita bele haree katak Maria uza eskritura 20 hanesan neʼe. Husi ezemplu neʼe ita bele fiar katak Maria gosta tebes atu koʼalia kona-ba Jeová. Nia rai no hafolin tebes lia-loos neʼebé nia aprende husi ninia Belun boot, Jeová iha ninia laran.

18. Iha dalan saida deʼit mak ita bele banati-tuir Maria nia fiar?

¹⁸ Karik ita mós bele sente hanesan Maria bainhira ita simu knaar ida husi Jeová, ita bele sente katak knaar neʼe todan tebes ba ita. Se nuneʼe, ita hakarak halo tuir Maria nia ezemplu atu tau fiar tomak ba Jeová hodi ajuda ita. Ita mós bele aprende husi Maria nia fiar hodi rona didiʼak ba buat sira neʼebé ita aprende daudauk kona-ba Jeová no ninia planu sira. Medita didiʼak kona-ba lia-loos, no fahe fali buat neʼebé ita aprende husi lia-loos ho laran solok ba ema seluk.—Salmo (Mazmur) 77:11, 12; Lucas 8:18; Roma 10:15.

19. Se ita mak banati-tuir fiar-naʼin sira-nia ezemplu husi Bíblia, ita sei hetan bensaun saida?

¹⁹ Ita bele haree katak, Rute, Ezekias, no Maria mak Jeová nia belun duni hanesan mós ho Abraão. Sira mós parte husi “sasin barak” neʼebé sai ona Jeová nia belun. Diʼak atu banati-tuir sira-nia fiar. (Ebreu 6:11, 12) Se ita mak halo tuir sira, ita mós sei sai Jeová nia belun ba nafatin!