HAʼU moris iha Crooksville, Ohio, Estadus Unidus, iha tinan 1926. Apá-amá ladún interese ba relijiaun, maibé sira haruka ami oan naʼin-ualu bá igreja. Haʼu bá tuir igreja Metodista. Bainhira haʼu toʼo tinan 14, pastór ida fó prémiu ba haʼu tanba iha tinan ida nia laran haʼu nunka falta bá misa iha domingu.

Maizumenus iha tempu neʼebá mak ami-nia viziñu ida naran Margaret Walker komesa vizita amá hodi koʼalia kona-ba Bíblia. Nia mak Testemuña ba Jeová ida. Loron ida, haʼu hakarak tuur hamutuk ho amá hodi rona sira estuda, maibé amá haruka haʼu sai ba liʼur tanba nia hanoin haʼu sei halo barullu ba sira-nia estudu. Haʼu tuur nafatin hodi rona sira. Margaret mai vizita tiha tempu balu, nia husu haʼu, “Ó hatene Maromak nia naran ka lae?” Haʼu hatán, “Ema hotu hatene ninia naran mak Maromak.” Nia hatete fali ba haʼu, “Foti ó-nia Bíblia no loke ba Salmo 83:18.” Haʼu bá no haʼu haree duni katak Maromak nia naran mak Jeová. Ho ida-neʼe, haʼu halai ba kolega sira iha liʼur hodi hatete ba sira, “Orasida kalan se imi fila ba uma, loke Bíblia ba Salmo 83:18 hodi buka toʼok Maromak nia  naran mak saida.” Ita bele hatete katak haʼu komesa haklaken husi tempu neʼe kedas.

Haʼu estuda Bíblia no hetan batizmu iha tinan 1941. Lakleur deʼit haʼu simu knaar atu tau matan ba grupu estudu livru nian. Haʼu mós anima amá ho haʼu-nia biin-alin sira atu tuir, no sira hotu tuir duni grupu estudu livru, só apá deʼit mak laiha interese.

Haʼu simu tan knaar balu husi kongregasaun, no iha uma haʼu halo biblioteka kiʼik ida ba haʼu-nia livru sira. Loron ida, apá hatudu ba livru sira-neʼe no hatete ba haʼu: “Ó haree livru sira-neʼe ka? Haʼu hakarak ó ho livru sira-neʼe sai husi uma neʼe.” Haʼu muda husi uma no hetan fatin kiʼik ida ladook husi uma, iha Zanesville, Ohio, maibé haʼu vizita beibeik uma atu fó anima ba haʼu-nia família.

Apá mós bandu amá atu la bele bá tuir reuniaun sira. Dala ruma kuandu amá sai husi uma atu bá reuniaun, apá halai tuir nia no dada fali amá tama ba uma. Maibé amá sempre halai fali husi odamatan seluk hodi bá fali reuniaun. Haʼu dehan ba amá: “Lalika taʼuk. Nia duni tuir beibeik hanesan neʼe, nia mak sei sai kole rasik sá.” Loos duni, ikusmai apá mak sai baruk atu bandu tan amá, entaun amá mós livre atu tuir reuniaun sira.

Ami-nia kongregasaun komesa halaʼo Eskola Serbisu Kristaun husi tinan 1943, no husi tempu neʼebá haʼu mós hatoʼo diskursu estudante nian. Konsellu neʼebé haʼu simu husi eskola neʼe ajuda tebes haʼu atu hatene oinsá bele koʼalia ho ema.

Iha tempu neʼebá, Funu Mundiál Segundu laʼo manas hela. Iha tinan 1944, sira mai bolu haʼu tama militár. Haʼu bá postu militár nian iha Fort Hayes, Columbus, Ohio. Sira koko haʼu-nia saúde, no haruka haʼu prenxe formuláriu balu. Haʼu mós fó-hatene ba sira katak haʼu sei la sai soldadu ida. Sira husik haʼu fila ba uma. Maibé loron balu liutiha, polísia ida mai uma no hatete ba haʼu: “Corwin Robison, haʼu lori surat neʼe mai atu kaer Ita.”

Semana rua liutiha, iha tribunál, juis hatete: “Se neʼe mak konforme haʼu, haʼu sei fó kastigu Ita toʼo Ita mate. Ita iha buat seluk tan ka lae atu koʼalia?” Haʼu hatán: “Ba Ita-Boot onoráriu, haʼu mak hanesan mestre relijiaun ida. Ema hotu nia eskada iha odamatan oin mak hanesan haʼu-nia plataforma, no haʼu haklaken liafuan diʼak kona-ba Maromak nia Ukun ba ema barak.” * (Haree nota iha kraik.) Juis neʼe hatete ba juri sira: “Imi mai laʼós atu haree katak ema neʼe mestre ka laʼós, maibé imi mai atu haree katak ema neʼe tama militár ona ka seidauk.” La toʼo minutu 30, juri sira fila ho desizaun katak haʼu sala. Juis julga haʼu ba tinan lima iha Ashland, Kentucky nia komarka.

Haʼu hela iha Columbus, Ohio nia prizaun ba semana rua, no loron primeiru sira hatama haʼu ba haʼu-nia sala kadeia. Haʼu halo orasaun ba Jeová: “Haʼu la bele tahan atu hela iha kadeia ba tinan lima. Haʼu la hatene atu halo saida.”

Loron tuirmai, sira husik haʼu sai husi sala kadeia nian. Haʼu hakbesik ba prizioneiru ida  neʼebé alturas no isin-boot. Nia hamriik hateke hela ba liʼur husi janela. Nia husu mai haʼu, “Mau-badak, ó halo saida mak sira hatama ó iha neʼe?” Haʼu hatete, “Haʼu mak Testemuña ba Jeová ida.” Nia dehan, “Tebes ka? Entaun tanbasá mak sira kaer ó?” Haʼu dehan, “Tanba Testemuña ba Jeová lakohi bá funu no oho ema.” Nia dehan, “Sira hatama ó iha komarka tan deʼit ó lakohi oho ema. Maibé sira mós kaer ema neʼebé oho ema hodi hatama iha komarka laran. Neʼe tama kakutak ka lae?” Haʼu dehan, “Lae, la tama kakutak.”

Depois nia hatete ba haʼu, “Haʼu hela iha komarka seluk ba tinan 15 ona, haʼu mós lee ona kona-ba imi-nia livru sira.” Tuirmai haʼu halo orasaun, “Jeová, ajuda haʼu hodi ema neʼe proteje haʼu.” Iha momentu neʼe kedas, Paulo, neʼe mak ninia naran, dehan: “Se ema ida mak book ó, hakilar deʼit. Haʼu mak sei arruma sira.” Hodi nuneʼe mak husi prizioneiru naʼin-50 sira-neʼe, laiha ida mak book haʼu.

Bainhira sira muda haʼu ba komarka iha Ashland, afinál sira mós kaer ona irmaun barak iha neʼebá. Ransu hamutuk ho irmaun sira-neʼe ajuda tebes haʼu-nia fiar. Iha prizaun laran, irmaun sira haruka ami lee no estuda eskritura sira neʼebé sira hili didiʼak ona. Sira fahe ami ba grupu ida-idak no halo pergunta no resposta kona-ba eskritura sira-neʼe ho grupu hotu. Iha neʼe, ami mós iha irmaun ida neʼebé tau matan ba haklaken-fatin, no ami-nia kuartu mak sala neʼebé boot no iha toba-fatin barak iha didin nia ninin sira. Irmaun neʼe hatete ba haʼu: “Robison, Ita mak tau matan ba toba-fatin ida-neʼe no ida-neʼe. Se ema ruma mak mai toba iha neʼe, toba-fatin neʼe mak Ita-nia haklaken-fatin. Keta haluha tenke haklaken ba nia antes nia sai husi fatin neʼe.” Dalan neʼe mak ami uza atu haklaken iha prizaun laran.

Funu Mundiál Segundu remata iha tinan 1945, maibé haʼu sei hela iha prizaun ba tempu balu tan. Haʼu hanoin tebes amá ho biin-alin sira, tanba apá uluk koʼalia ona katak, “Se haʼu mak bele hasai ó husi uma neʼe, sira restu mós la problema ba haʼu.” Bainhira haʼu sai husi prizaun, haʼu hakfodak tebes hodi haree katak, maski apá bandu makaʼas, maibé haʼu-nia biin-alin naʼin hitu tuir nafatin reuniaun sira, no alin-feto ida mós hetan ona batizmu.

Funu Koreia nian akontese iha tinan 1950. Dala ida tan sira haruka haʼu bá atu aprezenta an iha postu militár iha Fort Hayes. Koko tiha haʼu-nia saúde, komandante ida dehan, “Iha grupu neʼe, Ita-nia valór mak aas liu hotu.” Haʼu dehan ba nia, “Neʼe diʼak, maibé haʼu lakohi sai militár.” Haʼu uza eskritura husi 2 Timóteo 2:3 hodi esplika ba nia katak,  “Haʼu sai tiha ona Kristu nia soldadu ida.” Nonook tiha ba tempu uitoan, nia dehan, “Ita bele bá ona.”

Liutiha tempu uitoan, haʼu tuir enkontru ida kona-ba serbí iha Betel iha reuniaun boot ida iha Cincinnati, Ohio. Irmaun Milton Henschel hatete ba ami katak, se irmaun ida hakarak serbisu makaʼas ba Maromak, ninia organizasaun bele uza irmaun neʼe iha Betel. Haʼu mós hatama haʼu-nia formuláriu, no sira simu haʼu serbí iha Betel Brooklyn iha fulan-Agostu 1954. Komesa husi tempu neʼebá haʼu serbí deʼit iha Betel.

Iha Betel serbisu barak tebes. Haʼu-nia serbisu mak kaer no hadiʼa mákina sira, no hadiʼa xave sira. Haʼu halo serbisu sira-neʼe ba tinan barak tebes. Haʼu mós serbisu iha salaun ba reuniaun boot sira iha sidade Novaiorke.

Haʼu gosta tebes moris iha Betel, haʼu gosta toman sira hanesan tuir adorasaun dadeer no Estudu Livru Haklaken nuʼudar família Betel, no mós bá haklaken hamutuk ho kongregasaun. Haʼu sente neʼe diʼak ba família Testemuña hotu atu halo tuir programa sira-neʼe. Kuandu inan-aman ho oan sira mak lee eskritura loroloron nian hamutuk, nunka falta atu halaʼo Adorasaun Família nian, partisipa iha reuniaun sira, no haklaken ho badinas, neʼe bele ajuda família tomak hamriik metin iha lia-loos.

Haʼu halo kolega barak ho ema Betel no kongregasaun sira. Balu ema kose-mina neʼebé saʼe ona ba lalehan. Maibé Jeová nia atan hotu, inklui mós ema Betel, sira hotu la perfeitu. Se haʼu mak iha problema ruma ho irmaun ida, haʼu bá buka dame kedas ho nia. Haʼu hanoin kona-ba Mateus 5:23, 24 no oinsá mak bele uza eskritura neʼe atu rezolve problema balu. La fasil atu husu deskulpa ba ema, maibé dala barak husu tiha deskulpa, problema mós la dada naruk tan.

Tanba idade, agora haʼu sente susar atu haklaken husi uma ba uma, maibé haʼu nunka rende an. Haʼu aprende ona língua mandarín uitoan hodi haklaken ba ema Xina iha estrada ibun. Iha dadeer balu, haʼu fahe revista 30 toʼo 40 hanesan neʼe.

Haʼu mós iha vizita fali ida iha rai-Xina!  Loron ida, haʼu hasoru feto joven ida neʼebé hatudu oin-midar ba haʼu bainhira nia fahe hela surat iklan kona-ba fatin faʼan ai-fuan nian. Haʼu mós hatudu oin-midar ba nia no fó nia Livru Haklaken ho Matan-Moris bá! iha língua Xina. Nia simu tiha no nia fó-hatene haʼu katak nia naran Katie. Tan neʼe bainhira haʼu hasoru nia, nia sempre hakbesik no koʼalia ho haʼu. Haʼu hanorin nia kona-ba ai-fuan ho modo nia naran iha inglés, no nia mós repete tuir haʼu. Haʼu mós esplika eskritura ba nia, no fó livru Bíblia Hanorin ba nia. Maibé semana balu liutiha, haʼu nunka hasoru fali nia.

Fulan balu liutiha, haʼu hasoru feto joven seluk neʼebé mós fahe hela surat iklan, no nia mós simu revista sira husi haʼu. Semana ida liutiha, nia lori ninia telefone mai no hatete ba haʼu, “Ita koʼalia ba rai-Xina.” Haʼu dehan, “Haʼu la koñese ema ida iha rai-Xina.” Maibé nia obriga nafatin haʼu atu koʼalia, tan neʼe haʼu simu telefone neʼe no dehan, “Sin, neʼe ho Robison, koʼalia bá.” Ema ida koʼalia husi telefone dehan, “Maun Robby, neʼe haʼu, Katie. Haʼu fila ona ba rai-Xina.” Haʼu hatán, “Xina?” Katie hatán fali, “Neʼe sá, maun Robby. Ita hatene feto joven neʼebé fó hela telefone ba Ita mak sé? Nia mak haʼu-nia alin. Ita uluk hanorin buat diʼak barak mai haʼu. Favór ida hanorin fali buat sira-neʼe ba nia.” Haʼu hatete, “Katie, haʼu sei hakaʼas an. Obrigadu tanba fó-hatene haʼu Ita iha neʼebé.” Liutiha ida-neʼe, haʼu mós la hasoru tan Katie nia alin ona. Haʼu la hatene agora sira naʼin-rua iha neʼebé, maibé haʼu hein katak sira mós sei aprende kona-ba Jeová.

Haʼu halo Jeová nia serbisu santu ba tinan 73 ona. Haʼu agradese tebes tanba Jeová ajuda haʼu atu la mete ba buat funu nian no ajuda haʼu mantein haʼu-nia relasaun diʼak ho nia bainhira haʼu iha komarka laran. Haʼu-nia biin-alin sira mós fó-hatene ba haʼu katak, maski apá kontra makaʼas maibé haʼu nunka rende an, neʼe anima tebes sira. Amá no sira naʼin-neen seluk mós hetan ona batizmu. Ikusmai apá nia laran sai mamar ona, no antes nia mate, nia mós tuir ona reuniaun balu.

Se neʼe mak tuir Maromak nia hakarak, haʼu-nia família no belun hotu sei moris fali iha mundu foun. Imajina toʼok ita hotu nia solok atu bele serbí Jeová hamutuk ho ema neʼebé ita hadomi ba tempu neʼebé la bele sura. *