IHA Bíblia nia tempu, noivu nia família presiza selu barlake ba noiva nia família bainhira família rua tuur hamutuk atu koʼalia kona-ba kaben. Barlake bele inklui sasán neʼebé folin-boot, animál ka osan. Dala ruma, noivu selu barlake liuhusi halo serbisu ba noiva nia família. Porezemplu, Jacob halo serbisu durante tinan hitu ba Raquel nia aman atu Jacob bele kaben ho Raquel. (Gén 29:17, 18, 20) Saida mak objetivu husi kostume neʼe?

Matenek-naʼin ida kona-ba Bíblia naran Carol Meyers hatete: “Barlake nia objetivu mak atu taka buat neʼebé noiva nia família lakon tanba sira-nia oan-feto la serbisu tan ba sira, ida-neʼe importante tebes ba família sira neʼebé halo toʼos.” Barlake mós ajuda hametin relasaun diʼak entre família rua. Noiva no noivu nia família bele ajuda malu bainhira hasoru susar. Liután neʼe, kuandu selu tiha barlake, neʼe prova katak feto troka ona prenda no agora ninia laʼen mak iha responsabilidade atu tau matan no proteje nia, laʼós tan ninia aman.

Maibé selu barlake la dehan katak feto mak objetu neʼebé ema bele faʼan no sosa. Livru ida (Ancient Israel—Its Life and Institutions) kona-ba kultura iha Izraél antigu hatete: “Tanba ema Izraél tenke selu osan ka sasán nuʼudar barlake ba feto nia família, neʼe bele halo ema hanoin katak kaben mak hanesan ho negósiu. Maibé iha tempu neʼebá, ema haree [barlake] nuʼudar kompensasaun ba noiva nia família laʼós nuʼudar folin atu sosa feto.”

Ohin loron, iha nasaun balu, ema nafatin halo tuir kostume atu selu barlake. Bainhira inan-aman Kristaun husu noivu atu selu barlake, sira la husu noivu atu selu barlake neʼebé karun demais, hodi halo nuneʼe sira hatudu katak ‘sira la ulun-toos’. (Flp 4:5; 1 Kor 10:32, 33) Sira mós hatudu katak sira la “hadomi osan” no la kaan-teen. (2 Tim 3:2) Liután neʼe, bainhira sira la husu barlake neʼebé karun liu, noivu la presiza demora atu kaben tan deʼit seidauk iha osan natoon atu selu barlake. Ka noivu la sente katak nia presiza para pioneiru no komesa serbisu full-time atu bele manán osan no selu barlake neʼebé karun liu.

Iha nasaun seluk, iha lei kona-ba barlake no inan-aman Kristaun presiza halo tuir lei sira-neʼe. Tanbasá? Bíblia haruka ema Kristaun atu “hakruʼuk ba autoridade sira” no halo tuir lei sira neʼebé la kontra Maromak nia ukun-fuan.—Rom 13:1; Após 5:29.