1. Tanbasá Ita hafolin tebes Bíblia?

 ITA agradese tebes tanba Jeová fó Bíblia ba ita! Bíblia fó matadalan matenek neʼebé bele ajuda ita tahan problema sira ho susesu. Maromak mós fó ba ita esperansa kapás kona-ba futuru. Maibé importante liu mak Jeová fó sai ninia hahalok oioin liuhusi Bíblia. Bainhira ita medita kona-ba ninia hahalok sira, neʼe book tebes ita-nia laran no motiva ita atu sai Maromak nia belun.​—Sal 25:14.

2. Iha dalan saida deʼit mak Jeová fó sai kona-ba ninia an ba ema?

² Jeová hakarak ema atu koñese nia. Iha tempu uluk, nia fó sai kona-ba ninia an liuhusi mehi, vizaun no mós anju sira. (Núm 12:6; Após 10:3, 4) Maibé se ema la hakerek kona-ba mensajen husi anju, kona-ba mehi, ka vizaun sira, ita labele estuda kona-ba neʼe. Tan neʼe, Jeová haruka ema hakerek buat neʼebé nia hakarak ita atu hatene “iha livru ida”. (Jer 30:2) “Maromak loos nia dalan mak perfeitu”, tan neʼe ita bele iha konfiansa katak ninia dalan atu komunika ho ita mak diʼak no lori benefísiu mai ita.​—Sal 18:30.

3. Saida mak Jeová halo atu Bíblia iha toʼo ohin loron? (Isaias 40:8)

³ Lee Isaias 40:8. Durante tinan rihun ba rihun, Maromak nia Liafuan fó sai matadalan diʼak ba ema sira neʼebé laran-metin. Oinsá neʼe bele akontese? Tuir loloos ema hakerek Bíblia kleur liubá iha surat-tahan lulun neʼebé ikusmai sai aat tiha. Entaun ohin loron, ita la iha dokumentu orijinál sira. Maibé Jeová ajuda ema atu halo kopia ba testu sagradu. Maski sira mak ema neʼebé la perfeitu, maibé sira halo kopia ho kuidadu tebes.  Porezemplu, matenek-naʼin ida koʼalia kona-ba Eskritura Lian Ebraiku hodi hakerek: “Ita fiar metin katak la iha livru antigu seluk neʼebé kopia ho loloos hanesan livru neʼe.” Entaun maski ema hakerek Bíblia tinan barak liubá hodi uza materiál neʼebé bele sai aat no ema neʼebé halo kopia mak la perfeitu, maibé ita bele iha konfiansa katak buat neʼebé ita lee iha Bíblia fó sai Jeová nia hanoin.

4. Iha lisaun neʼe, ita sei aprende saida?

⁴ Jeová mak Hun ba “prezente diʼak ida-idak no prezente hotu neʼebé perfeitu”. (Tgo 1:17) Prezente diʼak ida neʼebé Maromak fó mai ita mak Bíblia. Bainhira ema fó prezente ida ba ita, baibain ida-neʼe hatudu sai oinsá nia koñese no hatene ita-nia presiza. Nuneʼe mós ho Bíblia. Bainhira ita ezamina prezente neʼe, ita bele aprende buat barak kona-ba Jeová. Ita aprende katak nia hatene didiʼak ita no mós ita-nia presiza. Iha lisaun neʼe, ita sei aprende kona-ba oinsá Bíblia hatudu sai Jeová nia hahalok tolu: matenek, justisa no domin. Mai ita koʼalia uluk kona-ba Maromak nia matenek.

5. Saida mak dalan ida neʼebé Bíblia hatudu sai Maromak nia matenek?

⁵ Jeová hatene katak ita presiza ninia konsellu neʼebé matenek. Bíblia mak nakonu ho ninia matenek. Bíblia nia konsellu bele fó influénsia diʼak no troka ema nia moris. Bainhira Moisés hakerek livru lima primeiru iha Bíblia, nia hatete ba Maromak nia povu Izraél: “Liafuan sira-neʼe laʼós liafuan mamuk deʼit, maibé neʼe mak moris ba imi.” (Deut 32:47) Ema neʼebé halo tuir Eskritura sira bele hetan moris neʼebé kontente no susesu. (Sal 1:2, 3) Maski Bíblia hakerek tinan barak liubá, maibé neʼe nafatin iha kbiit atu ajuda ema iha moris neʼebé diʼak liu. Porezemplu, ita bele hetan ezemplu barak neʼebé hatudu oinsá Bíblia ajuda fiar-naʼin sira ohin loron iha série “Bíblia troka ema nia moris” iha jw.org.​—1 Tes 2:13.

6. Tanbasá Bíblia la hanesan ho livru sira seluk?

⁶ La iha livru seluk neʼebé hanesan ho Bíblia. Tanbasá? Tanba Maromak Jeová neʼebé dirije ema atu hakerek Bíblia mak kbiit boot, iha ba nafatin no matenek liu fali anju no ema. Ema nia livru barak kontinua iha maski ema neʼebé hakerek ida-neʼe mate ona, maibé dala barak, matadalan iha livru sira-neʼe mós ikusmai la iha folin. Maski nuneʼe, prinsípiu sira iha Bíblia sempre diʼak no ajuda ema oioin neʼebé moris iha tempu neʼebé la hanesan. Bainhira ita lee Bíblia no medita kona-ba buat neʼebé ita aprende, Maromak uza ninia espíritu santu atu ajuda ita hatene oinsá ita bele aplika Bíblia nia matadalan. (Sal 119:27; Mal 3:16; Ebr 4:12) Sin, Jeová neʼebé dirije ema atu hakerek Bíblia mak moris no nia prontu atu ajuda Ita. Ida-neʼe book tebes Ita atu lee Bíblia!

7. Oinsá mak Bíblia ajuda Maromak nia povu atu iha unidade iha tempu uluk?

⁷ Dalan seluk neʼebé Bíblia hatudu sai Maromak nia matenek mak liuhusi ajuda Maromak nia povu atu iha unidade. Bainhira ema Izraél tama ba Rai neʼebé Maromak Promete, sira hela iha fatin oioin. Sira balu sai peskadór, seluk hakiak animál no seluk tan halo toʼos. Karik fasil deʼit ba ema Izraél iha área ida atu la  hanoin ema Izraél iha área seluk. Maibé Jeová halo arranju atu ema Izraél halibur hamutuk iha tempu oioin atu rona amlulik sira lee no esplika Maromak nia Liafuan. (Deut 31:10-13; Neem 8:2, 8, 18) Imajina toʼok ema Izraél neʼebé laran-metin sente oinsá bainhira sira toʼo iha Jeruzalein no haree sira-nia maluk fiar-naʼin millaun ba millaun neʼebé mai husi fatin oioin! Jeová nia arranju neʼe ajuda ninia povu atu kontinua iha unidade. Tuirmai, bainhira kongregasaun Kristaun forma tiha, iha ema neʼebé koʼalia língua oioin no sira-nia situasaun moris la hanesan. Maibé tanba sira hafolin tebes Eskritura, sira bele adora Maromak loos ho unidade. Ema neʼebé sai fiar-naʼin bele komprende Maromak nia Liafuan só deʼit ho ajuda husi maluk fiar-naʼin sira no mós hodi halibur hamutuk.​—Após 2:42; 8:30, 31.

8. Oinsá mak Bíblia ajuda Maromak nia povu atu iha unidade ohin loron?

⁸ Ita-nia Maromak neʼebé matenek kontinua hanorin ita no ajuda ita atu iha unidade liuhusi Bíblia. Ai-han espirituál hotu neʼebé ita simu mai husi Bíblia. Ita halibur hamutuk beibeik iha reuniaun, asembleia no reuniaun boot sira atu rona irmaun sira lee, esplika no koʼalia kona-ba Eskritura sira. Entaun Bíblia mak ekipamentu importante neʼebé Jeová  uza atu ajuda ninia povu “hodi adora nia ho unidade”.​—Sof 3:9.

9. Ita presiza hatudu hahalok saida atu bele komprende Bíblia? (Lucas 10:21)

⁹ Iha buat seluk neʼebé hatudu sai Jeová nia matenek. Eskritura barak hakerek iha dalan neʼebé ema haraik an deʼit mak bele komprende. (Lee Lucas 10:21.) Ema iha fatin oioin bele lee Bíblia. Matenek-naʼin ida hatete katak ema barak liu mak lee Bíblia duké livru sira seluk no sira lee Bíblia ho didiʼak. Maibé ema haraik an deʼit mak bele komprende didiʼak no halo tuir Bíblia.​—2 Kor 3:15, 16.

10. Saida mak dalan seluk neʼebé Bíblia hatudu sai Jeová nia matenek?

¹⁰ Iha dalan seluk tan neʼebé Bíblia hatudu sai Jeová nia matenek. Jeová uza Eskritura sira atu hanorin ninia povu nuʼudar grupu no mós atu hanorin no fó kmaan ba ita ida-idak. Bainhira ita lee Bíblia, ita bele sente katak Jeová hanoin ita ida-idak. (Isa 30:21) Bainhira hasoru problema, dala barak Ita lee eskritura ida neʼebé Ita sente katak hakerek ba Ita rasik. Maibé, Bíblia mós hakerek iha dalan neʼebé ema millaun ba millaun bele komprende. Tanbasá Bíblia iha informasaun neʼebé kona Ita-nia situasaun? Tanba Maromak neʼebé dirije ema atu hakerek Bíblia mak matenek liu hotu iha lalehan no rai.​—2 Tim 3:16, 17.

11. Oinsá Maromak hatudu katak nia la todan ba sorin bainhira hakerek Bíblia?

¹¹ Jeová nia hahalok seluk tan mak justisa. (Deut 32:4) Hahalok justisa mós liga ho hahalok la todan ba sorin no Jeová la todan ba sorin. (Após 10:34, 35; Rom 2:11) Jeová uza língua oioin atu hakerek Bíblia, neʼe hatudu nia la todan ba sorin. Livru 39 primeiru maioria hakerek ho lian Ebraiku neʼebé Maromak nia povu komprende iha tempu neʼebá. Maibé, iha apóstolu sira-nia tempu, ema barak koʼalia lian Gregu, entaun livru 27 ikus hakerek ho língua neʼe. Jeová la deside atu hakerek ninia Liafuan iha língua ida deʼit. Ohin loron, maizumenus ema biliaun ualu iha mundu tomak koʼalia língua oioin. Oinsá mak ema barak bele aprende kona-ba Jeová?

12. Saida mak dalan ida neʼebé Daniel 12:4 sai loos iha loron ikus sira?

¹² Liuhusi profeta Daniel, Jeová promete katak iha tempu nia rohan, ‘koñesimentu loos’ husi Bíblia “sei sai barak”. Ema barak sei komprende Bíblia. (Lee Daniel 12:4.) Bíblia no publikasaun kona-ba Bíblia tradús ona ba língua barak, no mós fó sai no fahe ba ema barak, tan neʼe mak koñesimentu neʼebé loos kona-ba Bíblia sai barak. Iha mundu tomak, Bíblia mak livru ida neʼebé tradús ba língua barak liu no fahe ba ema barak liu. Dala ruma tradusaun Bíblia neʼebé kompañia sira prodús mak karun tebes. Maibé Jeová nia povu tradús ona Bíblia kompletu ka parte balu iha língua 240 liu, no ema bele hetan ho gratuitu. Rezultadu mak ema husi nasaun hotu bele aprende “liafuan diʼak kona-ba Maromak nia Ukun” antes mundu nia rohan toʼo mai. (Mt 24:14) Ita-nia Maromak justisa nian hakarak fó oportunidade ba ema barak liu atu bele koñese nia liuhusi lee ninia Liafuan. Neʼe tanba nia hadomi tebes ita hotu.

13. Oinsá Bíblia hatudu sai Jeová nia domin? (João 21:25)

¹³ Bíblia ajuda ita atu komprende katak Jeová nia hahalok furak liu mak domin. (1 João 4:8) Hanoin toʼok kona-ba informasaun neʼebé Jeová fó sai no la fó sai iha Bíblia. Nia fó sai buat neʼebé ita presiza hatene atu bele iha relasaun diʼak ho nia, atu iha moris kontente agora no atu bele hetan moris ba nafatin. Maibé tanba Jeová hadomi ita, nia la fó sai informasaun barak liu fali buat neʼebé ita presiza hatene atu bele serbí nia.​—Lee João 21:25.

14. Iha dalan saida tan mak Bíblia hatudu sai Jeová nia domin?

¹⁴ Jeová mós hatudu domin mai ita hodi komunika ba ita ho respeitu. Iha Bíblia, Jeová la fó sai lista naruk kona-ba regra oioin ka fó sai buat neʼebé ita bele halo ka labele halo iha situasaun hotu iha ita-nia moris. Duké halo nuneʼe, nia book ita atu hadomi no halo tuir nia ho laran liuhusi ema nia istória, profesia no matadalan sira iha Bíblia atu ajuda ita halo desizaun neʼebé diʼak.

15. (a) Oinsá mak Bíblia hatudu katak Jeová hanoin ema sira neʼebé lee Bíblia? (b) Iha foto, labarik-feto, irmaun joven no irmán ferik medita kona-ba istória saida iha Bíblia? (Gén 39:1, 10-12; 2 Reis 5:1-3; Lc 2:25-38)

¹⁵ Bíblia mós hatudu katak Jeová hanoin tebes ita. Oinsá? Bíblia nakonu ho ema nia istória sira neʼebé ita bele komprende tanba ema iha istória sira-neʼe mak “iha sentimentu hanesan ita”. (Tgo 5:17) No importante liu, bainhira ita haree  oinsá Jeová tau matan didiʼak ba ema neʼebé hanesan ita, neʼe ajuda ita komprende ho didiʼak katak “Jeová iha domin neʼebé boot tebes no laran-sadiʼa”.​—Tgo 5:11.

16. Saida mak ita aprende kona-ba Jeová bainhira ita lee istória iha Bíblia kona-ba ema neʼebé halo sala? (Isaias 55:7)

¹⁶ Bíblia mós hatudu sai Jeová nia domin iha dalan seluk tan. Bíblia promete katak Maromak sei la husik hela ita kuandu ita halo sala. Ema Izraél halo sala beibeik hasoru Jeová. Maski nuneʼe, bainhira sira arrepende an ho laran, Jeová perdua sira. (Lee Isaias 55:7.) Ema Kristaun iha apóstolu sira-nia tempu mós hatene katak Jeová hadomi tebes sira. Jeová dirije apóstolu Paulo atu anima maluk fiar-naʼin sira atu ‘fó perdua no fó kmaan’ ba mane ida neʼebé uluk halo sala sériu maibé arrepende an ona. (2 Kor 2:6, 7; 1 Kor 5:1-5) Ita sente kontente tebes tanba hatene katak Jeová la husik deʼit ninia atan sira neʼebé halo sala. Maibé ho domin nia ajuda, korrije no konvida sira atu sai fali ninia belun. Nia mós promete atu halo nuneʼe ba ema hotu neʼebé arrepende sira-nia sala ohin loron.​—Tgo 4:8-10.

17. Tanbasá Bíblia mak prezente folin-boot?

¹⁷ Jeová fó ona prezente furak ida ba ita. Tanbasá Bíblia mak folin-boot? Hanesan ita aprende ona, Bíblia hatudu sai Maromak nia matenek, justisa no domin. Bíblia prova katak Jeová hakarak ita atu koñese nia. Nia hakarak ita atu sai ninia belun.

18. Oinsá ita bele hafolin Jeová nia “prezente diʼak”?

¹⁸ Ita lakohi haluha katak Bíblia mak “prezente diʼak” ida. (Tgo 1:17) Mai ita kontinua hafolin Bíblia. Ita bele halo nuneʼe liuhusi lee no medita kona-ba Bíblia. Bainhira ita halo nuneʼe, Ita bele fiar metin katak Jeová sei haraik bensaun ba ita-nia hakaʼas an no ita “sei hetan koñesimentu kona-ba Maromak”.​—Prov 2:5.