Haʼu-nia inan-aman fiar metin ba Katólika. Maibé bainhira sira aprende katak Maromak nia naran mak Jeová, sira sai Testemuña ba Jeová neʼebé laran-manas. Haʼu-nia apá para atu bahat imajen kona-ba Jesus. Maibé, nia uza ninia matenek nuʼudar badaen atu halo ami-nia uma nia andár kraik sai fali Reuniaun-Fatin, no neʼe mak Reuniaun-Fatin primeiru iha San Juan del Monte, iha Manila, rai-Filipinas nia sidade kapitál.

Haʼu moris iha tinan 1952. Husi kiʼik haʼu-nia inan-aman hanorin haʼu kona-ba Jeová, hanesan buat neʼebé sira halo ba haʼu-nia maun naʼin-haat no biin naʼin-tolu. Nuʼudar haʼu sai boot, apá anima haʼu atu lee kapítulu ida husi Bíblia loroloron, no nia hanorin haʼu hodi uza ita-nia publikasaun sira. Dala ruma haʼu-nia inan-aman konvida katuas área no reprezentante husi sukursál atu hela ho ami. Nuʼudar família, ami hetan ksolok no anima husi irmaun sira-neʼe nia esperiénsia, no neʼe motiva ami atu tau uluk Jeová iha ami-nia moris.

Haʼu aprende barak husi haʼu-nia inan-aman nia ezemplu. Depois amá mate tanba moras, haʼu no apá komesa serbí nuʼudar pioneiru hamutuk iha tinan 1971. Maibé iha tinan 1973 kuandu haʼu idade 20, haʼu-nia apá mate. Lakon inan-aman halo haʼu sente mamuk no mesamesak. Maibé Bíblia nia esperansa neʼebé “loos no metin” ajuda haʼu atu kontinua iha hanoin pozitivu no serbí Jeová. (Ebr 6:19) Lakleur depois apá mate, haʼu simu knaar nuʼudar pioneiru espesiál iha área izoladu iha illa Coron, provínsia Palawan.

Haʼu tinan 21 kuandu toʼo iha Coron. Nuʼudar sidade oan, haʼu hakfodak tanba illa neʼe ladún iha eletrisidade, bee moos, no karreta ka motór. Maski iha irmaun-irmán balu iha  illa neʼe, maibé la iha maluk pioneiru, no dala ruma haʼu tenke haklaken mesak. Ba fulan primeiru, haʼu sente triste tanba dook husi família no belun sira. Iha kalan, haʼu hateke ba fitun iha lalehan no tanis. Haʼu hanoin atu para deʼit husi haʼu-nia knaar no fila fali ba haʼu-nia uma.

Haʼu fakar sai haʼu-nia sentimentu ba Jeová. Haʼu mós hanoin fali liafuan husi Bíblia no publikasaun sira neʼebé hametin haʼu. Eskritura neʼebé haʼu hanoin beibeik mak Salmo 19:14. Bainhira haʼu medita kona-ba buat neʼebé halo Jeová kontente, porezemplu ninia hahalok no buat neʼebé nia halo ona, neʼe halo haʼu rekoñese katak Jeová mak “haʼu-nia Fatuk Boot no haʼu-nia Salvadór”. Informasaun ida husi Livru Haklaken ho títulu “Ó sei nunka mesak” a mós ajuda tebes haʼu. Haʼu lee beibeik informasaun neʼe. Kuandu haʼu mesak, haʼu bele sente katak Jeová hamutuk ho haʼu, no neʼe mak oportunidade mai haʼu atu halo orasaun, estuda, no medita.

Lakleur depois toʼo tiha iha Coron, haʼu simu knaar nuʼudar katuas kongregasaun. Tanba haʼu deʼit mak katuas kongregasaun, haʼu presiza dirije Eskola Serbisu Kristaun, Reuniaun Serbisu, Estudu Livru Kongregasaun, no Estudu Livru Haklaken. Haʼu mós hatoʼo diskursu públiku kada domingu. Neʼe halo haʼu la sente mesamesak tan!

Haʼu kontente hodi serbí iha Coron, no haʼu-nia estudante Bíblia balu hetan batizmu. Maibé, iha mós dezafiu balu. Dala ruma, haʼu tenke laʼo ba loron sorin atu bele toʼo iha haklaken-fatin, no kuandu toʼo fatin neʼe, haʼu la hatene atu toba iha neʼebé. Kongregasaun nia área mós inklui illa kiʼik sira. Dala barak haʼu bá fatin sira-neʼe ho ró kiʼik hodi liu laloran tasi neʼebé boot, maski haʼu la hatene nani! Maibé Jeová proteje no tau matan haʼu durante susar sira-neʼe hotu. Ikusmai, haʼu rekoñese katak Jeová prepara hela haʼu atu hasoru dezafiu neʼebé boot liu iha haʼu-nia knaar tuirmai.

Iha tinan 1978, haʼu hetan knaar atu serbí iha Papua-Guiné Foun, Austrália nia parte norte. Papua-Guiné Foun mak nasaun neʼebé iha foho barak, no boot atu hanesan ho España. Haʼu hakfodak kuandu hatene katak maizumenus populasaun naʼin millaun tolu mak koʼalia língua 800 liu. Buat neʼebé diʼak mak ema barak bele koʼalia língua Tok Pisin.

Ba tempu balu haʼu simu knaar atu serbí iha kongregasaun ho língua Inglés iha sidade kapitál, Port Moresby. Maibé, tuirmai haʼu muda ba kongregasaun Tok Pisin no aprende língua neʼe. Haʼu uza kedas língua neʼe kuandu haklaken, no neʼe ajuda haʼu atu aprende lalais. Lakleur, haʼu bele hatoʼo diskursu públiku ho língua Tok Pisin. Haʼu hakfodak tebes tanba la toʼo tinan ida iha Papua-Guiné Foun, haʼu simu knaar nuʼudar katuas área ba kongregasaun sira neʼebé koʼalia Tok Pisin, neʼe mak área neʼebé luan tebes.

Tanba kongregasaun ida-idak mak dook, haʼu tenke organiza asembleia barak no halo viajen barak. Foufoun, haʼu sente mesamesak iha fatin neʼebé haʼu la koñese. Haʼu  iha nasaun neʼebé foun, língua foun, no toman neʼebé foun. Haʼu labele vizita kongregasaun sira ho karreta ka motór tanba área neʼe mak liuhusi foho sira no la iha estrada. Tan neʼe, haʼu tenke saʼe beibeik aviaun. Dala ruma, haʼu mesak deʼit mak saʼe aviaun kiʼik neʼebé kondisaun la diʼak no nakdoko makaʼas. Viajen neʼe halo haʼu estrese tebes, hanesan deʼit kuandu haʼu saʼe ró!

Ema uitoan deʼit mak iha telefone, tan neʼe haʼu komunika ho kongregasaun sira liuhusi karta. Dala barak, antes kongregasaun simu haʼu-nia karta, haʼu mak toʼo uluk no presiza buka irmaun-irmán sira iha área neʼe. Maibé kuandu hasoru malu, sira sempre simu haʼu ho laran-diʼak no neʼe fó-hanoin haʼu tanbasá haʼu hakaʼas an halo haʼu-nia knaar. Haʼu hetan apoiu husi Jeová liuhusi dalan oioin, no haʼu-nia relasaun ho nia sai metin liután.

Iha haʼu-nia reuniaun primeiru iha illa Bougainville, kaben-naʼin ida ho oin-midar hakbesik haʼu no husu: “Ita hanoin-hetan ami?” Haʼu hanoin-hetan katak uluk haʼu haklaken ba sira kuandu haʼu foin toʼo iha Port Moresby. Haʼu hahú estuda ho sira no entrega sira ba irmaun ida. Agora sira batizmu ona! Neʼe mak bensaun ida husi bensaun barak neʼebé haʼu simu durante tinan tolu iha Papua-Guiné Foun.

Antes haʼu sai husi Coron tinan 1978, haʼu hasoru irmán ida neʼebé bonita no tau uluk ema seluk nia diʼak. Ninia naran mak Adel, pioneiru regulár ida neʼebé haboot oan naʼin-rua, Samuel no Shirley. Nia mós tau matan ninia inan neʼebé idade ona. Iha Maiu 1981, haʼu fila ba Filipinas atu kaben ho Adel. Depois kaben, ami serbí nuʼudar pioneiru regulár no tau matan ba ami-nia família.

Maski presiza tau matan ba família, maibé iha tinan 1983, haʼu hetan knaar atu serbí nuʼudar pioneiru espesiál iha illa Linapacan, iha Palawan. Tan neʼe ami hotu muda ba fatin izoladu neʼe neʼebé la iha Testemuña. Liutiha tinan ida, Adel nia amá mate. Maski nuneʼe, ami kontinua okupadu iha serbisu haklaken no neʼe ajuda ami atu la sente triste demais. Ami hahú estuda Bíblia ho ema barak iha Linapacan, no ami presiza Reuniaun-Fatin. Tan neʼe ami rasik harii Reuniaun-Fatin. Liutiha tinan tolu depois toʼo iha Linapacan, ami kontente tanba ema naʼin-110 mak tuir Memoriál, no sira barak ikusmai hetan batizmu.

Iha tinan 1986, haʼu hetan knaar atu serbí iha illa Culion, neʼebé inklui komunidade neʼebé kona moras-lepra. Tuirmai, Adel mós sai pioneiru espesiál. Foufoun, ami sente taʼuk atu haklaken ba ema neʼebé moras-lepra. Maibé haklaken-naʼin sira iha área neʼe dehan katak ema moras sira-neʼe hetan ona tratamentu no sira-nia moras ladún lori perigu ba ema seluk. Sira balu neʼebé kona moras neʼe tuir reuniaun iha irmán ida nia uma. Lakleur deʼit ami mós toman atu haklaken  hodi fahe esperansa husi Bíblia ba ema neʼebé sente katak Maromak no ema seluk la simu sira. Ami kontente tebes hodi haree sira neʼebé kona moras sériu hanesan neʼe bele hetan ksolok tanba esperansa kona-ba futuru.—Lc 5:​12, 13.

Oinsá mak ami-nia oan sira adapta ho situasaun iha Culion? Ami konvida irmán joven naʼin-rua husi Coron hodi nuneʼe ami-nia oan sira bele iha ransu neʼebé diʼak. Samuel, Shirley, no irmán joven naʼin-rua neʼe kontente atu ajuda ema seluk aprende Bíblia. Sira estuda ho labarik barak, no haʼu ho Adel estuda ho labarik sira-nia inan-aman. Dala ruma ami estuda ho família 11. Lakleur, ami iha estudante Bíblia barak neʼebé laʼo ba oin no bele forma kongregasaun foun ida!

Foufoun, haʼu deʼit mak katuas kongregasaun iha área neʼe. Tan neʼe sukursál husu haʼu atu dirije reuniaun semana-semana ho haklaken-naʼin hamutuk naʼin-ualu iha Culion no tuirmai dirije reuniaun ho haklaken-naʼin hamutuk naʼin-sia iha aldeia naran Marily, neʼebé presiza oras tolu ho ró atu toʼo iha neʼebá. Depois halaʼo tiha reuniaun iha Marily, ami laʼo liu husi foho sira ba oras barak atu dirije estudu Bíblia iha aldeia naran Halsey.

Lakleur, ema barak iha Marily no Halsey tama lia-loos, tan neʼe ami harii Reuniaun-Fatin iha área sira-neʼe. Hanesan iha Linapacan, irmaun-irmán sira no maluk sira seluk ajuda ho materiál konstrusaun no halo serbisu. Reuniaun-Fatin iha Marily bele halibur ema naʼin-200 no fasil atu halo luan. Tan neʼe ami mós halaʼo asembleia iha fatin neʼe.

Iha tinan 1993 kuandu ami-nia oan boot ona, ami serbí nuʼudar katuas área iha Filipinas. Tuirmai iha tinan 2000, haʼu tuir Eskola Treinu Atan Kristaun atu bele sai instrutór ba eskola neʼe. Haʼu sente la iha matenek atu sai instrutór, maibé Adel sempre anima haʼu. Nia fó-hanoin haʼu katak Jeová sei fó haʼu kbiit atu bele halaʼo knaar foun neʼe. (Flp 4:13) Adel fiar kona-ba neʼe tanba nia rasik  hetan forsa husi Jeová atu kumpre ninia knaar maski iha problema ho saúde.

Iha tinan 2006, kuandu haʼu hanorin hela, ami rona katak Adel kona moras Parkinson. Ami hakfodak! Bainhira haʼu hatete ba Adel katak diʼak liu ami para husi ami-nia knaar hodi haʼu bele tau matan ba nia, nia hatete: “Favór buka doutór neʼebé bele ajuda haʼu, no Jeová sei ajuda ita atu kontinua ita-nia knaar.” Ba tinan neen, Adel kontinua serbí Jeová ho kontente. Kuandu nia labele laʼo ona, nia haklaken husi kadeira-roda. Kuandu susar ba nia atu koʼalia, nia fó resposta ho liafuan ida ka rua deʼit iha reuniaun sira. Adel sempre simu karta husi irmaun-irmán sira tanba ninia ezemplu furak kona-ba laran-metin, toʼo nia mate iha tinan 2013. Haʼu hamutuk ho haʼu-nia feen doben Adel ba tinan 30 liu, tan neʼe dala ida tan haʼu sente triste tebes no mesamesak bainhira nia mate.

Adel hakarak haʼu kontinua ho haʼu-nia knaar, tan neʼe haʼu halo nuneʼe duni. Haʼu halo haʼu-nia an okupadu no neʼe ajuda haʼu atu tahan sentimentu mesamesak. Husi tinan 2014 toʼo 2017, haʼu hetan knaar atu vizita kongregasaun neʼebé koʼalia língua Tagalog iha nasaun sira neʼebé ladún livre atu halaʼo ita-nia atividade. Depois neʼe, haʼu vizita kongregasaun Tagalog iha Taiwán, Estadus Unidus, no Kanadá. Iha tinan 2019, haʼu sai instrutór ba Eskola ba Haklaken-Naʼin Tempu-Tomak ho língua Inglés iha Índia no Tailándia. Haʼu hetan ksolok boot tanba okupadu atu serbí Jeová.

Iha knaar foun ida-idak, haʼu sai besik tebes ho irmaun-irmán sira neʼebé haʼu hasoru, tan neʼe susar ba haʼu atu husik sira. Iha situasaun sira-neʼe, haʼu aprende atu tau fiar tomak ba Jeová. Haʼu sempre sente ninia apoiu, no neʼe ajuda haʼu atu hasoru situasaun naran deʼit. Agora, haʼu serbí nuʼudar pioneiru espesiál iha Filipinas. Haʼu serbí iha kongregasaun foun, no irmaun-irmán sira sai hanesan família neʼebé apoia no hadomi haʼu. Haʼu mós orgullu hodi haree Samuel no Shirley banati-tuir sira-nia amá nia ezemplu.—3 João 4.

Sin, haʼu hasoru ona dezafiu barak iha haʼu-nia moris, inklui haree haʼu-nia feen nia moras sai aat ba beibeik no mate. Haʼu mós tenke adapta beibeik ho situasaun foun. Maibé, haʼu haree katak Jeová “la dook husi ita ida-idak”. (Após 17:27) “Jeová nia liman la badak” atu apoia ninia atan sira maski iha área neʼebé izoladu. (Isa 59:1) Jeová, haʼu-nia Fatuk Boot, sempre hamutuk ho haʼu, no haʼu agradese tebes. Haʼu nunka mesak.