LISAUN ESTUDU 7
KNANANUK 15 Hahiʼi Jeová nia Oan Primeiru!
Ita hetan benefísiu tanba Jeová perdua ita
“Ita sei perdua duni ema nia sala sira.”—SAL 130:4.
OBJETIVU
Ita sei aprende ilustrasaun balu husi Bíblia kona-ba dalan úniku neʼebé Jeová fó perdua ba ita, no neʼe sei book ita atu hafolin liután dalan neʼebé Jeová fó perdua.
1. Tanbasá susar atu hatene ema ida nia hanoin bainhira sira hatete katak sira perdua ita?
“HAʼU PERDUA Ó.” Ita sei sente kontente bainhira Ita rona ema ida koʼalia liafuan neʼe, liuliu se Ita hatete ka halo buat ruma neʼebé hakanek ema neʼe! Maibé liafuan “haʼu perdua ó” katak sá? Karik ema ida koʼalia nuneʼe tanba hakarak ita atu nafatin sai ninia belun, ka nia lakohi koʼalia tan kona-ba buat neʼebé akontese ona. Ema ida-idak nia hanoin la hanesan bainhira sira hatete katak sira perdua ita.
2. Oinsá mak eskritura sira esplika kona-ba dalan neʼebé Jeová fó perdua? (Haree mós nota-rodapé.)
2 Dalan neʼebé Jeová perdua ita la hanesan ho dalan neʼebé ita fó perdua ba malu. Jeová nia dalan atu fó perdua mak úniku. Hakerek-naʼin ba salmo hatete kona-ba Jeová: “Ita sei perdua duni ema nia sala sira, atu nuneʼe ema sei hamtaʼuk Ita.” a (Sal 130:4) Sin, bainhira Jeová fó perdua, neʼe katak nia “perdua duni”. Nia mak ida neʼebé hatudu mai ita oinsá atu fó perdua iha dalan neʼebé loos. Iha versíkulu balu iha Bíblia, hakerek-naʼin sira uza liafuan husi lian Ebraiku kona-ba fó perdua neʼebé aplika deʼit ba dalan neʼebé Jeová fó perdua, laʼós ba dalan neʼebé ema fó perdua ba malu.
3. Oinsá mak dalan neʼebé Jeová fó perdua la hanesan ho dalan neʼebé ita fó perdua? (Isaias 55:6, 7)
3 Bainhira Jeová fó perdua ba ema ida, ema neʼe nia sala hamoos ona. Ema neʼe bele nafatin iha relasaun besik ho Jeová. Dalan neʼebé Jeová fó perdua mak kompletu no ho laran-luak.—Lee Isaias 55:6, 7.
4. Oinsá mak Jeová ajuda ita komprende signifikadu loloos kona-ba fó perdua?
4 Se dalan neʼebé Jeová fó perdua mak la hanesan ho ita-nian, oinsá mak ita neʼebé la perfeitu bele komprende signifikadu loloos kona-ba fó perdua? Jeová uza ilustrasaun sira atu ajuda ita komprende oinsá nia fó perdua ba ita. Iha lisaun neʼe, ita sei aprende kona-ba neʼe. Ita sei haree oinsá Jeová hamoos sala, no iha tempu neʼebé hanesan, ita bele iha fali relasaun diʼak ho nia. Nuʼudar ita hanoin kona-ba ilustrasaun sira-neʼe, ita sei hadomi liután ita-nia Aman, ida neʼebé fó perdua iha dalan oioin.
JEOVÁ HASAI TIHA ITA-NIA SALA
5. Saida mak akontese bainhira Jeová fó perdua ba ita?
5 Dala barak Bíblia kompara ita-nia sala hanesan naha todan. Liurai David esplika kona-ba ninia sala hodi dehan: “Haʼu-nia sala sira barak toʼo liu haʼu-nia ulun; sala sira-neʼe todan liu ba haʼu atu lori hanesan naha todan.” (Sal 38:4) Maibé Jeová fó perdua ba ita bainhira ita arrepende ita-nia sala. (Sal 25:18; 32:5) Liafuan Ebraiku neʼebé tradús nuʼudar “fó perdua” iha versíkulu sira-neʼe signifika “hiʼit saʼe” ka “lori”. Karik ita bele kompara Jeová hanesan ho mane forte neʼebé hiʼit saʼe ita-nia todan husi ita-nia kabaas no lori dook tiha husi ita.
“Perdua ona” (Sal 32:5)
6. Jeová lori ita-nia sala sira dook oinsá?
6 Ilustrasaun seluk hatudu oinsá Jeová lori dook tiha ita-nia sala sira. Salmo 103:12 hatete: “Hanesan lorosaʼe dook husi loromonu, nuneʼe mós nia tau ita-nia sala sira dook loos husi ita.” Lorosaʼe dook husi loromonu. Parte rua neʼe nunka bele hasoru malu. Neʼe katak Jeová lori ita-nia sala sira dook tiha husi ita toʼo ita labele imajina. Neʼe hametin ita katak Jeová perdua duni ita iha dalan neʼebé kompletu!
“Hanesan lorosaʼe dook husi loromonu” (Sal 103:12)
7. Jeová halo saida ba ita-nia sala sira? (Miqueias 7:18, 19)
7 Maski Jeová lori dook tiha ita-nia sala sira husi ita, nia kontinua kaer hela ba sala sira-neʼe ka lae? Lae. Liurai Ezequias hakerek kona-ba Jeová: “Ita soe tiha haʼu-nia sala hotu ba Ita-nia kotuk.” Ka hanesan nota-rodapé hatete: “Ita hasai haʼu-nia sala hotu husi Ita-nia oin.” (Isa 38:9, 17; nota) Neʼe katak bainhira ema ida arrepende an, Jeová soe dook tiha ema neʼe nia sala no la haree tan ida-neʼe. Liafuan neʼe mós bele tradús nuʼudar “Ita halo [haʼu-nia sala sira] hanesan neʼe nunka akontese”. Bíblia mós fó sai ideia neʼebé hanesan iha Miqueias 7:18, 19. (Lee.) Versíkulu sira-neʼe fó sai katak Jeová soe tiha ita-nia sala sira ba tasi kleʼan. Iha tempu antigu, buat neʼebé soe ona ba tasi kleʼan sei nunka hetan fali.
“Ita soe tiha haʼu-nia sala hotu ba Ita-nia kotuk” (Isa 38:17)
“Ita sei soe tiha ami-nia sala hotu ba tasi kleʼan” (Miq 7:19)
8. Saida mak ita aprende ona?
8 Liuhusi ilustrasaun sira-neʼe, ita aprende katak bainhira Jeová perdua ita, nia sei hamoos ita-nia sala iha dalan neʼebé kompletu no halo ita sente kmaan. Hanesan David hatete: “Ksolok ba ema neʼebé hetan ona perdua husi sira-nia hahalok aat no sira-nia sala hamoos ona. Ksolok ba ema neʼebé ninia sala Jeová la hanoin-hetan tan.” (Rom 4:7, 8) Neʼe mak perdua neʼebé loos!
JEOVÁ HAMOOS TIHA ITA-NIA SALA
9. Ilustrasaun saida mak Jeová uza atu esplika kona-ba dalan neʼebé nia fó perdua?
9 Jeová uza ilustrasaun seluk atu ajuda ita komprende oinsá Jeová hamoos tiha sala husi ema neʼebé arrepende an liuhusi Jesus nia sakrifísiu. Neʼe hanesan Jeová fase no solur tiha sala sira. No rezultadu mak ema neʼe sai moos ona. (Sal 51:7; Isa 4:4; Jer 33:8) Jeová esplika kona-ba rezultadu husi ninia prosesu: “Maski imi-nia sala sira mak mean, sira sei sai mutin fali hanesan jelu-rahun; maski sala sira-neʼe mak hanesan hena mean, sira sei sai mutin fali hanesan bibi-malae fulun.” (Isa 1:18) Susar tebes atu hasai noda neʼebé mean husi hena ruma. Maibé, Jeová uza ilustrasaun neʼe atu hametin ita katak ita-nia sala sira bele sai moos toʼo labele haree tan.
“Maski imi-nia sala sira mak mean, sira sei sai mutin fali hanesan jelu-rahun” (Isa 1:18)
10. Ilustrasaun saida tan mak Jeová uza atu esplika ninia laran-diʼak neʼebé boot kona-ba fó perdua?
10 Hanesan temi ona iha lisaun antes neʼe, sala mak hanesan ho “tusan”, ka debe. (Mt 6:12; Lc 11:4, nota) Entaun tempu ida-idak neʼebé ita halo sala hasoru Jeová, neʼe hanesan ita-nia debe aumenta. Ita iha debe neʼebé boot! Maibé bainhira Jeová perdua ita, neʼe hanesan ita-nia debe sira la iha ona. Nia la hanoin fali kona-ba sala neʼebé nia perdua ona. Hanesan ema neʼebé sente kontente bainhira ninia debe hotu la iha ona, ita mós sente kontente bainhira Jeová perdua ita!
“Fó perdua ba ami-nia sala” (Mt 6:12)
11. Bainhira Bíblia hatete katak ita-nia sala “hamoos tiha”, neʼe katak sá? (Apóstolu 3:19)
11 Jeová laʼós deʼit halakon ita-nia debe, ka sala sira, maibé mós hamoos tiha ida-neʼe. (Lee Apóstolu 3:19.) Bainhira ita-nia debe la iha ona, karik ita bele imajina hanesan ema tau marka X iha ita-nia debe. Maski nuneʼe, ita nafatin bele haree númeru sira iha marka X nia kotuk. Maibé atu hamoos tiha buat ruma mak la hanesan duni. Atu komprende kona-ba neʼe, ita presiza hanoin-hetan katak iha tempu antigu tinta neʼebé uza atu hakerek mak fasil atu hamoos ho bee. Ema bele uza esponja neʼebé bokon atu hamoos tiha buat neʼebé nia hakerek. Entaun bainhira ita-nia debe “hamoos tiha”, neʼe lakon ona. Ema labele haree tan buat neʼebé hakerek antes neʼe. Neʼe hanesan debe neʼe nunka akontese. Neʼe halo ita sente kmaan hodi hatene katak Jeová laʼós deʼit perdua ita-nia sala, maibé nia mós hamoos tiha ida-neʼe iha dalan neʼebé kompletu!—Sal 51:9.
“Atu nuneʼe Jeová bele hamoos tiha imi-nia sala sira” (Após 3:19)
12. Saida mak ita aprende husi ilustrasaun kona-ba kalohan mahar?
12 Jeová uza ilustrasaun neʼebé hanesan atu fó sai oinsá nia hamoos ita-nia sala sira. Nia hatete: “Haʼu sei hamoos ó-nia sala no taka ó-nia sala hanesan taka ho kalohan mahar.” (Isa 44:22) Bainhira Jeová fó perdua, neʼe hanesan nia uza kalohan mahar atu taka ita-nia sala hodi la haree tan.
“Haʼu sei hamoos ó-nia sala, no taka ó-nia sala hanesan taka ho kalohan mahar” (Isa 44:22)
13. Bainhira Jeová perdua ita, ita labele kontinua halo saida?
13 Saida mak ita aprende husi ilustrasaun sira-neʼe? Bainhira Jeová perdua ita, ita labele kontinua fó-sala ba ita-nia an durante ita-nia moris tomak. Liuhusi Jesus Kristu nia sakrifísiu, ita-nia debe hamoos tiha iha dalan neʼebé kompletu. Neʼe hanesan ita nunka halo sala neʼe. Jeová bele fó perdua duni ba ita bainhira ita arrepende ita-nia sala.
JEOVÁ SIMU FALI ITA NUʼUDAR NINIA BELUN
Dalan neʼebé ita-nia Aman iha lalehan perdua ita fó oportunidade ba ita atu iha relasaun diʼak ho nia (Haree parágrafu 14)
14. Tanbasá ita bele fiar katak Jeová sei perdua ita? (Haree mós foto.)
14 Perdua neʼebé loos neʼebé mai husi Jeová loke dalan mai ita atu iha relasaun belun ho nia. Neʼe ajuda ita atu la fó-sala demais ba ita-nia an. Ita la presiza taʼuk katak Jeová sei nafatin hirus ita, no sei fó kastigu ba ita. Nia sei nunka halo ida-neʼe. Tanbasá ita bele fiar katak Jeová sei perdua ita? Profeta Jeremias temi kona-ba Jeová hodi hatete: “Haʼu sei fó perdua ba sira-nia sala no la hanoin-hetan tan sira-nia sala.” (Jer 31:34) Bainhira apóstolu Paulo temi fali liafuan sira-neʼe, nia uza fraze neʼebé hanesan hodi hatete: “Haʼu sei la hanoin-hetan tan sira-nia sala.” (Ebr 8:12) Maibé neʼe katak sá?
“Haʼu sei . . . la hanoin-hetan tan sira-nia sala” (Jer 31:34)
15. Iha dalan oinsá mak Jeová la hanoin-hetan tan ita-nia sala sira?
15 Iha Bíblia, liafuan “hanoin-hetan” laʼós deʼit refere ba hanoin fali kona-ba buat neʼebé akontese iha pasadu. Maibé neʼe bele refere ba ema ida halo buat ruma. Porezemplu, kriminozu neʼebé prega iha Jesus nia sorin hatete: “Jesus, hanoin-hetan haʼu bá kuandu Ita tama iha Ita-nia Ukun.” (Lc 23:42, 43) Nia laʼós husu deʼit Jesus atu hanoin fali nia. Jesus nia resposta hatudu katak Jesus sei halo buat ruma atu fó moris-hiʼas ba kriminozu neʼe. Tan neʼe, bainhira Jeová hatete katak nia la hanoin-hetan tan kona-ba ita-nia sala sira, neʼe katak nia sei la halo buat ruma hasoru ita. Nia sei la fó kastigu ba ita iha futuru kona-ba sala neʼebé nia perdua ona.
16. Bíblia kompara ita hanesan ho saida?
16 Bíblia uza ilustrasaun seluk atu ajuda ita komprende liberdade neʼebé ita hetan bainhira Jeová perdua duni ita. Tanba ita mak ema sala-naʼin, Bíblia hatete katak ita mak “atan ba sala”. Maibé tanba Jeová fó perdua ba ita, ita mak hanesan atan neʼebé “sai livre ona husi sala”. (Rom 6:17, 18; Apok 1:5) Sin, dalan neʼebé Jeová fó perdua halo ita sente kontente hanesan atan neʼebé livre.
“Imi sai livre ona husi sala” (Rom 6:18)
17. Oinsá mak ita hetan kura iha dalan espirituál? (Isaias 53:5)
17 Lee Isaias 53:5. Ilustrasaun ikus neʼebé ita sei koʼalia hamutuk kompara ita ho ema neʼebé moras todan. Tanba Jeová fó ninia Oan-Mane nuʼudar sakrifísiu, neʼe hanesan ita hetan kura iha dalan simbóliku. (1 Ped 2:24) Bainhira ita halo sala, ita sai moras iha dalan espirituál. Maibé liuhusi Jesus nia sakrifísiu, ita bele iha fali relasaun diʼak ho Jeová. Hanesan ema neʼebé hetan kura husi moras todan no sente kontente, ita mós kontente bainhira hetan kura iha dalan espirituál no iha fali relasaun diʼak ho Jeová tanba nia fó perdua ba ita.
“Tanba ninia kanek sira mak ami hetan kura” (Isa 53:5)
OINSÁ MAK DALAN NEʼEBÉ JEOVÁ FÓ PERDUA KONA ITA
18. Saida mak ita aprende husi ilustrasaun iha Bíblia kona-ba dalan neʼebé Jeová fó perdua? (Haree mós kaixa “Oinsá Jeová fó perdua mai ita”.)
18 Saida mak ita aprende ona husi ilustrasaun iha Bíblia kona-ba dalan neʼebé Jeová fó perdua? Bainhira nia fó perdua, nia halo ida-neʼe iha dalan neʼebé kompletu no ba nafatin. Neʼe ajuda ita atu iha relasaun diʼak ho ita-nia Aman iha lalehan. No iha tempu hanesan, hanoin-hetan katak perdua neʼebé loos mak prezente. Jeová fó prezente neʼe tanba nia hadomi no hatudu laran-diʼak neʼebé boot mai ita, maski ita la merese simu ida-neʼe.—Rom 3:24.
19. (a) Ita presiza sente agradese kona-ba saida? (Roma 4:8) (b) Iha lisaun tuirmai, ita sei koʼalia kona-ba saida?
19 Lee Roma 4:8. Ita agradese tebes tanba Jeová mak Maromak neʼebé fó “perdua duni”! (Sal 130:4) Maibé se ita hakarak Jeová perdua ita, ita mós presiza halo buat ruma. Jesus hatete: “Se imi la fó perdua ba ema neʼebé halo sala hasoru imi, imi-nia Aman mós sei la fó perdua ba imi-nia sala.” (Mt 6:14, 15) Tan neʼe, ita presiza banati-tuir Jeová no fó perdua ba ema seluk. Oinsá mak ita bele halo ida-neʼe? Lisaun tuirmai sei koʼalia kona-ba neʼe.
KNANANUK 46 Agradese ba Jeová
a Iha língua Ebraiku orijinál iha eskritura neʼe uza liafuan “perdua duni” atu refere ba perdua neʼebé loos. Maski nuneʼe, iha mós dalan oioin kona-ba fó perdua. Tradusaun Bíblia barak la fó sai pontu importante neʼe iha Salmo 130:4. Maibé Bíblia Sagrada Tradusaun Mundu Foun mak úniku tanba fó sai ida-neʼe.
