ITA hasoru ona problema no sente katak la iha ida mak ajuda? Ita moris iha tempu neʼebé iha “problema barak neʼebé susar atu tahan”, no neʼe halo ita sente laran-kraik no mesamesak. (2 Tim 3:1) Maibé, ita la presiza hasoru problema mesak. Bíblia hatete katak belun neʼebé loos bele ajuda ita iha “tempu susar”.—Prov 17:17.

Apóstolu Paulo hetan ajuda barak husi belun sira neʼebé laʼo ho nia. (Kol 4:​7-11) Kuandu Paulo tama komarka iha Roma, ninia belun sira halo buat oioin neʼebé nia rasik labele halo. Porezemplu, Epafrodito lori sasán balu husi irmaun-irmán sira iha Filipe ba Paulo. (Flp 4:18) Tíkiko lori Paulo nia karta ba kongregasaun oioin. (Kol 4:7) Tanba hetan ajuda husi ninia belun, Paulo bele hametin kongregasaun maski nia labele sai husi uma ka iha komarka laran. Ohin loron, oinsá Ita bele sai belun neʼebé loos?

Ohin loron, irmaun-irmán barak hatudu ezemplu diʼak kona-ba oinsá atu sai belun neʼebé loos. Porezemplu Elisabet, neʼebé serbí nuʼudar pioneiru regulár iha España esplika oinsá irmán ida ajuda nia iha tempu susar. Bainhira Elisabet nia amá hetan moras kankru no labele kura, irmán neʼe haruka beibeik mensajen husi Bíblia neʼebé anima tebes nia. Elisabet hatete: “Bainhira haʼu lee mensajen sira-neʼe, haʼu sente kontente tanba hatene katak haʼu la mesak, no neʼe halo haʼu forsa atu bele tahan susar loroloron.”—Prov 18:24.

Ita bele hametin ita-nia relasaun belun ho maluk fiar-naʼin hodi apoia sira liuhusi atividade espirituál. Porezemplu, Ita bele tula irmaun ka irmán neʼebé idade ona atu bá reuniaun ka haklaken. Hodi halo nuneʼe, Ita bele hametin sira no sira mós bele hametin Ita. (Rom 1:12) Maibé, iha mós irmaun-irmán balu neʼebé labele sai husi uma. Oinsá mak ita bele sai belun neʼebé loos ba sira?

Irmaun-irmán balu labele tuir reuniaun iha Reuniaun-Fatin tanba problema saúde neʼebé sériu ka situasaun seluk. Hanoin toʼok ezemplu husi irmaun David neʼebé hetan moras kankru iha raan. Durante fulan neen liu, nia hetan kimioterapia. Tan neʼe, nia no ninia feen Lidia tuir reuniaun liuhusi vídeo konferénsia deʼit.

Saida mak irmaun-irmán sira halo atu ajuda sira? Depois reuniaun ida-idak,  irmaun-irmán balu hakaʼas an atu koʼalia ho David no Lidia liuhusi vídeo konferénsia. Liután neʼe, bainhira David no Lidia fó komentáriu, irmaun-irmán sira haruka mensajen ba sira. Rezultadu mak sira bele sente domin husi irmaun-irmán sira.

Karik ita mós bele halo mudansa uitoan ba ita-nia oráriu atu bele haklaken ho irmaun ka irmán neʼebé labele sai husi uma. Hodi halo nuneʼe, ita bele hatudu katak ita la haluha sira. (Prov 3:27) Karik ita bele fahe tempu atu haklaken liuhusi karta ka telefone. Sira neʼebé labele sai husi uma bele tuir grupu haklaken liuhusi vídeo konferénsia. David no Lidia hafolin tebes arranju neʼe. David hatete: “Kuandu ami tuir grupu haklaken no halo orasaun hamutuk, neʼe hametin tebes ami.” Liután neʼe, se situasaun permite, ita mós dala ruma bele lori ita-nia estudante Bíblia ba maluk sira-nia uma atu sira bele tuir ita-nia estuda.

Hodi haklaken hamutuk ho irmaun-irmán neʼebé labele sai husi uma, ita sei hatene liután sira-nia hahalok diʼak no besik liután ho sira. Porezemplu, kuandu ita haree oinsá sira loke eskritura neʼebé kona ema nia laran, ita sei hafolin liután sira. Bainhira ita apoia ita-nia maluk sira ho atividade espirituál nian, karik ita sei iha belun barak liután.—2 Kor 6:13.

Bainhira apóstolu Paulo iha susar laran, nia hetan kmaan husi ninia belun Tito neʼebé vizita nia. (2 Kor 7:​5-7) Neʼe hanorin ita katak ita bele fó kmaan ba maluk sira laʼós deʼit hodi hatoʼo liafuan, maibé mós liuhusi ita-nia hahalok.—1 João 3:18.

Irmaun-irmán sira iha Rúsia hatudu ezemplu neʼebé kapás kona-ba apoia malu. Haree toʼok esperiénsia husi irmaun Sergey no ninia feen Tatyana. Loron ida, polísia tama atu revista sira-nia apartamentu no lori sira bá postu atu investiga. Autoridade sira husik uluk Tatyana livre. Kona-ba tempu neʼe, Sergey hatete: “Bainhira Tatyana toʼo tiha apartamentu, irmán ida ho aten-brani vizita kedas nia. Lakleur, irmaun-irmán barak mós mai no ajuda atu haloot ami-nia sasán.”

Sergey hatutan: “Haʼu sempre gosta Provérbios 17:​17, neʼebé dehan: ‘Belun neʼebé loos hatudu domin iha tempu hotu no nia sai hanesan maun ka alin ida iha tempu susar.’ Esperiénsia neʼe hatudu katak eskritura neʼe mak loos duni. Bainhira haʼu hasoru susar neʼebé haʼu rasik labele tahan, Jeová fó belun neʼebé aten-brani atu ajuda haʼu.” a

Nuʼudar ita-nia situasaun sai aat liután, ita presiza duni belun sira-nia ajuda. No ita sei presiza liután sira durante terus boot. Tan neʼe, mai ita hakaʼas an agora atu sai belun neʼebé loos ba malu!—1 Ped 4:​7, 8.