1. Esplika toʼok kona-ba Tiago nia família.

 JESUS nia alin Tiago sai boot iha família neʼebé laran-metin ba Maromak. Ninia inan-aman José no Maria, hadomi tebes Jeová no hakaʼas an atu serbí Jeová. Tiago mós hetan bensaun ida tan, ninia maun ikusmai sai Mesias. Tiago iha priviléjiu boot atu sai parte ba família hanesan neʼe.

2. Tiago iha razaun saida deʼit atu admira Jesus?

² Tiago iha razaun barak atu admira ninia maun. (Mt 13:55) Porezemplu, bainhira Jesus tinan 12, nia hatene didiʼak kona-ba Eskritura no mestre sira iha Jeruzalein hakfodak kona-ba neʼe. (Lc 2:46, 47) Karik Tiago mós halo serbisu nuʼudar karpinteiru hamutuk ho Jesus. Se nuneʼe, klaru katak bainhira sira serbisu hamutuk, nia koñese Jesus diʼak liután. Neʼe atu hanesan ho irmaun Nathan Knorr nia liafuan: “Ita sei koñese ema ida diʼak liután bainhira ita serbisu hamutuk ho nia.” * Karik Tiago mós nota katak “Jesus kontinua sai boot, simu matenek, no hetan naran diʼak ho Maromak no ema”. (Lc 2:52) Tan neʼe, karik ita hanoin katak Tiago mak sei sai uluk Jesus nia dixípulu. Maibé neʼe la akontese.

3. Tiago hanoin oinsá kona-ba Jesus bainhira Jesus hahú serbisu haklaken?

³ Durante Jesus halaʼo ninia serbisu haklaken iha rai, Tiago la sai Jesus nia dixípulu. (João 7:3-5) Tuir loloos, hanesan Jesus nia família sira seluk, karik Tiago mós hanoin katak Jesus “bulak ona”. (Mc 3:21) No la iha evidénsia  neʼebé hatudu katak Tiago akompaña ninia inan Maria bainhira Jesus simu kastigu-mate iha ai-riin terus nian.—João 19:25-27.

4. Iha lisaun neʼe, ita sei aprende saida?

⁴ Ikusmai, Tiago tau fiar ba Jesus no sai katuas kongregasaun neʼebé ema respeitu. Iha lisaun neʼe, ita sei aprende buat rua husi Tiago: (1) tanbasá ita tenke kontinua hatudu haraik an no (2) oinsá ita bele sai mestre neʼebé diʼak.

5. Saida mak Tiago halo bainhira Jesus mosu tiha ba nia?

⁵ Bainhira mak Tiago sai Jesus nia dixípulu neʼebé laran-metin? Bíblia konta katak depois Jesus moris-hiʼas, “nia mosu ba Tiago, tuirmai ba apóstolu hotu”. (1 Kor 15:7) Bainhira Tiago hasoru tiha Jesus, Tiago sai Jesus nia dixípulu. Nia mós halibur hamutuk ho apóstolu sira iha uma ida iha Jeruzalein atu hein espíritu santu neʼebé Jesus promete. (Após 1:13, 14) Tuirmai, Tiago mós serbí nuʼudar membru ida husi grupu administradór iha apóstolu sira-nia tempu. (Após 15:6, 13-22; Gal 2:9) No maizumenus antes tinan 62 EC, Maromak dirije nia atu hakerek karta ida ba ema Kristaun neʼebé iha esperansa atu bá lalehan. Karta neʼe bele ajuda ita ohin loron, maski ita-nia esperansa mak atu moris iha lalehan ka iha rai. (Tgo 1:1) Matenek-naʼin ida naran Josefo hakerek katak ema Judeu nia Amlulik Boot Ananias mak fó orden atu fó kastigu-mate ba Tiago. Tiago kontinua laran-metin ba Jeová toʼo nia mate.

6. Iha dalan saida deʼit mak Tiago la hanesan ho ulun-naʼin relijiaun sira?

⁶ Tiago haraik an. Tanbasá ita dehan nuneʼe? Tuir loloos, ikusmai Tiago simu Jesus no sai Jesus nia dixípulu, maibé ulun-naʼin relijiaun sira la halo nuneʼe. Bainhira Tiago haree evidénsia forte katak Jesus mak Maromak nia Oan-Mane, nia simu ida-neʼe ho haraik an. Maibé amlulik boot iha Jeruzalein la halo hanesan neʼe. Porezemplu, sira labele nega katak Jesus fó moris-hiʼas ba Lázaro. Maski nuneʼe, sira lakohi rekoñese katak Maromak mak haruka Jesus mai, no sira buka dalan atu oho Jesus no mós Lázaro. (João 11:53; 12:9-11) Bainhira Jesus moris-hiʼas, sira mós halo planu  atu subar faktu husi povu. (Mt 28:11-15) Ulun-naʼin sira-neʼe nia hahalok foti an hanetik sira atu simu Mesias.

7. Tanbasá ita labele sai foti an?

⁷ Lisaun: Keta sai foti an, maibé prontu atu simu hanorin husi Jeová. Moras bele halo susar ba ema nia fuan atu funsiona ho didiʼak, nuneʼe mós foti an bele halo susar ba ita atu halo tuir Jeová nia matadalan. Ema Farizeu sira foti an tebes toʼo sira lakohi rekoñese evidénsia forte neʼebé hatudu katak Maromak fó ninia espíritu santu ba Jesus no mós Jesus mak Maromak nia Oan-Mane. (João 12:37-40) Neʼe perigu tebes, tanba hanetik sira atu hetan moris rohan-laek. (Mt 23:13, 33) Importante tebes atu ita kontinua aprende husi Maromak nia Liafuan no husik espíritu santu atu ajuda ita troka ita-nia hahalok, hanoin no mós afeta ita-nia desizaun sira. (Tgo 3:17) Tanba Tiago haraik an, nia prontu atu simu hanorin husi Jeová. Hanesan ita sei aprende iha lisaun neʼe, hahalok haraik an ajuda Tiago atu sai mestre neʼebé diʼak.

8. Saida mak sei ajuda ita atu sai mestre neʼebé diʼak?

⁸ Tiago la eskola boot. Tan neʼe, klaru katak ulun-naʼin relijiaun haree nia nuʼudar “ema la eskola no ema baibain deʼit” hanesan ho apóstolu Pedro no João. (Após 4:13) Maibé Tiago aprende atu sai mestre diʼak. Ita bele haree ida-neʼe bainhira ita lee karta neʼebé nia hakerek. Hanesan Tiago, karik ita la eskola boot. Maski nuneʼe, ho ajuda husi Jeová nia espíritu santu no mós treinu neʼebé ita simu husi Jeová nia organizasaun, ita bele sai mestre neʼebé diʼak. Mai ita haree Tiago nia ezemplu nuʼudar mestre neʼebé diʼak no saida mak ita bele aprende husi nia.

9. Esplika toʼok Tiago nia dalan atu hanorin.

⁹ Tiago la uza liafuan aas ka esplikasaun komplikadu. Rezultadu mak ninia rona-naʼin hatene buat neʼebé sira presiza halo no oinsá atu halo ida-neʼe. Porezemplu, Tiago hanorin iha dalan simples kona-ba oinsá ema Kristaun tenke  prontu atu tahan situasaun la justu no labele rai odi. Nia hakerek: “Ita dehan ona katak ema sira neʼebé tahan terus mak ema neʼebé kontente. Imi rona ona oinsá Job tahan terus toʼo rohan no haree bensaun neʼebé Jeová fó ona ba nia, no neʼe hatudu katak Jeová iha domin neʼebé boot tebes no laran-sadiʼa.” (Tgo 5:11) Ita nota katak Tiago nia hanorin bazeia ba Eskritura sira. Tiago uza Maromak nia Liafuan atu ajuda ninia rona-naʼin komprende katak Jeová sempre fó kolen ba ema neʼebé laran-metin ba nia, hanesan nia halo ba Job. Tiago esplika ho klaru hodi uza liafuan simples no lójiku. Ho ida-neʼe, nia la dada atensaun ba ninia an rasik maibé ba Jeová.

10. Saida mak dalan ida atu banati-tuir Tiago bainhira hanorin?

¹⁰ Lisaun: Hatoʼo mensajen iha dalan neʼebé simples no hanorin bazeia ba Bíblia. Ita-nia objetivu laʼós atu dada atensaun ba ita-nia koñesimentu, maibé atu ajuda ema hatene kona-ba Jeová nia matenek no oinsá nia hadomi sira. (Rom 11:33) Ita bele halo nuneʼe se ita sempre hanorin hodi uza Eskritura sira. Porezemplu, duké fó-hatene ita-nia estudante kona-ba saida mak ita sei halo se ita hasoru situasaun hanesan, diʼak liu atu ajuda sira hanoin kona-ba ezemplu husi Bíblia no komprende Jeová nia hanoin no sentimentu. Tuirmai sira sei aplika buat neʼebé sira aprende tanba sira hakarak halo Jeová kontente, laʼós halo ita kontente.

11. Ema Kristaun balu iha Tiago nia tempu iha fraku saida deʼit? Nia fó konsellu saida ba sira? (Tiago 5:13-15)

¹¹ Tiago iha hanoin pozitivu kona-ba ema. Husi ninia karta, ita bele haree katak Tiago hatene kona-ba maluk fiar-naʼin sira-nia fraku, no nia fó matadalan neʼebé klaru ba sira kona-ba oinsá atu manán fraku sira-neʼe. Porezemplu, ema Kristaun balu la halo tuir kedas konsellu oioin. (Tgo 1:22) Ema Kristaun seluk hafolin liu ema neʼebé riku. (Tgo 2:1-3) Ema seluk tan la kontrola sira-nia nanál. (Tgo 3:8-10) Neʼe mak problema boot, maibé Tiago la rende an atu ajuda sira. Nia fó konsellu ba sira ho laran-diʼak no mós klaru no anima sira atu buka ajuda husi katuas kongregasaun sira atu bele halo mudansa iha sira-nia moris.—Lee Tiago 5:13-15.

12. Oinsá ita bele kontinua hanoin pozitivu bainhira ita ajuda ita-nia estudante Bíblia?

¹² Lisaun: Kontinua hanoin pozitivu kona-ba ema seluk. Estudante Bíblia barak, karik sente susar atu aplika Bíblia nia konsellu. (Tgo 4:1-4) Karik presiza tempu kleur atu hasai tiha toman neʼebé aat no hatudu fali hahalok Kristaun nian. Atu banati-tuir Tiago, ita presiza brani atu fó-hatene ita-nia estudante kona-ba buat neʼebé sira presiza hadiʼa. Ita mós presiza kontinua hanoin pozitivu no fiar katak Jeová sei dada ema laran-loos ba nia no nia sei fó sira kbiit atu halo mudansa iha sira-nia moris.—Tgo 4:10.

13. Tuir Tiago 3:2, Tiago rekoñese saida?

¹³ Tiago kontinua iha hanoin neʼebé loos kona-ba ninia an. Tiago nunka sente katak nia mak importante liu fali irmaun-irmán seluk tanba nia mak Jesus nia alin ka tanba nia iha knaar importante. Nia bolu ninia maluk fiar-naʼin nuʼudar “haʼu-nia maun-alin doben sira”. (Tgo 1:16, 19; 2:5) Nia nunka halo ema hanoin katak nia mak perfeitu. Duké  halo nuneʼe, nia hatete: “Ita hotu halo sala dala barak.”—Lee Tiago 3:2.

14. Tanbasá diʼak atu fó sai katak ita mós halo sala?

¹⁴ Lisaun: Hanoin-hetan katak ita hotu sala-naʼin. Ita labele hanoin katak ita mak diʼak liu fali ita-nia estudante Bíblia. Tanbasá? Se ita-nia estudante hanoin katak ita la halo sala, karik nia sei sai laran-kraik tanba hanoin katak nia labele halo tuir Maromak ho perfeitu. Maibé se ita esplika katak dala barak susar mós ba ita atu halo tuir Bíblia nia prinsípiu no mós esplika oinsá Jeová ajuda ona ita atu aplika Bíblia nia konsellu, neʼe sei ajuda nia haree katak nia mós bele serbí Jeová.

15. Esplika toʼok ai-knanoik neʼebé Tiago uza. (Tiago 3:2-6, 10-12)

¹⁵ Tiago uza ai-knanoik neʼebé book ema nia laran. Klaru katak Jeová nia espíritu mak ajuda nia atu halo nuneʼe, maibé karik nia mós aprende oinsá atu hanorin liuhusi estuda ai-knanoik sira neʼebé ninia maun Jesus uza. Ai-knanoik neʼebé Tiago uza iha ninia karta mak simples no klaru.—Lee Tiago 3:2-6, 10-12.

16. Tanbasá ita presiza uza ai-knanoik neʼebé diʼak?

¹⁶ Lisaun: Uza ai-knanoik neʼebé book ema nia laran. Bainhira ita uza ai-knanoik neʼebé diʼak, neʼe sei ajuda ema atu rona ba lisaun importante no mós atu imajina ida-neʼe. Neʼe sei ajuda rona-naʼin sira hanoin-hetan lia-loos importante husi Bíblia. Jesus matenek tebes atu uza ai-knanoik neʼebé diʼak, no ninia alin Tiago mós halo tuir ninia ezemplu. Mai ita estuda Tiago nia ai-knanoik ida no haree tanbasá mak ai-knanoik neʼe diʼak.

17. Tanbasá ai-knanoik iha Tiago 1:22-25 mak diʼak?

¹⁷ Lee Tiago 1:22-25. Iha razaun oioin tanbasá Tiago nia ai-knanoik kona-ba espellu mak diʼak. Nia hakarak hanorin ninia rona-naʼin katak atu bele hetan benefísiu husi Maromak nia Liafuan, ita presiza lee no mós aplika buat neʼebé ita lee. Tiago hili ai-knanoik neʼebé fasil atu komprende kona-ba mane ida neʼebé haree ninia an iha espellu. Tiago hakarak hanorin lisaun saida? La matenek se ema ida haree tiha ninia oin iha espellu no  nota buat neʼebé nia presiza hadiʼa, maibé la halo buat ida. Nuneʼe mós la matenek se ita lee Bíblia no nota ita-nia hahalok ruma neʼebé presiza hadiʼa, maibé ita la halo buat ida.

18. Saida mak ita presiza halo bainhira uza ai-knanoik?

¹⁸ Ita bele banati-tuir Tiago kona-ba uza ai-knanoik hodi halo buat tolu tuirmai: (1) Uza deʼit ai-knanoik neʼebé ajuda ita atu fó sai lisaun importante husi informasaun neʼebé ita hanorin. (2) Uza ai-knanoik neʼebé fasil ba rona-naʼin sira atu komprende. (3) Hatudu ho klaru oinsá atu aplika ai-knanoik neʼe. Se ita sente susar atu hetan ai-knanoik diʼak, ita bele haree iha Indeks Publikasi. Buka títulu “Perumpamaan”, no ita sei haree ezemplu barak neʼebé ita bele uza. Maibé hanoin-hetan katak hanesan mikrofone bele halo ita-nia lian rona klaru liu, ai-knanoik sira mós ajuda atu halo klaru informasaun neʼebé ita hanorin. Maibé se ita uza ai-knanoik barak liu, neʼe sei halo ema konfuzaun. Tan neʼe, uza ai-knanoik atu esplika deʼit pontu importante sira neʼebé ita hakarak hanorin. Tuir loloos, ita-nia razaun atu aumenta ita-nia matenek atu hanorin mak atu ajuda ema barak sai parte ba Jeová nia família neʼebé kontente, laʼós atu dada atensaun ba ita-nia an.

19. Oinsá ita hatudu katak ita hafolin ita-nia família espirituál?

¹⁹ Tiago nia maun mak perfeitu, maibé ita la iha maun hanesan neʼe. Maski nuneʼe, ita iha priviléjiu atu serbí Jeová hamutuk ho família espirituál neʼebé boot. Ita hatudu domin ba sira liuhusi halibur hamutuk sira, aprende husi sira, no ho laran-metin hola parte iha serbisu haklaken no hanorin hamutuk ho sira. Bainhira ita hakaʼas an atu banati-tuir Tiago nia hanoin, hahalok, no dalan atu haklaken, ita sei fó glória ba Jeová no ita ajuda ema laran-loos sira atu hakbesik liután ba ita-nia Aman iha lalehan.