1-3. Susar saida deʼit mak bele halo Jeová nia povu tanis?

 HORIBAINHIRA mak Ita tanis? Dala ruma, ita tanis tanba ita sente kontente tebes. Maibé baibain ita tanis tanba ita laran-susar. Porezemplu, karik ita tanis bainhira ema neʼebé ita hadomi mate. Irmán Lorilei * husi Estadus Unidus hakerek: “Dala barak haʼu sente triste tanba hanoin fali haʼu-nia oan-feto neʼebé mate ona, no la iha buat ida mak bele fó kmaan ba haʼu. Iha tempu sira hanesan neʼe, haʼu sente haʼu-nia fuan rahun no haʼu labele tahan.”

² Karik ita tanis tanba razaun seluk. Irmán Hiromi neʼebé serbí nuʼudar pioneiru iha rai-Japaun hatete: “Dala ruma haʼu sente laran-kraik tanba ema iha haklaken-fatin la interese atu rona kona-ba Bíblia. Dala ruma ho matan-been nakonu, haʼu husu Jeová hodi ajuda haʼu atu bele hetan ema neʼebé buka lia-loos.”

³ Ita barak bele komprende irmán sira-neʼe nia sentimentu. (1 Ped 5:9) Ita hakarak “serbí Jeová ho haksolok”, maibé iha buat balu neʼebé bele halo ita serbí Jeová ho triste no matan-been. Porezemplu, ema neʼebé ita hadomi mate, ita sente laran-kraik, ka hasoru situasaun susar neʼebé koko ita-nia laran-metin ba Maromak. (Sal 6:6; 100:2) Saida mak bele ajuda ita tahan?

4. Iha lisaun neʼe, ita sei aprende saida?

⁴ Ita bele aprende husi Jesus. Dala ruma nia mós hasoru situasaun neʼebé halo ‘ninia matan-been suli’. (João 11:35; Lc 19:41; 22:44; Ebr 5:7) Mai ita koʼalia kona-ba situasaun sira-neʼe no lisaun saida mak ita bele aprende  husi ida-neʼe. Ita mós sei aprende saida mak ita bele halo bainhira ita hasoru situasaun neʼebé halo ita tanis.

5. Ita aprende saida kona-ba Jesus husi istória iha João 11:32-36?

⁵ Iha tempu malirin iha tinan 32 EC, Jesus nia belun diʼak Lázaro sai moras no mate. (João 11:3, 14) Lázaro iha biin rua naran Maria no Marta, no Jesus hadomi tebes sira naʼin-tolu. Feto sira-neʼe triste tebes bainhira sira-nia alin-mane mate. Depois Lázaro mate, Jesus bá Betánia hodi vizita Maria no Marta. Bainhira Marta rona katak Jesus mai ona, Marta bá lalais atu hasoru nia. Imajina Marta nia sentimentu triste bainhira nia hatete: “Naʼi, se Ita-Boot iha neʼe karik, haʼu-nia alin sei la mate.” (João 11:21) Bainhira Jesus haree Maria no ema seluk tanis, Jesus “nia matan-been suli”.—Lee João 11:32-36.

6. Tanbasá Jesus tanis iha situasaun neʼe?

⁶ Tanbasá Jesus tanis iha situasaun neʼe? Livru Pemahaman Alkitab esplika: “Jesus nia belun Lázaro mate no Lázaro nia biin sira mós triste tebes kona-ba neʼe, tan neʼe Jesus sai laran-triste tebes no ninia matan-been suli.” * Karik Jesus hanoin kona-ba susar neʼebé ninia belun Lázaro hasoru tanba moras no mós imajina Lázaro nia sentimentu bainhira hatene katak nia besik atu mate. Ita bele fiar katak bainhira Jesus haree Maria no Marta sente triste tebes, neʼe mós book Jesus atu tanis. Se Ita-nia belun ruma ka família ruma mate, klaru katak Ita rasik mós sente triste. Ita bele aprende lisaun tolu husi akontesimentu neʼe.

7. Ita aprende saida kona-ba Jeová husi Jesus neʼebé tanis?

⁷ Jeová komprende Ita-nia sentimentu. Jesus mak “ilas loloos” husi ninia Aman Jeová. (Ebr 1:3) Bainhira  Jesus tanis, neʼe hatudu sai oinsá Jeová sente bainhira ema neʼebé Ita hadomi mate. (João 14:9) Se ema ruma neʼebé Ita hadomi mate, Ita bele fiar metin katak Jeová haree Ita-nia laran-triste no nia mós hanoin tebes Ita. Nia hakarak kura Ita-nia laran-kanek.—Sal 34:18; 147:3.

8. Tanbasá ita bele fiar metin katak Jesus sei fó moris-hiʼas ba ita-nia família neʼebé mate?

⁸ Jesus hakarak fó moris-hiʼas ba Ita-nia família neʼebé mate. Antes Jesus tanis, nia hatete ba Marta: “Ó-nia alin sei moris fali.” Marta fiar Jesus. (João 11:23-27) Marta adora Jeová ho laran-metin, tan neʼe Marta hatene katak tinan atus ba atus liubá, profeta Elias no Eliseu fó moris-hiʼas ba ema balu. (1 Reis 17:17-24; 2 Reis 4:32-37) No karik nia mós rona ona kona-ba Jesus fó moris-hiʼas ba ema. (Lc 7:11-15; 8:41, 42, 49-56) Ita mós bele fiar metin katak Ita sei hasoru fali Ita-nia família neʼebé mate ona. Tanba Jesus tanis bainhira nia fó kmaan ba ninia belun sira, neʼe hanorin ita katak nia hein namanas atu fó moris-hiʼas ba ema mate sira.

9. Hanesan Jesus, oinsá Ita bele fó kmaan ba ema neʼebé laran-triste? Fó toʼok ezemplu.

⁹ Ita bele fó kmaan ba ema neʼebé laran-triste. Jesus tanis ho Marta no Maria no nia mós rona ba sira no fó kmaan ba sira. Ita mós bele halo nuneʼe. Katuas kongregasaun naran Dan neʼebé hela iha rai-Austrália hatete: “Bainhira haʼu-nia feen mate, haʼu presiza ema nia ajuda. Feen-laʼen balu prontu atu rona ba haʼu durante tempu naran deʼit. Sira fó tempu mai haʼu atu fó sai haʼu-nia sentimentu triste no sira la sente moe kuandu haʼu tanis. Sira mós ajuda halo serbisu balu ba haʼu, hanesan fase haʼu-nia karreta, kompras no teʼin ba haʼu bainhira haʼu presiza. No sira mós halo orasaun beibeik ho haʼu. Sira sai hanesan belun neʼebé loos no maun ka alin iha tempu susar.”—Prov 17:17.

10. Esplika toʼok akontesimentu iha Lucas 19:36-40.

¹⁰ Jesus toʼo iha Jeruzalein iha loron 9 Nisan tinan 33 EC. Bainhira besik ona sidade, ema-lubun boot halibur no ema komesa nahe sira-nia roupa iha dalan atu simu Jesus nuʼudar Liurai. Neʼe mak tempu atu sente haksolok. (Lee Lucas 19:36-40.) Entaun karik ninia dixípulu sira hakfodak ho buat neʼebé akontese tuirmai. “Kuandu Jesus besik Jeruzalein, nia hateke ba sidade neʼe no tanis.” Ho matan-been, Jesus fó sai buat aat oioin neʼebé sei akontese ba ema iha Jeruzalein.—Lc 19:41-44.

11. Tanbasá Jesus tanis kona-ba ema Judeu iha Jeruzalein?

¹¹ Jesus sente laran-susar tanba nia hatene katak maioria ema Judeu sei lakohi simu mensajen kona-ba Maromak nia Ukun. Tan neʼe, Jeruzalein sei rahun no ema Judeu neʼebé la mate sei sai atan. (Lc 21:20-24) Triste tanba hanesan Jesus hatete, ema maioria la simu nia. Iha Ita-nia área, ema barak sente oinsá kona-ba liafuan diʼak? Se ema uitoan deʼit mak simu kuandu Ita haklaken ba sira, saida mak Ita bele aprende husi akontesimentu neʼe? Ita bele aprende lisaun tolu tan husi akontesimentu neʼe.

12. Ita bele aprende saida kona-ba Jeová husi situasaun neʼebé halo Jesus tanis?

¹² Jeová hadomi ema. Tanba Jesus tanis iha situasaun neʼe, neʼe fó-hanoin ita  katak Jeová hadomi tebes ema. Maromak “lakohi ema ida lakon maibé nia hakarak ema hotu atu arrepende sala”. (2 Ped 3:9) Ohin loron, ita hatudu katak ita hadomi ema iha ita-nia haklaken-fatin liuhusi hakaʼas an book sira-nia laran atu simu liafuan diʼak.—Mt 22:39.

13-14. Oinsá mak Jesus hatudu katak nia hanoin ema? No oinsá mak ita bele banati-tuir nia?

¹³ Jesus badinas iha serbisu haklaken. Nia hatudu domin ba ema liuhusi uza oportunidade hotu atu haklaken ba sira. (Lc 19:47, 48) Saida mak book nia atu halo nuneʼe? Jesus hanoin sira. Dala ruma, ema barak hakarak rona ba Jesus toʼo nia no ninia dixípulu sira “la iha tempu atu han”. (Mc 3:20) No bainhira mane ida hakarak koʼalia ho Jesus iha kalan, Jesus prontu atu hasoru nia. (João 3:1, 2) Ema maioria neʼebé rona ba Jesus ikusmai la sai ninia dixípulu. Maski nuneʼe, sira hetan ona oportunidade atu rona kona-ba lia-loos. Ohin loron, ita mós hakarak fó oportunidade ba ema hotu atu simu lia-loos. (Após 10:42) Atu bele kumpre ida-neʼe, karik ita presiza troka dalan neʼebé ita haklaken.

¹⁴ Sai prontu atu halo mudansa tuir situasaun. Se ita sempre haklaken iha oras neʼebé hanesan, karik ita sei la hasoru ema balu neʼebé hakarak atu aprende lia-loos. Irmán pioneiru naran Matilda hatete: “Haʼu no haʼu-nia laʼen koko atu haklaken ba ema iha tempu oioin. Iha dadeer, ami haklaken ba negósiu-naʼin sira. Meiudia, kuandu ema barak laʼo iha dalan, ami haklaken ho karrosa. No iha lokraik, ami haklaken ba ema iha sira-nia uma, tanba ema barak liu iha uma.” Duké haklaken deʼit iha tempu neʼebé diʼak ba ita, ita presiza sai prontu halo mudansa no haklaken iha tempu neʼebé diʼak atu hasoru ema. Bainhira ita halo nuneʼe, Jeová sei kontente ho ita.

15. Tuir Lucas 22:39-44, saida mak akontese durante Jesus nia kalan ikus antes nia mate?

¹⁵ Iha kalan-boot, 14 Nisan tinan 33 EC, Jesus bá jardín Getsémani no  fakar sai ninia laran ba Jeová. (Lee Lucas 22:39-44.) Iha tempu neʼebá, Jesus “harohan ho laran no mós . . . lian makaʼas no ho matan-been”. (Ebr 5:7) Iha kalan antes Jesus mate, nia halo orasaun kona-ba saida? Nia halo orasaun hodi husu kbiit atu laran-metin nafatin ba Jeová no atu halo tuir Jeová nia hakarak. Jeová rona ninia Oan-Mane nia orasaun ho laran no haruka anju ida atu hametin nia.

16. Tanbasá Jesus sente estrese bainhira nia halo orasaun iha jardín Getsémani?

¹⁶ Jesus tanis kuandu halo orasaun iha jardín Getsémani tanba ema sei haree nia nuʼudar ema neʼebé la respeitu Maromak nia naran, no neʼe halo nia sente estrese. Nia mós hatene katak nia iha responsabilidade importante atu laran-metin nafatin no halo santu Maromak nia naran. Se Ita mós hasoru situasaun susar neʼebé koko Ita-nia laran-metin ba Jeová, saida mak Ita bele aprende husi Jesus? Ita sei aprende lisaun tolu tan.

17. Ita bele aprende saida kona-ba Jeová husi dalan neʼebé nia hatán Jesus nia orasaun?

¹⁷ Jeová rona Ita-nia orasaun. Jeová rona ba Jesus nia orasaun. Tanbasá? Tanba Jesus halo orasaun atu laran-metin nafatin no atu halo santu ninia Aman nia naran. Se ita halo orasaun hodi husu ajuda atu laran-metin nafatin ba Jeová no atu halo santu ninia naran, Jeová sei hatán ita-nia orasaun.—Sal 145:18, 19.

18. Oinsá mak Jesus hanesan ho belun neʼebé komprende ita?

¹⁸ Jesus komprende Ita-nia sentimentu. Se ita sente laran-susar, ita sei sente kmaan bainhira ita iha belun neʼebé komprende ita-nia sentimentu, liuliu se nia mós hasoru ona susar neʼebé hanesan. Jesus mak hanesan belun neʼe. Nia komprende ita-nia sentimentu bainhira ita sente fraku no presiza ajuda. Nia komprende ita-nia fraku sira, no sei ajuda ita simu apoia “iha tempu neʼebé loloos”. (Ebr 4:15, 16) Jesus prontu atu simu ajuda husi anju ida iha jardín Getsémani,  ita mós presiza sai prontu atu simu Jeová nia ajuda, maski neʼe mai husi ita-nia publikasaun ruma, vídeo ida, diskursu ida, katuas kongregasaun ka irmaun-irmán seluk neʼebé maduru.

19. Oinsá Ita bele hetan kbiit bainhira hasoru susar? Fó toʼok ezemplu.

¹⁹ Jeová sei fó ba Ita dame. Oinsá mak Jeová sei hametin ita? Bainhira ita halo orasaun, ita sei simu “Maromak nia dame neʼebé aas liu ema nia hanoin hotu”. (Flp 4:6, 7) Dame husi Jeová bele halo ita-nia laran sente kalma no ajuda ita hanoin ho klaru. Irmán Luz sente rasik ida-neʼe. Nia hatete: “Dala barak haʼu sente mesamesak. Tan neʼe, dala ruma haʼu hanoin katak Jeová la hadomi haʼu. Maibé kuandu haʼu sente hanesan neʼe, haʼu harohan kedas ba Jeová no fó sai haʼu-nia sentimentu. Orasaun ajuda haʼu atu kontrola haʼu-nia sentimentu.” Irmán Luz nia esperiénsia hatudu katak orasaun bele ajuda ita sente dame.

20. Ita aprende saida husi situasaun neʼebé halo Jesus tanis?

²⁰ Ita hetan kmaan no aprende buat barak tanba estuda kona-ba situasaun neʼebé halo Jesus tanis. Ita aprende katak ita presiza apoia ita-nia belun neʼebé laran-triste tanba família mate, no ita presiza iha konfiansa katak Jeová no Jesus sei apoia ita kuandu ita-nia família ruma mate. Ita mós aprende katak ita presiza hanoin ema bainhira ita haklaken no hanorin tanba Jeová no Jesus mós hanoin ema. No ita hetan kmaan tanba aprende katak Jeová no Jesus komprende ita-nia sentimentu no fraku sira no sira hakarak atu ajuda ita tahan. Mai ita kontinua aplika buat neʼebé ita aprende toʼo loron neʼebé Jeová kumpre ninia promesa atu ‘hamaran ita-nia matan-been hotu husi ita-nia matan’.—Apok 21:4.