LISAUN ESTUDU 1
“Sira neʼebé buka Jeová sei la falta buat diʼak ida”
ITA-NIA ESKRITURA TINAN NIAN BA TINAN 2022: “Sira neʼebé buka Jeová sei la falta buat diʼak ida.”—SAL 34:10.
KNANANUK 4 “Jeová mak haʼu-nia Bibi-Atan”
IHA LISAUN NEʼE *
David sente katak nia “la falta buat diʼak ida” maski hasoru susar oioin (Haree parágrafu 1-3) *
1. David hasoru situasaun susar saida?
DAVID halai daudaun tanba Liurai Saul husi Izraél hakarak oho nia. Bainhira David presiza hahán, nia para iha sidade Nob no husu deʼit paun fuan lima ba amlulik Ahimelec. (1 Sam 21:1, 3) Iha tempu seluk, David no ninia ema sira tenke subar iha fatuk-kuak. (1 Sam 22:1) Tanbasá David hasoru situasaun hanesan neʼe?
2. Saul halo hahalok aat saida deʼit? (1 Samuel 23:16, 17)
2 Saul laran-moras tebes tanba ema barak gosta no gaba David tanba manán funu barak. Saul hatene katak Jeová la simu tan nia tanba nia la halo tuir Jeová. Saul mós hatene katak Jeová hili ona David atu sai liurai iha futuru. (Lee 1 Samuel 23:16, 17.) Maski nuneʼe, Saul nafatin ukun nuʼudar liurai iha Izraél no tropa barak no mós ema barak apoia Saul, tan neʼe David tenke halai atu salva ninia moris. Saul hanoin katak nia bele hapara Maromak atu halo David sai liurai ka lae? (Isa 55:11) Bíblia la fó sai kona-ba neʼe, maibé ita hatene katak Saul halo buat neʼebé aat tebes. Ema neʼebé kontra Maromak sempre lakon.
3. David sente oinsá maski hasoru situasaun susar?
3 David mak mane neʼebé haraik an. Nia la hili ninia an rasik atu sai liurai ba Izraél. Jeová mak hili nia atu sai liurai. (1 Sam 16:1, 12, 13) Saul haree David nuʼudar ninia inimigu. Maibé David la fó-sala ba Jeová bainhira ninia moris iha perigu laran. Nia mós la muramura tanba iha hahán uitoan deʼit no tenke subar iha fatuk-kuak. Duké halo nuneʼe, karik iha situasaun neʼe mak nia hakerek knananuk furak atu fó hahiʼi ba Jeová neʼebé inklui liafuan iha ita-nia eskritura tema: “Sira neʼebé buka Jeová sei la falta buat diʼak ida.”—Sal 34:10.
4. Ita sei koʼalia kona-ba pergunta saida deʼit? Tanbasá pergunta sira-neʼe importante?
4 Ohin loron, Jeová nia atan barak la iha hahán no sasán neʼebé natoon ba sira-nia moris loroloron. * Jeová nia atan barak hasoru situasaun susar liuliu durante tempu pandemia neʼe. No ita sei hasoru susar barak liután nuʼudar ita hakbesik liután ba “terus boot”. (Mt 24:21) Tan neʼe, mai ita koʼalia kona-ba pergunta haat: Iha dalan oinsá mak David “la falta buat diʼak ida”? Tanbasá ita tenke aprende atu kontente ho buat neʼebé ita iha? Tanbasá ita bele iha konfiansa katak Jeová sei tau matan ba ita? No oinsá ita bele prepara nanis ba futuru?
“HAʼU SEI LA FALTA BUAT IDA”
5-6. Oinsá Salmo 23:1-6 bele ajuda ita komprende signifikadu husi David nia liafuan kona-ba Jeová nia atan sei “la falta buat diʼak ida”?
5 David nia liafuan kona-ba Jeová nia atan sei “la falta buat diʼak ida” katak sá? Bainhira David hakerek Salmo 23, nia uza fraze neʼebé atu hanesan. Entaun Salmo neʼe bele ajuda ita komprende signifikadu husi David nia liafuan. (Lee Salmo 23:1-6.) Salmo 23 hahú ho liafuan: “Jeová mak haʼu-nia Bibi-Atan. Haʼu sei la falta buat ida.” Iha Salmo 23:2-6, David temi buat oioin neʼebé iha duni folin. Porezemplu, David temi kona-ba bensaun neʼebé Jeová haraik ba nia tanba nia simu Jeová nuʼudar ninia Bibi-Atan. Jeová lori David “laʼo iha dalan loos sira”, no Jeová apoia David ho laran-metin iha tempu diʼak no mós iha tempu susar. David rekoñese katak maski nia moris iha Jeová nia “fatin neʼebé nakonu ho duʼut matak”, maibé nia nafatin hasoru susar. Dala ruma, nia sai laran-kraik no sente hanesan “laʼo iha foho-leet neʼebé nakukun tebes” no ema sei odi nia. Maibé tanba Jeová mak David nia Bibi-Atan, David “la taʼuk kona-ba perigu sira”.
6 Entaun, iha dalan oinsá mak David “la falta buat diʼak ida”? Nia iha buat hotu neʼebé nia presiza atu bele hakbesik nafatin ba Jeová. Nia la presiza sasán ka rikusoin atu bele sente kontente. David kontente ho buat neʼebé Jeová fó ba nia. Protesaun no bensaun husi Jeová mak buat neʼebé importante liu ba David.
7. Tuir Lucas 21:20-24, ema Kristaun iha Judeia hasoru situasaun susar saida?
7 David nia liafuan ajuda ita komprende katak importante tebes atu iha hanoin neʼebé loos kona-ba osan no sasán. La sala atu iha osan no sasán, maibé keta husik buat sira-neʼe sai importante liu iha ita-nia moris. Ema Kristaun iha apóstolu sira-nia tempu neʼebé hela iha Judeia komprende lia-loos importante neʼe. (Lee Lucas 21:20-24.) Jesus fó sai nanis ba ema Kristaun iha Judeia katak tropa sira sei haleʼu sidade Jeruzalein. Bainhira neʼe akontese, sira “tenke halai ba foho”. Se sira sai husi sidade Jeruzalein sira sei hetan salvasaun, maibé sira tenke husik hela sasán barak. Uluk, Livru Haklaken ida hatete: “Sira husik toʼos no uma, sira mós la lori sasán husi sira-nia uma. Sira fiar metin katak Jeová sei proteje no ajuda sira, no sira tau uluk adorasaun ba nia duké buat seluk.”
8. Saida mak ita bele aprende husi ema Kristaun neʼebé hela iha Judeia?
8 Saida mak ita bele aprende husi ema Kristaun neʼebé hela iha Judeia? Livru Haklaken neʼebé temi ona hatete: “Iha futuru, karik ita sei hetan koko neʼebé sei hatudu sai ita-nia hanoin kona-ba osan no sasán. Saida mak importante liu ba ita, osan no sasán ka salvasaun husi Maromak? Bainhira mundu nia rohan toʼo mai, karik ita sei hasoru susar oioin no presiza halo sakrifísiu oioin. Ita presiza sai prontu atu halo buat naran deʼit atu hetan salvasaun hanesan ema Kristaun iha Judeia iha apóstolu sira-nia tempu.” *
9. Oinsá Paulo nia konsellu ba ema Ebreu anima ita?
9 Imajina toʼok susar neʼebé ema Kristaun sira-neʼe hasoru tanba tenke husik hela sira-nia sasán hotu no hela iha fatin foun. Sira presiza fiar katak Jeová sei tau matan ba sira-nia presiza. Tinan lima antes tropa Roma haleʼu sidade Jeruzalein, apóstolu Paulo fó konsellu diʼak ba ema Ebreu. Nia hatete: “Iha imi-nia moris, keta hadomi osan, maibé kontente ho buat neʼebé imi iha ona. Tanba nia dehan ona: ‘Haʼu sei nunka husik ó, no haʼu sei nunka fila kotuk ba ó.’ Atu nuneʼe ita bele sai brani no dehan: ‘Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?’” (Ebr 13:5, 6) Ema sira neʼebé halo tuir ona apóstolu Paulo nia konsellu, karik sente fasil liu atu halaʼo moris neʼebé simples iha sira-nia hela-fatin foun. Sira bele fiar metin katak Jeová sei tau matan ba sira-nia presiza. Paulo nia liafuan mós bele hametin ita-nia fiar katak Jeová sei fó buat neʼebé ita presiza.
“ITA TENKE KONTENTE HO BUAT SIRA-NEʼE”
10. Saida mak ajuda Paulo atu laran-metin nafatin?
10 Paulo mós fó konsellu neʼebé atu hanesan ba Timóteo no konsellu neʼe mós diʼak ba ita. Paulo hakerek: “Tan neʼe, se ita iha ai-han no roupa, ita tenke kontente ho buat sira-neʼe.” (1 Tim 6:8) Neʼe katak ita labele han hahán neʼebé gostu, labele hela iha uma neʼebé diʼak ka labele hola roupa foun ka lae? Laʼós hanesan neʼe. Paulo hatete katak ita tenke kontente ho buat neʼebé ita iha. (Flp 4:12) Neʼe mak ajuda Paulo atu laran-metin nafatin. Ita-nia relasaun diʼak ho Jeová mak buat neʼebé importante liu, duké sasán neʼebé ita iha.—Hab 3:17, 18.
Ema Izraél “la falta buat ida” bainhira sira iha rai-fuik durante tinan 40. Oinsá mak ita bele kontente ho buat neʼebé ita iha agora? (Haree parágrafu 11) *
11. Moisés nia liafuan ba ema Izraél hanorin saida mai ita kona-ba kontente ho buat neʼebé ita iha?
11 Dala ruma buat neʼebé ita hanoin katak ita presiza la hanesan ho buat neʼebé Jeová hatene ita presiza. Hanoin toʼok kona-ba Moisés nia liafuan ba ema Izraél bainhira sira laʼo iha rai-fuik durante tinan 40, nia hatete: “Jeová, imi-nia Maromak, haraik ona bensaun ba buat hotu neʼebé imi halo. Nia hatene didiʼak kona-ba oinsá imi laʼo iha rai-fuik luan neʼe. Ba tinan 40 ona Jeová, imi-nia Maromak, hamutuk ho imi, no imi la falta buat ida.” (Deut 2:7) Durante tinan 40, Jeová fó maná ba ema Izraél atu han. Sira-nia roupa nunka sai bosan, maski neʼe mak roupa neʼebé sira hatais kuandu sira sai husi rai-Ejitu. (Deut 8:3, 4) Karik sira balu hanoin katak buat neʼebé Jeová fó mak la toʼo, maibé Moisés fó-hanoin ema Izraél katak sira iha buat hotu neʼebé sira presiza. Ita sei halo Jeová kontente se ita aprende atu kontente ho buat neʼebé ita iha. Jeová hakarak ita hafolin buat hotu neʼebé nia fó ba ita, maski neʼe mak buat simples. No komprende katak neʼe mak bensaun no prezente husi Jeová.
FIAR KATAK JEOVÁ SEI TAU MATAN ITA
12. Oinsá ita hatene katak David sadere ba Jeová no laʼós ba ninia an rasik?
12 David hatene katak Jeová mak laran-metin no hadomi tebes ema neʼebé hadomi Nia. Maski David nia moris iha perigu laran bainhira nia hakerek Salmo 34, maibé David fiar metin katak “Jeová nia anju harii tenda haleʼu” nia. (Sal 34:7, nota) Karik David kompara Jeová nia anju ho soldadu neʼebé harii tenda iha rai-luan, no sempre matan-moris. Maski David mak asuwaʼin neʼebé brani no Jeová promete ona katak nia sei sai liurai, maibé David la sadere ba ninia matenek atu uza tali-baku ka surik hodi manán inimigu. (1 Sam 16:13; 24:12) David tau fiar ba Jeová no iha konfiansa katak Jeová nia anju sei ‘salva sira neʼebé hamtaʼuk Jeová’. Klaru katak, ohin loron ita la hein atu Jeová uza milagre hodi salva ita. Maibé ita hatene katak ema hotu neʼebé tau fiar ba Jeová sei hetan moris ba nafatin maski sira mate agora.
Durante tempu terus boot, Gog husi Magog nia tropa sei koko ataka ita iha ita-nia uma. Maibé ita bele sente kmaan tanba hatene katak Jesus no anju sira haree buat neʼebé akontese no sira sei defende ita (Haree parágrafu 13)
13. Bainhira Gog husi rai-Magog ataka, tanbasá sira hanoin fasil deʼit atu halakon ita? Maibé tanbasá ita la presiza taʼuk? (Haree dezeñu iha livru oin.)
13 Lakleur tan, ita-nia fiar ba Jeová nia abilidade atu proteje ita sei hetan koko. Bainhira Gog husi rai-Magog ka grupu nasaun sira ataka Maromak nia povu, karik ita hanoin katak sira bele oho ita. Ita presiza fiar metin katak Jeová bele no sei salva ita. Nasaun sira sei hanoin katak ita mak hanesan bibi neʼebé la iha bibi-atan atu proteje sira. (Eze 38:10-12) Ita sei la kaer armas no ita mós la simu treinu atu halo funu. Nasaun sira sei hanoin fasil deʼit atu halakon ita. Sira la hatene katak Jeová nia anju sira “harii tenda haleʼu” ita no prontu atu proteje ita. Maibé ita hatene ida-neʼe tanba ita iha fiar neʼebé metin. Nasaun sira la fiar Maromak. Sira sei hakfodak tebes bainhira tropa lalehan mai atu halo funu hodi proteje ita.—Apok 19:11, 14, 15.
PREPARA NANIS BA FUTURU
14. Oinsá mak ita bele prepara nanis ba futuru?
14 Oinsá mak ita bele prepara nanis ba futuru? Ita presiza iha hanoin neʼebé loos kona-ba osan no sasán tanba loron ida ita tenke husik buat sira-neʼe. Ita mós presiza kontente ho buat neʼebé ita iha no sente kontente tanba ita iha relasaun diʼak ho Jeová. Bainhira ita koñese didiʼak Maromak, ita sei fiar metin liután katak nia iha abilidade atu proteje ita kuandu Gog husi rai-Magog ataka.
15. David hasoru situasaun saida deʼit kuandu joven?
15 Hanoin toʼok buat seluk neʼebé ajuda David no neʼe mós bele ajuda ita prepara nanis ba susar sira. David hatete: “Koko no haree katak Jeová mak diʼak; ksolok ba ema neʼebé buka protesaun husi nia.” (Sal 34:8) Liafuan sira-neʼe hatudu tanbasá David hatene katak nia bele sadere ba Jeová atu apoia nia. David sadere beibeik ba Jeová no Jeová sempre ajuda nia. Bainhira David sei joven, nia tenke funu hasoru tropa jigante husi Filístia naran Golias. David hatete ba nia: “Loron neʼe duni mak Jeová sei entrega ó ba haʼu-nia liman.” (1 Sam 17:46) Tempu seluk, David serbí Liurai Saul no dala barak Saul koko atu oho David. Maibé “Jeová hamutuk ho” David. (1 Sam 18:12) David sente rasik ona oinsá Jeová ajuda nia, tan neʼe David hatene katak Jeová sei ajuda nia kuandu nia hasoru susar seluk.
16. Oinsá mak ita bele koko no haree Jeová nia hahalok diʼak?
16 Bainhira ita sai toman atu sadere ba Jeová, ita sei fiar metin katak nia iha abilidade atu ajuda ita iha futuru. Porezemplu, ita presiza hatudu fiar no sadere ba Jeová hodi bele husu lisensa husi ita-nia patraun atu bele tuir asembleia ka reuniaun boot, ka husu patraun atu troka ita-nia oras serbisu atu ita bele tuir reuniaun hotu no haklaken liután. Oinsá se ita-nia patraun lakohi fó lisensa no ita lakon ita-nia serbisu? Ita fiar metin katak Jeová sei nunka husik ita no nia sei fó buat neʼebé ita presiza ka lae? (Ebr 13:5) Irmaun-irmán barak neʼebé serbí Jeová tempu-tomak sente rasik ona oinsá Jeová ajuda sira. Jeová mak laran-metin.
17. Saida mak eskritura tinan nian ba tinan 2022, no tanbasá neʼe diʼak?
17 Ho Jeová nia apoia, ita la presiza taʼuk futuru. Maromak sei nunka husik hela ita se ita tau uluk ninia Ukun. Grupu Administradór hakarak fó-hanoin ita katak ita presiza prepara nanis ba susar sira iha futuru no ita presiza fiar katak Jeová sei nunka husik ita, tan neʼe sira hili Salmo 34:10 nuʼudar eskritura ba tinan 2022: “Sira neʼebé buka Jeová sei la falta buat diʼak ida.”
KNANANUK 38 Nia sei halo ó forsa
^ Eskritura tinan nian ba tinan 2022 foti husi Salmo 34:10: “Sira neʼebé buka Jeová sei la falta buat diʼak ida.” Jeová nia atan barak iha osan no sasán uitoan deʼit. Entaun tanbasá ita bele dehan katak sira “la falta buat diʼak ida”? No oinsá versíkulu neʼe bele ajuda ita prepara an ba susar sira iha futuru?
^ Haree “Pergunta husi lee-naʼin” iha Livru Haklaken, 15 Setembru 2014.
^ Haree Menara Pengawal, 1 Maiu 1999, pájina 19.
