1-2. (a) Iha tempu saida mak baibain ita hanoin-hetan ema neʼebé ita hadomi neʼebé mate ona? (b) Saida mak Jesus arranja iha kalan antes nia mate?

 MASKI ema neʼebé ita hadomi mate kleur ona, maibé ita nafatin hanoin-hetan kona-ba nia. Baibain ita hanoin kona-ba nia iha data neʼebé nia mate.

² Tinan-tinan, ema millaun ba millaun iha mundu tomak asiste Memoriál ba Jesus Kristu nia mate tanba hadomi tebes nia. (1 Ped 1:8) Ita halibur hamutuk atu hanoin-hetan Jesus neʼebé fó ninia moris atu salva ita husi sala no mate. (Mt 20:28) Tuir loloos, Jesus hakarak ninia dixípulu sira hanoin-hetan ninia mate. Kalan antes nia mate, nia arranja han-kalan espesiál ida no dehan: “Kontinua halo ida-neʼe hodi hanoin haʼu.”—Lc 22:19.

3. Iha lisaun neʼe, ita sei koʼalia kona-ba saida?

³ Ema balu deʼit neʼebé asiste Memoriál mak iha esperansa atu bá lalehan. Maibé ema millaun ba millaun seluk neʼebé mós asiste Memoriál, iha esperansa atu moris iha rai. Iha lisaun neʼe, ita sei koʼalia kona-ba razaun oioin tanbasá grupu rua neʼe hakarak tebes atu asiste Memoriál tinan-tinan. Ita mós sei aprende kona-ba oinsá ita bele hetan benefísiu hodi asiste Memoriál. Mai ita koʼalia uluk kona-ba razaun balu tanbasá ema neʼebé iha esperansa atu bá lalehan ka Kristu nia alin sira asiste Memoriál.

4. Tanbasá Kristu nia alin sira deʼit mak han paun no hemu tua-uvas iha Memoriál?

⁴ Tinan-tinan, Kristu nia alin sira neʼebé asiste Memoriál han paun no hemu tua-uvas. Tanbasá sira han paun no hemu tua-uvas iha Memoriál? Atu hatán ba pergunta neʼe, hanoin toʼok kona-ba Jesus nia kalan ikus iha rai. Depois han tiha hahán Páskua nian, Jesus hahú fali buat neʼebé agora ita hatene nuʼudar Naʼi nia Han-Kalan. Nia pasa paun no tua-uvas ba ninia apóstolu naʼin-11 neʼebé laran-metin no haruka sira atu han paun no hemu tua-uvas. Jesus fó sai ba sira kona-ba aliansa rua, aliansa foun no aliansa Ukun nian. * (Lc 22:19, 20, 28-30) Aliansa sira-neʼe loke dalan ba apóstolu sira-neʼe no ema seluk tan atu sai liurai no amlulik iha lalehan. (Apok 5:10; 14:1) Kristu nia alin sira neʼebé sei moris iha rai no hola parte iha aliansa rua neʼe mak han paun no hemu tua-uvas iha Memoriál.

5. Kristu nia alin sira hatene saida kona-ba sira-nia esperansa?

⁵ Kristu nia alin sira mós hein namanas atu asiste Memoriál tanba komemorasaun neʼe fó oportunidade ba sira atu hanoin kleʼan kona-ba sira-nia esperansa. Jeová fó ona esperansa furak ba sira atu moris ba nafatin iha lalehan no nunka mate tan. Sira sei bá lalehan atu serbí hamutuk ho Jesus Kristu no mós ema seluk tan neʼebé sai parte ba ema naʼin-144.000. Maibé buat neʼebé importante liu mak sira sei serbí iha Jeová nia oin. (1 Kor 15:51-53; 1 João 3:2) Kristu nia alin sira hatene katak Maromak konvida ona sira atu simu priviléjiu neʼe. Maibé atu bele tama iha lalehan, sira presiza kontinua laran-metin toʼo mate. (2 Tim 4:7, 8) Kristu nia alin sira kontente atu medita kona-ba sira-nia esperansa neʼe. (Tito 2:13) Oinsá ho “bibi-malae seluk”? (João 10:16) Saida mak razaun balu atu sira asiste Memoriál?

6. Tanbasá bibi-malae seluk asiste Memoriál tinan-tinan?

⁶ Maski bibi-malae seluk la han paun no hemu tua-uvas, maibé sira kontente atu asiste Memoriál. Iha tinan 1938, sira neʼebé iha esperansa atu moris iha rai hetan konvite ba dala primeiru atu asiste Memoriál. Livru Haklaken 1 Marsu 1938 iha lian Inglés hatete: “Diʼak ba [bibi-malae seluk] atu asiste reuniaun neʼe no haree buat neʼebé halaʼo daudaun. . . . Neʼe mós tempu ksolok ba sira.” Hanesan konvidadu sira neʼebé kontente atu asiste festa kazamentu, bibi-malae seluk mós kontente atu asiste Memoriál.

7. Tanbasá bibi-malae seluk hein namanas atu rona diskursu Memoriál?

⁷ Bibi-malae seluk mós medita kona-ba sira-nia esperansa. Sira hein namanas atu rona diskursu Memoriál, tanba diskursu neʼe tau fokus ba buat neʼebé Kristu no ninia alin naʼin-144.000 sei halo ba ema laran-metin sira durante Kristu nia Ukun ba Tinan Rihun Ida. Liurai Jesus Kristu sei dirije ukun-naʼin sira iha lalehan atu ajuda halo mundu sai paraízu no ajuda ema laran-metin sai perfeitu fali. Klaru katak ema millaun  ba millaun neʼebé asiste Memoriál kontente tebes atu imajina kona-ba Bíblia nia profesia sira hanesan Isaias 35:5, 6; 65:21-23; no Apokalipse 21:3, 4. Hodi imajina kona-ba oinsá sira no sira-nia família moris iha mundu foun, neʼe hametin sira-nia esperansa ba futuru no hametin sira-nia hakarak atu nunka para serbí Jeová.—Mt 24:13; Gal 6:9.

8. Tanbasá bibi-malae seluk asiste Memoriál?

⁸ Bibi-malae seluk mós asiste Memoriál tanba sira hakarak hatudu sira-nia domin no apoiu ba Kristu nia alin sira. Bíblia fó-hatene nanis katak Kristu nia alin sira no mós ema neʼebé iha esperansa atu moris iha rai sei serbisu hamutuk. Oinsá? Mai ita koʼalia kona-ba ezemplu balu.

9. Profesia iha Zacarias 8:23 fó sai saida kona-ba bibi-malae seluk nia hanoin kona-ba Kristu nia alin sira?

⁹ Lee Zacarias 8:23. Profesia neʼe esplika iha dalan neʼebé furak kona-ba oinsá bibi-malae seluk nia hanoin kona-ba Kristu nia alin sira. Liafuan “mane Judeu ida” no “imi” refere ba grupu neʼebé hanesan, neʼe mak Kristu nia alin sira neʼebé sei moris hela iha rai. (Rom 2:28, 29) Fraze “mane naʼin-sanulu husi língua hotu husi nasaun oioin” refere ba bibi-malae seluk. Sira sei “kaer metin” Kristu nia alin sira, neʼe katak sira apoia Kristu nia alin sira ho laran-metin atu adora Maromak iha dalan neʼebé loos. Tan neʼe, iha kalan Memoriál, bibi-malae seluk asiste Memoriál atu hatudu katak sira iha relasaun besik ho Kristu nia alin sira.

10. Saida mak Jeová halo ona atu kumpre profesia iha Ezequiel 37:15-19, 24, 25?

¹⁰ Lee Ezequiel 37:15-19, 24, 25. Jeová kumpre profesia neʼe liuhusi ajuda Kristu nia alin sira no bibi-malae seluk atu serbisu hamutuk ho unidade. Profesia neʼe temi kona-ba ai-pedasuk rua. Sira neʼebé iha esperansa atu moris iha lalehan mak hanesan ai-pedasuk “ba Judá”. Uluk Maromak hili liurai Izraél husi suku Judá. No sira neʼebé iha esperansa atu moris iha rai mak hanesan ai-pedasuk “ba Efraim”. * Jeová sei tau ai-pedasuk rua neʼe hamutuk atu sai “ai ida deʼit”. Neʼe katak grupu rua neʼe serbí hamutuk ho unidade no Liurai Kristu Jesus mak dirije sira. Tinan-tinan, Kristu nia alin sira no bibi-malae seluk asiste Memoriál laʼós nuʼudar grupu ketaketak, maibé nuʼudar “bibi-lubun ida deʼit” neʼebé “bibi-atan ida deʼit” mak dirije.—João 10:16.

11. Tuir Mateus 25:31-36, 40, oinsá mak “bibi-malae” hatudu katak sira apoia Kristu nia alin sira?

¹¹ Lee Mateus 25:31-36, 40. “Bibi-malae” iha Jesus nia ai-knanoik reprezenta ema laran-loos iha tempu nia rohan neʼebé iha esperansa atu moris iha rai, neʼe katak bibi-malae seluk. Bibi-malae seluk ho laran-metin apoia Kristu nia alin sira neʼebé sei moris hela liuhusi ajuda sira atu kumpre sira-nia responsabilidade neʼebé boot, neʼe mak haklaken no hanorin ema sai Jesus nia dixípulu.—Mt 24:14; 28:19, 20.

12-13. Saida mak dalan seluk tan neʼebé bibi-malae seluk apoia Kristu nia alin sira?

¹² Tinan-tinan iha semana sira antes Memoriál, bibi-malae seluk apoia Kristu nia alin hodi fahe konvite iha mundu tomak atu konvida ema seluk atu asiste  Memoriál. (Haree kaixa “ Ita halo planu nanis ba tempu Memoriál ka lae?”) Bibi-malae seluk mós arranja atu kongregasaun hotu halaʼo Memoriál, maski kongregasaun barak la iha ema ida mak han paun no hemu tua-uvas iha Memoriál. Bibi-malae seluk kontente atu apoia Kristu nia alin sira. Bibi-malae sira hatene katak Jesus hafolin buat neʼebé sira halo ba ninia alin sira, neʼe hanesan sira halo ba nia.—Mt 25:37-40.

¹³ Saida mak razaun seluk tan atu ita hotu asiste Memoriál maski ita-nia esperansa la hanesan?

14. Oinsá Jeová no Jesus hatudu domin ba ita?

¹⁴ Ita agradese tebes tanba Jeová no Jesus hadomi ita. Jeová hatudu ona ninia domin ba ita iha dalan oioin. Maibé nia hatudu domin boot liu ba ita hodi haruka ninia Oan-Mane mesak atu hetan terus no mate ba ita. (João 3:16) Ita rekoñese katak Jesus mós hatudu domin boot hodi fó ninia moris ba ita. (João 15:13) Ita nunka bele selu fali Jeová no Jesus nia domin ba ita. Maibé ita bele hatudu agradese liuhusi dalan neʼebé ita halaʼo ita-nia moris loroloron. (Kol 3:15) No ita asiste Memoriál atu hanoin-hetan sira-nia domin ba ita no mós atu hatudu ita-nia domin ba sira.

15. Tanbasá Kristu nia alin sira no bibi-malae seluk hafolin tebes Jesus nia sakrifísiu?

¹⁵ Ita hafolin tebes Jesus nia sakrifísiu. (Mt 20:28) Kristu nia alin sira hafolin Jesus nia sakrifísiu, tanba ida-neʼe loke dalan ba sira atu iha esperansa atu bá lalehan. Tanba sira-nia fiar ba Kristu nia sakrifísiu, Jeová bele haree sira nuʼudar ema laran-loos no hili sira nuʼudar ninia oan hakiak. (Rom 5:1; 8:15-17, 23) Bibi-malae seluk mós hafolin Jesus nia sakrifísiu. Tanba sira tau fiar ba Kristu nia raan neʼebé fakar ona, sira sai moos iha Maromak nia oin, no bele halo serbisu sagradu ba Maromak, no iha esperansa atu “liu terus boot”. (Apok 7:13-15) Dalan ida Kristu nia alin sira no bibi-malae seluk hatudu sira-nia agradese ba Jesus nia sakrifísiu mak hodi asiste Memoriál tinan-tinan.

16. Saida mak razaun seluk atu asiste Memoriál?

¹⁶ Ita mós asiste Memoriál tanba ita hakarak halo tuir Jesus nia mandamentu. Maski ita-nia esperansa mak atu moris iha lalehan ka iha rai, ita hakarak halo tuir Jesus nia mandamentu neʼebé nia fó sai iha kalan neʼebé nia komesa halaʼo Memoriál: “Kontinua halo ida-neʼe hodi hanoin haʼu.”—1 Kor 11:23, 24.

17. Oinsá Memoriál ajuda ita atu hakbesik liután ba Jeová?

¹⁷ Ita hakbesik liután ba Jeová. (Tgo 4:8) Hanesan ita aprende ona, Memoriál fó ita oportunidade atu hanoin kona-ba esperansa neʼebé Jeová fó ona ba ita no medita kona-ba domin boot neʼebé nia hatudu mai ita. (Jer 29:11; 1 João 4:8-10) Bainhira ita medita kona-ba ita-nia esperansa ba futuru no Maromak nia domin ba ita neʼebé nunka lakon, ita-nia domin ba Jeová sei sai boot liután no ita sei hametin ita-nia relasaun diʼak ho nia.—Rom 8:38, 39.

18. Medita kona-ba Jesus nia ezemplu book ita atu halo saida?

¹⁸ Ita hetan laran-manas atu banati-tuir Jesus. (1 Ped 2:21) Loron balu  antes Memoriál, ita lee istória husi Bíblia kona-ba Jesus nia semana ikus iha rai, ninia mate no moris-hiʼas. Tuirmai, iha kalan Memoriál nian, ita rona diskursu neʼebé fó-hanoin ita kona-ba Jesus nia domin ba ita. (Éf 5:2; 1 João 3:16) Bainhira ita lee kona-ba Jesus nia ezemplu neʼebé la hanoin an deʼit no medita kona-ba neʼe, ida-neʼe book ita atu “kontinua laʼo tuir Jesus nia dalan”.—1 João 2:6.

19. Oinsá mak ita bele hela nafatin iha Maromak nia domin?

¹⁹ Ita mós sei hakarak liután atu hela iha Maromak nia domin. (Jud 20, 21) Ita bele hela nafatin iha Maromak nia domin liuhusi hakaʼas an atu halo tuir nia, halo santu ninia naran, no halo ninia laran kontente. (Prov 27:11; Mt 6:9; 1 João 5:3) Memoriál mós book ita atu deside metin atu halaʼo ita-nia moris loroloron iha dalan neʼebé hatudu ba Jeová katak ita hakarak hela nafatin iha ninia domin.

20. Ita iha razaun saida deʼit atu asiste Memoriál?

²⁰ Maski ita-nia esperansa mak atu moris iha lalehan ka iha rai, ita iha razaun oioin atu asiste Memoriál. Tinan-tinan bainhira ita asiste Memoriál, ita hanoin-hetan Jesus Kristu nia mate tanba ita hadomi nia. Liután neʼe, ita mós hanoin-hetan domin boot neʼebé Jeová hatudu hodi fó ninia Oan-Mane nuʼudar sakrifísiu ba ita. Tinan neʼe, Memoriál sei halaʼo iha sesta kalan, 15 Abríl 2022. Ita hadomi Jeová no ninia Oan-Mane. Tan neʼe, iha loron neʼebé ita komemora Jesus nia mate, ita lakohi husik buat ida hanetik ita atu asiste Memoriál.