1. Tanbasá ema barak ohin loron la tau fiar ba Bíblia?

 EMA barak ohin loron la hatene atu tau fiar ba sé. Sira duvida katak ema neʼebé sira respeitu hanesan ulun-naʼin sira, sientista no negósiu-naʼin hanoin sira. Sira mós la respeitu ulun-naʼin relijiaun sira neʼebé bolu sira-nia an nuʼudar ema Kristaun no dehan katak sira halo tuir Bíblia. Tan neʼe ita la hakfodak bainhira ema barak la tau fiar ba Bíblia.

2. Tuir Salmo 119:160, ita tenke fiar metin saida?

² Jeová nia povu fiar metin katak Jeová mak “Maromak lia-loos nian” no nia hakarak ita hetan buat neʼebé diʼak. (Sal 31:5; Isa 48:17) Ita hatene katak ita bele tau fiar ba buat neʼebé hakerek iha Bíblia. Ita fiar katak “[Maromak nia] liafuan mak lia-loos”. (Lee Salmo 119:160.) Ita konkorda ho buat neʼebé matenek-naʼin ida kona-ba Bíblia hakerek: “Maromak nia liafuan hotu sempre loos no buat hotu neʼebé nia hatete sempre sai loos. Maromak nia povu bele tau fiar ba ninia liafuan tanba fiar ba Maromak neʼebé hatete liafuan sira-neʼe.”

3. Iha lisaun neʼe, ita sei aprende saida?

³ Oinsá ita bele ajuda ema seluk atu tau fiar ba Bíblia? Mai ita aprende kona-ba razaun tolu tanbasá ita bele tau fiar ba Bíblia. Ita sei aprende kona-ba oinsá Bíblia nia mensajen la troka, oinsá Bíblia nia profesia sai loos no oinsá Bíblia iha kbiit atu troka ema nia moris.

4. Tanbasá ema balu hanoin katak Bíblia troka?

⁴ Maromak Jeová dirije mane laran-metin maizumenus naʼin-40 atu hakerek livru sira iha Bíblia. Maibé la iha manuskritu b orijinál ohin loron, ita iha deʼit kópia husi kópia sira. Tan neʼe ema balu duvida se buat neʼebé ohin loron ita lee iha Bíblia mak hanesan duni ho buat neʼebé uluk ema hakerek. Ita rasik hanoin ona kona-ba oinsá ita bele fiar katak Maromak nia Liafuan la troka ka lae?

5. Oinsá mak ema halo kopia ba Eskritura Lian Ebraiku? (Haree dezeñu iha livru oin.)

⁵ Atu proteje Bíblia nia mensajen, Jeová haruka ninia povu atu halo kopia sira. Nia haruka liurai sira husi Izraél atu kopia Moisés nia Ukun-Fuan, no nia hili ema Levi atu hanorin Ukun-Fuan ba povu. (Deut 17:18; 31:24-26; Neem 8:7) Depois ema Judeu livre husi Babilónia, iha ema grupu ida neʼebé serbisu nuʼudar eskriba no sira komesa halo kopia barak ba Eskritura Lian Ebraiku. (Ezras 7:6, nota) Mane sira-neʼe halo serbisu ho kuidadu. Eskriba sira sura liafuan no mós letra sira atu nuneʼe sira bele hatene se sira kopia ho loloos. Maibé tanba sala-naʼin, entaun sala kiʼik balu tama iha Bíblia nia testu laran. Maski nuneʼe tanba iha kópia barak husi testu neʼebé hanesan, matenek-naʼin sira bele buka-hetan sala sira-neʼe. Oinsá?

6. Oinsá mak matenek-naʼin sira bele buka-hetan sala iha Bíblia?

⁶ Ohin loron, matenek-naʼin sira iha dalan diʼak atu buka-hetan sala sira husi Bíblia nia kópia ida. Porezemplu, imajina mane naʼin-100 hetan knaar atu kopia pájina ida ho liman. Mane ida halo sala kiʼik bainhira nia kopia. Dalan ida atu buka-hetan ninia sala mak hodi kompara ninia kópia ho ema seluk nia kópia. Nuneʼe mós hodi kompara Bíblia nia manuskritu oioin, matenek-naʼin sira bele buka-hetan sala neʼebé eskriba ida halo ka liafuan neʼebé nia haluha hakerek.

7. Oinsá mak ita hatene katak eskriba sira serbisu ho kuidadu tebes?

⁷ Ema neʼebé kopia Bíblia nia manuskritu sira hakaʼas an tebes atu kopia ho loloos. Hanoin toʼok kona-ba ezemplu ida. Kópia kompletu ida husi Eskritura Lian Ebraiku naran Kódise Leningradu neʼebé tuan liu mak husi tinan 1.008 ka 1.009 EC. Maibé matenek-naʼin sira deskobre Bíblia nia manuskritu no parte husi manuskritu sira neʼebé tinan 1.000 tuan liu fali Kódise Leningradu. Karik ita bele hanoin katak se ema kopia beibeik manuskritu sira-neʼe durante tinan 1.000, karik Kódise Leningradu la hanesan ona ho manuskritu sira neʼebé tuan liu. Maibé neʼe la akontese. Matenek-naʼin sira kompara manuskritu neʼebé tuan liu ho manuskritu neʼebé foun liu no deskobre katak iha liafuan balu deʼit mak la hanesan no Bíblia nia mensajen la troka.

8. Saida mak la hanesan entre kópia ba Eskritura Lian Gregu no kópia ba livru antigu sira seluk?

⁸ Ema Kristaun iha tempu uluk mós kopia Eskritura sira. Sira kopia livru 27 husi Eskritura Lian Gregu, no sira uza kópia sira-neʼe iha reuniaun no bainhira haklaken. Matenek-naʼin ida kompara manuskritu sira husi Eskritura Lian Gregu ho livru sira seluk husi tempu neʼebé hanesan hodi hatete: “Ohin loron iha  manuskritu husi Eskritura Lian Gregu barak liu se kompara ho livru sira seluk . . . no baibain manuskritu sira-neʼe kompletu liu.” Livru ida kona-ba Testamentu Foun hatete: “Ita bele iha konfiansa katak buat neʼebé hakerek iha tradusaun Bíblia neʼebé diʼak husi Eskritura Lian Gregu fó sai mensajen neʼebé hanesan ho buat neʼebé hakerek-naʼin sira hakerek tinan barak liubá.”

9. Isaias 40:8 fó sai lia-loos saida kona-ba Bíblia nia mensajen?

⁹ Durante tinan atus ba atus, eskriba barak serbisu ho badinas atu kopia Bíblia ho didiʼak. Tan neʼe ohin loron, ita bele lee no estuda Bíblia neʼebé hanesan ho orijinál. c Ita hatene katak Jeová mak proteje ninia Liafuan atu ninia mensajen la troka toʼo ohin loron. (Lee Isaias 40:8.) Maibé ema balu dehan katak maski Bíblia nia mensajen la troka, neʼe la dehan katak Maromak mak dirije ema atu hakerek Bíblia. Entaun mai ita koʼalia kona-ba evidénsia balu neʼebé hatudu katak Bíblia mai husi Maromak.

10. Temi toʼok ezemplu kona-ba profesia neʼebé sai loos ona no prova katak 2 Pedro 1:21 mak loos. (Haree dezeñu sira.)

¹⁰ Bíblia fó sai profesia barak neʼebé sai loos ona. Profesia balu hakerek tinan atus ba atus antes sai loos. Istória hatudu katak profesia sira-neʼe sai loos ona. Ita la hakfodak tanba ita hatene katak profesia hotu iha Bíblia mai husi Jeová. (Lee 2 Pedro 1:21.) Hanoin toʼok profesia kona-ba sidade Babilónia sei lakon. Maizumenus entre tinan 778 no 732 AEC, Jeová dirije profeta Isaias atu fó sai nanis katak ema sei manán sidade Babilónia neʼebé kbiit boot. Isaias fó sai katak mane ida naran Ciro mak sei manán sidade Babilónia no nia mós fó sai oinsá Ciro sei manán sidade neʼe. (Isa 44:27–45:2) Isaias mós fó sai katak ikusmai  Babilónia sei rahun no ema sei la hela tan iha neʼebá. (Isa 13:19, 20) Ida-neʼe akontese duni. Iha tinan 539 AEC, Média no Pérsia manán Babilónia, no ohin loron sidade neʼe hela fatuk butuk deʼit.​—Haree vídeo Bíblia fó-hatene nanis katak Babilónia sei lakon iha livru Moris Haksolok ba Nafatin, lisaun 03 pontu 5 versaun eletróniku.

11. Esplika toʼok oinsá Daniel 2:41-43 sai loos ohin loron.

¹¹ Bíblia nia profesia mós sai loos ohin loron, laʼós deʼit iha tempu uluk. Porezemplu hanoin toʼok Daniel nia profesia kona-ba Ukun Boot Bretaña ho Estadus Unidus neʼebé sai loos ohin loron. (Lee Daniel 2:41-43.) Profesia neʼe fó sai katak Bretaña ho Estadu Unidus nia ukun sei “forte iha parte balu” hanesan ho besi no “fraku iha parte seluk” hanesan ho rai-mean. Ita bele haree katak neʼe loos duni. Bretaña ho Estadus Unidus hatudu katak sira forte hanesan besi hodi hola parte importante iha Funu Mundiál 1 no 2, no sira nafatin iha militár neʼebé forsa boot. Maibé sira mós fraku tanba sira-nia sidadaun protesta beibeik hodi kontra negósiu-naʼin sira no governu. Matenek-naʼin ida kona-ba polítiku hatete: “Husi nasaun demokrátika hotu iha mundu ohin loron, Estadus Unidus mak nasaun ho ema barak liu neʼebé la konkorda malu kona-ba polítiku.” No iha Bretaña, iha tinan hirak-neʼe nia laran, ema mós haketak malu tanba la konkorda kona-ba ligasaun entre Bretaña no nasaun sira iha Uniaun Europeia. Tanba ema la konkorda malu, neʼe halo susar ba Ukun Boot Bretaña no Estadus Unidus atu ukun ho forsa boot.

12. Bíblia nia profesia hametin ita-nia fiar kona-ba saida?

¹² Tanba profesia barak sai loos ona, neʼe hametin ita-nia fiar katak Maromak nia promesa sira kona-ba futuru mós sei sai loos. Ita sente hanesan ema ida neʼebé hakerek salmo no halo orasaun ba Jeová hodi hatete: “Haʼu hakarak tebes hetan salvasaun husi Ita, tanba haʼu tau esperansa ba Ita-nia liafuan.” (Sal 119:81) Jeová hatudu laran-diʼak hodi fó ita “futuru kapás no esperansa” liuhusi Bíblia. (Jer 29:11) Ita-nia esperansa ba futuru la depende ba ema nia hakaʼas an, maibé bazeia ba Jeová nia promesa sira. Mai ita kontinua hametin ita-nia fiar ba Maromak nia Liafuan liuhusi estuda profesia iha Bíblia.

13. Tuir Salmo 119:66, 138, saida mak razaun seluk tan atu tau fiar ba Bíblia?

¹³ Razaun seluk tan atu tau fiar ba Bíblia mak hodi haree rezultadu diʼak neʼebé ema hetan tanba halo tuir Bíblia nia matadalan. (Lee Salmo 119:66, 138.) Porezemplu, feen-laʼen neʼebé uluk besik atu soe malu, agora moris hamutuk ho kontente tanba halo tuir Bíblia nia matadalan. Sira-nia oan sente kontente tanba iha inan-aman Kristaun neʼebé tau matan no hadomi sira.​—Éf 5:22-29.

14. Fó toʼok ezemplu neʼebé hatudu katak halo tuir Bíblia nia hanorin bele troka ema nia hahalok.

¹⁴ Kriminozu neʼebé perigu tebes mós konsege troka sira-nia hahalok liuhusi halo tuir Bíblia nia matadalan. Hanoin toʼok oinsá Bíblia ajuda prizioneiru ida naran Jack. d Nia mak kriminozu neʼebé  gosta halo violénsia no husi prizioneiru hotu neʼebé atu hetan kastigu-mate, nia mak ida neʼebé perigu liu. Maibé loron ida, Jack tuir estuda Bíblia. Irmaun sira neʼebé dirije estuda Bíblia hatudu laran-diʼak no neʼe book tebes Jack. Nia mós komesa estuda Bíblia. Bainhira nia aplika Bíblia nia matadalan, ninia hahalok komesa troka no nia sai ema neʼebé laran-diʼak. Ikusmai, Jack kumpre kritéria atu sai haklaken-naʼin neʼebé seidauk batizmu no hetan batizmu. Nia haklaken ho badinas ba prizioneiru seluk kona-ba Maromak nia Ukun no ajuda ema naʼin-haat atu aprende lia-loos. Bainhira tempu toʼo atu hetan kastigu-mate, Jack nia hahalok la hanesan uluk ona. Ninia advogadu ida hatete: “Jack nia hahalok la hanesan duni ho tinan 20 liubá. Testemuña ba Jeová nia hanorin troka duni ninia moris.” Maski Jack hetan kastigu-mate, maibé ninia ezemplu hatudu katak ita bele tau fiar ba Maromak nia Liafuan no neʼe iha kbiit atu troka ema nia hahalok.​—Isa 11:6-9.

15. Oinsá mak halo tuir Bíblia nia matadalan halo Maromak nia povu la hanesan ho ema seluk? (Haree foto.)

¹⁵ Jeová nia povu iha unidade tanba sira halo tuir lia-loos husi Bíblia. (João 13:35; 1 Kor 1:10) Ita bele haree dame no unidade entre Maromak nia povu, maski ohin loron ema seluk haketak malu tanba opiniaun polítiku, rasa ka pozisaun iha komunidade. Bainhira mane joven ida naran Jean haree unidade entre Maromak nia povu, neʼe book tebes ninia laran. Nia sai boot iha nasaun ida iha Áfrika. Bainhira funu akontese iha ninia nasaun, nia tama militár maibé tuirmai nia halai ba nasaun viziñu. Iha neʼebá nia hasoru Testemuña ba Jeová. Jean hatete: “Haʼu aprende katak ema neʼebé tuir relijiaun loos la envolve an iha polítiku no sira la haketak malu. Sira hadomi malu. Uluk haʼu dedika haʼu-nia  moris atu defende haʼu-nia nasaun. Maibé bainhira haʼu aprende lia-loos husi Bíblia, haʼu deside atu dedika haʼu-nia moris ba Jeová.” Jean troka ninia hahalok hotu. Duké halo funu hasoru ema husi nasaun no rasa la hanesan ho nia, agora nia haklaken kona-ba Bíblia nia mensajen dame nian ba ema hotu neʼebé nia hasoru. Bíblia bele ajuda ema barak husi nasaun oioin no neʼe mak razaun atu tau fiar ba Maromak nia Liafuan.

16. Tanbasá importante atu hametin ita-nia fiar ba Maromak nia Liafuan?

¹⁶ Nuʼudar situasaun iha mundu sai aat liután, ita-nia fiar ba Maromak nia Liafuan mós sei hetan koko. Karik ema sei koko halo ita duvida katak Bíblia mak loos no Jeová mak hili atan laran-metin no matenek atu dirije ninia povu ohin loron. Maibé se ita fiar katak Jeová nia Liafuan mak sempre loos, neʼe sei ajuda ita tahan bainhira ita-nia fiar hetan koko. Ita sei deside metin atu ‘halo tuir Jeová nia ukun-fuan sira iha tempu hotu, toʼo mate’. (Sal 119:112) Ita sei “la moe” atu fó sai lia-loos ba ema seluk no anima sira atu moris tuir Bíblia. (Sal 119:46) Ita mós sei iha kbiit atu tahan situasaun neʼebé susar tebes “ho pasiénsia no ksolok”, inklui kuandu ema fó-terus ita.​—Kol 1:11; Sal 119:143, 157.

17. Ita-nia eskritura tinan nian sei fó-hanoin ita kona-ba saida?

¹⁷ Ita agradese tebes tanba Jeová fó sai lia-loos ba ita. Lia-loos ajuda ita sente kalma, iha konfiansa, no mós iha objetivu ba moris maski mundu neʼe sai aat ba beibeik. Lia-loos fó ita esperansa kona-ba futuru kapás iha Maromak nia Ukun okos. Hein katak eskritura tinan nian ba tinan 2023 bele ajuda ita atu kontinua fiar metin katak Maromak nia Liafuan mak lia-loos!​—Sal 119:160.