LISAUN ESTUDU 4
Jeová haraik bensaun ba Ita-nia hakaʼas an atu tuir Memoriál
“Kontinua halo ida-neʼe hodi hanoin haʼu.”—LC 22:19.
KNANANUK 19 Naʼi nia Han-Kalan
IHA LISAUN NEʼE a
1-2. Tanbasá ita tuir Memoriál tinan-tinan?
MAIZUMENUS tinan 2.000 liubá, Jesus fó ninia moris nuʼudar sakrifísiu atu loke dalan ba ita hodi ita bele hetan moris ba nafatin. Iha kalan antes Jesus mate, nia haruka ninia dixípulu sira atu hanoin-hetan buat neʼebé nia halo hodi halaʼo serimónia simples neʼebé inklui paun no tua-uvas.—1 Kor 11:23-26.
2 Ita halo tuir Jesus nia mandamentu tanba ita hadomi tebes nia. (João 14:15) Tinan-tinan, durante tempu memoriál, ita hatudu agradese ba buat neʼebé Jesus halo liuhusi uza tempu atu halo orasaun no hanoin kleʼan kona-ba benefísiu husi Jesus nia mate. Ita mós kontente atu aumenta ita-nia serbisu haklaken no konvida ema barak atu asiste serimónia espesiál neʼe. Ita mós hakaʼas an atu la husik buat naran deʼit hanetik ita atu tuir Memoriál.
3. Iha lisaun neʼe, ita sei aprende saida?
3 Iha lisaun neʼe, ita sei koʼalia hamutuk dalan tolu oinsá Jeová nia povu hakaʼas an atu komemora Jesus nia mate: (1) halaʼo Memoriál tuir buat neʼebé Jesus hanorin, (2) konvida ema seluk asiste Memoriál, no (3) tuir Memoriál maski hasoru situasaun susar.
HALAʼO MEMORIÁL TUIR BUAT NEʼEBÉ JESUS HANORIN
4. Tinan-tinan iha Memoriál, ita hetan resposta ba pergunta saida deʼit, no tanbasá ita presiza hafolin lia-loos sira-neʼe? (Lucas 22:19, 20)
4 Tinan-tinan iha Memoriál, ita rona diskursu husi Bíblia neʼebé hatán pergunta barak. Ita aprende tanbasá mak Jesus presiza mate no oinsá mak ninia mate bele sosa ema barak husi sala. Ita mós hanoin fali kona-ba paun no tua-uvas reprezenta saida no sé mak bele han paun no hemu tua-uvas. (Lee Lucas 22:19, 20.) Ita mós hanoin kleʼan kona-ba futuru kapás ba ema sira neʼebé iha esperansa atu moris ba nafatin iha mundu. (Isa 35:5, 6; 65:17, 21-23) Ita presiza hafolin lia-loos sira-neʼe. Ema millaun ba millaun la hatene lia-loos sira-neʼe no sira la hatene katak Jesus nia sakrifísiu mak folin-boot tebes. Sira mós la komemora Jesus nia mate tuir dalan neʼebé Jesus hanorin ba ninia dixípulu sira. Tanbasá?
5. Depois apóstolu sira mate, ema komesa komemora Jesus nia mate iha dalan oinsá?
5 Lakleur depois Jesus nia apóstolu sira mate, ema Kristaun falsu komesa tama ba kongregasaun laran. (Mt 13:24-27, 37-39) Sira koʼalia “lia-bobar oioin hodi dada sees dixípulu sira atu halo tuir sira”. (Após 20:29, 30) Lia-bobar ida neʼebé ema Kristaun falsu komesa hanorin mak Jesus la fó ninia isin nuʼudar sakrifísiu “dala ida deʼit ba nafatin atu lori ema barak nia sala” hanesan Bíblia hanorin, maibé sira hanorin katak ninia sakrifísiu tenke repete beibeik. (Ebr 9:27, 28) Ohin loron, ema barak fiar hanorin falsu neʼe. Sira bá igreja semana-semana, ka dala ruma loroloron, atu komemora Jesus nia sakrifísiu, baibain relijiaun Katólika bolu ida-neʼe nuʼudar “Eukaristia”. b Relijiaun seluk la komemora beibeik Jesus nia mate, no sira la komprende ho klaru signifikadu husi Jesus nia mate. Sira balu hanoin: ‘Jesus nia mate perdua duni haʼu-nia sala ka lae?’ Tanbasá sira husu pergunta hanesan neʼe? Karik tanba sira fiar ba ema nia hanorin neʼebé dehan katak Jesus nia sakrifísiu labele hamoos ema nia sala. Oinsá mak Jesus nia dixípulu sira ajuda ema sira-neʼe atu komprende?
6. Iha tinan 1872, grupu Estudante Bíblia komprende saida?
6 Iha tinan 1870, grupu Estudante Bíblia neʼebé Charles Taze Russell mak dirije komesa estuda didiʼak Eskritura sira. Sira hakarak hatene lia-loos kona-ba Jesus nia sakrifísiu no oinsá atu komemora Jesus nia loron mate. Iha tinan 1872, sira komprende husi Bíblia katak Jesus fó duni ninia moris nuʼudar sakrifísiu ba ema hotu. Sira la rai deʼit buat neʼebé sira aprende. Maibé sira fó sai ida-neʼe ba ema seluk liuhusi livru, jornál no revista sira. No lakleur deʼit, sira komesa halibur hamutuk tinan ida dala ida atu komemora Memoriál, hanesan ema Kristaun loos sira halo iha apóstolu sira-nia tempu.
7. Oinsá ita hetan benefísiu husi estudu neʼebé uluk Estudante Bíblia sira halo?
7 Ohin loron, ita hetan benefísiu husi mane sira-neʼe nia hakaʼas an atu estuda didiʼak Bíblia tinan barak liubá. Oinsá? Jeová ajuda ita atu komprende signifikadu husi Jesus nia sakrifísiu no oinsá ida-neʼe lori benefísiu mai ita no mós ema hotu. (1 João 2:1, 2) Ita mós aprende katak Bíblia temi kona-ba esperansa rua ba ema neʼebé halo Maromak kontente. Ema balu iha esperansa atu moris ba nafatin iha lalehan no mós ema millaun ba millaun iha esperansa atu moris ba nafatin iha rai. Ita bele hakbesik liután ba Jeová bainhira ita hanoin kona-ba ninia domin mai ita no oinsá ita bele hetan benefísiu husi Jesus nia sakrifísiu. (1 Ped 3:18; 1 João 4:9) Entaun, hanesan irmaun sira iha tempu uluk neʼebé laran-metin, ita mós konvida ema seluk atu asiste Memoriál tuir buat neʼebé Jesus hanorin ona ba ninia dixípulu sira.
KONVIDA EMA SELUK TUIR MEMORIÁL
Saida mak Ita bele halo atu hola parte liután iha kampaña atu fahe konvite Memoriál? (Haree parágrafu 8-10) e
8. Saida mak Jeová nia povu halo atu konvida ema seluk tuir Memoriál? (Haree foto.)
8 Durante tinan barak, Jeová nia povu konvida ema tuir Memoriál. Iha tinan 1881, irmaun-irmán sira iha Estadus Unidus hetan konvite atu tuir Memoriál iha uma privadu ida iha Allegheny, Pensilvánia. Tuirmai kongregasaun ida-idak komemora Memoriál ketaketak. Iha fulan-Marsu tinan 1940, haklaken-naʼin sira rona katak sira bele konvida ema neʼebé interese iha sira-nia área. Iha tinan 1960, ba dala primeiru Betel print konvite Memoriál atu fó ba kongregasaun sira. Husi tempu neʼebá, ita fahe ona konvite Memoriál biliaun ba biliaun. Tanbasá ita hakaʼas an uza tempu no kbiit atu konvida ema seluk?
9-10. Sé mak hetan benefísiu husi ita-nia hakaʼas an atu konvida ema tuir Memoriál? (João 3:16)
9 Razaun ida ita konvida ema seluk tuir Memoriál mak ita hakarak sira neʼebé tuir ba dala primeiru atu aprende lia-loos kona-ba buat neʼebé Jeová no Jesus halo ona ba ita hotu. (Lee João 3:16.) Ita hein katak buat neʼebé sira haree no rona iha Memoriál sei book sira atu aprende liután no serbí Jeová. Maibé ema seluk mós hetan benefísiu.
10 Ita mós konvida Testemuña sira neʼebé la ativu ona. Ita halo nuneʼe hodi fó-hanoin sira katak Maromak nafatin hadomi sira. Sira barak mak simu konvite no ita kontente atu hasoru fali sira. Bainhira sira tuir Memoriál, neʼe fó-hanoin sira katak uluk sira sente kontente tanba serbí Jeová. Haree toʼok irmán Monica c nia ezemplu. Nia komesa haklaken fali durante pandemia COVID-19. Depois tuir tiha Memoriál iha tinan 2021, nia hatete: “Memoriál neʼe espesiál tebes mai haʼu. Durante tinan 20, neʼe mak dala primeiru, haʼu haklaken no konvida ema tuir Memoriál. Haʼu hakaʼas an atu konvida ema seluk tanba haʼu hafolin buat neʼebé Jeová no Jesus halo ona mai haʼu.” (Sal 103:1-4) Maski ema simu ka la simu ita-nia konvite, ita kontinua konvida ema seluk tuir Memoriál, tanba ita hatene katak Jeová hafolin ita-nia hakaʼas an.
11. Oinsá Jeová haraik bensaun ba ita-nia hakaʼas an atu konvida ema tuir Memoriál? (Ageu 2:7)
11 Jeová haraik bensaun ba ita-nia hakaʼas an atu konvida ema tuir Memoriál. Iha tinan 2021, ema neʼebé tuir Memoriál mak hamutuk naʼin-21.367.603, maski iha restrisaun oioin tanba pandemia COVID-19. Neʼe dala rua ho balu barak liu fali Testemuña ba Jeová iha mundu tomak. Klaru katak Jeová la interese deʼit kona-ba ema naʼin-hira mak tuir Memoriál. Nia mós hafolin ema ida-idak neʼebé tuir Memoriál. (Lc 15:7; 1 Tim 2:3, 4) Ita bele fiar katak bainhira ita fahe konvite ba ema seluk, Jeová ajuda ita atu hetan ema neʼebé laran-maus.—Lee Ageu 2:7.
TUIR MEMORIÁL MASKI HASORU SITUASAUN SUSAR
Jeová haraik bensaun ba ita-nia hakaʼas an atu tuir Memoriál (Haree parágrafu 12) f
12. Situasaun saida deʼit mak bele halo susar mai ita atu tuir Memoriál? (Haree foto.)
12 Jesus fó sai nanis katak durante loron ikus sira, ita sei hasoru situasaun susar oioin, hanesan família kontra ita, akontese funu, mosu moras-peste no susar seluk tan. (Mt 10:36; Mc 13:9; Lc 21:10, 11) Dala ruma, situasaun sira-neʼe halo susar mai ita atu komemora Jesus nia mate. Saida mak irmaun-irmán sira halo atu bele manán susar sira-neʼe no oinsá Jeová ajuda sira?
13. Oinsá Jeová haraik bensaun ba Artem nia aten-brani no hakaʼas an atu tuir Memoriál maski iha komarka?
13 Iha komarka laran. Irmaun-irmán sira neʼebé iha komarka tanba sira-nia fiar, hakaʼas an atu komemora Jesus nia mate tuir sira-nia situasaun. Hanoin toʼok irmaun Artem nia ezemplu. Durante Memoriál tinan 2020, ema hatama nia ba sela ho luan metru kuadradu 17 no iha tempu neʼebá iha prizioneiru naʼin-lima iha sela kiʼik neʼe. Maski iha komarka laran, nia nafatin bele hetan buat neʼebé nia presiza atu komemora Memoriál, no nia mós planu atu hatoʼo rasik diskursu Memoriál. Maibé prizioneiru seluk iha sela neʼe fuma sigarru no tolok beibeik. Saida mak nia halo? Nia husu sira atu para fuma no tolok ba oras ida deʼit. Artem hakfodak tanba sira konkorda. Artem hatete: “Haʼu oferese atu esplika ba sira kona-ba Memoriál.” Sira lakohi rona, maibé depois haree no rona oinsá Artem halaʼo Memoriál, sira husu pergunta barak ba nia.
14. Saida deʼit mak Jeová nia povu halo atu bele komemora Memoriál maski iha tempu pandemia?
14 Pandemia COVID-19. Tanba pandemia neʼe, Jeová nia povu labele halibur hamutuk atu komemora Memoriál. Maibé neʼe la hanetik sira atu tuir Memoriál. d Kongregasaun sira neʼebé bele asesu internét, halaʼo Memoriál liuhusi vídeo konferénsia. Maibé oinsá ho ema millaun ba millaun neʼebé labele asesu internét? Iha rai balu, sukursál halo arranju atu ema bele nonton diskursu iha televizaun ka rona diskursu husi rádiu. Sukursál sira mós grava diskursu neʼe iha língua 500 liu atu ema iha área izoladu mós bele komemora Memoriál. Irmaun sira haruka gravasaun sira-neʼe ba maluk sira neʼebé presiza.
15. Ita aprende saida husi feto ida naran Sue?
15 Família kontra. Ba ema balu, buat neʼebé halo susar liu ba sira atu tuir Memoriál mak bainhira sira-nia família kontra sira. Hanoin toʼok ezemplu husi feto ida naran Sue neʼebé estuda Bíblia. Iha tinan 2021, loron ida antes Memoriál, Sue hatete ba irmán neʼebé fó estuda nia katak ninia família kontra makaʼas nia, tan neʼe nia labele tuir Memoriál. Irmán neʼe lee Lucas 22:44. No tuirmai esplika ba nia katak bainhira ita hasoru susar, ita presiza halo tuir Jesus nia ezemplu hodi buka ajuda husi Jeová liuhusi orasaun no tau fiar tomak ba Jeová. Loron tuirmai, Sue prepara tua-uvas no paun, no nonton programa Adorasaun dadeer nian iha jw.org. Iha kalan, kuandu nia mesak deʼit iha kuartu, nia tuir Memoriál liuhusi telefone. Tuirmai, Sue hakerek ba ninia mestra Bíblia: “Ita anima tebes haʼu horiseik. Haʼu halo buat neʼebé haʼu bele atu tuir Memoriál no Jeová ajuda haʼu. Haʼu sente kontente no agradese tebes.” Tuir Ita-nia hanoin, Jeová bele ajuda Ita kuandu Ita hasoru situasaun susar hanesan neʼe ka lae?
16. Tanbasá ita bele fiar katak Jeová sei haraik bensaun ba ita-nia hakaʼas an atu tuir Memoriál? (Roma 8:31, 32)
16 Jeová hafolin tebes ita-nia hakaʼas an atu komemora Jesus nia mate. Ita bele fiar katak nia sei haraik bensaun ba ita kuandu ita hatudu agradese ba buat neʼebé nia halo ona mai ita. (Lee Roma 8:31, 32.) Mai ita hotu hakaʼas an atu tuir Memoriál iha tinan neʼe no mós hakaʼas an atu aumenta ita-nia serbisu haklaken durante tempu Memoriál.
KNANANUK 18 Agradese ba Jesus nia sakrifísiu
a Iha loron-tersa, 4 Abríl 2023, ema millaun ba millaun iha mundu tomak sei asiste Memoriál ba Jesus nia mate. Ema barak sei tuir ba dala primeiru. Ema balu mak Testemuña neʼebé la ativu ona no la tuir Memoriál ba tinan barak. Ema seluk tan hasoru situasaun neʼebé halo susar ba sira atu tuir Memoriál. Maski Ita ida-idak nia situasaun la hanesan, maibé Ita bele fiar katak Jeová sei sente kontente kuandu Ita hakaʼas an atu asiste.
b Ema balu fiar katak durante selebrasaun neʼe, paun no tua-uvas nakfila ba Kristu nia isin no raan. Sira hanoin katak tempu ida-idak neʼebé sira hola parte iha selebrasaun neʼe, Jesus fó ninia isin no raan nuʼudar sakrifísiu.
c Naran balu laʼós naran neʼebé loos.
d Haree mós informasaun iha jw.org ho títulu “Komemora Memoriál 2021”.
