1-2. Saida mak ita presiza kontinua halo depois batizmu? Esplika toʼok.

 DALA hira mak Ita hamoos Ita-nia uma? Antes atu muda ba uma ida, karik Ita sei hamoos didiʼak uma neʼe. Maibé saida mak sei akontese se Ita nunka hamoos fali? Lakleur deʼit Ita-nia uma sei sai foʼer. Atu bele moos nafatin, Ita presiza hamoos beibeik Ita-nia uma.

² Ita mós tenke kontinua hadiʼa ita-nia hanoin no hahalok. Klaru katak antes hetan batizmu, ita hakaʼas an atu halo mudansa hodi “hamoos ita-nia an husi buat hotu neʼebé hafoʼer isin no neon”. (2 Kor 7:1) Maibé agora ita presiza halo tuir apóstolu Paulo nia konsellu atu ‘kontinua hafoun ita-nia dalan atu hanoin’. (Éf 4:23) Tanbasá ita presiza kontinua hakaʼas an? Tanba mundu neʼe bele fó influénsia ba ita no ita bele sai la moos iha Jeová nia oin lalais deʼit. Atu Maromak kontinua simu ita, ita presiza ezamina beibeik ita-nia hanoin, hahalok no hakarak.

3. “Hafoun imi-nia hanoin” katak sá? (Roma 12:2)

³ Ita presiza halo saida atu hafoun ka troka ita-nia hanoin? (Lee Roma 12:2.) Fraze Gregu neʼebé tradús nuʼudar “hafoun imi-nia hanoin”, bele mós tradús nuʼudar “renova imi-nia hanoin”. Tan neʼe, la toʼo atu hatudu deʼit  hahalok diʼak balu, ita presiza halo mudansa boot. Ita tenke ezamina ita-nia laran no halo mudansa neʼebé presiza atu bele halo tuir Maromak nia matadalan sira ho didiʼak. Ita presiza halo ida-neʼe beibeik, laʼós dala ida deʼit.

4. Ita presiza halo saida atu la husik mundu neʼe fó influénsia ba ita-nia hanoin?

⁴ Iha futuru kuandu ita sai perfeitu ona, ita bele halo Jeová kontente iha buat hotu. Maibé agora, ita presiza kontinua hakaʼas an atu halo nuneʼe. Iha Roma 12:2, Paulo hatete katak ita presiza hafoun ita-nia hanoin atu bele hatene saida mak Maromak nia hakarak ba ita. Duké husik deʼit mundu neʼe fó influénsia ba ita, diʼak atu ezamina ita-nia an hodi buka-hatene se Maromak nia hanoin, laʼós mundu nian mak fó influénsia ba ita-nia planu no desizaun sira.

5. Oinsá ita bele buka-hatene se ita fiar katak Jeová nia loron besik ona? (Haree foto.)

⁵ Hanoin toʼok ezemplu ida. Jeová hakarak ita atu “hanoin-hetan nafatin kona-ba Jeová nia loron neʼebé atu mai”. (2 Ped 3:12) Husu ba Ita-nia an: ‘Dalan neʼebé haʼu halaʼo haʼu-nia moris hatudu katak haʼu komprende lakleur tan mundu aat neʼe sei lakon ka lae? Haʼu-nia desizaun kona-ba edukasaun no serbisu hatudu katak serbí Jeová mak importante liu iha haʼu-nia moris ka lae? Haʼu fiar katak Jeová sei tau matan ba haʼu no haʼu-nia família, ka haʼu sempre hanoin barak kona-ba osan no sasán?’ Jeová kontente tebes bainhira ita hakaʼas an atu moris tuir ninia hakarak.​—Mt 6:25-27, 33; Flp 4:12, 13.

6. Ita presiza kontinua halo saida?

⁶ Ita presiza ezamina beibeik ita-nia hanoin no tuirmai halo mudansa. Paulo  hatete ba ema Kristaun iha Korinto: “Kontinua koko imi-nia an atu hatene se imi moris tuir fiar ka lae. Kontinua haree didiʼak imi ema oinsá.” (2 Kor 13:5) Atu bele “moris tuir fiar”, la toʼo atu tuir reuniaun no haklaken dala ruma deʼit, maibé ita mós presiza halo buat seluk tan. Moris tuir fiar envolve ita-nia hanoin, hakarak no motivu. Tan neʼe ita presiza hafoun ita-nia hanoin liuhusi lee Bíblia, aprende atu iha hanoin hanesan Jeová nian no hakaʼas an atu halo mudansa hodi bele halo Jeová kontente.​—1 Kor 2:14-16.

7. Tuir Éfeso 4:31, 32, ita presiza halo saida tan, no tanbasá dala ruma ida-neʼe susar?

⁷ Lee Éfeso 4:31, 32. Ita presiza halo mudansa ba ita-nia hanoin, no mós ‘tau hahalok foun nuʼudar ita-nia roupa’. (Éf 4:24) Ita presiza hakaʼas an atu halo nuneʼe. Ita presiza hakaʼas an atu hasai hahalok aat sira hanesan laran-nakali no hirus. Tanbasá neʼe susar? Tanba hahalok aat balu karik metin ona iha ita-nia laran. Porezemplu, Bíblia hatete katak ema balu “hirusdór” no “sempre sai hirus lalais”. (Prov 29:22) Ema neʼebé iha hahalok aat sira-neʼe, presiza kontinua hakaʼas an atu halo mudansa maski nia batizmu ona. Esperiénsia tuirmai hatudu ida-neʼe.

8-9. Oinsá Stephen nia esperiénsia hatudu katak ita presiza kontinua hasai tiha hahalok tuan nian?

⁸ Irmaun ida naran Stephen sente susar atu kontrola ninia hirus. Nia hatete: “Depois haʼu hetan tiha batizmu, haʼu presiza kontinua hakaʼas an atu kontrola haʼu-nia hirus. Porezemplu, loron ida kuandu haklaken husi uma ba uma, haʼu duni tuir naʼok-teen ida neʼebé foin naʼok haʼu-nia karreta nia rádiu. Bainhira haʼu atu besik kaer toman nia, nia soe hela rádiu no halai tiha. Kuandu haʼu konta ida-neʼe ba irmaun-irmán sira, katuas ida husu: ‘Stephen, se ó kaer toman ema neʼe, ó sei halo saida?’ Pergunta neʼe halo haʼu hanoin kleʼan no motiva haʼu atu kontinua hakaʼas an buka dame.” b

⁹ Stephen nia ezemplu hatudu katak dala ruma hahalok la diʼak bele mosu derrepente, maski ita sente katak ita troka ona ita-nia hahalok. Se neʼe akontese ba ita, keta sai laran-kraik no keta hanoin katak ita mak ema Kristaun neʼebé aat. Apóstolu Paulo mós dehan: “Bainhira haʼu hakarak halo buat neʼebé loos, buat neʼebé aat mós hamutuk ho haʼu.” (Rom 7:21-23) Ema Kristaun hotu la perfeitu no iha hahalok la diʼak balu neʼebé kontinua mosu fali, no neʼe hanesan buat oioin neʼebé kontinua halo uma sai foʼer. Ita presiza kontinua hakaʼas an atu bele moos nafatin. Oinsá atu halo nuneʼe?

10. Oinsá mak ita bele luta hasoru hahalok neʼebé sala? (1 João 5:14, 15)

¹⁰ Halo orasaun ba Jeová kona-ba hahalok neʼebé ita sente susar atu troka, no fiar katak nia sei rona no ajuda ita. (Lee 1 João 5:14, 15.) Maski Jeová la hasai kedas ita-nia hahalok aat neʼe, maibé nia bele hametin ita atu ita la halo fali hahalok neʼe. (1 Ped 5:10) Ita mós tenke halo tuir ita-nia orasaun hodi hasees an husi buat neʼebé bele book ita atu hatudu fali hahalok tuan nian. Porezemplu,  kuidadu atu la haree filme no programa televizaun, no la lee istória neʼebé fó sai hahalok neʼebé ita hakarak atu troka. Keta hanoin beibeik kona-ba hakarak neʼebé sala.​—Flp 4:8; Kol 3:2.

11. Saida deʼit mak ita bele halo atu kontinua tau hahalok foun?

¹¹ Maski ita hasai ona hahalok tuan nian, importante atu haburas fali hahalok foun. Oinsá ita bele halo nuneʼe? Halo planu atu banati-tuir Jeová nuʼudar ita estuda kona-ba ninia hahalok sira. (Éf 5:1, 2) Porezemplu, bainhira ita lee istória iha Bíblia neʼebé hatudu katak Jeová prontu atu fó perdua, husu ita-nia an: ‘Haʼu perdua ema ka lae?’ Bainhira ita lee kona-ba oinsá Jeová hatudu laran-sadiʼa ba ninia atan neʼebé kiak, husu ita-nia an: ‘Haʼu mós hanoin maluk fiar-naʼin sira neʼebé hasoru problema ekonomia, no halo buat ruma atu ajuda sira ka lae?’ Kontinua hafoun ita-nia hanoin hodi tau hahalok foun nuʼudar ita-nia roupa, no hatudu pasiénsia ba ita-nia an bainhira ita halo nuneʼe.

12. Oinsá mak Stephen nia esperiénsia hatudu katak Bíblia iha kbiit atu troka ema nia moris?

¹² Stephen neʼebé temi ohin, ikusmai konsege tau fali hahalok foun. Nia hatete: “Husi tempu neʼebé haʼu hetan batizmu, dala barak haʼu hasoru situasaun neʼebé provoka haʼu atu hirus. Maibé haʼu hasees an deʼit husi ema neʼebé provoka haʼu, ka haʼu koko atu halo situasaun sai kalma fali. Haʼu-nia feen no ema seluk gaba haʼu tanba haʼu kalma nafatin. Loloos, haʼu mós hakfodak! Maibé haʼu hatene katak haʼu rasik la iha kbiit atu troka haʼu-nia hahalok, só Bíblia deʼit mak iha kbiit atu troka ema nia moris.”

13. Saida mak bele ajuda ita atu halo buat neʼebé loos? (Galásia 5:16)

¹³ Lee Galásia 5:16. Jeová ho laran-luak fó ninia espíritu santu atu ajuda ita kontinua halo buat neʼebé loos. Bainhira ita estuda Bíblia, ita fó oportunidade ba Maromak nia espíritu santu atu fó influénsia mai ita. Ita mós simu espíritu santu bainhira ita tuir reuniaun. Iha reuniaun sira, ita bele ransu ho irmaun-irmán sira neʼebé hakaʼas an atu halo buat loos hanesan ita no neʼe anima duni ita. (Ebr 10:24, 25; 13:7) Bainhira ita harohan ba Jeová no husu nia atu ajuda ita manán ita-nia fraku balu, nia sei fó espíritu santu atu ajuda ita kontinua luta. Karik buat sira-neʼe la halakon ita-nia hakarak neʼebé sala, maibé neʼe bele ajuda ita atu la halo tuir deʼit ita-nia hakarak. Galásia 5:16 hatete katak ema sira neʼebé moris tuir espíritu santu sei “la halo tuir hakarak isin nian”.

14. Tanbasá importante atu kontinua haburas hakarak atu halo buat neʼebé loos?

¹⁴ Bainhira ita iha toman atu halo atividade espirituál, importante atu mantein ida-neʼe no kontinua haburas hakarak atu halo buat neʼebé loos. Tanbasá? Tanba iha tentasaun oioin neʼebé hanesan inimigu no neʼe nunka para atu kontra ita. Depois hetan tiha batizmu, karik ita hakarak halo buat neʼebé sala, hanesan joga osan, hemu lanu ka haree pornografia. (Éf 5:3, 4) Irmaun joven ida hatete: “Bainhira haʼu joven, haʼu gosta mane. Neʼe mak buat neʼebé susar tebes ba haʼu. Uluk haʼu hanoin katak haʼu-nia sentimentu gosta ba mane sei lakon, maibé toʼo agora, sentimentu neʼe  nafatin iha.” Saida mak bele ajuda ita bainhira hakarak neʼebé sala komesa sai makaʼas liu?

15. Tanbasá ita sente kmaan atu hatene katak ema seluk mós luta hasoru hakarak neʼebé sala? (Haree foto.)

¹⁵ Bainhira Ita hakaʼas an atu kontrola hakarak sala neʼebé sai makaʼas liu, hanoin-hetan katak Ita la mesak. Bíblia hatete: “Imi hetan tentasaun neʼebé baibain ema seluk mós hetan.” (1 Kor 10:13a) Paulo hakerek liafuan sira-neʼe ba irmaun-irmán sira iha Korinto. Uluk sira balu halo adultériu, hahalok omoseksuál, no lanu-teen. (1 Kor 6:9-11) Tuir ita-nia hanoin, depois hetan tiha batizmu, sira la presiza luta tan hakarak neʼebé sala ka lae? Lae. Maski sira iha esperansa atu bá lalehan, maibé sira mak ema neʼebé la perfeitu. Tan neʼe klaru katak dala ruma sira presiza luta hasoru hakarak neʼebé sala. Neʼe fó kmaan mai ita. Tanbasá? Tanba neʼe hatudu katak ema seluk mós manán hasoru hakarak sala neʼebé ita luta hasoru daudaun. Tuir loloos, ita bele fiar metin ‘tanba hatene katak ita-nia maluk fiar-naʼin iha mundu tomak mós tahan terus neʼebé hanesan ita-nian’.​—1 Ped 5:9.

16. Ita presiza hasees an husi hanoin saida no tanbasá?

¹⁶ Keta hanoin katak ema seluk la komprende fraku neʼebé Ita luta hasoru daudaun. Hanoin hanesan neʼe bele halo Ita sente katak Ita labele hetan ajuda no Ita la iha kbiit atu luta hasoru Ita-nia hakarak neʼebé sala. Bíblia dehan katak Ita bele manán Ita-nia hakarak neʼebé sala. Bíblia hatete: “Maromak mak laran-metin, no nia sei nunka husik imi atu hetan tentasaun neʼebé liu fali imi-nia kbiit, maibé kuandu imi hasoru  tentasaun ruma, nia mós sei hatudu dalan ba imi atu sai, atu nuneʼe imi bele tahan.” (1 Kor 10:13b) Tan neʼe, maski ita-nia hakarak neʼebé sala mak makaʼas tebes, maibé ita bele tahan ida-neʼe ho susesu. Ho Jeová nia ajuda, ita bele iha kbiit atu la halo tuir deʼit ita-nia hakarak.

17. Maski hakarak neʼebé sala bele mosu, maibé saida mak ita bele halo?

¹⁷ Kontinua hanoin-hetan katak tanba Ita la perfeitu, dala ruma hakarak neʼebé sala bele mosu. Maibé bainhira neʼe mosu, Ita bele halakon kedas ida-neʼe hanesan José halo bainhira nia halai sees lalais husi Potifar nia feen. (Gén 39:12) Ita la presiza halo tuir Ita-nia hakarak neʼebé sala.

18-19. Ita bele husu pergunta saida deʼit ba ita-nia an nuʼudar ita hafoun ita-nia hanoin?

¹⁸ Atu hafoun ita-nia hanoin, ita tenke kontinua buka-hatene se ita-nia hanoin no hahalok halo Jeová kontente ka lae. Tan neʼe, ezamina beibeik Ita-nia an no husu: ‘Haʼu-nia hahalok hatudu katak haʼu rekoñese agora mak tempu urjente ka lae? Haʼu hetan susesu atu tau fali hahalok foun ka lae? Haʼu fó oportunidade ba Jeová nia espíritu atu dirije haʼu-nia moris atu haʼu la halo tuir haʼu-nia hakarak neʼebé sala ka lae?’

¹⁹ Bainhira Ita ezamina Ita-nia an, keta espera atu sai perfeitu, maibé kontente ho oinsá Ita laʼo ba oin. Keta sai laran-kraik se Ita presiza halo mudansa. Duké halo nuneʼe, halo tuir matadalan iha Filipe 3:16: “Hanesan ita laʼo ba oin ona, mai ita kontinua laʼo ba oin iha dalan neʼebé hanesan.” Fiar metin bá katak Jeová sei haraik bensaun ba Ita-nia hakaʼas an atu kontinua hafoun Ita-nia hanoin.