LISAUN ESTUDU 5
KNANANUK 108 Maromak nia domin neʼebé laran-metin
Benefísiu neʼebé ita hetan tanba Jeová nia domin
“Kristu Jesus mai iha mundu atu salva sala-naʼin sira.”—1 TIM 1:15.
OBJETIVU
Aprende kona-ba benefísiu neʼebé ita hetan husi Jesus nia sakrifísiu no oinsá ita bele hatudu agradese ba Jeová.
1. Oinsá ita bele halo Jeová kontente?
IMAJINA toʼok Ita fó prezente espesiál ba ema ida neʼebé Ita hadomi tanba hatene katak neʼe bele ajuda nia. Ita sei sente kontente kuandu ema neʼe uza didiʼak prezente neʼe no hatudu agradese ba Ita. Maibé Ita sei triste tebes se ema neʼe rai deʼit prezente neʼe no nunka hanoin fali kona-ba neʼe. Saida mak ita bele aprende? Jeová fó ninia Oan-Mane atu mate mai ita. Klaru katak Jeová kontente tebes kuandu ita hatudu agradese ba prezente neʼe no domin neʼebé nia hatudu hodi fó ninia Oan-Mane nuʼudar sakrifísiu!—João 3:16; Rom 5:7, 8.
2. Iha lisaun neʼe, ita sei aprende kona-ba saida?
2 Nuʼudar tempu liu daudaun, karik ita komesa haree Jesus nia sakrifísiu nuʼudar buat baibain deʼit. Neʼe hanesan ita rai deʼit Maromak nia prezente neʼebé folin-boot no la hanoin fali kona-ba neʼe. Atu neʼe la akontese, ita presiza hanoin beibeik kona-ba buat neʼebé Maromak no Kristu halo ona mai ita. Iha lisaun neʼe, ita sei aprende kona-ba benefísiu neʼebé ita bele hetan agora no mós iha futuru. Ita mós sei koʼalia kona-ba saida mak ita bele halo atu hatudu agradese ba Jeová nia domin, liuliu iha tempu Memoriál.
BENEFÍSIU NEʼEBÉ ITA HETAN AGORA
3. Ohin loron, benefísiu saida mak ita hetan husi Jesus nia sakrifísiu?
3 Ita hetan ona benefísiu barak husi Jesus nia sakrifísiu. Porezemplu, tanba Jesus nia sakrifísiu, Jeová fó perdua ba ita-nia sala. Jeová halo ida-neʼe tanba ninia hakarak rasik, laʼós tanba iha obrigasaun. Ema ida neʼebé hakerek livru Salmo hatudu agradese ba Jeová hodi dehan: “Oh Jeová, Ita mak diʼak no prontu atu fó perdua.”—Sal 86:5; 103:3, 10-13.
4. Jeová fó Jesus nia sakrifísiu ba sé? (Lucas 5:32; 1 Timóteo 1:15)
4 Ema balu sente katak sira la merese hetan perdua husi Jeová. Tuir loloos, ita hotu la merese. Apóstolu Paulo komprende katak nia “la merese” atu sai apóstolu ida. Maibé nia hatete: “Haʼu bele sai hanesan agora tanba Maromak nia laran-diʼak neʼebé boot.” (1 Kor 15:9, 10) Bainhira ita arrepende sala, Jeová perdua ita. Tanbasá? Laʼós tanba ita merese hetan ida-neʼe, maibé tanba nia hadomi ita. Entaun, se ita sente katak ita la merese hetan perdua, hanoin-hetan katak Jeová fó Jesus nia sakrifísiu laʼós ba ema neʼebé perfeitu, maibé ba ema sala-naʼin neʼebé arrepende an.—Lee Lucas 5:32; 1 Timóteo 1:15.
5. Ita merese simu Jeová nia laran-sadiʼa ka lae? Esplika toʼok.
5 Ita labele hanoin katak ita merese simu Jeová nia laran-sadiʼa tanba ita serbí Jeová tinan barak ona. Klaru katak Jeová hafolin no hanoin-hetan buat hotu neʼebé ita halo ba nia. (Ebr 6:10) Maibé nia fó ita Jesus nia sakrifísiu nuʼudar prezente, laʼós atu selu ita-nia kolen. Se ita hanoin katak ita merese hetan Jeová nia perdua tanba buat barak neʼebé ita halo ona ba nia, neʼe hanesan ita dehan katak Kristu mate saugati deʼit.—Kompara ho Galásia 2:21.
6. Tanbasá Paulo hakaʼas an atu serbí Jeová?
6 Paulo hatene katak nia la merese hetan Maromak nia laran-sadiʼa. Entaun tanbasá nia hakaʼas an atu serbí Jeová? Nia halo nuneʼe atu hatudu agradese ba Jeová nia laran-diʼak neʼebé boot. (Éf 3:7) Hanesan Paulo, ita mós kontinua serbí Jeová ho laran-manas, laʼós atu hetan perdua, maibé atu hatudu agradese ba nia.
7. Saida mak benefísiu seluk neʼebé ita hetan husi Jesus nia sakrifísiu? (Roma 5:1; Tiago 2:23)
7 Benefísiu seluk mak ita bele iha relasaun besik ho Jeová. a Hanesan temi iha lisaun antes neʼe, bainhira ita moris mai, ita la iha relasaun diʼak ho Maromak. Maibé tanba Jesus nia sakrifísiu, ita bele “iha dame ho Maromak” no hakbesik ba nia.—Lee Roma 5:1; Tiago 2:23.
8. Tanbasá ita presiza hatudu agradese ba priviléjiu atu halo orasaun?
8 Hanoin toʼok priviléjiu furak ida neʼebé ita bele hetan tanba iha relasaun diʼak ho Jeová, neʼe mak orasaun. Jeová rona ba orasaun neʼebé ita halo hamutuk ho ema seluk no mós orasaun neʼebé ita ida-idak halo. Orasaun bele halo ita sente dame, maibé mós lori benefísiu barak tan. Neʼe bele hametin ita-nia relasaun diʼak ho Maromak. (Sal 65:2; Tgo 4:8; 1 João 5:14) Bainhira iha rai, Jesus halo orasaun beibeik, tanba hatene katak Jeová rona ba nia no neʼe hametin liután ninia relasaun ho ninia Aman. (Lc 5:16) Ita agradese tebes tanba liuhusi Jesus nia sakrifísiu, ita bele sai belun ho Jeová no koʼalia ba Nia liuhusi orasaun!
BENEFÍSIU NEʼEBÉ ITA BELE HETAN IHA FUTURU
9. Jesus nia sakrifísiu sei lori benefísiu saida mai ita iha futuru?
9 Jesus nia sakrifísiu sei lori benefísiu saida mai ita iha futuru? Jeová sei fó ba ninia atan sira moris ba nafatin. Ema barak hanoin katak neʼe imposivel tanba durante tinan rihun ba rihun, ema sempre mate. Maibé husi uluk kedas, Jeová hakarak ema atu moris ba nafatin. Se Adão la halo sala, ema hotu sei moris ba nafatin. Neʼe laʼós buat neʼebé imposivel. Maski susar atu imajina moris ba nafatin mak oinsá, maibé ita bele fiar katak neʼe sei akontese duni tanba Jeová selu ona folin neʼebé boot tebetebes, neʼe mak ninia Oan-Mane nia moris.—Rom 8:32.
10. Kristu nia alin sira no mós bibi seluk hein namanas ba esperansa saida?
10 Maski moris ba nafatin sei akontese iha futuru, maibé Jeová hakarak ita atu hanoin kona-ba neʼe agora. Kristu nia alin sira hein namanas atu ukun hamutuk ho Kristu iha lalehan. (Apok 20:6) Bibi seluk iha esperansa atu moris iha mundu paraízu neʼebé livre husi moras no triste. (Apok 21:3, 4) Ita mós iha esperansa atu moris ba nafatin iha mundu ka lae? Maski ita iha esperansa atu moris iha lalehan ka iha mundu, neʼe hotu mak folin-boot! Jeová kria ema atu moris iha mundu. Tan neʼe, moris ba nafatin iha mundu sei halo ita kontente tebetebes.
11-12. Bensaun saida deʼit mak ita bele hetan iha Paraízu? (Haree mós dezeñu.)
11 Imajina toʼok Ita-nia moris iha Paraízu sei sai oinsá. Ita sei la laran-taridu kona-ba moras no mate. (Isa 25:8; 33:24) Jeová sei fó buat diʼak hotu neʼebé Ita hakarak. Ita hakarak aprende kona-ba saida? Toka instrumentu múzika, pinta dezeñu, ka aprende kona-ba animál sira? Iha Paraízu, presiza duni arkitetu, badaen sira, no mós toʼos-naʼin. Ita mós presiza prepara ai-han, halo ekipamentu oioin, no tau matan ba jardín neʼebé furak. (Isa 35:1; 65:21) Bainhira Ita moris ba nafatin, Ita sei iha tempu barak atu halo buat hotu neʼe no mós buat seluk tan.
12 Ita sei sente haksolok tebes atu fó benvindu ba ema neʼebé moris-hiʼas! (Após 24:15) Imajina mós kontente neʼebé Ita sei sente bainhira aprende kona-ba Jeová liuhusi ninia kriasaun sira. (Sal 104:24; Isa 11:9) Buat neʼebé diʼak liu hotu mak Ita sei nunka halo tan sala, tan neʼe Ita bele serbí Jeová no la presiza tan husu perdua. Klaru katak Ita lakohi lakon esperansa neʼe tan deʼit atu hetan “haksolok ba tempu uitoan hodi halo sala”. (Ebr 11:25) Moris ba nafatin mak furak liu fali buat neʼebé ita bele hetan husi mundu neʼe. Esperansa neʼe sei sai loos no ita sei moris duni iha neʼebá. Neʼe hotu bele akontese tanba Jeová hadomi ita no fó ninia Oan-Mane nuʼudar sakrifísiu.
Bensaun saida deʼit mak Ita hein namanas atu hetan iha Paraízu? (Haree parágrafu 11-12)
HATUDU AGRADESE BA JEOVÁ NIA DOMIN
13. Oinsá ita bele hatudu agradese ba Jeová nia domin? (2 Korinto 6:1)
13 Oinsá ita bele hatudu agradese ba Jeová tanba fó Jesus nuʼudar sakrifísiu? Neʼe mak hodi tau uluk Jeová iha ita-nia moris. (Mt 6:33) Jesus mate “atu nuneʼe sira neʼebé moris la moris tan ba sira-nia an rasik, maibé moris ba ida neʼebé mate ba sira no moris hiʼas ona”. (2 Kor 5:15) Ita bele hatudu katak ita hafolin Jeová nia laran-diʼak neʼebé boot hodi halo buat hotu neʼebé ita bele atu serbí nia.—Lee 2 Korinto 6:1.
14. Oinsá mak ita bele hatudu fiar ba Jeová nia matadalan sira?
14 Ita mós bele hatudu katak ita hafolin Jeová nia domin hodi hatudu fiar ba ninia matadalan sira. Oinsá? Bainhira atu halo desizaun oioin, porezemplu kona-ba edukasaun ka serbisu neʼebé ita sei halo, ita presiza hanoin kona-ba Jeová nia hakarak. (1 Kor 10:31; 2 Kor 5:7) Kuandu ita halo desizaun hodi tau fiar ba Jeová, ita-nia fiar no relasaun diʼak ho nia sei sai metin liután. No ita-nia esperansa mós sei sai metin liu.—Rom 5:3-5; Tgo 2:21, 22.
15. Oinsá atu hatudu agradese ba Jeová durante tempu Memoriál?
15 Dalan seluk tan atu hatudu agradese ba Jeová nia domin mak hodi halo buat neʼebé ita bele durante tempu Memoriál atu hatudu katak ita hafolin Jesus nia sakrifísiu. Nuʼudar Ita halo planu atu tuir Memoriál, Ita mós bele konvida ema seluk atu asiste. (1 Tim 2:4) Esplika ba ema neʼebé Ita konvida kona-ba dalan neʼebé ita halaʼo Memoriál. Ita bele hatudu vídeo husi jw.org ho títulu Tanbasá mak Jesus mate? no Komemora Jesus nia mate. Katuas kongregasaun sira presiza konvida ema neʼebé la ativu. Imajina toʼok ksolok boot neʼebé akontese iha lalehan no rai bainhira Jeová nia bibi neʼebé lakon fila fali! (Lc 15:4-7) Iha Memoriál, mai ita hakaʼas an atu fó benvindu ba sira neʼebé foin tuir Memoriál ka sira neʼebé kleur ona la tuir reuniaun. Ita hakarak sira atu sente ita-nia domin!—Rom 12:13.
16. Tanbasá diʼak atu aumenta ita-nia serbisu haklaken durante tempu Memoriál?
16 Ita bele aumenta ita-nia atividade espirituál durante tempu Memoriál ka lae? Neʼe mak dalan ida atu hatudu agradese ba buat hotu neʼebé Jeová no Jesus halo ona mai ita. Se ita aumenta ita-nia serbisu haklaken, ita bele haree liután oinsá Jeová ajuda ita, no neʼe sei hametin liután ita-nia fiar. (1 Kor 3:9) Ita mós presiza halo tuir programa lee Bíblia ba Memoriál neʼebé temi iha Eskritura Loron-loron ka iha Livru Moris Kristaun. Ka ita mós bele halaʼo estuda mesak hodi uza eskritura balu neʼebé liga ho Memoriál.
17. Saida mak halo Jeová kontente? (Haree mós kaixa “ Dalan atu hatudu agradese ba Jeová nia domin”.)
17 Karik Ita-nia situasaun la permite atu halo tuir buat hotu neʼebé temi iha lisaun neʼe. Maski nuneʼe, Jeová la kompara buat neʼebé Ita halo ho ema seluk. Nia hafolin domin neʼebé Ita hatudu ba nia. Nia sente kontente bainhira haree katak Ita hatudu agradese ba prezente neʼebé nia fó, neʼe mak Jesus nia sakrifísiu.—1 Sam 16:7; Mc 12:41-44.
18. Tanbasá ita hatudu agradese ba Maromak Jeová no Jesus Kristu?
18 Jesus nia sakrifísiu loke dalan mai ita atu hetan perdua ba ita-nia sala, sai belun diʼak ho Jeová, no iha esperansa atu moris ba nafatin. Mai ita hotu sempre hatudu agradese ba Jeová tanba hatudu ona domin hodi fó bensaun furak sira-neʼe hotu. (1 João 4:19) Mai ita mós hatudu agradese ba Jesus neʼebé ho domin fó ona ninia moris mai ita!—João 15:13.
KNANANUK 154 Domin nunka lakon
a Jeová fó perdua ba ninia atan sira iha tempu uluk maski Kristu seidauk fó ninia moris nuʼudar sakrifísiu. Jeová bele halo nuneʼe tanba nia fiar katak ninia Oan-Mane sei laran-metin toʼo mate. Tuir Jeová nia haree, neʼe hanesan ninia Oan-Mane fó ona ninia moris nuʼudar sakrifísiu maski nia seidauk mate.—Rom 3:25.
