1. Ema barak ohin loron fokus ba saida?

 KARIK Ita nota katak ema barak ohin loron hanoin an deʼit. Porezemplu, ema balu uza média sosiál atu dada atensaun ba sira-nia an no mós ba buat neʼebé sira halo. Maibé, ohin loron ema uitoan deʼit mak hakarak fó glória ba Jeová. Iha lisaun neʼe, ita sei koʼalia kona-ba fó glória ba Jeová katak sá no saida mak motiva ita atu halo ida-neʼe. Ita mós sei aprende oinsá ita bele fó ba Jeová glória neʼebé nia merese simu no oinsá mak nia rasik sei lori glória ba ninia naran iha futuru.

FÓ GLÓRIA BA JEOVÁ KATAK SÁ?

2. Oinsá mak Jeová hatudu sai ninia glória iha Foho Sinai? (Haree mós dezeñu.)

² Glória katak sá? Iha Bíblia, liafuan “glória” bele refere ba buat naran deʼit neʼebé halo ema ruma admira. Loron balu liu tiha depois Jeová halo povu Izraél livre husi Ejitu, nia hatudu sai ninia glória neʼebé boot ba sira. Imajina toʼok: Ema Izraél millaun ba millaun halibur hamutuk iha Foho Sinai nia hun atu rona ba Maromak. Kalohan metan taka foho tomak. Derrepente deʼit rai nakdoko makaʼas, no suar nakonu iha foho neʼe. Povu haree rai-lakan, rona rai-tarutu no dikur nia lian neʼebé makaʼas. (Éx 19:​16-18; 24:17; Sal 68:8) Bainhira Jeová halo buat sira-neʼe, ita bele fiar katak ema Izraél sente admira tebes ho Jeová nia forsa.

3. Oinsá mak ita bele fó glória ba Jeová?

³ Maibé oinsá ho ita ema? Ita bele fó glória ba Jeová ka lae? Sin, bele duni. Dalan ida atu fó glória ba Jeová mak hodi fó-hatene ema seluk kona-ba ninia forsa no hahalok  furak sira. Ita mós fó glória ba Jeová bainhira ita fó sai katak ita bele halo buat hotu tanba ninia ajuda. (Isa 26:12) Liurai David mak ezemplu ida kona-ba fó glória ba Jeová. Bainhira David halo orasaun iha povu Izraél nia oin, nia hatete: “Oh Jeová, Ita mak boot no iha kbiit, Ita mak furak, iha dignidade no kmanek, tanba buat hotu iha lalehan no rai mak Ita-nian.” Depois David remata tiha ninia orasaun, “kongregasaun hotu hahiʼi Jeová”.—1 Krón 29:​11, 20.

4. Oinsá mak Jesus fó glória ba Jeová?

⁴ Bainhira Jesus iha rai, nia fó glória ba Jeová hodi fó-hatene ema seluk katak Jeová mak fó forsa ba nia atu halo milagre. (Mc 5:​18-20) Jesus mós fó glória ba Jeová liuhusi dalan neʼebé nia trata ema seluk no koʼalia kona-ba ninia Aman. Iha situasaun ida kuandu Jesus hanorin hela iha sinagoga, nia haree feto ida neʼebé anju aat domina ba tinan 18. Anju aat halo feto neʼe sai bonko no labele hamriik loos. Neʼe susar tebes! Tanba hanoin tebes feto neʼe, Jesus hakbesik ba nia no ho laran-diʼak hatete: “Feto, agora ó livre ona husi ó-nia moras.” Tuirmai, Jesus tau liman ba feto neʼe, no iha tempu neʼe kedas feto neʼe hamriik loos no “hahú fó glória ba Maromak” tanba nia sente agradese tebetebes! (Lc 13:​10-13) Feto neʼe iha razaun diʼak atu fó glória ba Jeová, nuneʼe mós ho ita.

SAIDA MAK MOTIVA ITA ATU FÓ GLÓRIA BA JEOVÁ?

5. Ita iha razaun saida deʼit atu hatudu respeitu ba Jeová?

⁵ Ita fó glória ba Jeová tanba respeitu tebes nia. Ita iha razaun barak atu hatudu respeitu ba nia. Jeová mak kbiit boot liu hotu, no ninia forsa la iha limite. (Sal 96:​4-7) Kriasaun hatudu sai ninia matenek. Nia mak fó ita moris no buat hotu neʼebé ita presiza. (Apok 4:11) Nia laran-metin. (Apok 15:4) Buat hotu neʼebé nia halo sempre susesu no nia sempre kumpre ninia promesa. (Jos 23:14) Tan neʼe, profeta Jeremias hatete ba Jeová: “Ita mak boot liu . . . Husi matenek-naʼin hotu no liurai hotu iha nasaun sira-nia leet, la iha ida mak hanesan Ita-Boot.” (Jer 10:​6, 7) Klaru katak ita iha razaun diʼak barak atu hatudu respeitu ba ita-nia Aman iha lalehan. Maibé Ita laʼós deʼit hatudu respeitu ba Jeová. Ita mós hadomi nia.

6. Tanbasá ita hadomi Jeová?

⁶ Ita fó glória ba Jeová tanba hadomi tebes nia. Hanoin toʼok kona-ba Jeová nia hahalok balu neʼebé halo ita hadomi nia. Nia laran-sadiʼa no laran-diʼak. (Sal 103:13; Isa 49:15) Nia hanoin ita no komprende ita-nia sentimentu. (Zac 2:8) Nia halo fasil ba ita atu hakbesik ba nia nuʼudar Belun. (Sal 25:14; Após 17:27) No nia haraik an, tan neʼe “nia hakruʼuk atu haree ba lalehan no rai, nia halo ema kiʼik hamriik husi rai-rahun”. (Sal 113:​6, 7) Tanba razaun sira-neʼe mak ita hakarak fó glória ba Jeová.—Sal 86:12.

7. Ita iha oportunidade espesiál saida?

⁷ Ita fó glória ba Jeová tanba hakarak atu ema koñese nia. Ema barak la hatene lia-loos kona-ba Jeová. Tanbasá? Tanba Satanás taka netik sira-nia neon liuhusi lia-bosok oioin kona-ba Jeová. (2 Kor 4:4) Satanás halo ema fiar katak Jeová mak Maromak neʼebé hirusdór, la  hanoin ema, no hamosu susar barak iha mundu neʼe. Maibé ita hatene lia-loos kona-ba ita-nia Maromak! Ita iha oportunidade espesiál atu fó-hatene ema seluk lia-loos kona-ba Maromak no ajuda sira atu fó glória ba nia. (Isa 43:10) Salmo 96 fó sai kona-ba fó glória ba Jeová. Nuʼudar ita koʼalia kona-ba eskritura balu husi salmo neʼe, hanoin toʼok oinsá ita bele fó ba Jeová glória neʼebé nia merese simu.

OINSÁ ITA BELE FÓ BA JEOVÁ GLÓRIA NEʼEBÉ NIA MERESE SIMU?

8. Ita bele fó glória ba Jeová liuhusi saida? (Salmo 96:​1-3)

⁸ Lee Salmo 96:​1-3. Ita bele fó glória ba Jeová liuhusi ita-nia liafuan. Iha versu sira-neʼe, Jeová nia povu hetan konvite atu “kanta ba Jeová”, “fó hahiʼi ba ninia naran”, “haklaken liafuan diʼak kona-ba salvasaun husi nia”, no “fó sai ninia glória iha nasaun sira-nia leet”. Neʼe mak dalan furak atu fó glória ba ita-nia Aman iha lalehan. Ema Judeu neʼebé laran-metin no ema Kristaun iha apóstolu sira-nia tempu la dada an atu fó-hatene ema seluk kona-ba buat diʼak hotu neʼebé Jeová halo ona ba sira no atu defende ninia reputasaun. (Dan 3:​16-18; Após 4:29) Oinsá mak ita mós bele halo nuneʼe?

9-10. Saida mak ita aprende husi Angelina nia esperiénsia? (Haree mós foto.)

⁹ Hanoin toʼok esperiénsia husi irmán Angelina a iha Estadus Unidus. Nia ho aten-brani defende Jeová iha ninia serbisu-fatin. Nuʼudar serbisu-naʼin foun, Angelina simu konvite atu tuir enkontru ida no hetan oportunidade atu fó sai kona-ba ninia an. Angelina prepara foto balu atu esplika kona-ba ninia moris neʼebé kontente nuʼudar Testemuña ba Jeová. Maibé, antes hatoʼo ninia parte, serbisu-naʼin mane ida hatete katak nia sai boot iha família Testemuña ba Jeová, no nia koʼalia buat aat oioin kona-ba Testemuña nia fiar. Angelina hatete: “Haʼu-nia fuan tuku-tuku makaʼas. Maibé haʼu hatete ba haʼu-nia an: ‘Haʼu labele husik ema seluk bosok kona-ba Jeová. Haʼu tenke defende Jeová.’”

¹⁰ Bainhira mane neʼe koʼalia hotu tiha,  Angelina halo lalais orasaun. Tuirmai nia koʼalia ho laran-diʼak ba mane neʼe: “Haʼu mós hanesan ho Ita. Haʼu boot nuʼudar Testemuña ba Jeová no toʼo agora haʼu mak Testemuña ida.” Angelina nafatin kalma maski situasaun ladún diʼak. Tuirmai, nia hatudu foto sira kona-ba nia no ninia belun sira neʼebé kontente serbí Jeová, no mós esplika ninia fiar ho respeitu. (1 Ped 3:15) Rezultadu mak saida? Bainhira Angelina koʼalia hotu tiha, mane neʼe sai kalma. Ikusmai mane neʼe mós konta kona-ba memória diʼak balu nuʼudar joven Testemuña ida. Angelina hatete: “Ita tenke defende Jeová. Neʼe mak priviléjiu atu fó sai lia-loos kona-ba Jeová.” Ita mós iha priviléjiu atu hahiʼi no fó glória ba Jeová maski ema seluk la respeitu nia.

11. Oinsá mak ema neʼebé adora Jeová aplika prinsípiu iha Salmo 96:8?

¹¹ Lee Salmo 96:8. Ita bele fó glória ba Jeová hodi fó sasán folin-boot neʼebé ita iha. Ema neʼebé adora Jeová sempre fó glória ba nia liuhusi dalan hanesan neʼe. (Prov 3:9) Porezemplu, povu Izraél fó kontribuisaun hodi harii no tau matan ba templu. (2 Reis 12:​4, 5; 1 Krón 29:​3-9) Jesus nia dixípulu balu mós fó apoiu ba nia no apóstolu sira hodi “uza sira-nia rikusoin rasik”. (Lc 8:​1-3) Ema Kristaun iha apóstolu sira-nia tempu mós fó kontribuisaun atu ajuda irmaun-irmán sira neʼebé hasoru susar. (Após 11:​27-29) Ohin loron, ita mós bele fó glória ba Jeová liuhusi kontribuisaun neʼebé ita fó ho laran.

12. Oinsá mak ita bele fó glória ba Jeová liuhusi ita-nia kontribuisaun? (Haree mós foto.)

¹² Haree toʼok ezemplu ida neʼebé hatudu katak ita bele fó glória ba Jeová liuhusi ita-nia kontribuisaun. Iha tinan 2020, udan la tau ba tempu naruk iha rai-Zimbabué. Ema millaun ida liu mak besik atu mate tanba rai-hamlaha. Maski situasaun susar tebes, irmán Prisca kontinua ninia toman atu haklaken iha loron-kuarta no sesta, maski durante tempu prepara rai atu halo toʼos. Ninia viziñu sira hatete aat nia tanba bá haklaken duké halo serbisu iha toʼos, hodi dehan: “Ó sei mate tanba hamlaha.” Ho fiar an, Prisca hatán: “Jeová nunka  husik hela ninia atan sira.” Lakleur depois neʼe, nia hetan ajuda umanitária husi ita-nia organizasaun. Ajuda hanesan neʼe mai husi kontribuisaun neʼebé ita fó. Prisca nia viziñu sira admira no hatete: “Maromak nunka husik hela ó, tan neʼe ami hakarak aprende liután kona-ba Maromak.” Ninia viziñu naʼin-hitu komesa tuir reuniaun sira.

13. Oinsá mak ita bele fó glória ba Jeová liuhusi ita-nia hahalok? (Salmo 96:9)

¹³ Lee Salmo 96:9. Ita bele fó glória ba Jeová liuhusi ita-nia hahalok. Amlulik neʼebé serbí iha Jeová nia tenda santu presiza moos iha dalan fíziku. (Éx 40:​30-32) Maibé, buat neʼebé importante liután mak iha hahalok neʼebé moos. (Sal 24:​3, 4; 1 Ped 1:​15, 16) Ita presiza hakaʼas an atu hasai tiha “hahalok tuan nian” no tau fali “hahalok foun”, neʼe katak husik tiha ita-nia hahalok neʼebé la diʼak no hatudu fali hahalok neʼebé fó glória ba Jeová. (Kol 3:​9, 10) Ho Jeová nia ajuda, ema neʼebé halo hahalok aat tebes mós bele halo mudansa.

14. Saida mak ita aprende husi Jack nia esperiénsia? (Haree mós foto.)

¹⁴ Hanoin toʼok kona-ba Jack nia esperiénsia. Nia halo violénsia neʼebé aat tebes no ema bolu nia ho naran Demóniu. Tanba nia halo krime oioin, tribunál deside atu fó kastigu-mate ba nia. Maibé nuʼudar Jack hein ba ninia kastigu, irmaun ida neʼebé vizita prizaun oferese atu estuda Bíblia, no Jack hakarak. Maski nia mak kriminozu ida, maibé ikusmai nia troka ninia hahalok no hetan batizmu. Jack halo mudansa boot, tan neʼe antes nia hetan kastigu-mate, guarda balu tanis hodi fó adeus. Mane ida neʼebé serbisu iha prizaun hatete: “Uluk Jack mak ema neʼebé aat liu iha fatin neʼe, maibé agora nia mak ida neʼebé diʼak liu.” Semana ida depois Jack hetan tiha kastigu-mate, irmaun sira bá prizaun atu halaʼo reuniaun, no iha neʼebá sira hasoru dadur ida neʼebé tuir reuniaun ba dala primeiru. Saida mak book nia atu tuir? Nia admira tebes ho Jack nia mudansa no hakarak hatene saida mak nia presiza halo  atu bele adora Jeová. Klaru, ita-nia hahalok bele lori glória ba Aman Jeová!—1 Ped 2:12.

OINSÁ MAK JEOVÁ SEI LORI GLÓRIA BA NINIA NARAN IHA FUTURU?

15. Oinsá mak Jeová sei lori glória ba ninia naran iha futuru? (Salmo 96:​10-13)

¹⁵ Lee Salmo 96:​10-13. Parte ikus husi Salmo 96 fó sai Jeová nuʼudar Juís no Liurai neʼebé la todan ba sorin. Oinsá mak Jeová sei lori glória ba ninia naran iha futuru? Nia sei halo ida-neʼe hodi tesi-lia tuir justisa. Lakleur tan nia sei harahun Babilónia Boot, katak relijiaun falsu neʼebé hafoʼer ona ninia naran neʼebé santu. (Apok 17:​5, 16; 19:​1, 2) Ema balu neʼebé haree Babilónia Boot rahun, karik sei deside atu adora Jeová hamutuk ho ita. Ikusliu iha funu Armagedon, Jeová sei harahun Satanás nia sistema aat hotu no halakon ema neʼebé kontra no hafoʼer ninia naran. Maibé nia sei salva ema hotu neʼebé hadomi no halo tuir nia, no fó glória ba ninia naran. (Mc 8:38; 2 Tes 1:​6-10) Tuirmai, iha Kristu nia Ukun ba Tinan Rihun Ida nia rohan no depois ema hotu hetan koko ba dala ikus, Jeová sei halo santu ninia naran iha dalan neʼebé kompletu. (Apok 20:​7-10) Iha tempu neʼebá, “mundu tomak sei nakonu ho koñesimentu kona-ba Jeová nia glória hanesan bee taka tasi tomak”.—Hab 2:14.

16. Ita deside metin atu halo saida? (Haree mós dezeñu.)

¹⁶ Neʼe mak tempu furak tanba ema hotu neʼebé moris sei fó glória ba Jeová tanba ninia naran! Maibé antes tempu neʼe toʼo mai, ita bele hakaʼas an hodi halo buat naran deʼit atu fó glória ba Maromak. Atu ajuda ita fokus ba responsabilidade importante neʼe, Grupu Administradór hili ona Salmo 96:8 nuʼudar eskritura tinan nian ba tinan 2025: “Fó glória ba Jeová tanba ninia naran.”