LISAUN ESTUDU 2
KNANANUK 132 Agora ita ida deʼit
Laʼen sira, hatudu respeitu ba imi-nia feen
“Imi laʼen sira, . . . hatudu respeitu ba sira.”—1 PED 3:7.
OBJETIVU
Aprende oinsá mak laʼen bele hatudu respeitu ba ninia feen liuhusi liafuan no hahalok.
1. Saida mak razaun ida Jeová halo arranju kaben nian?
JEOVÁ mak “Maromak neʼebé kontente”, no nia hakarak ita atu kontente. (1 Tim 1:11) Nia fó ita prezente barak atu ajuda ita moris kontente. (Tgo 1:17) Prezente ida mak arranju kaben nian. Bainhira mane no feto ida kaben, sira promete atu hadomi no respeitu malu. Kuandu laʼen no feen mantein sira-nia domin ba malu, sira bele moris kontente.—Prov 5:18.
2. Saida mak akontese ba kaben-naʼin barak ohin loron?
2 Triste mak kaben-naʼin barak ohin loron haluha sira-nia juramentu kaben nian, no rezultadu mak sira la kontente. Relatóriu ida husi Organizasaun Saúde Mundiál fó sai katak laʼen barak trata aat sira-nia feen iha dalan fíziku, emosaun, no liafuan. Karik laʼen neʼebé halo hanesan neʼe trata sira-nia feen ho respeitu iha ema seluk nia oin, maibé iha uma sira la halo ida-neʼe. Laʼen barak mós haree pornografia, no neʼe halo sira-nia feen sente laʼen la hadomi sira.
3. Tanbasá mak laʼen balu trata aat sira-nia feen?
3 Tanbasá mak laʼen balu trata aat sira-nia feen? Karik sira sai boot iha família neʼebé aman gosta halo violénsia, tan neʼe sira hanoin katak neʼe mak normál. Mane balu sente katak se nia trata aat ninia feen, neʼe sei halo feen rekoñese katak laʼen mak domina iha uma laran. Mane seluk fali la hatene kontrola sira-nia emosaun, inklui sentimentu hirus. Iha mós mane neʼebé haree beibeik pornografia, no neʼe halo sira iha hanoin la loos kona-ba feto no mós relasaun seksuál. Relatóriu ida hatete katak impaktu husi COVID-19 halo problema sira-neʼe sai aat liután. Klaru katak neʼe labele sai razaun ba laʼen atu trata aat sira-nia feen.
4. Laʼen Kristaun sira presiza kuidadu kona-ba saida, no tanbasá?
4 Laʼen Kristaun sira presiza kuidadu atu la husik mundu fó influénsia ba sira-nia hanoin kona-ba feto. a Tanbasá? Razaun ida mak ema nia hanoin bele fó impaktu ba sira-nia hahalok. Apóstolu Paulo hakerek karta ba ema Kristaun iha Roma neʼebé iha esperansa atu bá lalehan, hodi dehan: “Keta halo tuir mundu ohin neʼe.” (Rom 12:1, 2) Bainhira Paulo hakerek karta neʼe, sira balu sai ona ema Kristaun ba tinan barak. Maski nuneʼe, Paulo nia liafuan hatudu katak ema balu iha kongregasaun nafatin hetan influénsia husi mundu nia hanoin no kostume. Tan neʼe, Paulo fó konsellu ba sira atu troka sira-nia hanoin no hahalok. Klaru katak konsellu neʼe mós bele aplika ba laʼen Kristaun ohin loron. Triste mak laʼen balu hetan influénsia husi mundu nia hanoin no trata aat sira-nia feen. b Jeová hakarak laʼen sira atu trata sira-nia feen iha dalan oinsá? Ita sei hetan resposta husi eskritura tema iha lisaun neʼe.
5. Tuir 1 Pedro 3:7, laʼen ida presiza trata ninia feen iha dalan oinsá?
5 Lee 1 Pedro 3:7. Jeová haruka laʼen sira atu hatudu respeitu ba sira-nia feen. Laʼen neʼebé respeitu ninia feen sei trata feen ho laran-diʼak no domin. Iha lisaun neʼe, ita sei aprende oinsá mak laʼen ida bele hatudu respeitu ba ninia feen. Maibé ulukliu, mai ita koʼalia kona-ba hahalok balu neʼebé la hatudu respeitu ba feen.
SEES HUSI HAHALOK NEʼEBÉ HAKANEK FEEN NIA SENTIMENTU
6. Jeová sente oinsá kona-ba laʼen neʼebé halo violénsia ba feen? (Koloso 3:19)
6 Trata aat feen iha dalan fíziku. Jeová odi ema neʼebé gosta halo violénsia. (Sal 11:5) Jeová fó sai ho klaru katak nia la simu laʼen sira neʼebé halo violénsia ba sira-nia feen. (Mal 2:16; lee Koloso 3:19.) Tuir eskritura tema 1 Pedro 3:7, se laʼen ida la trata feen ho didiʼak, neʼe sei kona ninia relasaun ho Maromak. Karik Jeová mós la rona ba ninia orasaun.
7. Tuir Éfeso 4:31, 32, laʼen sira presiza hasees an husi liafuan saida deʼit? (Haree mós “Esplikasaun ba fraze”.)
7 Trata aat feen liuhusi liafuan. Laʼen balu trata aat feen ho hirus no liafuan kroʼat. Maibé Jeová odi hahalok “hirus, laran-nakali, hakilar malu, koʼalia aat”. c (Lee Éfeso 4:31, 32.) Nia rona buat hotu. Nia hatene dalan neʼebé laʼen koʼalia ba feen, maski neʼe mak entre feen no laʼen deʼit. Laʼen neʼebé koʼalia makaʼas ba feen, laʼós deʼit estraga relasaun kaben nian, maibé mós ninia relasaun ho Maromak.—Tgo 1:26.
8. Jeová sente oinsá kona-ba pornografia, no tanbasá?
8 Haree pornografia. Jeová sente oinsá kona-ba pornografia? Nia odi ida-neʼe. Tan neʼe, se laʼen ida haree pornografia, neʼe bele estraga ninia relasaun ho Jeová no la hatudu respeitu ba feen. d Jeová hakarak laʼen atu laran-metin ba feen laʼós deʼit liuhusi hahalok maibé mós liuhusi hanoin. Jesus hatete katak mane neʼebé haree ba feto seluk hodi kaan feto neʼe, nia halo ona adultériu “iha ninia laran”. e—Mt 5:28, 29.
9. Tanbasá mak Jeová odi bainhira laʼen ida la hatudu respeitu ba feen iha dalan seksuál?
9 La hatudu respeitu ba feen iha dalan seksuál. Laʼen balu obriga feen atu halo relasaun seksuál iha dalan neʼebé halo feen sente la moos ka la iha domin. Jeová odi hahalok hanoin an deʼit no la hanoin feen nia diʼak. Nia hakarak laʼen sira hadomi no hafolin sira-nia feen, no respeitu feen nia sentimentu. (Éf 5:28, 29) Oinsá se laʼen Kristaun ida iha ona toman atu trata aat ninia feen, la hatudu respeitu, ka haree pornografia? Oinsá mak nia bele troka ninia hanoin no hahalok?
OINSÁ ATU HAPARA TOMAN NEʼEBÉ LA DIʼAK
10. Oinsá mak laʼen sira bele hetan benefísiu husi Jesus nia ezemplu?
10 Saida mak bele ajuda laʼen ida atu hapara toman neʼebé la diʼak? Nia presiza hakaʼas an atu banati-tuir Jesus. Maski Jesus nunka kaben, dalan neʼebé nia trata dixípulu sira mak nuʼudar ezemplu ba laʼen sira. (Éf 5:25) Porezemplu, haree toʼok saida mak laʼen sira bele aprende husi dalan neʼebé Jesus trata ninia dixípulu sira no koʼalia ba sira.
11. Oinsá Jesus trata ninia apóstolu sira?
11 Jesus trata ninia apóstolu sira ho laran-diʼak no dignidade. Nia nunka koʼalia makaʼas ba sira. Maski iha podér, nia nunka uza ida-neʼe atu hatún ka hataʼuk sira. Nia serbí sira ho haraik an. (João 13:12-17) Nia hatete ba dixípulu sira: “Aprende husi haʼu, tanba haʼu laran-maus no haraik an, no imi sei sente kmaan.” (Mt 11:28-30) Jesus laran-maus. Ema neʼebé laran-maus laʼós katak fraku, maibé nia iha kbiit atu kontrola an. Bainhira ema provoka Jesus, nia nafatin kalma no kontrola ninia emosaun.
12. Jesus koʼalia ba ema seluk iha dalan oinsá?
12 Jesus uza ninia liafuan atu anima no fó kmaan ba ema seluk. Nia la koʼalia ho hirus ba dixípulu sira. (Lc 8:47, 48) Maski kontradór sira insulta no provoka nia, “nia la koʼalia fali liafuan kroʼat”. (1 Ped 2:21-23) Dala balu Jesus hili atu nonook deʼit duké hatán ho hirus. (Mt 27:12-14) Neʼe mak ezemplu diʼak tebes ba laʼen Kristaun sira!
13. Tuir Mateus 19:4-6, oinsá mak laʼen ida bele “hamutuk ho ninia feen”? (Haree mós dezeñu.)
13 Jesus hanorin laʼen sira atu laran-metin ba sira-nia feen. Nia temi fali ninia Aman nia liafuan katak laʼen ida tenke “hamutuk ho ninia feen”. (Lee Mateus 19:4-6.) Liafuan Gregu neʼebé tradús nuʼudar “hamutuk” signifika katak “belit metin hanesan goma”, tan neʼe domin entre laʼen no feen tenke metin hanesan goma neʼebé belit metin. Se sira ida halo buat neʼebé hakanek sira-nia pár nia laran, neʼe sei lori susar ba sira naʼin-rua. Laʼen neʼebé laran-metin ba feen sei hasees an husi buat naran deʼit neʼebé liga ho pornografia. Nia sei la hateke ba “buat neʼebé folin-laek”. (Sal 119:37) Hanesan Job, nia deside metin atu la hateke ba feto seluk hodi kaan feto neʼe.—Job 31:1.
Laʼen neʼebé laran-metin sei la haree pornografia (Haree parágrafu 13) g
14. Se laʼen ida hakarak hadiʼa ninia relasaun ho Jeová no ninia feen, saida deʼit mak nia presiza halo?
14 Laʼen neʼebé trata aat ninia feen iha dalan fíziku ka liuhusi liafuan, presiza halo tuir hakat sira tuirmai neʼe atu hadiʼa ninia relasaun ho Jeová no ninia feen. Primeiru, nia rekoñese katak ninia hahalok mak aat duni. La iha buat ida mak subar husi Jeová. (Sal 44:21; Ecle 12:14; Ebr 4:13) Segundu, nia tenke para atu trata aat ninia feen no troka ninia hahalok. (Prov 28:13) Terseiru, nia husu deskulpa ba ninia feen no mós ba Jeová hodi husu perdua. (Após 3:19) Nia mós presiza husu Jeová nia ajuda hodi bele haburas hakarak atu troka ninia hanoin, liafuan, no hahalok. (Sal 51:10-12; 2 Kor 10:5; Flp 2:13) Kuartu, ninia hahalok tenke tuir ninia orasaun, neʼe mak hodi halo buat hotu neʼebé nia bele atu odi violénsia no liafuan neʼebé kroʼat. (Sal 97:10) Kintu, nia buka kedas ajuda husi katuas kongregasaun. (Tgo 5:14-16) Sestu, nia halo planu neʼebé bele ajuda nia atu hasees an husi buat sira-neʼe iha futuru. Laʼen neʼebé haree pornografia mós tenke halo tuir hakat sira-neʼe. Jeová sei haraik bensaun ba ninia hakaʼas an. (Sal 37:5) Maibé, hakat sira-neʼe deʼit la toʼo. Laʼen mós presiza aprende atu hatudu domin no respeitu ba feen. Oinsá laʼen bele halo ida-neʼe?
OINSÁ ATU HATUDU DOMIN NO RESPEITU BA FEEN
15. Oinsá mak laʼen ida bele hatudu katak nia hadomi ninia feen?
15 Hatudu sai Ita-nia domin. Irmaun balu neʼebé iha moris kaben nian neʼebé kontente iha toman atu hatudu sai loroloron katak nia hadomi tebes ninia feen. (1 João 3:18) Laʼen ida bele hatudu sai ninia domin iha dalan neʼebé kiʼik, hanesan kaer feen nia liman ka hakoʼak ho domin. Karik laʼen bele haruka mensajen badak ba feen no hatete: “Haʼu saudades Ita”, ka “Ita diʼak hela ka lae?” Karik nia mós bele hakerek karta ba ninia feen ho liafuan murak. Bainhira laʼen halo buat sira-neʼe, nia hatudu domin no respeitu ba ninia feen no hametin sira-nia moris kaben nian.
16. Tanbasá mak laʼen presiza gaba ninia feen?
16 Hatudu sai agradese. Laʼen neʼebé hadomi ninia feen halo feen sente iha folin. Dalan ida mak hodi hatudu agradese ba buat hotu neʼebé feen halo atu apoia nia. (Kol 3:15) Bainhira laʼen ida ho laran gaba ninia feen, neʼe halo feen sente kontente, seguru, domin, no respeitu.—Prov 31:28.
17. Oinsá mak laʼen ida bele hatudu respeitu ba feen?
17 Hatudu laran-diʼak no respeitu. Laʼen neʼebé hadomi ninia feen, hafolin no haree feen nuʼudar prezente folin-boot husi Jeová. (Prov 18:22; 31:10) No neʼe sei halo nia trata feen ho laran-diʼak no respeitu, inklui kuandu halo relasaun seksuál. Nia sei la obriga feen atu halo relasaun seksuál iha dalan neʼebé halo feen sente la diʼak, ka kona feen nia konxiénsia. f Laʼen mós sei halo buat naran deʼit atu iha konxiénsia neʼebé moos iha Jeová nia oin.—Após 24:16.
18. Laʼen sira presiza deside metin atu halo saida? (Haree mós kaixa “ Dalan haat atu sai laʼen neʼebé respeitu feen”.)
18 Laʼen sira, imi bele fiar katak Jeová haree no hafolin imi-nia hakaʼas an atu hatudu respeitu ba feen iha buat hotu iha imi-nia moris. Deside metin atu hatudu respeitu ba feen hodi la halo buat naran deʼit neʼebé bele hakanek feen nia laran, no mós hodi hatudu laran-diʼak, respeitu, no domin ba nia. Bainhira imi halo nuneʼe, imi hatudu katak imi hadomi no hafolin imi-nia feen. Hatudu respeitu ba imi-nia feen, no imi sei proteje imi-nia relasaun neʼebé importante liu, neʼe mak relasaun ho Jeová.—Sal 25:14.
KNANANUK 131 “Buat neʼebé Maromak tau hamutuk”
a Laʼen sira sei hetan benefísiu hodi lee informasaun “Ita trata feto sira tuir Jeová nia dalan ka lae?” iha Livru Haklaken Janeiru 2024.
b Ema neʼebé sai vítima ba violénsia doméstika bele hetan benefísiu hodi lee informasaun “Ajuda ba ema neʼebé sai vítima ba violénsia doméstika” husi série “Tópiku seluk tan” iha jw.org no JW Library®.
c ESPLIKASAUN BA FRAZE: “Koʼalia aat” inklui koʼalia hodi hatún atu halo ema ida sente la diʼak kona-ba ninia an, no kritika beibeik nia. Liafuan naran deʼit neʼebé laʼen koʼalia hodi hakanek ka insulta feen mós temi nuʼudar “koʼalia aat”.
d Haree informasaun “Pornografia bele estraga Ita-nia moris kaben” iha jw.org no JW Library.
e Feen neʼebé ninia laʼen haree pornografia bele haree informasaun “Saida mak Ita bele halo se Ita-nia pár haree pornografia?” iha Livru Haklaken Agostu 2023.
f Bíblia la fó sai detalla kona-ba relasaun seksuál hanesan saida mak moos ka la moos entre feen no laʼen. Feen-laʼen Kristaun ida-idak tenke halo desizaun neʼebé hatudu sai sira-nia hakarak atu fó glória ba Jeová, halo kontente malu, no kontinua iha konxiénsia neʼebé moos. Baibain, feen-laʼen la koʼalia kona-ba sira-nia relasaun seksuál ba ema seluk.
g ESPLIKASAUN BA DEZEÑU: Serbisu-naʼin sira obriga irmaun ida atu haree pornografia.
