1. Tanbasá diʼak ba ita atu komemora Jesus nia mate tinan-tinan?

 JEOVÁ fó ba Ita ninia Oan-Mane nuʼudar sakrifísiu, neʼe mak prezente neʼebé folin-boot tebes! (2 Kor 9:15) Tanba Jesus mate ba Ita, neʼe loke dalan atu Ita bele iha relasaun diʼak ho Jeová no moris ba nafatin. Ita iha razaun barak atu hatudu agradese ba Jeová tanba nia hadomi ita hodi fó ninia Oan nuʼudar sakrifísiu. (Rom 5:8) Atu ajuda ita kontinua hatudu agradese no nunka haluha buat neʼebé Jeová no Jesus halo ona mai ita, Jesus husu ita atu komemora ninia mate tinan ida dala ida.—Lc 22:​19, 20.

2. Iha lisaun neʼe, ita sei aprende kona-ba saida?

² Tinan neʼe, ita sei halaʼo Memoriál iha loron-sábadu 12 Abríl 2025. Ita hotu hein namanas ba loron neʼe. Ita ida-idak bele hetan benefísiu hodi uza semana balu antes no depois Memoriál atu medita a kona-ba buat neʼebé Jeová no Jesus halo ona mai ita. Iha lisaun neʼe, ita sei aprende kona-ba Jeová no Jesus nia hahalok diʼak liuhusi Jesus nia sakrifísiu. Lisaun tuirmai, ita sei aprende kona-ba benefísiu neʼebé ita hetan husi Jesus nia sakrifísiu no oinsá ita bele hatudu agradese ba ida-neʼe.

JESUS NIA SAKRIFÍSIU HANORIN SAIDA MAI ITA KONA-BA JEOVÁ

3. Oinsá mak mane perfeitu ida nia sakrifísiu bele salva ema millaun ba millaun husi sala no mate? (Haree mós dezeñu.)

³ Jesus nia sakrifísiu hanorin ita katak Jeová hadomi justisa. (Deut 32:4) Oinsá ita hatene? Hanoin toʼok, tanba Adão la halo tuir Maromak, ita hotu sai sala-naʼin no  mate. (Rom 5:12) Atu salva ita husi sala no mate, Jeová halo arranju atu fó Jesus nuʼudar sakrifísiu. Maibé, oinsá mak mane perfeitu ida nia sakrifísiu bele salva ema millaun ba millaun? Apóstolu Paulo esplika: “Liuhusi ema ida deʼit [Adão] neʼebé lakohi halo tuir, ema hotu sai sala-naʼin, nuneʼe mós liuhusi ema ida deʼit [Jesus] neʼebé halo tuir, Maromak sei haree ema barak nuʼudar ema laran-loos.” (Rom 5:19; 1 Tim 2:6) Paulo hatete katak ita hotu sai atan ba sala no mate tanba mane perfeitu ida neʼebé la halo tuir Maromak. Tan neʼe, presiza mane perfeitu ida neʼebé halo tuir Maromak atu ita bele livre husi sala no mate.

4. Tanbasá Jeová la husik deʼit Adão nia bei-oan neʼebé laran-loos atu moris ba nafatin?

⁴ Jesus tenke mate duni atu salva ita ka lae? Tanbasá Jeová la husik deʼit Adão nia bei-oan neʼebé laran-loos atu moris ba nafatin? Nuʼudar sala-naʼin, karik ita hanoin katak neʼe mak dalan diʼak liu atu rezolve problema. Maibé ba Jeová, neʼe la justu. Tanba Jeová nia justisa mak perfeitu, nia labele taka matan deʼit ba Adão nia sala neʼebé sériu.

5. Tanbasá ita bele fiar metin katak Jeová sempre halo buat neʼebé loos?

⁵ Se Jeová la fó Jesus nuʼudar sakrifísiu no husik deʼit Adão nia bei-oan sira atu moris ba nafatin maski sira la perfeitu, neʼe katak Jeová kontra ninia matadalan rasik kona-ba saida mak loos no sala. No neʼe bele halo ema hanoin katak Jeová sei la kaer metin ba ninia desizaun kona-ba buat seluk no sei la kumpre ninia promesa kona-ba futuru. Maibé ita la presiza hanoin hanesan neʼe. Tanbasá? Tanba Jeová halo ona buat neʼebé justu maski la fasil ba nia atu fó ninia Oan rasik nuʼudar sakrifísiu. Neʼe halo ita fiar metin katak Jeová sempre halo buat neʼebé loos.

6. Jesus nia sakrifísiu hatudu saida mai ita kona-ba Jeová nia domin? (1 João 4:​9, 10)

⁶ Jesus nia sakrifísiu mós ajuda ita atu hatene katak Jeová hadomi tebes ita. (João 3:16; lee 1 João 4:​9, 10.) Jesus nia sakrifísiu hatudu katak Jeová hakarak ita atu moris ba nafatin no sai parte ba ninia família. Hanoin toʼok, bainhira Adão halo sala, nia labele tan sai parte ba Jeová nia família. Rezultadu mak bainhira ita moris mai, ita mós laʼós parte ba Jeová nia família. Maibé liuhusi Jesus nia sakrifísiu, ema hotu neʼebé hatudu fiar no halo tuir Jeová bele hetan perdua no ikusmai bele sai parte ba ninia família. No agora mós ita bele iha relasaun diʼak  ho Jeová no irmaun-irmán sira. Neʼe hatudu duni katak Jeová hadomi tebes ita!—Rom 5:​10, 11.

7. Oinsá mak Jesus nia terus no mate ajuda ita komprende Jeová nia domin mai ita?

⁷ Ita bele komprende liután Jeová nia domin ba ita se ita medita kona-ba Jeová nia sentimentu bainhira ema fó-terus no oho ninia Oan. Satanás duun katak la iha ema ida mak sei laran-metin ba Jeová bainhira hasoru susar. Atu prova katak Satanás mak bosok-teen, Jeová husik Jesus hetan uluk terus antes mate. (Job 2:​1-5; 1 Ped 2:21) Jeová haree bainhira ulun-naʼin relijiaun sira goza Jesus, soldadu sira baku nia ho xikote, no prega nia iha ai-riin. Tuirmai, Jeová mós haree ninia Oan doben mate iha dalan neʼebé aat tebes. (Mt 27:​28-31, 39) Jeová iha forsa atu hapara situasaun neʼe iha tempu naran deʼit. Porezemplu, bainhira kontradór sira dehan: “Husik Maromak salva nia”, loloos Jeová bele salva Jesus. (Mt 27:​42, 43) Maibé se Jeová halo nuneʼe, Jesus sei labele fó ninia moris nuʼudar sakrifísiu no ita sei la iha esperansa. Tan neʼe mak Jeová husik ninia Oan atu hetan terus toʼo mate.

8. Jeová sente oinsá bainhira haree ninia Oan hetan terus? Esplika toʼok. (Haree mós dezeñu.)

⁸ Maski Maromak iha forsa boot liu hotu, maibé neʼe la dehan katak nia la iha sentimentu. Maromak kria ita tuir ninia ilas no ita iha sentimentu oioin, neʼe katak Jeová mós iha sentimentu. Bíblia hatete katak Jeová sente “triste” ka “laran-kanek”. (Sal 78:​40, 41, nota) Hanoin mós kona-ba Abraão no Isaac nia istória. Jeová haruka Abraão atu hasaʼe ninia oan-mane mesak nuʼudar sakrifísiu. (Gén 22:​9-12; Ebr 11:​17-19) Imajina toʼok Abraão nia sentimentu bainhira nia foti tudik atu oho ninia oan-mane mesak. Klaru katak Jeová sente triste liu fali Abraão bainhira nia haree ema aat fó-terus no oho ninia Oan!—Haree vídeo Banati-tuir sira-nia fiar—Abraão, Parte 2 iha jw.org.

9. Roma 8:​32, 38, 39 hanorin saida kona-ba Jeová nia domin ba ita no ba ita-nia maluk fiar-naʼin sira?

⁹ Jesus nia sakrifísiu hanorin ita katak Jeová nia domin mai ita mak boot liu fali ema seluk nia domin, maski neʼe mak ita-nia família ka belun. (Lee Roma 8:​32, 38, 39.) Klaru katak Jeová hadomi ita liu fali ita hadomi ita-nia an rasik. Ita hakarak moris ba nafatin ka lae? Jeová hakarak tebetebes atu ita hetan ida-neʼe. Ita hakarak hetan perdua ba ita-nia  sala ka lae? Jeová hakarak duni atu fó perdua ba ita. Buat importante neʼebé Jeová hakarak husi ita mak atu ita hatudu deʼit agradese ba ninia prezente folin-boot hodi hatudu fiar no halo tuir nia. Jesus nia sakrifísiu mak prova katak Jeová hadomi tebes ita. No iha mundu foun, ita sei aprende liután kona-ba Jeová nia domin.—Ecle 3:11.

ITA BELE APRENDE SAIDA KONA-BA JESUS LIUHUSI NINIA SAKRIFÍSIU

10. (a) Tanbasá Jesus triste tebes kona-ba ninia mate? (b) Oinsá Jesus halo santu Jeová nia naran? (Haree mós kaixa “ Jesus nia laran-metin halo santu Jeová nia naran”.)

¹⁰ Jesus hanoin tebes kona-ba ninia Aman nia reputasaun. (João 14:31) Jesus hatene katak ema sei fó kastigu-mate ba nia nuʼudar kriminozu ida neʼebé la hatudu respeitu ba Maromak, no nia triste tebes tanba neʼe bele halo ema hanoin la diʼak kona-ba ninia Aman. Tan neʼe nia halo orasaun: “Haʼu-nia Aman, se bele karik, hasai tiha kopu neʼe husi haʼu.” (Mt 26:39) Maibé tanba Jesus hatudu laran-metin ba ninia Aman toʼo mate, nia halo santu ninia Aman nia naran.

11. Oinsá mak Jesus hatudu katak nia hadomi tebes ema? (João 13:1)

¹¹ Jesus nia sakrifísiu hanorin ita katak nia hadomi tebes ema, liuliu ninia dixípulu sira. (Prov 8:31; lee João 13:1.) Porezemplu, Jesus hatene katak buat balu neʼebé nia sei halo iha mundu mak susar, liuliu nia presiza hetan terus toʼo mate. Maski nuneʼe, Jesus halaʼo ninia knaar hotu laʼós deʼit tanba Jeová mak haruka, maibé mós tanba nia hadomi ema. Jesus haklaken, hanorin, no ajuda ema seluk ho laran tomak. Iha kalan antes Jesus mate, nia uza tempu atu fase  apóstolu sira-nia ain, hanorin sira, no fó kmaan ba sira. (João 13:​12-15) Tuirmai, kuandu nia iha ai-riin terus nian, nia fó esperansa ba kriminozu ida neʼebé iha ninia sorin no husu João atu tau matan ninia inan Maria. (Lc 23:​42, 43; João 19:​26, 27) Jesus hatudu domin ba ema laʼós deʼit hodi mate ba sira, maibé mós hodi trata sira ho domin no laran-diʼak.

12. Oinsá mak Jesus kontinua ajuda ita?

¹² Maski Kristu mate “dala ida deʼit ba nafatin”, maibé nia nafatin halo buat diʼak oioin mai ita ohin loron. (Rom 6:10) Oinsá? Nia kontinua halo serbisu oioin atu ita bele hetan benefísiu husi ninia sakrifísiu. Hanoin toʼok knaar oioin neʼebé Jesus halo. Nia serbí nuʼudar Liurai, Amlulik Boot, no mós ulun ba kongregasaun. (1 Kor 15:25; Éf 5:23; Ebr 2:17) Jesus halibur daudaun ema neʼebé iha esperansa atu bá lalehan no ema-lubun boot. Nia sei halo kompletu knaar neʼe antes terus boot nia rohan. b (Mt 25:32; Mc 13:27) Nia mós kontinua fó ai-han espirituál mai ita liuhusi atan laran-metin iha loron ikus sira-neʼe. (Mt 24:45) No durante Kristu nia Ukun ba Tinan Rihun Ida, nia sei kontinua tau matan ita. Jeová fó duni ninia Oan mai ita!

KONTINUA APRENDE BUAT FOUN

13. Oinsá mak Ita bele kontinua aprende kona-ba Maromak no Kristu nia domin?

¹³ Ita bele aprende liután kona-ba Maromak no Kristu nia domin se Ita kontinua medita kona-ba buat neʼebé sira halo ona. Karik semana balu antes no depois Memoriál, Ita bele lee livru Evanjellu ida ka rua. Duké lee kapítulu barak iha tempu ida nia laran, diʼak atu lee parte balu deʼit no buka-hatene tanbasá Ita presiza hadomi Jeová no Jesus. No fahe ba ema seluk buat neʼebé Ita aprende.

14. Tuir Salmo 119:​97, oinsá mak halo peskiza bele ajuda ita kontinua aprende kona-ba Jesus nia sakrifísiu no tópiku seluk tan? (Haree mós dezeñu.)

¹⁴ Se Ita iha lia-loos ba tinan barak ona, karik Ita hanoin katak la iha ona informasaun foun neʼebé Ita bele aprende kona-ba Maromak nia justisa, domin, no Jesus nia sakrifísiu. Maibé loloos, sempre iha buat foun neʼebé ita bele aprende kona-ba tópiku sira-neʼe no mós tópiku  seluk tan. Entaun, saida mak Ita presiza halo? Lee no estuda informasaun sira husi ita-nia publikasaun. Bainhira Ita lee eskritura ruma no ladún komprende, diʼak atu halo peskiza. Tuirmai, medita loron tomak kona-ba buat neʼebé Ita estuda, no saida mak Ita aprende kona-ba Jeová no ninia Oan-Mane nia domin ba Ita.—Lee Salmo 119:97 no nota-rodapé.

15. Tanbasá ita presiza kontinua aprende buat foun husi Bíblia?

¹⁵ Keta sai laran-kraik bainhira Ita la hetan buat foun ruma kuandu lee Bíblia ka halo peskiza. Imajina katak Ita mak hanesan ho ema neʼebé buka osan-mean. Baibain ema neʼebé buka osan-mean gasta oras barak no loron barak toʼo ikusmai hetan osan-mean, maski neʼe mak kiʼik deʼit. Maibé, sira la rende an no nafatin pasiénsia tanba hatene katak osan-mean neʼebé kiʼik mós iha folin-boot. Klaru katak lia-loos husi Bíblia mak folin-boot liu fali osan-mean! (Sal 119:127; Prov 8:10) Tan neʼe, hatudu pasiénsia hodi kontinua lee Bíblia no halo peskiza.—Sal 1:2.

16. Oinsá mak Ita bele banati-tuir Jeová no Jesus?

¹⁶ Bainhira Ita estuda, hanoin kona-ba oinsá atu aplika ida-neʼe iha Ita-nia moris. Porezemplu, Ita bele banati-tuir Jeová nia justisa hodi trata ema seluk ho justu. No Ita bele banati-tuir Jesus nia domin ba ninia Aman no ema seluk hodi prontu atu halo tuir Jeová nia hakarak no ajuda ema seluk maski dala ruma susar. Ita mós bele banati-tuir Jesus nia ezemplu hodi haklaken ba ema seluk, atu nuneʼe sira mós bele hetan oportunidade atu simu Jeová nia prezente folin-boot.

17. Iha lisaun tuirmai, ita sei koʼalia kona-ba saida?

¹⁷ Bainhira ita aprende no hafolin Jesus nia sakrifísiu, ita-nia domin ba Jeová no Jesus sai boot liután. Kuandu ita hadomi liután sira, sira mós sei hadomi liután ita. (João 14:21; Tgo 4:8) Tan neʼe, mai ita aproveita buat hotu neʼebé Jeová fó mai ita atu kontinua aprende kona-ba Jesus nia sakrifísiu. Iha lisaun tuirmai, ita sei haree benefísiu neʼebé ita hetan husi Jesus nia sakrifísiu no oinsá ita bele hatudu agradese ba Jeová nia domin.