1. Oinsá mak ema Kristaun tenke sai hanesan ai-hun ida? (Haree mós dezeñu.)

 “AI-HUN hotu neʼebé book an bá-mai kuandu anin huu sei la tohar lalais bainhira akontese anin boot.” Liafuan sira-neʼe hatudu katak ai-hun sira presiza fleksivel bainhira anin huu hodi nafatin hamriik metin. Ita mós tenke fleksivel bainhira mosu situasaun susar atu nuneʼe ita bele kontinua serbí Jeová ho haksolok. Oinsá? Ita labele ulun-toos no presiza sai toman ho ita-nia situasaun foun no presiza respeitu ema seluk nia hanoin no desizaun.

2. Hahalok saida mak bele ajuda ita atu sai toman ho situasaun foun? Iha lisaun neʼe, ita sei aprende saida?

² Nuʼudar Jeová nia atan sira, ita lakohi ulun-toos. Ita mós presiza hatudu haraik an no laran-sadiʼa. Iha lisaun neʼe, ita sei koʼalia kona-ba oinsá hahalok sira-neʼe ajuda ona ema Kristaun balu atu sai toman ho sira-nia situasaun foun. Ita mós sei aprende oinsá hahalok sira-neʼe bele ajuda ita. Ulukliu ita sei aprende husi Jeová no Jesus nia ezemplu kapás kona-ba la ulun-toos.

3. Oinsá ita hatene katak Jeová la ulun-toos?

³ Bíblia bolu Jeová nuʼudar “Fatuk Boot” tanba ninia hahalok no desizaun sira mak metin. (Deut 32:4) Maski nuneʼe, nia mós la ulun-toos. Nuʼudar situasaun iha mundu troka, Jeová kontinua fleksivel atu bele kumpre ninia hakarak. Jeová kria ema tuir ninia ilas no iha abilidade atu adapta ho situasaun neʼebé troka. Iha Bíblia ita bele hetan prinsípiu neʼebé klaru atu ajuda ita halo desizaun neʼebé matenek bainhira ita hasoru susar. Jeová nia hahalok no prinsípiu iha Bíblia hatudu katak maski nia mak  hanesan “Fatuk Boot”, maibé nia mós la ulun-toos.

4. Fó toʼok ezemplu neʼebé hatudu katak Jeová la ulun-toos. (Levítico 5:7, 11)

⁴ Jeová nia dalan sira mak perfeitu no fleksivel. Nia la ulun-toos bainhira tau matan ba ema. Hanoin toʼok kona-ba oinsá Jeová hatudu katak nia la ulun-toos ba ema Izraél. Nia la husu ema Izraél neʼebé kiak ka riku atu fó sakrifísiu neʼebé hanesan. Dala ruma, nia fó lisensa ba ema atu fó sakrifísiu neʼebé tuir sira-nia situasaun moris.​—Lee Levítico 5:7, 11.

5. Fó toʼok ezemplu neʼebé hatudu katak Jeová haraik an no laran-sadiʼa.

⁵ Jeová hatudu haraik an no laran-sadiʼa, no neʼe book nia atu la ulun-toos. Porezemplu, Jeová hatudu haraik an bainhira nia deside atu halakon ema aat iha Sodoma. Liuhusi ninia anju sira, nia fó matadalan ba Lot neʼebé laran-metin atu halai ba área foho nian. Maibé Lot taʼuk atu halo nuneʼe. Tan neʼe Lot husu atu nia no ninia família halai ba Zoar, neʼe mak sidade kiʼik neʼebé Maromak deside ona atu halakon. Loloos, Jeová bele obriga Lot atu halo tuir ninia matadalan. Duké halo nuneʼe, nia fó lisensa ba Lot atu bá Zoar no nia la halakon sidade neʼe. (Gén 19:18-22) Tinan barak liutiha, Jeová hatudu laran-sadiʼa ba ema Nínive. Nia haruka profeta Jonas atu fó avizu katak Jeová sei harahun sidade neʼe. Maibé bainhira ema Nínive arrepende an, Jeová hanoin sira no la harahun sidade neʼe.​—Jonas 3:1, 10; 4:10, 11.

6. Oinsá mak Jesus banati-tuir Jeová hodi la ulun-toos?

⁶ Jesus banati-tuir Jeová nia hahalok la ulun-toos. Maromak haruka Jesus mai iha rai atu haklaken ba ema Izraél neʼebé hanesan “bibi-malae neʼebé lakon”. Maibé Jesus hatudu katak nia la ulun-toos bainhira halaʼo ninia knaar. Loron ida, feto ida neʼebé laʼós ema Izraél husu Jesus atu kura ninia oan-feto neʼebé “anju aat domina”. Jesus hatudu laran-sadiʼa no kura feto neʼe nia oan. (Mt 15:21-28) Hanoin toʼok ezemplu seluk tan. Antes neʼe, kuandu Jesus haklaken, nia dehan: “Ema neʼebé nega haʼu . . . , haʼu mós sei nega nia.” (Mt 10:33) Maibé bainhira Pedro nega Jesus ba dala tolu, Jesus mós nega nia ka lae? Lae. Jesus hatene katak Pedro arrepende an no hatudu fiar. Depois Jesus moris-hiʼas nia mosu ba Pedro no karik fó-hanoin Pedro katak nia hadomi no perdua ona Pedro.​—Lc 24:33, 34.

7. Tuir Filipe 4:5, ita hakarak ema atu haree ita oinsá?

⁷ Ita aprende ona katak Jeová no Jesus la ulun-toos. Oinsá ho ita? Jeová hakarak ita atu la ulun-toos. (Lee Filipe 4:5.) Dalan seluk atu tradús versíkulu neʼe mak “iha reputasaun diʼak kona-ba  la ulun-toos”. Ita bele husu ba ita-nia an: ‘Ema haree haʼu nuʼudar ema neʼebé la ulun-toos no simu ema seluk nia ideia ka lae? Ka ema haree haʼu nuʼudar ema neʼebé la laran-maus no ulun-toos? Haʼu obriga ema atu halo tuir deʼit haʼu-nia hanoin ka lae? Haʼu prontu atu rona no simu ema seluk nia ideia ka lae?’ Bainhira ita la ulun-toos, neʼe hatudu katak ita banati-tuir Jeová no Jesus. Mai ita koʼalia kona-ba situasaun rua neʼebé ita presiza hatudu katak ita la ulun-toos. Neʼe mak bainhira ita-nia situasaun troka no bainhira ema seluk nia hanoin no desizaun la hanesan ho ita-nian.

8. Saida mak bele ajuda ita atu la ulun-toos bainhira ita-nia situasaun troka? (Haree mós nota-rodapé.)

⁸ Ita labele ulun-toos bainhira ita-nia situasaun troka. Mudansa sira bele hamosu problema neʼebé ita nunka espera. Karik ita hasoru situasaun kona-ba emerjénsia médiku. Ka karik situasaun polítiku ka ekonómiku troka derrepente no afeta ita-nia moris. (Ecle 9:11; 1 Kor 7:31) Bainhira ita-nia knaar iha organizasaun troka, dala ruma neʼe mós bele halo susar. Maski nuneʼe, ita bele hetan susesu atu sai toman ho ita-nia situasaun foun hodi halo tuir hakat haat tuirmai: (1) simu realidade, (2) hanoin kona-ba futuru, (3) iha hanoin pozitivu, no (4) ajuda ema seluk. b Mai ita koʼalia kona-ba ezemplu balu.

9. Oinsá feen-laʼen misionáriu ida tahan hasoru susar neʼebé mosu derrepente deʼit?

⁹ Simu realidade. Emanuele no Francesca simu knaar atu serbí nuʼudar misionáriu. Bainhira sira foin komesa aprende língua foun no sai toman ho kongregasaun foun, pandemia COVID-19 hahú no sira presiza izola an iha uma. Tuirmai irmán Francesca nia inan derrepente mate. Irmán Francesca hakarak tebes atu hamutuk ho ninia família, maibé tanba pandemia nia labele halo viajen. Oinsá mak nia bele tahan hasoru situasaun neʼe? Primeiru, Emanuele no Francesca halo orasaun hamutuk hodi husu matenek atu tahan susar iha loron ida-idak. Jeová hatán sira-nia orasaun hodi fó ai-han espirituál iha tempu neʼebé loos. Porezemplu, sira hetan anima husi irmaun ida iha vídeo neʼebé hatete: “Se ita lalais simu realidade, ita sei hetan fali ksolok no mós kontinua serbí Jeová ho laran tomak iha ita-nia situasaun foun.” c Segundu, sira deside atu aumenta sira-nia matenek hodi haklaken liuhusi telefone no sira konsege hahú estuda Bíblia ho ema ida. Terseiru, sira hafolin domin no ajuda husi irmaun-irmán sira. Loroloron, irmán ida haruka mensajen badak ho Eskritura durante tinan ida. Bainhira ita simu ita-nia situasaun foun, ita sei sente kontente ho buat neʼebé ita bele halo.

10. Oinsá mak irmán ida sai toman ho situasaun foun?

¹⁰ Hanoin kona-ba futuru no iha hanoin pozitivu. Irmán Christina husi rai-Roménia no hela iha rai-Japaun, sente triste bainhira sukursál haruka taka kongregasaun lian Inglés neʼebé nia asiste. Maibé nia la hanoin demais kona-ba buat  neʼebé akontese ona. Nia deside atu tuir fali kongregasaun lian Japonés no hakaʼas an atu haklaken iha lian Japonés. Nia husu feto ida neʼebé uluk serbisu ho nia atu ajuda nia koʼalia lian Japonés ho diʼak liután. Maski feto neʼe laʼós Testemuña, nia konkorda atu uza Bíblia no broxura Moris Haksolok ba Nafatin atu hanorin lian Japonés ba Christina. Rezultadu mak Christina aumenta ninia matenek atu koʼalia lian Japonés no feto neʼe mós komesa gosta aprende lia-loos. Bainhira ita hanoin kona-ba futuru no iha hanoin pozitivu, mudansa sira bele lori bensaun ba ita.

11. Saida mak ajuda feen-laʼen ida neʼebé hasoru problema ekonomia?

¹¹ Ajuda ema seluk. Feen-laʼen ida hela iha nasaun neʼebé governu bandu ita-nia atividade no hasoru problema ekonomia tanba nasaun neʼe iha krize ekonomia. Oinsá sira sai toman ho situasaun foun? Primeiru, sira halo hakat oioin atu halo simples sira-nia moris. Tuirmai, duké tau fokus ba sira-nia problema rasik, sira deside atu sai okupadu hodi ajuda ema seluk liuhusi serbisu haklaken. (Após 20:35) Laʼen neʼe hatete: “Sai okupadu iha serbisu haklaken ajuda ami atu la hanoin barak kona-ba ami-nia problema no ami bele tau fokus atu halo Maromak nia hakarak.” Bainhira ita-nia situasaun troka, importante atu ajuda ema seluk, liuliu hodi haklaken.

12. Oinsá mak apóstolu Paulo nia ezemplu bele ajuda ita sai fleksivel iha serbisu haklaken?

¹² Iha serbisu haklaken ita presiza fleksivel. Baibain ita hasoru ema neʼebé iha hanoin, fiar no situasaun moris neʼebé la hanesan. Apóstolu Paulo halo mudansa tuir situasaun no ita bele banati-tuir nia. Jesus hili Paulo nuʼudar “apóstolu ba nasaun sira”. (Rom 11:13) Tan neʼe, Paulo haklaken ba ema Judeu, ema Gregu, ema matenek, ema la eskola, ema-boot no liurai sira. Atu bele book ema oioin nia laran, Paulo tenke “sai buat hotu ba ema oioin”. (1 Kor 9:19-23) Nia hanoin didiʼak kona-ba ema nia kultura, situasaun moris no fiar, tan neʼe nia halo mudansa ba dalan neʼebé nia haklaken ba sira. Ita mós bele aumenta ita-nia matenek atu haklaken se ita fleksivel no hanoin kona-ba oinsá ita bele ajuda ema.

13. Tuir 1 Korinto 8:9, ita sei la halo saida se ita respeitu ema seluk nia hanoin?

¹³ Bainhira ita la ulun-toos, ita sei respeitu ema seluk nia hanoin. Porezemplu, irmán balu gosta atu pinta oin, maibé irmán seluk la gosta. Ema Kristaun balu gosta hemu tua, maibé ema seluk deside atu la hemu. Ema Kristaun hotu hakarak iha saúde neʼebé diʼak, maibé sira hili tratamentu médiku neʼebé la hanesan. Se ita sente katak ita-nia desizaun deʼit mak sempre loos no koko habelar ita-nia hanoin neʼe iha kongregasaun, karik ita bele halo ema seluk sidi no halakon unidade. Ita lakohi duni atu halo nuneʼe! (Lee 1 Korinto 8:9; 10:23, 24) Mai ita koʼalia kona-ba ezemplu rua neʼebé hatudu oinsá aplika Bíblia nia prinsípiu bele ajuda ita atu iha balansu no haburas dame.

14. Bíblia nia prinsípiu saida mak bele ajuda ita kuandu ita deside kona-ba dalan neʼebé ita hatais no hadiʼa an?

¹⁴ Hatais no hadiʼa an. Jeová la fó ukun-fuan espesífiku kona-ba dalan  neʼebé ita hatais, maibé nia fó prinsípiu sira ba ita. Ita presiza hatais iha dalan neʼebé lori glória ba Maromak, ho respeitu no “ho hanoin neʼebé loos”. (1 Tim 2:9, 10; 1 Ped 3:3) Tan neʼe, ita lakohi dada atensaun demais ba ita-nia an liuhusi dalan neʼebé ita hatais. Bíblia nia prinsípiu sira sei ajuda katuas sira atu la halo lei oioin kona-ba dalan neʼebé ema hatais no sira-nia modelu fuuk. Porezemplu, katuas iha kongregasaun ida hakarak ajuda irmaun joven balu neʼebé sai toman atu iha fuuk neʼebé runguranga. Oinsá katuas sira bele ajuda joven sira-neʼe hodi la halo lei ba sira? Katuas área fó sujestaun ba katuas sira atu hatete ba joven sira-neʼe: “Se Ita iha palku leten no ema tau fokus liu ba Ita duké Ita-nia liafuan, neʼe katak Ita iha problema ho dalan neʼebé Ita hatais no hadiʼa an.” Liafuan sira-neʼe ajuda joven sira atu komprende ho klaru, no katuas sira la presiza halo lei. d

15. Bíblia nia prinsípiu saida mak bele ajuda ita kuandu ita deside kona-ba tratamentu médiku? (Roma 14:5)

¹⁵ Tratamentu médiku. Ema Kristaun ida-idak tenke deside rasik oinsá atu tau matan ba sira-nia saúde. (Gal 6:5) Bainhira ema Kristaun hili tratamentu médiku, sira presiza halo tuir Bíblia nia ukun-fuan kona-ba hasees an husi raan no espiritizmu. (Após 15:20; Gal 5:19, 20) Maibé kona-ba tratamentu seluk, sira bele deside rasik. Ema Kristaun balu buka tratamentu husi doutór no enfermeiru sira, no balu tan buka tratamentu seluk. Karik ita rasik sente katak tratamentu balu mak diʼak ka la diʼak, maibé  ita presiza respeitu irmaun-irmán sira-nia direitu atu halo desizaun rasik kona-ba tratamentu médiku. Tan neʼe ita tenke hanoin-hetan pontu sira tuirmai: (1) Só Maromak nia Ukun deʼit mak bele kura ema nia moras ba nafatin. (Isa 33:24) (2) Ema Kristaun ida-idak tenke “fiar metin” kona-ba buat neʼebé diʼak ba nia. (Lee Roma 14:5.) (3) Ita labele tesi-lia ba ema seluk ka halo sira sidi. (Rom 14:13) (4) Ema Kristaun hatudu domin no komprende katak unidade iha kongregasaun mak importante liu fali sira-nia hanoin rasik. (Rom 14:15, 19, 20) Se ita hanoin-hetan pontu sira-neʼe, ita sei kontinua iha relasaun diʼak ho irmaun-irmán sira no haburas dame iha kongregasaun.

16. Oinsá mak katuas ida bele hatudu katak nia la ulun-toos? (Haree mós foto.)

¹⁶ Katuas sira tenke hatudu ezemplu diʼak kona-ba la ulun-toos. (1 Tim 3:2, 3) Porezemplu, katuas ida labele hanoin katak katuas hotu tenke simu ninia ideia tanba nia mak idade liu. Nia rekoñese katak Jeová nia espíritu bele book katuas naran deʼit atu fó ideia neʼebé bele ajuda katuas sira atu halo desizaun neʼebé matenek. No se desizaun neʼe la kontra Bíblia nia prinsípiu, katuas neʼebé la ulun-toos sei apoia desizaun neʼebé grupu katuas foti, maski nia rasik hakarak foti desizaun seluk.

17. Ema Kristaun neʼebé la ulun-toos hetan bensaun saida?

¹⁷ Ema Kristaun hetan bensaun barak tanba la ulun-toos. Porezemplu, ita sei iha relasaun diʼak ho irmaun-irmán sira no mós kongregasaun sei iha dame. Ita kontente tanba bele adora Jeová hamutuk ho ema neʼebé iha hahalok no kultura neʼebé la hanesan. Importante liu, ita kontente tanba ita banati-tuir Jeová neʼebé la ulun-toos.