1. Saida mak Ita aprende bainhira Ita komesa estuda Bíblia?

 ITA hanoin-hetan buat neʼebé Ita aprende bainhira Ita komesa estuda Bíblia ka lae? Karik Ita kontente atu hatene kona-ba Maromak nia naran. Karik Ita mós kontente atu hatene katak Maromak la fó-kastigu ba ema iha infernu. No karik Ita kontente tebes atu aprende katak Ita sei hasoru fali Ita-nia família ka belun neʼebé mate ona no sei moris hamutuk ho sira iha mundu paraízu.

2. Mudansa saida mak Ita halo kuandu estuda Bíblia? (Éfeso 5:1, 2)

² Bainhira Ita estuda liután Bíblia, Ita-nia domin ba Jeová sai boot liután. Domin neʼe book Ita atu aplika buat neʼebé Ita aprende. Ita halo desizaun diʼak neʼebé bazeia ba Bíblia nia prinsípiu. Ita aprende atu hanoin no halo buat loos tanba Ita hakarak halo Maromak kontente. Hanesan labarik ida neʼebé banati-tuir ninia aman, Ita mós banati-tuir Ita-nia Aman iha lalehan.​—Lee Éfeso 5:1, 2.

3. Pergunta saida mak ita presiza husu ba ita-nia an?

³ Ita bele husu ba ita-nia an: ‘Haʼu-nia domin ba Jeová boot liu fali se kompara ho tempu neʼebé haʼu foin sai ema Kristaun ka lae? Haʼu haleno Jeová nia hanoin no hahalok sira ho didiʼak hodi hatudu domin ba irmaun-irmán sira ka lae?’ Se ita-nia “domin uluk nian” sai malirin ona, keta sai laran-kraik. Ida-neʼe mós akontese ba ema Kristaun iha apóstolu sira-nia tempu. Jesus la rende an atu ajuda sira, no nia mós sei ajuda ita. (Apok 2:4, 7) Nia hatene katak ita bele aprende atu hatudu fali domin hanesan uluk ita hatudu bainhira foin aprende lia-loos.

4. Iha lisaun neʼe, ita sei aprende saida?

 ⁴ Iha lisaun neʼe, ita sei aprende kona-ba oinsá ita bele kontinua haburas domin ba Jeová no ema. Ita mós sei koʼalia kona-ba bensaun balu neʼebé ita no ema seluk bele hetan bainhira ita haburas domin.

5-6. Paulo hasoru susar saida bainhira haklaken? Saida mak ajuda nia atu kontinua serbí Jeová?

⁵ Apóstolu Paulo kontente atu serbí Jeová, maibé nia mós hasoru susar oioin. Dala barak Paulo presiza halo viajen dook, no iha tempu neʼebá la fasil atu halo viajen. Durante viajen nia “hasoru perigu iha mota” no “perigu husi naʼok-teen sira”. Inimigu sira mós baku nia. (2 Kor 11:23-27) No dala ruma irmaun-irmán sira mós la hafolin ninia hakaʼas an atu ajuda sira.​—2 Kor 10:10; Flp 4:15.

⁶ Saida mak ajuda Paulo atu kontinua serbí Jeová? Paulo aprende buat barak kona-ba Jeová nia hahalok husi Eskritura sira no mós husi ninia esperiénsia rasik. Paulo fiar metin katak Maromak Jeová hadomi nia. (Rom 8:38, 39; Éf 2:4, 5) No nia mós hadomi tebes Jeová. Paulo hatudu domin ba Jeová hodi “kontinua serbí ema santu sira”.​—Ebr 6:10.

7. Oinsá atu haburas domin ba Jeová?

⁷ Ita bele haburas domin ba Jeová liuhusi estuda Bíblia beibeik. Bainhira Ita lee Bíblia, koko atu buka-hatene buat neʼebé eskritura sira hanorin mai Ita kona-ba Jeová. Husu ba Ita-nia an: ‘Oinsá mak istória neʼe hatudu katak Jeová hadomi haʼu? Oinsá mak ida-neʼe ajuda haʼu atu hadomi Jeová?’

8. Oinsá mak orasaun ajuda ita atu haburas domin ba Jeová?

⁸ Dalan seluk atu haburas domin ba Jeová mak liuhusi halo orasaun ba nia loroloron no fakar sai ita-nia sentimentu ba nia. (Sal 25:4, 5) Jeová sei hatán ita-nia orasaun. (1 João 3:21, 22) Irmán Kayla b neʼebé hela iha Ázia, hatete: “Uluk haʼu-nia domin ba Jeová bazeia ba koñesimentu, maibé agora haʼu-nia domin sai boot liután bainhira haʼu haree nia hatán haʼu-nia orasaun. Neʼe book haʼu atu halo buat neʼebé nia gosta.”

9. Tanbasá ita hatene katak Timóteo haburas domin ba irmaun-irmán sira?

⁹ Depois apóstolu Paulo sai ema Kristaun, nia hasoru joven ida naran Timóteo. Timóteo hadomi Jeová no hadomi ema seluk. Paulo hatete ba ema Kristaun iha Filipe: “Haʼu la hetan ema seluk neʼebé iha hahalok hanesan [Timóteo], no nia sei tau matan ba imi ho laran.” (Flp 2:20) Paulo la koʼalia kona-ba Timóteo nia abilidade atu organiza buat oioin ka abilidade atu hatoʼo diskursu, maibé nia koʼalia kona-ba Timóteo nia domin ba irmaun-irmán sira. Klaru katak irmaun-irmán sira hein namanas atu Timóteo vizita sira-nia kongregasaun.​—1 Kor 4:17.

10. Oinsá irmán Anna no ninia laʼen hatudu domin ba irmaun-irmán sira?

¹⁰ Ita mós buka dalan atu ajuda irmaun-irmán sira. (Ebr 13:16) Hanoin kona-ba Anna neʼebé temi iha lisaun antes neʼe. Depois dezastre akontese, Anna no ninia laʼen vizita família ida iha  sira-nia kongregasaun no haree katak família neʼe nia uma-kakuluk mak aat ona. Família neʼe nia roupa foʼer hotu. Entaun, Anna hatete: “Ami foti sira-nia roupa hodi bá fase no mós estrika. Tuirmai ami fó fali ba sira. Ba ami, neʼe mak buat kiʼik deʼit, maibé tanba ami halo ida-neʼe, ami-nia relasaun nuʼudar belun sai metin liután.” Anna no ninia laʼen hadomi irmaun-irmán sira, no neʼe book sira atu fó ajuda.​—1 João 3:17, 18.

11. (a) Baibain ema sente oinsá bainhira ita hatudu domin ba sira? (b) Tuir Provérbios 19:17, Jeová sei halo saida bainhira ita hatudu domin?

¹¹ Bainhira ita hatudu domin no laran-diʼak ba ema seluk, baibain sira bele haree katak ita hakaʼas an atu haleno Jeová nia hanoin no hahalok. Karik sira sei hafolin tebes ita-nia laran-diʼak. Kayla neʼebé temi ona, hanoin-hetan ema neʼebé uluk ajuda nia. Nia hatete: “Haʼu agradese tebes ba irmán hotu neʼebé konvida haʼu atu haklaken hamutuk. Sira tula haʼu atu bá haklaken, konvida haʼu atu han hamutuk, no tula fali haʼu ba uma. Agora haʼu komprende katak sira presiza hakaʼas an atu halo nuneʼe. No sira halo ida-neʼe ho kontente.” Dala ruma ita sente katak ema la hafolin ita-nia ajuda. Kayla hatete: “Haʼu hakarak atu selu fali hahalok diʼak hotu neʼebé uluk sira halo ba haʼu, maibé agora haʼu la hatene sira hotu hela iha neʼebé. Maski nuneʼe, Jeová hatene, no haʼu halo orasaun atu nia selu fali sira-nia hahalok diʼak.” Kayla koʼalia loos. Jeová haree hahalok diʼak neʼebé ita hatudu ba ema seluk maski neʼe kiʼik deʼit. Nia haree ida-neʼe nuʼudar sakrifísiu neʼebé folin-boot no nuʼudar debe neʼebé nia presiza selu fali.​—Lee Provérbios 19:17.

12. Oinsá mak irmaun sira bele hatudu domin ba kongregasaun? (Haree mós foto.)

 ¹² Se Ita mak irmaun ida, oinsá mak Ita bele hatudu domin ba ema seluk no ajuda sira? Irmaun joven ida naran Jordan husu katuas kongregasaun ida kona-ba oinsá nia bele ajuda liután kongregasaun. Katuas neʼe gaba Jordan kona-ba buat diʼak neʼebé nia halo ona no tuirmai fó sujestaun balu kona-ba saida mak nia bele halo. Porezemplu, nia fó sujestaun ba Jordan atu toʼo iha Reuniaun-Fatin sedu hodi bele kumprimenta ema seluk, fó komentáriu iha reuniaun sira, haklaken beibeik hamutuk ho ninia grupu, no buka dalan atu ajuda ema seluk. Bainhira Jordan aplika sujestaun sira-neʼe, nia aprende buat oioin no mós aprende atu hatudu domin ba irmaun-irmán sira. Jordan aprende katak irmaun ida presiza hahú atu ajuda ema antes nia sai atan ba kongregasaun no tuirmai kontinua halo nuneʼe depois sai atan.​—1 Tim 3:8-10, 13.

13. Oinsá mak domin book irmaun Christian atu serbí fali nuʼudar katuas?

¹³ Oinsá se uluk Ita serbí nuʼudar atan ba kongregasaun ka katuas ida? Jeová hanoin-hetan serbisu neʼebé Ita halo iha tempu uluk no mós Ita-nia domin neʼebé book Ita atu halo serbisu neʼe. (1 Kor 15:58) Nia mós haree oinsá Ita kontinua hatudu domin. Irmaun Christian sai laran-kraik bainhira lakon ninia knaar nuʼudar katuas. Maibé nia dehan: “Haʼu deside katak haʼu sei hakaʼas an atu serbí Jeová ho laran tomak maski haʼu mak katuas kongregasaun ka lae.” Ikusmai, nia serbí fali nuʼudar katuas. Christian hatete: “Foufoun haʼu hanoin barak atu  simu fali knaar neʼe. Maibé haʼu deside katak se Jeová hakarak haʼu atu serbí fali nuʼudar katuas, haʼu sei halo nuneʼe tanba haʼu hadomi nia no mós irmaun-irmán sira.”

14. Saida mak ita aprende husi irmán Elena?

¹⁴ Jeová nia atan sira mós hatudu domin ba ema neʼebé laʼós Testemuña. (Mt 22:37-39) Porezemplu, irmán Elena husi rai-Jeórjia hatete: “Foufoun, razaun neʼebé haʼu bá haklaken mak tanba haʼu hadomi Jeová. Maibé bainhira haʼu-nia domin ba Jeová sai boot liután, haʼu-nia domin ba ema mós sai boot liután. Haʼu koko atu hanoin kona-ba problema neʼebé ema hasoru no tópiku saida mak sei book sira-nia laran. Bainhira haʼu halo nuneʼe, neʼe book haʼu atu hakarak ajuda sira.”​—Rom 10:13-15.

15-16. Hanesan hatudu iha foto, ita hetan bensaun saida bainhira hatudu domin?

¹⁵ Bainhira ita hatudu domin ba irmaun-irmán sira, neʼe sei lori benefísiu ba ita no mós ema seluk. Bainhira pandemia COVID-19 akontese, irmaun Paolo no ninia feen ajuda irmán ferik barak atu aprende oinsá atu uza sira-nia sasán eletróniku atu haklaken. Foufoun, susar ba irmán ida atu uza sasán eletróniku maibé ikusmai nia hatene oinsá atu uza ida-neʼe ho didiʼak. Nia uza ida-neʼe atu konvida ninia família atu asiste Memoriál. No sira naʼin-60 asiste liuhusi vídeo  konferénsia! Irmán neʼe no ninia família hetan benefísiu tanba irmaun Paolo no ninia feen nia ajuda. Irmán neʼe hakerek ba Paolo: “Obrigada tanba ita hanorin ona ami neʼebé idade. Haʼu sei nunka haluha Jeová nia domin no oinsá Ita hakaʼas an atu ajuda ami.”

¹⁶ Esperiénsia neʼe ajuda Paolo. Nia aprende katak hatudu domin mak importante liu fali matenek ka abilidade. Nia dehan: “Uluk haʼu serbí nuʼudar katuas área. Haʼu rekoñese katak karik ema haluha ona haʼu-nia diskursu sira, maibé sira sei hanoin-hetan buat neʼebé haʼu halo atu ajuda sira.”

17. Sé tan mak sei hetan benefísiu husi ita-nia domin?

¹⁷ Bainhira ita hatudu domin ba ema seluk, ita rasik bele hetan benefísiu husi ida-neʼe. Irmaun Jonathan neʼebé hela iha rai-Novazelándia sente hanesan neʼe. Iha loron-sábadu ida, nia haree pioneiru ida haklaken mesak iha dalan maski rai-manas. Jonathan deside atu haklaken ho pioneiru neʼe sábadu-sábadu iha lokraik. Tuir loloos, Jonathan nia laran-diʼak lori benefísiu ba ninia an rasik. Jonathan dehan: “Iha tempu neʼebá, haʼu ladún gosta haklaken. Maibé kuandu haʼu rona ba dalan neʼebé pioneiru neʼe hanorin no haree oinsá nia hetan susesu, neʼe book haʼu atu hafolin serbisu haklaken. Nia sai haʼu-nia belun diʼak no ajuda haʼu atu gosta haklaken no hakbesik liután ba Jeová.”

18. Jeová hakarak ita atu halo saida?

¹⁸ Jeová hakarak ita hotu atu haburas domin ba nia no ba ema seluk. Hanesan ita aprende ona, ita bele haburas domin ba Jeová liuhusi lee no medita ninia Liafuan, no mós halo orasaun beibeik. Ita bele haburas domin ba irmaun-irmán sira liuhusi fó ajuda ba sira. Bainhira ita-nia domin sai boot liután, ita sei hakbesik liután ba Jeová no ba irmaun-irmán sira. No ita-nia relasaun belun sei dura ba nafatin!