1. Tuir 1 Pedro 5:2, Jeová fó knaar saida ba katuas sira?

 KATUAS kongregasaun sira iha responsabilidade atu tau matan ba Jeová nia bibi neʼebé folin-boot. Sira agradese tanba Jeová fó fiar ba sira atu tau matan irmaun-irmán sira, no sira mós serbisu makaʼas nuʼudar “bibi-atan sira neʼebé . . . tau matan duni bibi sira ho didiʼak”. (Jer 23:4; lee 1 Pedro 5:2.) Ita hafolin tebes sira-nia serbisu!

2. Katuas balu hasoru susar saida?

² Katuas sira hasoru susar oioin bainhira halaʼo sira-nia knaar. Katuas sira presiza serbisu makaʼas atu tau matan ba kongregasaun. Katuas kongregasaun ida naran Tony iha Estadus Unidus, tenke aprende atu hatudu haraik an hodi la simu responsabilidade barak demais. Nia esplika: “Bainhira pandemia COVID-19 hahú, haʼu koko halo serbisu barak liután atu organiza reuniaun no serbisu haklaken. Maski nuneʼe sempre iha serbisu barak. Haʼu sai okupadu tebes toʼo la iha tempu atu lee Bíblia, estuda mesak no halo orasaun.” Katuas kongregasaun ida naran Ilir iha rai-Kosovo hasoru susar seluk. Bainhira akontese funu iha ninia rai, nia sente la fasil atu halo tuir matadalan husi organizasaun. Nia hatete: “Haʼu sente susar atu hatudu aten-brani bainhira sukursál haruka haʼu atu ajuda irmaun-irmán sira iha área neʼebé perigozu. Haʼu taʼuk loos, no haʼu sente katak matadalan neʼe la diʼak.” Misionáriu ida iha Ázia naran Tim sente susar atu halo atividade oioin neʼebé nia presiza halo iha loron ida-idak. Nia hatete: “Dala ruma, haʼu-nia isin no neon kole tebes.” Saida mak bele ajuda katuas sira atu tahan hasoru susar sira hanesan neʼe?

3. Oinsá ita hotu bele hetan benefísiu husi Gideão nia ezemplu?

³ Katuas sira bele aprende husi Juís Gideão nia ezemplu. (Ebr 6:12; 11:32) Nia sai hanesan bibi-atan neʼebé proteje  Maromak nia bibi. (Juís 2:16; 1 Krón 17:6) Hanesan Gideão, Jeová fó knaar ba katuas sira atu tau matan ba ninia povu durante tempu susar. (Após 20:28; 2 Tim 3:1) Ita bele banati-tuir Gideão nia hahalok haraik an no halo tuir. Nia sente susar atu tahan bainhira halaʼo ninia knaar. Maski ita serbí nuʼudar katuas ka lae, ita bele aprende atu hafolin liután ita-nia katuas sira. Ita hakarak ajuda katuas sira neʼebé serbisu makaʼas.​—Ebr 13:17.

4. Oinsá mak Gideão hatudu haraik an?

⁴ Gideão mak mane neʼebé haraik an. b Bainhira Jeová nia anju fó-hatene Gideão katak Jeová hili nia atu salva povu Izraél husi ema Midian neʼebé forsa boot, mane haraik an neʼe dehan: “Haʼu-nia umakain mak kiʼik liu iha Manasés, no haʼu mak ema neʼebé la importante liu iha haʼu-nia aman nia umakain.” (Juís 6:15) Nia sente katak nia labele kumpre knaar neʼe, maibé Jeová hatene katak nia bele halo ida-neʼe. Ho Jeová nia ajuda, Gideão kumpre ninia knaar ho susesu.

5. Saida deʼit mak halo susar ba katuas sira atu hatudu haraik an?

⁵ Katuas sira hakaʼas an atu hatudu haraik an iha buat hotu. (Miq 6:8; Após 20:18, 19) Sira la gaba an kona-ba sira-nia abilidade ka buat neʼebé sira kumpre. Sira mós la hanoin katak sira folin-laek tanba sala balu neʼebé sira halo. Maibé dala ruma susar ba katuas ida atu hatudu haraik an. Porezemplu, karik nia simu knaar barak no susar atu kumpre knaar hotu. Ka karik ema kritika ka gaba dalan neʼebé nia halaʼo ninia knaar. Saida mak katuas sira bele aprende husi Gideão bainhira hasoru situasaun sira-neʼe?

6. Saida mak katuas sira bele aprende husi Gideão kona-ba haraik an? (Haree mós foto.)

⁶ Husu ajuda. Gideão hatudu haraik an hodi husu ema seluk nia ajuda. (Juís 6:27, 35; 7:24) Diʼak atu katuas sira halo buat neʼebé hanesan. Tony neʼebé temi ohin hatete: “Haʼu toman atu simu serbisu barak liu fali haʼu-nia kbiit tanba dalan neʼebé haʼu-nia inan-aman haboot haʼu. Entaun haʼu deside atu estuda kona-ba  hahalok haraik an iha ami-nia adorasaun família no husu haʼu-nia feen se haʼu hatudu ona hahalok neʼe ka lae. Haʼu mós haree vídeo iha website jw.org ho títulu Fó treinu, tau fiar, no fahe responsabilidade ba ema seluk hodi banati-tuir Jesus.” Tony komesa husu ajuda husi ema seluk atu halo knaar oioin. Rezultadu mak saida? Tony hatete: “Iha ema seluk neʼebé bele halo knaar sira iha kongregasaun, no haʼu iha tempu barak liután atu hametin haʼu-nia relasaun ho Jeová.”

7. Oinsá katuas sira bele banati-tuir Gideão bainhira hetan kritika? (Tiago 3:13)

⁷ Keta sai hirus bainhira ema kritika. Bainhira ema kritika katuas ida, neʼe bele koko ninia haraik an. Dala ida tan, Gideão nia ezemplu bele ajuda katuas sira. Gideão komprende katak nia la perfeitu, tan neʼe nia hatán ho laran-maus bainhira ema Efraim kritika nia. (Juís 8:1-3) Gideão la hatán ho hirus, maibé nia hatudu haraik an hodi rona didiʼak no koʼalia ho laran-maus. Neʼe ajuda ema Efraim atu sai kalma. Katuas sira neʼebé matenek banati-tuir Gideão hodi rona didiʼak no hatán ho laran-maus bainhira ema kritika. (Lee Tiago 3:13.) Hodi halo nuneʼe, katuas sira bele haburas dame iha kongregasaun.

8. Saida mak katuas sira bele halo bainhira hetan gaba? Fó toʼok ezemplu ida.

⁸ Fó glória hotu ba Jeová. Bainhira ema gaba Gideão tanba manán ema Midian, nia fó glória hotu ba Jeová. (Juís 8:22, 23) Oinsá katuas sira bele banati-tuir Gideão? Sira bele fó glória ba Jeová kona-ba buat neʼebé sira kumpre. (1 Kor 4:6, 7) Porezemplu, se katuas ida hetan gaba tanba matenek atu hanorin, nia bele esplika katak hanorin neʼe mai husi Bíblia no ita hotu aprende husi Jeová nia organizasaun. Dala ruma katuas sira presiza hanoin kona-ba dalan neʼebé sira hanorin dada atensaun ba Jeová ka ba sira-nia an. Hanoin toʼok kona-ba katuas ida naran Timothy. Bainhira Timothy foin serbí nuʼudar katuas, nia gosta hatoʼo diskursu públiku. Nia hatete: “Haʼu uza introdusaun no ai-knanoik neʼebé naruk no komplikadu. Dala barak ema gaba haʼu. Maibé sira tau fokus liu ba haʼu duké ba Bíblia ka Jeová.” Liutiha tempu balu, Timothy rekoñese katak nia presiza troka dalan neʼebé nia hanorin atu la dada atensaun ba ninia an. (Prov 27:21) Neʼe lori rezultadu saida? Nia esplika: “Ema oioin fó sai oinsá haʼu-nia diskursu ajuda sira atu tahan problema, ka ajuda sira hakbesik ba Jeová. Neʼe halo haʼu sente haksolok liu duké hetan gaba hanesan uluk.”

9. Saida mak halo susar ba Gideão atu halo tuir no hatudu aten-brani? (Haree dezeñu iha oin.)

⁹ Bainhira Gideão sai juís, nia presiza halo tuir no hatudu aten-brani iha situasaun oioin. Porezemplu, Maromak fó nia knaar neʼebé perigozu, neʼe mak atu harahun Baal nia altár neʼebé ninia aman harii. (Juís 6:25, 26) Tuirmai, bainhira nia halibur tiha tropa sira, dala rua Jeová haruka nia atu hamenus ninia tropa. (Juís 7:2-7) Ikusmai, Maromak haruka nia atu asalta tropa inimigu iha kalan-boot.​—Juís 7:9-11.

10. Tanbasá dala ruma susar ba katuas sira atu halo tuir matadalan?

¹⁰ Katuas sira tenke “prontu atu halo tuir”. (Tgo 3:17) Sira prontu atu halo tuir buat neʼebé Eskritura hatete no mós matadalan husi Maromak nia organizasaun.  Hodi halo nuneʼe, sira hatudu ezemplu kapás ba ema seluk. Maski nuneʼe, dala ruma susar ba katuas ida atu halo tuir matadalan. Porezemplu, karik nia hetan beibeik matadalan foun no nia sente susar atu aplika ida-neʼe. Iha situasaun balu, karik nia duvida se matadalan neʼe mak diʼak no matenek. Ka karik organizasaun husu nia atu halo knaar ida neʼebé bele halo autoridade sira kaer nia. Oinsá katuas sira bele banati-tuir Gideão hodi prontu halo tuir matadalan iha situasaun sira-neʼe?

11. Saida mak bele ajuda katuas sira atu prontu halo tuir?

¹¹ Rona didiʼak ba matadalan no aplika ida-neʼe. Maromak esplika ba Gideão kona-ba oinsá atu harahun Baal nia altár, iha neʼebé mak atu harii fali altár foun ba Jeová, no nia presiza hasaʼe animál saida nuʼudar sakrifísiu. Gideão la kritika matadalan neʼe, maibé halo tuir deʼit. Ohin loron, katuas sira simu matadalan husi Jeová nia organizasaun liuhusi karta, avizu sira, no matadalan seluk neʼebé ajuda proteje ita no ajuda ita hakbesik nafatin ba Jeová. Ita hafolin katuas sira tanba halo tuir matadalan husi organizasaun, no kongregasaun tomak hetan benefísiu husi ida-neʼe.​—Sal 119:112.

12. Oinsá katuas sira bele halo tuir Ebreu 13:17 bainhira organizasaun halo mudansa ba matadalan ruma?

¹² Prontu atu halo mudansa. Jeová husu Gideão atu haruka kuaze tropa hotu atu fila fali ba sira-nia uma. (Juís 7:8) Karik nia bele hanoin: ‘Presiza duni halo mudansa neʼe ka lae? Neʼe sei susesu ka lae?’ Maski nuneʼe Gideão halo tuir. Ohin loron, katuas sira banati-tuir Gideão hodi aplika mudansa foun husi organizasaun. (Lee Ebreu 13:17.) Porezemplu, iha tinan 2014, Grupu Administradór halo mudansa kona-ba fundus atu harii Reuniaun-Fatin ka Salaun ba Asembleia. (2 Kor 8:12-14) Iha tempu uluk, organizasaun fó-empresta osan ba kongregasaun atu harii fatin adorasaun no kongregasaun tenke selu fali ida-neʼe. Maibé agora organizasaun uza kontribuisaun husi kongregasaun iha mundu tomak atu harii Reuniaun-Fatin no Salaun ba Asembleia iha fatin sira neʼebé presiza, maski irmaun-irmán sira iha fatin sira-neʼe fó kontribuisaun uitoan deʼit. Bainhira irmaun José rona kona-ba neʼe, nia sente duvida no hanoin: ‘Ita sei nunka bele harii Reuniaun-Fatin ida. Neʼe sei la susesu iha neʼe.’ Saida mak ajuda José atu apoia matadalan neʼe? Nia hatete: “Provérbios 3:5, 6 fó-hanoin haʼu atu tau fiar ba Jeová. Neʼe lori rezultadu diʼak tebes. Agora ita harii Reuniaun-Fatin barak liután. No dalan neʼebé organizasaun uza ita-nia kontribuisaun lori  benefísiu tanba bele taka buat neʼebé ita-nia maluk iha rai seluk falta.”

13. (a) Gideão iha konfiansa saida? (b) Oinsá katuas sira bele banati-tuir Gideão? (Haree mós foto.)

¹³ Halo Jeová nia hakarak ho aten-brani. Gideão halo tuir Jeová maski nia taʼuk no mós knaar neʼe mak perigozu. (Juís 9:17) Depois hetan anima husi Jeová, Gideão iha konfiansa katak Jeová sei ajuda nia atu proteje Jeová nia povu. Katuas sira neʼebé hela iha área neʼebé governu bandu ita-nia atividade, bele banati-tuir Gideão. Sira ho aten-brani dirije reuniaun no mós serbisu haklaken maski karik polísia bele kaer sira, halo interrogasaun, lakon serbisu ka ema halo violénsia hasoru sira. c Durante terus boot, katuas sira presiza aten-brani atu halo tuir matadalan neʼebé sira simu maski karik perigu atu halo tuir. Matadalan sira-neʼe karik inklui mós oinsá atu haklaken mensajen neʼebé hanesan jelu-fatuk boot no buat neʼebé ita presiza halo atu hetan salvasaun bainhira Gog husi Magog ataka.​—Eze 38:18; Apok 16:21.

14. Tanbasá Gideão sente susar atu tahan?

¹⁴ Gideão tenke uza ninia forsa tomak atu halaʼo knaar nuʼudar juís. Porezemplu, iha kalan bainhira tropa Midian halai, Gideão duni tuir sira husi Foho-Leet Jezreel toʼo Mota Jordaun neʼebé karik iha ai-hun barak. (Juís 7:22) Gideão para iha Mota Jordaun ka lae? Lae! Maski kole, nia no ninia tropa naʼin-300 hakur mota no kontinua duni tuir tropa Midian. Ikusmai sira kaer toman tropa Midian no manán tropa sira-neʼe.​—Juís 8:4-12.

15. Tanbasá dala ruma susar ba katuas ida atu tahan?

¹⁵ Dala ruma katuas ida nia neon no isin sai kole tebes tanba tau matan ba kongregasaun  no ninia família. Entaun, oinsá katuas ida bele banati-tuir Gideão?

16-17. Saida mak ajuda Gideão atu tahan, no katuas sira bele iha konfiansa saida? (Isaias 40:28-31) (Haree mós foto.)

¹⁶ Fiar katak Jeová sei hametin ita. Gideão fiar katak Jeová sei fó kbiit ba nia, no Jeová halo duni nuneʼe. (Juís 6:14, 34) Gideão no ninia tropa sira halai hodi duni tuir liurai Midian naʼin-rua neʼebé karik saʼe kuda-kamelu. (Juís 8:12, 21) Maibé, Maromak ajuda ema Izraél atu kaer liurai sira-neʼe no manán funu. Katuas sira mós bele sadere ba Jeová tanba nia “nunka sai kole ka fraku”. Nia sei fó sira kbiit bainhira sira presiza.​—Lee Isaias 40:28-31.

¹⁷ Hanoin toʼok kona-ba irmaun Matthew neʼebé serbí nuʼudar membru ba Komisaun neʼebé Komunika ho Ospitál. Saida mak ajuda Matthew atu tahan? Nia hatete: “Haʼu sente Jeová fó kbiit mai haʼu hanesan fó sai iha Filipe 4:13. Dala barak bainhira haʼu kole tebes no sente atu para deʼit, haʼu harohan ba Jeová hodi husu nia atu fó forsa neʼebé haʼu presiza atu apoia irmaun-irmán sira. Iha situasaun neʼe, haʼu sente duni Jeová nia espíritu fó forsa mai haʼu no ajuda haʼu atu tahan.” Hanesan Gideão, dala ruma katuas sira sente susar tanba presiza serbisu makaʼas atu tau matan ba Maromak nia bibi sira. Klaru katak sira presiza hatudu haraik an no rekoñese sira-nia limitasaun, maibé sira bele fiar katak Jeová sei rona sira-nia orasaun atu husu ajuda no sei fó forsa ba sira atu tahan.​—Sal 116:1; Flp 2:13.

18. Oinsá katuas sira bele banati-tuir Gideão?

¹⁸ Katuas sira bele aprende buat barak husi Gideão nia ezemplu. Katuas sira presiza hatudu haraik an hodi hanoin didiʼak antes simu knaar barak liután no mós bainhira ema seluk kritika ka gaba sira. Sira tenke halo tuir no hatudu aten-brani, liuliu nuʼudar sistema neʼe nia rohan besik daudaun ona. No sira presiza fiar katak maski sira hasoru susar oioin, Maromak bele hametin sira. Klaru katak ita agradese tebes ba bibi-atan sira-neʼe tanba sira serbisu makaʼas ba ita, no ita hakarak “kontinua hafolin” sira.​—Flp 2:29.