1-2. Hanesan Lot, susar saida mak ema Kristaun hasoru ohin loron?

 LOT “sente laran-susar tebes tanba ema aat sira neʼebé halo hahalok aat toʼo la sente moe”. (2 Ped 2:7, 8) Nia hatene katak Aman Jeová odi hahalok aat. Ita mós sente hanesan Lot bainhira ita haree ema nia morál neʼebé sai aat liután ohin loron. Tanba Lot hadomi no hamtaʼuk Jeová, nia odi hahalok la morál husi ema sira neʼebé haleʼu nia. Ohin loron, ema barak mós la hafolin Jeová nia matadalan kona-ba morál. Maski nuneʼe, ita bele moos nafatin iha dalan morál se ita kontinua hadomi Jeová no aprende atu hamtaʼuk nia.​—Prov 14:2.

² Jeová ajuda ita atu halo ida-neʼe liuhusi konsellu diʼak iha livru Provérbios. Ema Kristaun hotu, mane no feto, joven no idade, bele hetan benefísiu husi konsellu matenek iha Provérbios.

3. Tuir Provérbios 17:3, tanbasá ita presiza proteje ita-nia laran? (Haree mós foto.)

³ Jeová buka-hatene ema nia laran. Neʼe katak nia haree ita mak ema oinsá loos, laʼós deʼit buat neʼebé matan bele haree. Tan neʼe importante atu proteje ita-nia laran. (Lee Provérbios 17:3.) Nia sei hadomi ita se ita kontinua hanoin kona-ba ninia konsellu neʼebé bele ajuda ita atu hetan moris ba nafatin. (João 4:14) Se ita halo nuneʼe, neʼe sei ajuda ita hasees an husi Satanás nia lia-bosok no ema nia morál neʼebé aat. (1 João 5:18, 19) Bainhira ita hakbesik liután ba Jeová, ita sei hadomi no respeitu  liután nia. Tanba lakohi hakanek ita-nia Aman nia laran, ita sei nunka hanoin atu halo sala. Tan neʼe bainhira ita hetan tentasaun, ita sei husu ba ita-nia an: ‘Haʼu hakarak duni atu hakanek Maromak neʼebé hadomi tebes haʼu ka lae?’​—1 João 4:9, 10.

4. Oinsá hamtaʼuk ba Jeová proteje irmán ida?

⁴ Irmán Marta husi rai-Kroásia hetan tentasaun atu halo sala seksuál, nia hatete: “Susar ba haʼu atu iha hanoin neʼebé loos no luta hasoru hakarak atu halo sala. Maibé hamtaʼuk ba Jeová proteje duni haʼu.” b Oinsá hamtaʼuk ba Maromak ajuda Marta? Nia hatete katak nia hanoin kleʼan kona-ba konsekuénsia husi desizaun neʼebé sala. Ita mós bele halo nuneʼe. Se ita halo desizaun sala, ita hakanek Jeová nia laran no lakon oportunidade atu adora nia ba nafatin. Neʼe mak konsekuénsia neʼebé aat tebes.​—Gén 6:5, 6.

5. Ita bele aprende saida husi Leo?

⁵ Bainhira ita hamtaʼuk Jeová, ita sei la habelun ho ema sira neʼebé halo hahalok aat. Haree toʼok esperiénsia husi irmaun Leo iha Repúblika Demokrátika Kongu. Tinan haat depois nia hetan batizmu, nia ransu ho ema neʼebé halo hahalok aat. Nia hanoin katak se nia rasik la halo hahalok aat, la sala atu ransu ho sira. Maibé lakleur, ninia ransu halo nia sai toman atu hemu tua demais no halo sala seksuál. Tuirmai nia hanoin-hetan buat neʼebé ninia inan-aman hanorin ba nia no mós kontente neʼebé uluk nia sente. Entaun nia komesa halo fali buat neʼebé loos. Nia fila fali ba Jeová tanba hetan ajuda husi katuas kongregasaun  sira. Ohin loron, nia serbí nuʼudar katuas no pioneiru espesiál.

6. Feto naʼin-rua neʼebé temi iha livru Provérbios reprezenta saida?

⁶ Ita sei koʼalia kona-ba Provérbios kapítulu 9 neʼebé konta kona-ba feto simbóliku naʼin-rua neʼebé reprezenta matenek no hahalok beik. c Bainhira ita aprende kona-ba neʼe, hanoin-hetan katak Satanás nia mundu tau fokus demais ba sala seksuál no pornografia. (Éf 4:19) Tan neʼe importante atu kontinua hamtaʼuk Jeová no hasees an husi buat neʼebé aat. (Prov 16:6) Ita hotu, maski mane ka feto bele hetan benefísiu hodi aprende kona-ba Provérbios kapítulu 9. Bíblia dehan katak feto ida-idak fó konvite ba ema neʼebé la iha esperiénsia ka “ema neʼebé beik”. Neʼe hanesan sira ida-idak hatete: ‘Mai han hamutuk iha haʼu-nia uma.’ (Prov 9:1, 5, 6, 13, 16, 17) Maibé ema neʼebé simu konvite hetan rezultadu neʼebé la hanesan.

7. Tuir Provérbios 9:13-18, saida mak akontese kuandu simu konvite husi feto neʼebé beik? (Haree mós dezeñu.)

⁷ Lee toʼok konvite husi “feto neʼebé beik”. (Lee Provérbios 9:13-18.) Nia bolu ema neʼebé la iha esperiénsia hodi dehan: “Mai iha neʼe” no halo festa. Tuirmai saida mak akontese ba sira? “Feto neʼe nia uma mak uma ba ema mate.” Neʼe halo ita hanoin-hetan feto simbóliku seluk iha livru Provérbios. Ita hetan avizu atu kuidadu ho “feto neʼebé halo hahalok aat”, no “feto neʼebé la iha morál”. Provérbios dehan: “Laʼo ba ninia uma mak hanesan laʼo ba mate.” (Prov 2:11-19) Provérbios 5:3-10 fó avizu kona-ba feto seluk tan “neʼebé halo hahalok aat” no “ninia ain laʼo tun ba mate”.

8. Ita tenke halo desizaun saida?

⁸ Sira neʼebé rona ba “feto neʼebé beik” tenke deside atu simu ninia konvite ka lae. Karik ita mós presiza halo desizaun hanesan neʼe. Saida mak ita sei halo se ita hetan tentasaun atu halo sala seksuál ka se derrepente deʼit mosu dezeñu pornografia iha internét?

9-10. Tanbasá ita presiza hasees an husi sala seksuál?

⁹ Iha razaun neʼebé diʼak atu hasees an husi sala seksuál. “Feto neʼebé beik” dehan:  “Bee naʼok nian mak midar.” Saida mak “bee naʼok nian”? Bíblia kompara relasaun seksuál entre feen-laʼen ho bee neʼebé fresku. (Prov 5:15-18) Feto no mane neʼebé kaben ona tuir lei mak bele haksolok hodi halo relasaun seksuál. “Bee naʼok nian” bele refere ba sala seksuál no neʼe la lori ksolok. Dala barak ema halo sala seksuál subasubar hanesan naʼok-teen. “Bee naʼok nian” sente midar tebes bainhira sira hanoin katak la iha ema ida mak hatene buat neʼebé sira halo. Sira lohi sira-nia an tanba Jeová haree buat hotu. Bainhira Jeová la simu ita, neʼe mak buat neʼebé moruk ka aat tebes, no la halo ita kontente. (1 Kor 6:9, 10) Maibé iha mós konsekuénsia seluk.

¹⁰ Sala seksuál bele halo ita sente moe, sente la iha folin, sai isin-rua, no sobu família. Tan neʼe matenek duni atu la simu konvite husi feto neʼebé beik. Ema neʼebé halo sala seksuál laʼós deʼit lakon sira-nia relasaun diʼak ho Jeová, maibé mós bele hetan moras no tuirmai lakon sira-nia moris. (Prov 7:23, 26) Provérbios 9:18 hatete: “Feto neʼe nia bainaka sira mak iha rate laran neʼebé kleʼan.” Se nuneʼe tanbasá ema barak simu feto neʼe nia konvite?​—Prov 9:13-18.

11. Tanbasá haree pornografia mak perigu tebes?

¹¹ Buat neʼebé lasu ema barak mak pornografia. Ema balu hanoin katak la perigu atu haree pornografia. Maibé realidade mak neʼe perigu tebes, halo ema la hafolin sira-nia an no ema seluk, no mós susar atu hapara toman neʼe. Bainhira ita haree foto neʼebé la morál, neʼe bele belit metin iha ita-nia neon. Liután neʼe, pornografia la ajuda ita hamate hakarak isin nian, maibé haburas liután hakarak neʼe. (Kol 3:5; Tgo 1:14, 15) Dala barak ema neʼebé haree pornografia ikusmai halo hahalok la morál.

12. Ita presiza halo saida atu hasees an husi dezeñu sira neʼebé hamosu hanoin la morál?

¹² Ita presiza halo saida se dezeñu pornografia mosu derrepente iha ita-nia telemovel ka sasán eletróniku seluk? Ita presiza taka kedas no labele haree ida-neʼe. Fasil liu atu halo ida-neʼe se ita hanoin-hetan katak ita-nia relasaun ho Jeová mak folin-boot liu. Tuir loloos, dezeñu sira neʼebé laʼós pornografia bele mós hamosu hanoin neʼebé la morál. Tanbasá ita presiza hasees an husi ida-neʼe? Tanba ita mós lakohi atu hanoin kona-ba halo hahalok la morál. (Mt 5:28, 29) Irmaun David neʼebé serbí nuʼudar katuas iha rai-Tailándia hatete: “Haʼu husu ba haʼu-nia an: ‘Maski dezeñu sira-neʼe laʼós pornografia, maibé Jeová kontente ka lae se haʼu kontinua haree ida-neʼe?’ Neʼe ajuda haʼu atu foti desizaun neʼebé matenek.”

13. Saida mak bele ajuda ita halo desizaun neʼebé matenek?

¹³ Bainhira ita hamtaʼuk Jeová no lakohi halo nia laran-kanek, neʼe sei ajuda ita atu halo desizaun neʼebé matenek. “Hamtaʼuk Jeová mak hakat primeiru atu bele hetan matenek.” (Prov 9:10) Mai ita haree Provérbios 9:1-6 neʼebé esplika kona-ba feto ida neʼebé reprezenta “matenek neʼebé loos”.

14. Konvite saida mak ita lee iha Provérbios 9:1-6?

¹⁴ Lee Provérbios 9:1-6. Iha eskritura neʼe, ita lee kona-ba konvite ida husi Jeová, ita-nia Kriadór no Hun ba matenek hotu. (Prov 2:6; Rom 16:27) Ita  mós lee kona-ba uma boot neʼebé iha riin hitu. Neʼe hatudu katak Jeová mak laran-luak no nia konvida ita hotu atu aprende husi nia atu nuneʼe ita bele sai matenek.

15. Jeová konvida ita atu halo saida?

¹⁵ Jeová mak laran-luak no nia fó ita buat diʼak barak. Ita bele haree ida-neʼe husi ezemplu kona-ba feto neʼebé reprezenta “matenek neʼebé loos” iha Provérbios kapítulu 9. Versíkulu sira-neʼe konta katak feto neʼe konvida bainaka sira atu tama ba ninia uma no han naʼan no tua-uvas neʼebé nia prepara ona. (Prov 9:1, 2, nota.) Versíkulu 4 no 5 hatete: “Nia [katak matenek neʼebé loos] koʼalia ba ema neʼebé beik, hodi dehan: ‘Mai, han haʼu-nia paun.’” Tanbasá ita presiza simu konvite husi feto neʼebé matenek? Jeová hakarak ninia oan sira atu hetan matenek no sente seguru. Nia lakohi ita atu halo sala neʼebé lori susar ba ita. Tan neʼe mak “nia rai hela matenek ba ema neʼebé laran-loos”. (Prov 2:7) Bainhira ita hamtaʼuk Jeová, ita hakarak atu halo nia kontente, rona ba ninia konsellu no aplika ida-neʼe.​—Tgo 1:25.

16. Oinsá hamtaʼuk ba Maromak ajuda Alain halo desizaun matenek, no neʼe lori rezultadu saida?

¹⁶ Hanoin toʼok esperiénsia husi irmaun Alain neʼebé serbí nuʼudar katuas kongregasaun no hanorin nuʼudar profesór. Nia hamtaʼuk Maromak, no neʼe ajuda nia atu halo desizaun neʼebé matenek. Nia hatete: “Haʼu-nia kolega serbisu dehan katak la sala atu haree pornografia tanba neʼe bele eduka ita kona-ba buat seksuál.” Maibé Alain la konkorda. Nia hatete: “Tanba haʼu hamtaʼuk Jeová, haʼu lakohi haree pornografia. Haʼu mós esplika haʼu-nia razaun ba sira.” Irmaun Alain aplika konsellu husi “matenek neʼebé loos” atu bele kontinua “laʼo ba oin ho kbiit atu komprende”. (Prov 9:6) Alain nia desizaun book mestre balu atu estuda Bíblia no mós tuir reuniaun.

17-18. Ema sira neʼebé simu konvite husi “matenek neʼebé loos” hetan benefísiu saida, no sira hein namanas ba saida? (Haree mós dezeñu.)

¹⁷ Jeová uza ezemplu kona-ba feto naʼin-rua neʼe atu hatudu oinsá ita bele hetan futuru neʼebé diʼak. Ema neʼebé simu konvite husi “feto neʼebé beik” koko atu hetan ksolok husi hahalok la morál. Maibé sira la hatene katak buat neʼebé sira halo sei afeta sira-nia futuru. Sira-nia hahalok sei lori sira ba “rate laran neʼebé kleʼan”.​—Prov 9:13, 17, 18.

 ¹⁸ Maibé ema sira neʼebé simu konvite husi feto neʼebé reprezenta “matenek neʼebé loos” sei hetan futuru neʼebé diʼak. Sira kontente tanba sira hetan ai-han espirituál neʼebé sira presiza atu bele kontinua iha relasaun diʼak ho Jeová. (Isa 65:13) Liuhusi profeta Isaias, Jeová dehan: “Rona didiʼak ba haʼu, no han buat neʼebé diʼak, no imi sei hetan ksolok boot tanba han ai-han neʼebé diʼak liu.” (Isa 55:1, 2) Ita aprende atu gosta buat neʼebé Jeová gosta no odi buat neʼebé Jeová odi. (Sal 97:10) No ita kontente tanba bele konvida ema seluk atu aprende husi “matenek neʼebé loos”. Ita hanesan atan neʼebé hamriik “iha fatin aas sidade nian no bolu ho lian makaʼas, hodi dehan: ‘Ema naran deʼit neʼebé la iha esperiénsia, mai iha neʼe.’” Bainhira ita no ema seluk simu konvite husi matenek neʼebé loos, ita laʼós deʼit hetan benefísiu agora, maibé mós ba nafatin. Neʼe ajuda ita atu “moris” ba nafatin nuʼudar ita “laʼo ba oin ho kbiit atu komprende”.​—Prov 9:3, 4, 6.

19. Tuir Eclesiastes 12:13, 14, ita hakarak atu halo saida? (Haree mós kaixa “ Hamtaʼuk ba Maromak lori benefísiu mai ita”.)

¹⁹ Lee Eclesiastes 12:13, 14. Hamtaʼuk Maromak sei proteje ita no ajuda ita atu moos nafatin iha dalan morál no hakbesik ba Jeová durante loron ikus sira-neʼe. Hamtaʼuk ba Maromak mós sei book ita atu kontinua konvida ema barak liután atu buka “matenek neʼebé loos” no hetan benefísiu husi ida-neʼe.