1. Ita tenke halo saida atu hetan salvasaun iha Jeová nia loron?

 KUANDU Bíblia koʼalia kona-ba “Jeová nia loron”, neʼe refere ba tempu neʼebé Jeová tesi-lia ba ninia inimigu sira no salva ninia povu. Iha tempu uluk, Jeová fó-kastigu ba nasaun balu. (Isa 13:1, 6; Eze 13:5; Sof 1:8) Iha ita-nia tempu, “Jeová nia loron” komesa bainhira ulun-naʼin polítiku sira ataka Babilónia Boot no remata iha funu Armagedon. Atu hetan salvasaun iha “loron” neʼe, ita presiza prepara an agora. Jesus la dehan deʼit katak ita presiza prontu ba “terus boot”, maibé ita mós tenke “prontu nafatin” ba loron neʼe.​—Mt 24:21; Lc 12:40.

2. Oinsá ita bele hetan benefísiu husi Primeiru Tesalónika?

² Iha Paulo nia karta primeiru ba ema Kristaun iha Tesalónika, nia uza ai-knanoik oioin atu ajuda sira sai prontu nafatin ba Jeová nia loron tesi-lia nian. Paulo hatene katak Maromak nia loron seidauk mai iha tempu neʼebá. (2 Tes 2:1-3) Maski nuneʼe, nia anima irmaun-irmán sira atu prepara an ba loron neʼe hanesan loron neʼe sei mai aban, no ita mós bele halo tuir ninia konsellu neʼe. Ita sei buka-hatene ninia esplikasaun kona-ba (1) oinsá mak Jeová nia loron sei mai, (2) sé mak sei la hetan salvasaun iha loron neʼe, no (3) oinsá ita bele prepara an atu hetan salvasaun.

3. Oinsá mak Jeová nia loron mai hanesan naʼok-teen iha kalan? (Haree mós dezeñu.)

³ “Hanesan naʼok-teen iha kalan.” (1 Tes 5:2) Neʼe mak komparasaun primeiru husi komparasaun tolu neʼebé  esplika kona-ba oinsá Jeová nia loron sei toʼo mai. Baibain naʼok-teen sira naʼok durante kalan bainhira ema la espera katak sira sei mai. Jeová nia loron mós sei mai derrepente, no ema barak sei hakfodak. Karik ema Kristaun loos mós sei hakfodak. Maibé la hanesan ema aat sira, ita sei la lakon.

4. Iha dalan saida mak Jeová nia loron hanesan feto neʼebé sente moras tuur-ahi nian?

⁴ “Hanesan feto isin-rua neʼebé sente moras tuur-ahi nian.” (1 Tes 5:3) Feto neʼebé isin-rua la hatene ho loloos bainhira mak nia sei tuur-ahi. Maski nuneʼe nia fiar katak nia sei tuur-ahi duni. Bainhira tempu toʼo, neʼe sei akontese derrepente, nia sei sente moras tebes, no mós la iha buat ida mak bele hapara nia atu tuur-ahi. Nuneʼe mós, ita la hatene loron no oras neʼebé Jeová nia loron sei mai. Maski nuneʼe, ita fiar metin katak neʼe sei mai duni, no Maromak nia tesi-lia ba ema aat sira sei akontese derrepente no ema labele halai sees.

5. Iha dalan saida mak terus boot hanesan naroman iha dadeer-saan?

⁵ Hanesan naroman iha dadeer-saan. Paulo nia ai-knanoik terseiru temi tan kona-ba naʼok-teen neʼebé naʼok iha kalan. Maibé agora Paulo kompara Jeová nia loron ho naroman iha dadeer-saan. (1 Tes 5:4) Naʼok-teen neʼebé mai iha kalan karik okupadu tebes toʼo haluha oras. No tuirmai rai komesa naroman no ema bele kaer toman sira. Ohin loron, ema barak mós hanesan naʼok-teen neʼebé iha nakukun laran tanba kontinua halo buat neʼebé Jeová la gosta. Maibé terus boot neʼebé hanesan naroman dadeer nian sei hatudu sai ema sira-neʼe nia hahalok. La hanesan sira, ita bele sai prontu liuhusi la halo buat neʼebé Maromak odi no halo  fali “hahalok diʼak oioin, hahalok loos no lia-loos”. (Éf 5:8-12) Paulo mós fó sai ai-knanoik rua tan atu esplika kona-ba ema sira neʼebé sei la hetan salvasaun.

6. Iha dalan saida mak ema barak toba-dukur? (1 Tesalónika 5:6, 7)

⁶ “Ema sira neʼebé toba.” (Lee 1 Tesalónika 5:6, 7.) Paulo kompara ema neʼebé sei la hetan salvasaun iha Jeová nia loron ho ema neʼebé toba-dukur. Sira la hatene saida mak akontese iha sira-nia sorin-sorin ka la hatene tempu. Tan neʼe, sira la nota bainhira buat neʼebé importante akontese no sira la halo buat ida. Ohin loron, ema barak toba iha dalan espirituál. (Rom 11:8) Sira la fiar evidénsia neʼebé hatudu katak ita hela iha “loron ikus sira” no terus boot sei akontese lakleur tan. Bainhira mosu akontesimentu boot ida iha mundu, ema balu hatudu interese ba mensajen kona-ba Maromak nia Ukun. Maibé tuirmai duké hadeer nafatin, sira barak toba fali iha dalan espirituál. Ema balu neʼebé fiar kona-ba loron tesi-lia nian mós hanoin katak loron neʼe sei kleur. (2 Ped 3:3, 4) Maibé, ita rekoñese katak importante atu kontinua hadeer nafatin loron ba loron.

7. Tanbasá ema neʼebé Maromak sei halakon mak hanesan ho ema neʼebé lanu?

⁷ “Ema sira neʼebé lanu.” Apóstolu Paulo kompara ema sira neʼebé Maromak sei halakon ho ema neʼebé lanu. Baibain ema neʼebé lanu neineik atu halo buat ruma tuir situasaun neʼebé haleʼu sira, no sira halo desizaun neʼebé beik. Nuneʼe mós, ema neʼebé aat lakohi simu Maromak nia avizu. Sira hili atu laʼo iha dalan neʼebé sei lori sira ba mate. Maibé ema Kristaun simu avizu atu matan-moris nafatin no hanoin ho loloos. (1 Tes 5:6) Matenek-naʼin ida kona-ba Bíblia dehan katak ema neʼebé oin-moos mak ema neʼebé kalma nafatin no la pániku. Nia bele hanoin ho loloos atu bele halo desizaun neʼebé loos. Tanbasá ita presiza kalma nafatin no la pániku? Tanba neʼe ajuda ita atu la envolve an ho problema polítiku no sosiál iha mundu neʼe. Ita sei hetan presaun makaʼas liután atu la neutrál nafatin nuʼudar Jeová nia loron sai besik liután. Maski nuneʼe, ita la presiza laran-taridu kona-ba buat neʼebé ita sei halo. Maromak nia espíritu santu bele ajuda ita kalma nafatin no la pániku atu bele halo desizaun neʼebé matenek.​—Lc 12:11, 12.

8. 1 Tesalónika 5:8 esplika saida kona-ba hahalok neʼebé bele ajuda ita atu matan-moris nafatin no la pániku? (Haree mós dezeñu.)

⁸ “Tau . . . besi atu proteje ita-nia hirus-matan . . . no . . . kapasete.” Paulo kompara ita ho soldadu neʼebé matan-moris no hatais ona roupa funu nian. (Lee 1 Tesalónika 5:8.) Soldadu ida tenke prontu iha tempu hotu atu halo funu. Ita mós presiza kontinua sai prontu ba Jeová nia loron liuhusi tau fiar no domin nuʼudar besi neʼebé proteje ita-nia hirus-matan no esperansa nuʼudar ita-nia kapasete. Hahalok sira-neʼe bele ajuda ita.

9. Oinsá mak ita-nia fiar proteje ita?

⁹ Besi proteje soldadu nia hirus-matan. Fiar no domin proteje mós ita-nia laran. Hahalok sira-neʼe ajuda ita atu kontinua serbí Maromak no halo tuir Jesus. Fiar ajuda ita atu iha konfiansa katak Jeová sei fó kolen ba ita neʼebé buka nia ho laran tomak. (Ebr 11:6) Neʼe sei book ita atu nafatin laran-metin ba ita-nia Ulun-Naʼin Jesus  maski ita hasoru susar. Ita bele hametin ita-nia fiar atu bele tahan susar sira hodi aprende husi irmaun-irmán sira neʼebé nafatin laran-metin maski hasoru susar ekonomia ka ema kontra. Ita mós bele hasees an husi lasu kona-ba materializmu hodi banati-tuir irmaun-irmán sira neʼebé halaʼo moris simples atu bele tau uluk Maromak nia Ukun. b

10. Oinsá mak domin ba Maromak no domin ba ema ajuda ita tahan?

¹⁰ Domin mak importante atu kontinua matan-moris nafatin no la pániku. (Mt 22:37-39) Domin ba Maromak ajuda ita atu kontinua haklaken maski neʼe bele lori susar ruma ba ita. (2 Tim 1:7, 8) Tanba hadomi ema sira neʼebé seidauk serbí Jeová, ita kontinua haklaken ba sira, inklui husi karta no telefone. Ita iha esperansa katak loron ida sira sei halo mudansa no komesa halo buat neʼebé loos.​—Eze 18:27, 28.

11. Oinsá mak domin ba irmaun-irmán sira ajuda ita? (1 Tesalónika 5:11)

¹¹ Ita mós hadomi irmaun-irmán sira. Ita hatudu domin neʼe liuhusi “fó aten-brani ba malu no hametin malu”. (Lee 1 Tesalónika 5:11.) Hanesan soldadu neʼebé apoia malu durante funu, ita mós fó aten-brani ba malu. Dala ruma durante funu, soldadu ida la ho neon hakanek soldadu seluk, maski la iha intensaun atu halo ida-neʼe. Nuneʼe mós, ita lakohi hakanek irmaun-irmán sira ho neon ka selu aat fali ba sira. (1 Tes 5:13, 15) Ita mós hatudu domin hodi respeitu irmaun sira neʼebé tau matan ba kongregasaun. (1 Tes 5:12) Bainhira Paulo hakerek ninia karta, kongregasaun iha Tesalónika foin harii la toʼo tinan ida. Mane sira neʼebé tau matan kongregasaun karik ladún iha esperiénsia no halo sala oioin. Maski nuneʼe, sira merese atu hetan respeitu. Nuʼudar terus boot besik daudaun, karik ita sei hetan matadalan barak liután husi katuas sira. Karik ita sei lakon kontaktu  ho sede-jerál no sukursál. Tan neʼe importante atu aprende hatudu domin no respeitu ba katuas sira ohin loron. Mai ita kontinua matan-moris no la tau fokus ba sira-nia fraku, maibé tau fokus ba oinsá Jeová dirije sira liuhusi Kristu.

12. Oinsá mak esperansa proteje ita-nia hanoin?

¹² Hanesan kapasete proteje soldadu nia ulun, ita-nia esperansa proteje ita-nia hanoin. Tanba ita iha esperansa neʼebé metin, ita rekoñese katak buat neʼebé mundu oferese mak la iha folin. (Flp 3:8) Ita-nia esperansa ajuda ita atu kalma nafatin no la pániku. Irmaun Wallace no irmán Laurinda neʼebé serbí iha Áfrika sente nuneʼe duni. Iha semana tolu nia laran, Laurinda nia amá no Wallace nia apá mate. Sira labele fila fali ba sira-nia rai atu hamutuk ho sira-nia família tanba pandemia COVID-19. Wallace hakerek: “Esperansa kona-ba moris-hiʼas ajuda haʼu atu imajina loron primeiru neʼebé sira iha mundu foun, laʼós tempu ikus antes sira mate. Esperansa neʼe halo haʼu sente kalma bainhira haʼu triste tanba ema neʼebé haʼu hadomi mate.”

13. Ita bele halo saida atu simu espíritu santu?

¹³ “Keta hamate ahi husi espíritu.” (1 Tes 5:19, nota) Paulo kompara espíritu santu ho ahi neʼebé lakan iha ita-nia laran. Bainhira ita simu Maromak nia espíritu santu, ita sai laran-manas ba buat neʼebé loos no iha forsa atu halo Jeová nia serbisu. (Rom 12:11) Saida mak ita bele halo atu simu espíritu santu? Ita bele halo orasaun atu husu ida-neʼe, estuda Bíblia no mós sai parte ba Jeová nia organizasaun. Neʼe sei ajuda ita haburas hahalok neʼebé mai husi espíritu santu.​—Gal 5:22, 23.

14. Ita presiza hasees an husi saida atu bele kontinua simu Maromak nia espíritu santu? (Haree mós foto.)

¹⁴ Bainhira Maromak fó ninia espíritu santu ba ita, ita tenke kuidadu atu la “hamate ahi husi espíritu”. Maromak fó deʼit ninia espíritu santu ba ema neʼebé iha hanoin neʼebé moos no hahalok  moos. Nia sei la fó ninia espíritu santu ba ita se ita kontinua hanoin kona-ba buat neʼebé la moos no halo hahalok la moos. (1 Tes 4:7, 8) Atu kontinua simu espíritu santu, ita labele “hakribi profesia sira”. (1 Tes 5:20) Liafuan “profesia” iha eskritura neʼe refere ba mensajen neʼebé Maromak fó ba ita liuhusi ninia espíritu santu, inklui mensajen kona-ba Jeová nia loron no tanbasá ita-nia tempu mak urjente. Ita labele hanoin katak Jeová nia loron ka Armagedon sei la akontese iha ita-nia tempu. Duké halo nuneʼe, ita hatudu katak ita fiar loron neʼe sei mai lakleur tan, ka ita kontinua hanoin kona-ba neʼe hodi hatudu hahalok loos no mós ‘hatudu hahalok laran-metin ba Maromak’ loron ba loron.​—2 Ped 3:11, 12.

15. Oinsá atu la fiar ba informasaun falsu no propaganda husi anju aat sira? (1 Tesalónika 5:21)

¹⁵ Iha futuru, Maromak nia inimigu sira sei deklara: “Dame no hakmatek!” (1 Tes 5:3) Propaganda neʼebé mai husi anju aat sira sei habelar iha mundu tomak, no ema barak sei fiar ida-neʼe. (Apok 16:13, 14) Oinsá ho ita? Ita sei la fiar ida-neʼe se ita “buka-hatene uluk buat hotu se neʼe mak loos ka lae”. (Lee 1 Tesalónika 5:21.) Liafuan Gregu “buka-hatene” refere ba dalan neʼebé ema koko osan-mean no osan-mutin atu haree se neʼe tebes ka lae. Entaun ita tenke koko atu haree se buat neʼebé ita rona ka lee mak loos ka lae. Importante ba ema Kristaun iha Tesalónika iha tempu uluk atu halo ida-neʼe, no importante liután ba ita atu halo nuneʼe tanba terus boot besik daudaun ona. Duké tau fiar ba buat hotu neʼebé ema seluk hatete, uza ita-nia kbiit atu hanoin hodi kompara buat neʼebé ita lee ka rona ho buat neʼebé Bíblia no Jeová nia organizasaun fó sai. Hodi halo nuneʼe, ita sei la fiar ba lia-bosok ka propaganda husi anju aat sira.​—Prov 14:15; 1 Tim 4:1.

16. Ita iha esperansa saida, no ita hakarak halo saida?

¹⁶ Nuʼudar grupu, Maromak nia atan sei liu terus boot. Maibé ita ida-idak la hatene saida mak sei akontese aban-bainrua. (Tgo 4:14) Maski ita sei moris liu terus boot ka mate antes tempu neʼe, ita sei hetan moris ba nafatin se ita kontinua laran-metin. Kristu nia alin sira sei hamutuk ho Kristu iha lalehan. Bibi-malae seluk sei moris iha Paraízu iha rai. Mai ita hotu tau fokus ba ita-nia esperansa furak no kontinua sai prontu ba Jeová nia loron!