Durante Funu Mundiál Segundu, haʼu-nia inan-aman sai husi rai-Estónia no muda ba rai-Alemaña, no haʼu moris iha neʼebá. Depois neʼe, ami muda ba rai-Kanadá no hela besik sidade Ottawa. Ami kiak tebes no ami hela iha uma kiʼik hamutuk ho manu sira, maibé diʼak tanba ami bele han manu-tolun durante matabixu.

Loron ida, Testemuña ba Jeová vizita haʼu-nia amá no lee Apokalipse 21:3, 4. Neʼe kona tebes ninia laran no nia komesa tanis. Haʼu-nia inan-aman kontinua estuda Bíblia, no lakleur deʼit sira hetan batizmu.

Maski haʼu-nia inan-aman ladún hatene koʼalia língua Inglés, maibé sira laran-manas atu serbí Jeová. Semana-semana iha loron-sábadu, haʼu-nia apá lori haʼu no haʼu-nia alin-feto Sylvia bá haklaken maski nia serbisu makaʼas durante kalan tomak iha kompañia neʼebé halo besi iha Sudbury, Ontário. No semana-semana, ami-nia família mós estuda Livru Haklaken. Amá no apá ajuda haʼu atu hadomi Jeová. Neʼe book haʼu atu dedika an ba Jeová iha tinan 1956 kuandu haʼu tinan sanulu. Sira-nia domin ba Jeová anima haʼu atu kontinua serbí Jeová.

Depois remata eskola sekundária, haʼu ladún fokus atu serbí Jeová. Haʼu hanoin katak se haʼu sai pioneiru, haʼu labele hetan osan atu saʼe aviaun no vizita rai seluk. Haʼu hetan serbisu iha estasaun rádiu atu loke múzika no haʼu gosta serbisu neʼe. Maibé haʼu serbisu iha kalan, tan neʼe haʼu falta reuniaun beibeik no ransu ho ema neʼebé la hadomi Jeová. Maibé ikusmai haʼu-nia konxiénsia book haʼu atu halo mudansa.

Haʼu muda ba Oshawa iha Ontário. Iha neʼebá, haʼu hasoru Ray Norman, ninia alin-feto Lesli, no mós pioneiru seluk. Sira simu haʼu ho laran-diʼak. Kuandu haʼu haree katak sira kontente, neʼe book haʼu atu hanoin kona-ba haʼu-nia planu sira. Sira anima haʼu atu sai pioneiru, no haʼu sai pioneiru iha fulan-Setembru 1966. Haʼu kontente. Maibé haʼu la hatene katak lakleur tan haʼu-nia moris sei troka.

Uluk kuandu iha eskola sekundária, haʼu prenxe formuláriu atu serbí iha Betel Toronto,  Kanadá. Kuandu haʼu serbí nuʼudar pioneiru, haʼu hetan konvite atu serbí iha Betel durante tinan haat. Maibé haʼu gosta tebes Lesli, no haʼu taʼuk atu simu konvite neʼe tanba karik haʼu sei nunka hasoru fali nia. Depois halo tiha orasaun barak, haʼu deside atu serbí iha Betel maski haʼu triste tanba tenke fó adeus ba Lesli.

Iha Betel, haʼu-nia serbisu mak fase roupa no tuirmai haʼu sai sekretáriu. No Lesli serbí nuʼudar pioneiru espesiál iha Gatineau, Kebeke. Haʼu sempre hanoin kona-ba Lesli no duvida se haʼu halo ona desizaun neʼebé loos. Maibé buat ruma akontese no halo haʼu hakfodak. Lesli nia maun Ray mós tama Betel. Ami naʼin-rua hela iha kuartu ida. Tuirmai haʼu bele kontaktu malu fali ho Lesli. Ikusmai ami kaben iha 27 Fevereiru 1971 no neʼe mak haʼu-nia loron ikus iha Betel.

Haʼu no Lesli hetan knaar atu serbí iha kongregasaun língua Fransés iha Kebeke. Tinan balu liutiha, bainhira haʼu tinan 28, ami simu konvite atu serbí nuʼudar katuas área. Haʼu hanoin haʼu mak idade kiʼik liu no la iha esperiénsia. Maibé liafuan iha Jeremias 1:7, 8 anima haʼu. Iha tempu neʼebá, sempre susar ba Lesli atu toba no mós uluk nia hetan asidente karreta ba dala balu. Entaun ami sente susar atu simu konvite neʼe. Maski nuneʼe, Lesli hatete: “Se Jeová mak konvida ita atu halo buat ruma, ita tenke koko atu halo ida-neʼe.” Ami simu knaar neʼe no serbí nuʼudar katuas área durante tinan 17.

Haʼu okupadu tebes, no ladún gasta tempu ho Lesli. Haʼu aprende lisaun ida tan. Iha segunda dadeer, ema ruma dere ami-nia odamatan. Kuandu haʼu loke odamatan, ema la iha. Haʼu haree deʼit raga neʼebé nakonu ho ai-fuan, paun, tintu botir ida, kopu, hena meza no mós nota kiʼik ida neʼebé dehan: “Lori ó-nia feen ba piknik.” Loron neʼe mak furak no lalehan kór-azúl. Maski nuneʼe, haʼu esplika ba Lesli katak haʼu labele bá tanba presiza prepara diskursu. Nia konkorda, maibé sente triste uitoan. Bainhira haʼu tuur atu prepara diskursu, haʼu-nia konxiénsia fó-sala mai haʼu. Haʼu hanoin kona-ba Éfeso 5:25, 28 no liuhusi versíkulu sira-neʼe Jeová fó-hanoin haʼu atu hanoin haʼu-nia feen nia sentimentu. Depois halo tiha orasaun, haʼu hatete ba Lesli: “Mai ita bá.” Neʼe halo nia kontente. Ami saʼe karreta ba fatin furak ida besik mota. Neʼe mak loron neʼebé furak tebes iha ami-nia moris. Ikusmai haʼu konsege prepara haʼu-nia diskursu.

Ami kontente vizita kongregasaun sira iha provínsia Kolómbia Británika toʼo Terra Nova. Ikusmai haʼu realiza haʼu-nia mehi atu  halo viajen. Haʼu hanoin atu tuir Eskola Gilead, maibé haʼu lakohi sai misionáriu. Haʼu hanoin katak haʼu ladún matenek atu serbí nuʼudar misionáriu. No haʼu mós taʼuk katak ami sei hetan knaar iha Áfrika tanba iha moras no funu. Haʼu kontente ona moris iha Kanadá.

Iha tinan 1992, Testemuña hetan fali liberdade atu haklaken iha nasaun balu neʼebé uluk parte ba Uniaun Soviétika. Entaun irmaun sira husu ami atu sai misionáriu iha Estónia. Ami hakfodak, maibé ami halo orasaun kona-ba neʼe. No dala ida tan, ami hanoin: ‘Se Jeová mak konvida ita atu halo buat ruma, ita tenke koko atu halo ida-neʼe.’ Ami simu knaar neʼe no haʼu hanoin: ‘Diʼak tanba ami la bá Áfrika.’

Ami komesa kedas aprende língua Estonianu. Fulan balu liutiha, ami simu knaar nuʼudar katuas área. Ami vizita kongregasaun hamutuk 46 no grupu balu iha nasaun Báltiku tolu no mós vizita Kaliningradu, iha rai-Rúsia. Neʼe katak ami presiza aprende língua Letaun, Lituanu, no Rusu. No neʼe la fasil. Maski nuneʼe irmaun-irmán sira kontente tanba ami koko atu aprende sira-nia língua, no sira mós ajuda ami. Iha tinan 1999, sukursál harii iha Estónia, no haʼu hetan knaar atu serbí nuʼudar membru ba Komisaun ba Sukursál hamutuk ho Toomas Edur, Lembit Reile, no Tommi Kauko.

Ami koñese Testemuña barak neʼebé uluk tama komarka iha Sibéria. Maski ema trata aat sira no sira dook husi família, maibé sira la rai odi. Sira kontinua haksolok no laran-manas atu haklaken. Sira-nia ezemplu hanorin ami katak maski hasoru susar, ita nafatin bele tahan ho haksolok.

Durante tinan barak, ami ladún iha tempu deskansa, tan neʼe Lesli komesa sente kole demais. Ami la hatene katak neʼe mak sintoma husi moras ida naran fibromialgia. Ami hanoin atu fila fali ba Kanadá. Tuirmai ami hetan konvite atu tuir Eskola ba Membru Komisaun Sukursál iha Betel Patterson, Novaiorke, maibé ami duvida atu tuir ka lae. Depois halo tiha orasaun, ami simu konvite neʼe, no Jeová haraik bensaun ba ami-nia desizaun. Kuandu tuir eskola neʼe, Lesli mós konsulta ho doutór no hetan tratamentu. Rezultadu mak ami bele halaʼo fali ami-nia atividade hanesan baibain.

Kalan ida iha tinan 2008 iha Estónia, sede-jerál telefone haʼu no konvida ami atu serbí iha Kongu. Haʼu hakfodak, liuliu tanba haʼu presiza hatán iha loron tuirmai. Foufoun haʼu la hatete ba Lesli tanba neʼe sei halo nia la toba-dukur. Maibé, haʼu mak la toba-dukur. Haʼu halo orasaun kona-ba haʼu-nia laran-taridu atu bá Áfrika.

Loron tuirmai, haʼu fó-hatene Lesli, no ami hanoin: “Jeová mak konvida ita atu bá Áfrika.  Ita presiza koko lai atu bele hatene se ita gosta ka lae.” Entaun depois serbí iha Estónia durante tinan 16, ami muda ba Kinxasa, rai-Kongu. Sukursál iha Kongu iha jardín neʼebé furak no hakmatek tebes. Sasán primeiru neʼebé Lesli tau iha ami-nia kuartu mak karta ida neʼebé nia kontinua rai husi tempu neʼebé ami sai husi Kanadá. Iha karta neʼe hakerek: “Haksolok bá iha fatin naran deʼit neʼebé ó bá.” Ami haksolok liután bainhira ami hasoru irmaun-irmán sira, dirije estuda Bíblia no halaʼo ami-nia knaar nuʼudar misionáriu. Ami mós simu priviléjiu atu vizita sukursál 13 iha Áfrika. Neʼe fó oportunidade ba ami atu aprende kona-ba ema oioin. Haʼu la laran-taridu tan atu hela iha Áfrika. Ami agradese ba Jeová tanba haruka ami atu serbí iha Áfrika.

Iha Kongu, ami koko hahán oioin, inklui insetu sira neʼebé uluk ami nunka imajina atu han. Maibé kuandu haree irmaun-irmán sira gosta atu han ida-neʼe, ami koko no afinál ami mós gosta.

Ami vizita Kongu nia parte leste atu anima no mós fó ajuda ba irmaun-irmán sira. Iha fatin sira-neʼe, milísia sira ataka knua oioin no estraga feto no mós labarik sira. Kuaze irmaun-irmán hotu mak kiak. Maski nuneʼe sira kaer metin sira-nia esperansa ba moris-hiʼas, hadomi Jeová no mós laran-metin ba ninia organizasaun. Neʼe book tebes ami-nia laran. Sira-nia ezemplu ajuda ami atu hanoin kona-ba ami-nia razaun atu serbí Jeová no mós hametin ami-nia fiar. Irmaun-irmán balu hasoru susar tanba lakon sira-nia uma no mós toʼos. Neʼe fó-hanoin ami katak sasán bele lakon lalais, maibé ami-nia relasaun ho Jeová mak importante liu. Maski hasoru susar makaʼas, irmaun-irmán sira nunka muramura. Sira-nia hahalok anima ami atu tahan hasoru susar no problema saúde ho aten-brani.

Tuirmai ami hetan konvite atu muda ba sukursál Honkóng. Ami nunka hanoin atu hela iha Ázia. Tanba haree ona oinsá Jeová haraik  bensaun iha ami-nia knaar hotu, ami simu konvite neʼe. Maski la hatene saida mak ami sei hasoru tuirmai, iha tinan 2013, ami fó adeus ba ami-nia belun sira no sai husi Áfrika.

Hela iha Honkóng mak mudansa boot tanba sidade neʼe iha ema barak loos. La fasil mós atu aprende língua Kantonés. Maski nuneʼe irmaun-irmán sira simu ami ho laran-diʼak no ami gosta tebes hahán lokál. Serbisu iha sukursál kontinua aumenta, maibé folin ba uma no rai sai karun liu. Tan neʼe, Grupu Administradór faʼan fatin neʼebé uza nuʼudar sukursál. Lakleur iha tinan 2015, ami muda ba Koreia Súl, no ami nafatin serbí iha neʼebá. Ami presiza aprende língua foun, no maski ami seidauk bele koʼalia língua Koreanu ho moos, maibé irmaun-irmán sira anima ami hodi hatete katak ami-nia língua Koreanu sai diʼak liu.

La fasil atu hetan belun iha fatin foun, maibé hodi konvida ema oioin atu ransu ho ami, neʼe ajuda ami atu koñese lalais ema. Ami haree oinsá irmaun-irmán sira hatudu hahalok neʼebé hanesan, maski sira mai husi rai oioin. Ami mós komprende katak Jeová kria ita ho abilidade atu loke luan ita-nia laran no atu hatudu domin ba ema oioin.​—2 Kor 6:11.

Ami aprende atu haree ema tuir Jeová nia haree no haree evidénsia neʼebé hatudu katak Jeová hadomi ita no dirije ita. Bainhira ami sente laran-kraik ka hanoin barak kona-ba irmaun-irmán sira sei gosta ami ka lae, ami lee fali karta husi ami-nia belun sira. Ami haree ona oinsá Jeová hatán ami-nia orasaun, hadomi ami no fó kbiit ba ami atu tahan.

Haʼu no Lesli aprende katak importante atu gasta tempu hamutuk maski ami okupadu tebes. Ami mós aprende atu la sai sériu demais, liuliu bainhira ami koko atu aprende língua foun. Kalan-kalan, ami koko hanoin kona-ba buat neʼebé ami gosta no tuirmai ami fó agradese ba Jeová kona-ba neʼe.

Uluk haʼu hanoin katak haʼu nunka bele serbí nuʼudar misionáriu ka hela iha nasaun seluk. Maibé haʼu aprende katak ho Jeová nia ajuda, ita bele halo buat naran deʼit. Neʼe halo haʼu hanoin kona-ba profeta Jeremias nia liafuan: “Oh Jeová, Ita lohi ona haʼu.” (Jer 20:7) Jeová fó knaar oioin neʼebé halo ami hakfodak no fó bensaun furak oioin no mós realiza haʼu-nia mehi atu saʼe aviaun. Ami vizita fatin barak liu fali buat neʼebé haʼu imajina kuandu haʼu kiʼik. Ami vizita sukursál oioin iha nasaun barak. Haʼu mós agradese tebes tanba Lesli sempre apoia haʼu iha haʼu-nia knaar oioin.

Ami sempre hanoin-hetan katak ami halo knaar oioin tanba ami hadomi Jeová. Bensaun neʼebé ami hetan ona hatudu katak moris ba nafatin iha futuru sei furak tebes tanba Jeová sei ‘loke ninia liman no halo kontente kriatura hotu neʼebé moris hodi fó buat neʼebé sira hakarak’.​—Sal 145:16.