Bíblia la esplika tanbasá. Maibé Bíblia fó sai detalla neʼebé ajuda ita komprende tanbasá sira deside atu la fila fali kedas ba Nazaré.

Anju ida hatete ba Maria katak nia sei sai isin-rua no tuur-ahi. Bainhira anju hatoʼo mensajen neʼe, Maria no José hela iha Nazaré. Sidade neʼe iha Galileia. (Lc 1:26-31; 2:4) Ikusmai, bainhira sira fila husi rai-Ejitu, sira fila fali ba Nazaré. Jesus sai boot iha neʼebá no sai ema Nazaré. (Mt 2:19-23) Tan neʼe mak bainhira ita rona kona-ba Jesus, José no Maria, ita hanoin kedas kona-ba Nazaré.

Maria iha família ida naran Isabel neʼebé hela iha Judá. Isabel mak amlulik Zacarias nia feen no inan ba João Batista. (Lc 1:5, 9, 13, 36) Bainhira Maria isin-rua, nia vizita Isabel iha Judá no sira hela hamutuk durante fulan tolu. Tuirmai Maria fila fali ba Nazaré. (Lc 1:39, 40, 56) Tan neʼe mak Maria hatene didiʼak área Judá.

Tuirmai, governu Roma haruka ema hotu atu “tau naran” iha sira-nia sidade ida-idak, tan neʼe José ho Maria sai husi Nazaré no bá sidade Belein, “David nia sidade”. No tuir profesia, Mesias sei moris iha Belein. (Lc 2:3, 4; 1 Sam 17:15; 20:6; Miq 5:2) Depois Maria tuur-ahi, José la obriga Maria atu halo viajen dook ba Nazaré hamutuk bebé Jesus neʼebé nurak hela. Sira hela iha Belein neʼebé dook maizumenus kilómetru sia husi Jeruzalein. Neʼe halo fasil ba sira atu lori bebé Jesus ba templu no kumpre Moisés nia Ukun-Fuan kona-ba hasaʼe sakrifísiu.​—Lev 12:2, 6-8; Lc 2:22-24.

Maromak nia anju fó-hatene nanis ona ba Maria katak ninia oan-mane sei simu “David nia kadunan” no sei “ukun nuʼudar Liurai”. Karik José no Maria komprende katak importante duni atu Jesus moris iha David nia sidade. (Lc 1:32, 33; 2:11, 17) Karik sira hanoin katak diʼak liu atu kontinua hela iha Belein no hein toʼo Maromak fó tan matadalan ba sira.

Ita la hatene ho loloos kona-ba sira hela ona ba tempu hira iha Belein bainhira matenek-naʼin sira neʼebé estuda kona-ba fitun vizita sira. Maski nuneʼe iha tempu neʼebá, José nia família hela ona iha uma ida no Jesus laʼós tan bebé, tanba Bíblia bolu Jesus nuʼudar “labarik kiʼik”. (Mt 2:11) Haree hanesan sira hela kleur iha Belein.

Herodes haruka ninia atan sira atu oho “labarik-mane hotu neʼebé tinan rua ba kraik” neʼebé hela iha Belein. (Mt 2:16) Anju ida fó avizu ba José, tan neʼe José no Maria halai ba rai-Ejitu hamutuk ho Jesus no sira hela iha neʼebá toʼo Herodes mate. Tuirmai José lori ninia família ba Nazaré. Tanbasá sira la fila fali ba Belein? Tanba iha tempu neʼebá, Herodes nia oan-mane naran Arkelau mak ukun Judeia no nia mak mane neʼebé aat tebes no mós atu halo tuir anju nia avizu. Iha Nazaré, José bele haboot Jesus ho seguru atu adora Jeová.​—Mt 2:19-22; 13:55; Lc 2:39, 52.

Haree hanesan José mate antes Jesus loke dalan ba ema atu moris iha lalehan. Tan neʼe, José sei moris-hiʼas iha rai. Ema barak sei hasoru José no aprende buat barak liután husi nia kona-ba tanbasá nia no Maria hela nafatin iha Belein depois Jesus moris.