1-2. Tuir Salmo 25:14, saida mak ita tenke halo atu sai Jeová nia belun?

 HAHALOK saida mak ita presiza atu bele mantein ita-nia relasaun belun? Karik Ita hanoin kona-ba domin no apoia malu, maibé tuir eskritura tema ba lisaun neʼe, ema neʼebé hakarak habelun ho Jeová tenke hamtaʼuk nia. Tan neʼe hamtaʼuk mós hahalok neʼebé importante.​—Lee Salmo 25:14.

² Maski ita serbí Jeová ba tempu kleur ona, maibé ita hotu tenke nafatin hamtaʼuk ba nia. Entaun hamtaʼuk ba Maromak katak sá? Oinsá ita bele aprende atu hamtaʼuk ba Jeová? Ita bele aprende saida husi Obadias, Amlulik Boot Jeoada no Liurai Jeoas kona-ba hamtaʼuk ba Jeová?

3. Tanbasá ema balu halo tuir Maromak? Saida mak motiva ita atu halo nuneʼe?

³ Ema balu halo tuir Maromak tanba taʼuk atu hetan kastigu ka taʼuk katak Maromak sei hamosu problema ba sira. Maibé Maromak hakarak ita atu serbí nia tanba razaun neʼe ka lae? Lae. Duké sai taʼuk, Maromak hakarak ita atu hamtaʼuk nia, neʼe sei book ita atu la halo buat neʼebé bele estraga ita-nia relasaun diʼak ho nia.

4. Satanás hakarak ita atu sente oinsá kona-ba Jeová?

⁴ Satanás hakarak ema atu taʼuk ba Jeová. Satanás hakarak  ita fiar katak Jeová mak hirusdór, gosta atu kastigu ita no ita sei nunka bele halo nia kontente. (Job 4:18, 19) Satanás hakarak ita sente taʼuk ba Jeová toʼo para atu serbí nia. Tan neʼe, ita presiza haburas respeitu no hamtaʼuk ba Maromak.

5. Hamtaʼuk ba Maromak katak sá?

⁵ Hamtaʼuk ba Jeová katak ita hadomi nia, no taʼuk atu halo buat neʼebé bele estraga ita-nia relasaun diʼak ho nia. Jesus sente hanesan neʼe kona-ba ninia Aman. (Ebr 5:7) Duké sente taʼuk, Jesus haksolok hodi hamtaʼuk Jeová. (Isa 11:2, 3) Nia hadomi tebes Jeová no hakarak halo tuir nia. (João 14:21, 31) Hanesan Jesus, ita respeitu no hamtaʼuk ba Jeová tanba nia iha domin, matenek, justisa no kbiit neʼebé boot. Ita mós hatene katak Jeová hadomi tebes ita no nia interese atu haree oinsá ita halo tuir ninia matadalan sira. Se ita la halo tuir Jeová, nia sei sente laran-kanek, maibé se ita halo tuir nia, ita sei halo nia laran-kontente.​—Sal 78:41; Prov 27:11.

6. Oinsá ita bele aprende atu hamtaʼuk Maromak? (Salmo 34:11)

⁶ Ita tenke aprende atu hamtaʼuk ba Maromak tanba neʼe la mosu mesak deʼit. (Lee Salmo 34:11.) Dalan ida mak hodi haree didiʼak ba kriasaun sira. Bainhira ita haree oinsá Jeová nia kriasaun sira haleno ninia matenek, kbiit no domin neʼebé boot mai ita, ita sei respeitu no hadomi nia liután. (Rom 1:20) Irmán ida naran Adrienne hatete: “Haʼu admira ho Jeová nia kriasaun tanba fó sai ninia matenek. Haʼu komprende katak nia hatene buat neʼebé diʼak liu mai haʼu.” Tanba Adrienne medita beibeik kona-ba neʼe, nia hatete: “Haʼu lakohi halo buat neʼebé bele estraga haʼu-nia relasaun ho Jeová, Ida neʼebé fó moris mai haʼu.” Oinsá ho Ita? Ita bele koko uza tempu uitoan iha semana neʼe atu hanoin kona-ba Jeová nia kriasaun ruma ka lae? Neʼe sei ajuda Ita respeitu no hadomi liután nia.​—Sal 111:2, 3.

7. Oinsá orasaun bele ajuda ita atu hamtaʼuk ba Jeová?

⁷ Ita mós bele aprende atu hamtaʼuk Jeová liuhusi halo orasaun beibeik. Dala ida-idak ita halo orasaun ba Jeová, ita koñese nia diʼak liután. Porezemplu, bainhira ita husu Jeová atu fó forsa ba ita atu tahan, ka fó obrigadu ba ninia Oan nia sakrifísiu, ka husu ajuda kona-ba problema ruma, neʼe fó-hanoin ita katak nia iha forsa neʼebé boot, hadomi tebes ita, no mós matenek tebes. Orasaun sira hanesan neʼe halo ita respeitu liután Jeová no ita sei hakaʼas an atu la halo buat ida neʼebé bele estraga ita-nia relasaun ho nia.

8. Ita bele halo saida atu nafatin hamtaʼuk ba Maromak?

⁸ Ita bele nafatin hamtaʼuk Maromak liuhusi estuda Bíblia ho objetivu atu aprende husi ezemplu neʼebé diʼak no aat. Mai ita koʼalia kona-ba mane naʼin-rua neʼebé laran-metin ba Jeová. Neʼe mak Liurai Acab nia atan Obadias no Amlulik Boot Jeoada. Depois neʼe, ita mós sei aprende husi Liurai Jeoas husi Judá neʼebé foufoun laran-metin, maibé ikusmai husik Jeová.

9. Oinsá hamtaʼuk ba Jeová ajuda Obadias? (1 Reis 18:3, 12)

⁹ Bíblia koʼalia dala primeiru kona-ba Obadias b hodi hatete: “Obadias mak ema neʼebé hamtaʼuk tebes Jeová.” (Lee 1 Reis 18:3, 12.) Oinsá mak hamtaʼuk ba Jeová ajuda Obadias? Neʼe ajuda nia atu onestu no ema seluk bele tau fiar ba nia. Tan neʼe liurai fó knaar ba nia atu tau matan ba liurai nia umakain. (Kompara ho Neemias 7:2.) Hamtaʼuk ba Maromak mós ajuda Obadias atu sai aten-brani. Nia presiza tebes hahalok neʼe tanba nia moris iha tempu neʼebé Liurai Acab mak ukun. Liurai Acab ‘halo buat neʼebé aat tebes iha Jeová nia haree no nia aat liu fali liurai sira hotu antes nia’. (1 Reis 16:30) No Acab nia feen Jezabel neʼebé adora Baal odi tebes Jeová no koko atu halakon adorasaun neʼebé loos husi Izraél parte norte. Nia mós oho Jeová nia profeta barak. (1 Reis 18:4) Klaru katak Obadias adora Jeová iha tempu neʼebé susar.

10. Oinsá mak Obadias hatudu aten-brani?

¹⁰ Oinsá mak Obadias hatudu aten-brani? Bainhira Jezabel buka atu oho Maromak nia profeta sira, Obadias subar Jeová nia profeta naʼin-100. ‘Nia subar sira naʼin limanulu-limanulu iha fatuk-kuak no nia fó nafatin paun no bee ba sira.’ (1 Reis 18:13, 14) Se Jezabel hatene buat neʼebé Obadias halo, nia sei oho duni Obadias. Klaru katak Obadias sente taʼuk no lakohi atu mate, maibé nia hadomi Jeová no ema sira neʼebé serbí Jeová duké hadomi ninia moris rasik.

11. Oinsá Jeová nia atan sira ohin loron hatudu hahalok hanesan Obadias? (Haree mós foto.)

¹¹ Ohin loron, Jeová nia atan barak adora Jeová iha rai sira neʼebé bandu serbisu haklaken. Sira hatudu respeitu ba ukun-naʼin sira, maibé hanesan Obadias, sira laran-metin deʼit ba Jeová. (Mt 22:21) Sira hatudu katak sira hamtaʼuk Maromak hodi halo  tuir deʼit nia duké ema. (Após 5:29) Sira kontinua haklaken no halaʼo reuniaun subasubar. (Mt 10:16, 28) Sira hakarak irmaun-irmán sira hetan hahán espirituál neʼebé sira presiza. Hanoin toʼok ezemplu husi irmaun Henri. Nia hela iha rai ida iha Áfrika neʼebé bandu serbisu haklaken. Durante tempu neʼe, nia ajuda fahe ita-nia publikasaun sira ba irmaun-irmán sira. Nia hatete: “Haʼu mak moedór, maibé haʼu fiar katak hamtaʼuk ba Jeová halo haʼu aten-brani.” Ita bele hatudu aten-brani hanesan irmaun Henri ka lae? Bele duni se ita hamtaʼuk ba Jeová.

12. Oinsá Amlulik Boot Jeoada no ninia feen hatudu laran-metin ba Jeová?

¹² Amlulik Boot Jeoada hamtaʼuk Jeová no neʼe book nia atu laran-metin no apoia adorasaun loos. Nia halo ida-neʼe iha tempu neʼebé Jezabel nia oan-feto Atalia hadau pozisaun nuʼudar liurai iha Judá. Povu sira taʼuk tebes Atalia. Nia laran-aat no kaan podér, tan neʼe nia koko atu oho liurai nia jerasaun hotu, katak ninia bei-oan rasik. (2 Krón 22:10, 11) Maibé ninia bei-oan ida naran Jeoas la mate tanba Jeoada nia feen Jeosabeat salva Jeoas. Jeosabeat no ninia laʼen subar Jeoas neʼebé kiʼik no tau matan ba nia. Hodi halo nuneʼe, sira ajuda proteje David nia liña jerasaun neʼebé sei ukun nuʼudar liurai. Jeoada laran-metin ba Jeová no la taʼuk Atalia.​—Prov 29:25.

13. Bainhira Jeoas tinan hitu, oinsá mak Jeoada hatudu laran-metin dala ida tan?

¹³ Bainhira Jeoas tinan hitu, Jeoada hatudu laran-metin ba Jeová dala ida tan. Nia halo planu ida. Se planu neʼe susesu, Jeoas sei sai liurai, tanba nia mak iha direitu atu tuur iha David nia kadunan. Maibé se planu neʼe la susesu, karik Jeoada bele mate. Ho Jeová nia bensaun, Jeoada nia planu hetan susesu. Jeoada halo Jeoas sai liurai no mós oho Atalia. Xefe no ema Levi sira mós apoia nia. (2 Krón 23:1-5, 11, 12, 15; 24:1) Tuirmai Jeoada “halo aliansa entre Jeová ho liurai no ho povu, katak sira sei kontinua sai Jeová nia povu”. (2 Reis 11:17) Jeoada mós “haruka guarda sira atu hein portaun iha Jeová nia uma, atu nuneʼe ema hotu neʼebé la moos labele tama”.​—2 Krón 23:19.

14. Jeoada hetan bensaun saida deʼit tanba hatudu respeitu ba Jeová?

¹⁴ Jeová dehan: “Sira neʼebé hatudu respeitu ba haʼu, haʼu sei respeitu sira.” Jeová fó duni bensaun ba Jeoada. (1 Sam 2:30) Bensaun ida mak Jeová tau Jeoada nia istória iha Bíblia laran, no ohin loron ita bele aprende husi ninia ezemplu. (Rom 15:4) No bainhira Jeoada mate, ema “hakoi nia iha David nia Sidade hamutuk ho liurai sira, tanba buat diʼak hotu neʼebé nia halo ona ba povu Izraél, ba Maromak neʼebé loos no ba Ninia uma”.​—2 Krón 24:15, 16.

15. Ita bele aprende saida husi istória kona-ba Jeoada? (Haree mós foto.)

¹⁵ Istória kona-ba Jeoada ajuda ita hotu atu hamtaʼuk ba Maromak Jeová. Katuas kongregasaun sira bele banati-tuir Jeoada hodi kontinua matan-moris no proteje Maromak nia bibi. (Após 20:28) Ferik-katuas sira bele aprende katak Jeová sei ajuda sira atu kumpre  ninia hakarak se sira hamtaʼuk no laran-metin ba Jeová. Jeová hafolin tebes sira. Joven sira bele banati-tuir dalan neʼebé Jeová hafolin no respeitu Jeoada hodi hafolin no respeitu ferik-katuas sira, liuliu sira neʼebé serbí Jeová ho laran-metin ba tempu kleur. (Prov 16:31) Ikusliu, ita hotu bele aprende husi xefe no ema Levi sira neʼebé apoia Jeoada. Mai ita hotu apoia ‘sira neʼebé dirije ita’ liuhusi halo tuir sira.​—Ebr 13:17.

16. Saida mak hatudu katak Jeoas la hamtaʼuk Maromak?

¹⁶ Jeoada ajuda Liurai Jeoas atu sai ema neʼebé diʼak. (2 Reis 12:2) Entaun bainhira Jeoas sei joven, nia hakarak halo Jeová kontente. Maibé bainhira Jeoada mate, Jeoas rona ba ulun-naʼin sira neʼebé la halo tuir Jeová. Neʼe lori rezultadu saida? Jeoas no ninia povu “komesa serbí fali ai-riin lulik no estátua sira”. (2 Krón 24:4, 17, 18) Jeová sente laran-triste no nia “kontinua haruka profeta sira atu ajuda sira fila fali ba nia . . . , maibé sira lakohi rona”. Sira mós lakohi rona ba Jeoada nia oan-mane naran Zacarias neʼebé serbí nuʼudar Jeová nia profeta no amlulik. Tuir loloos, Liurai Jeoas haruka ema atu oho ninia primu Zacarias, maski uluk Zacarias nia família mak ajuda Jeoas atu kontinua moris.​—2 Krón 22:11; 24:19-22.

17. Ikusmai Jeoas hetan rezultadu saida?

 ¹⁷ Tanba Jeoas la kontinua hamtaʼuk ba Jeová, nia hetan rezultadu aat. Jeová hatete ona: “Sira neʼebé hakribi haʼu, haʼu mós sei hakribi sira.” (1 Sam 2:30) Tropa Síria neʼebé uitoan deʼit manán Jeoas nia tropa “neʼebé barak tebes” no Jeoas “hetan kanek todan”. Depois tropa Síria sai husi fatin neʼe, Jeoas nia atan rasik oho nia tanba uluk nia oho Zacarias. Povu hanoin katak liurai Jeoas mak aat tebes no la merese atu hakoi iha “fatin neʼebé liurai sira hakoi bá”.​—2 Krón 24:23-25.

18. Tuir Jeremias 17:7, 8, saida mak ita bele halo atu la sai hanesan Jeoas?

¹⁸ Saida mak ita bele aprende husi Jeoas? Nia hanesan ai-hun ho abut neʼebé la tama kleʼan ba rai no presiza ai seluk atu satan netik. Jeoada mak hanesan ai neʼebé satan netik Jeoas. Bainhira Jeoada mate, Jeoas komesa hetan influénsia husi ema neʼebé la adora Jeová. No ikusmai nia monu, katak la laran-metin ba Jeová. Ninia ezemplu hatudu katak ita labele halo tuir Maromak tan deʼit ita-nia família ka ema seluk hatudu ezemplu diʼak mai ita. Atu bele hakbesik nafatin ba Jeová, ita rasik tenke hametin ita-nia domin no hamtaʼuk ba Jeová liuhusi estuda, medita no halo orasaun beibeik.​—Lee Jeremias 17:7, 8; Kol 2:6, 7.

19. Saida mak Jeová husu ita atu halo?

¹⁹ Jeová la husu buat barak husi ita. Buat neʼebé Jeová haruka ita atu halo mak fó sai iha Eclesiastes 12:13 neʼebé dehan: “Hamtaʼuk Maromak loos no halo tuir ninia mandamentu bá, tanba neʼe mak ema nia obrigasaun.” Bainhira ita hamtaʼuk Maromak, ita sei hamriik metin hanesan Obadias no Jeoada. La iha buat ida mak bele estraga ita-nia relasaun diʼak ho Jeová.