1-2. Esplika toʼok oinsá mak Bíblia nia prinsípiu ruma bele sai importante liután ba ita bainhira ita-nia situasaun troka.

 IHA loron kazamentu, noivu no noiva rona didiʼak ba diskursu neʼebé bazeia ba Bíblia kona-ba moris kaben nian. Sira hatene ona prinsípiu neʼebé fó sai iha diskursu neʼe. Maibé agora prinsípiu sira-neʼe sai importante liután ba sira. Tanbasá? Tanba sira sei aplika prinsípiu sira-neʼe iha sira-nia moris kaben nian.

² Nuneʼe mós kuandu feen-laʼen iha oan. Durante tinan barak, sira rona ona diskursu oioin kona-ba haboot oan. Maibé agora prinsípiu sira-neʼe importante liután ba sira. Agora sira presiza haboot sira-nia oan. Neʼe mak responsabilidade neʼebé boot tebes. Entaun, bainhira ita-nia situasaun troka, prinsípiu balu sai importante liután ba ita. Tan neʼe mak Jeová nia atan sira lee no medita kona-ba Eskritura sira “durante loron hotu” iha sira-nia moris hanesan liurai sira iha Izraél antigu.​—Deut 17:19.

3. Iha lisaun neʼe, ita sei koʼalia kona-ba saida?

³ Inan-aman sira, Ita iha priviléjiu espesiál atu hanorin Ita-nia oan sira kona-ba Jeová. Maibé la toʼo atu hanorin deʼit faktu kona-ba Maromak. Ita hakarak ajuda Ita-nia oan atu hadomi tebes Jeová. Oinsá Ita bele halo ida-neʼe? Iha lisaun neʼe, ita sei aprende Bíblia nia prinsípiu haat neʼebé bele ajuda inan-aman sira. (2 Tim 3:16) Ita mós sei  aprende oinsá inan-aman Kristaun balu hetan benefísiu tanba aplika Bíblia nia konsellu.

4. Inan-aman bele halo tuir prinsípiu saida atu ajuda sira-nia oan haburas domin ba Jeová? (Tiago 1:5)

⁴ Prinsípiu 1: Buka Jeová nia matadalan. Husu Jeová atu fó matenek neʼebé Ita presiza atu ajuda Ita-nia oan haburas domin ba Jeová. (Lee Tiago 1:5.) Jeová mak matenek liu atu fó konsellu. Iha razaun oioin tanbasá. Mai ita hanoin kona-ba razaun rua. Primeiru, Jeová iha esperiénsia barak liu nuʼudar aman. (Sal 36:9) Segundu, ninia matadalan neʼebé matenek sempre lori benefísiu.​—Isa 48:17.

5. (a) Saida mak Jeová nia organizasaun fó atu ajuda inan-aman sira? (b) Hanesan fó sai iha vídeo, saida mak Ita bele aprende husi irmaun Abilio no irmán Ulla kona-ba haboot oan sira?

⁵ Liuhusi Jeová nia Liafuan no ninia organizasaun, nia fó ai-han espirituál barak neʼebé bele ajuda Ita haboot Ita-nia oan atu hadomi Jeová. (Mt 24:45) Porezemplu, Ita bele hetan matadalan diʼak husi série “Ajuda ba família” neʼebé uluk fó sai iha revista Matan-moris bá!, maibé agora Ita bele hetan iha Ita-nia website. Iha jw.org, Ita bele hetan vídeo barak, no neʼe bele ajuda Ita atu aplika Jeová nia matadalan nuʼudar Ita haboot oan sira. *​—Prov 2:4-6.

6. Irmaun Joe no ninia feen sente oinsá kona-ba matadalan husi Jeová nia organizasaun?

⁶ Inan-aman barak fó sai katak sira agradese tebes ba ajuda neʼebé Jeová fó liuhusi ninia organizasaun. Aman ida naran Joe hatete: “La fasil atu haboot oan naʼin-tolu iha lia-loos. Haʼu no haʼu-nia feen sempre halo orasaun ba Jeová atu husu ajuda. Dala barak, Jeová nia organizasaun fó sai informasaun ka vídeo iha tempu neʼebé loos no neʼe ajuda ami hadiʼa problema neʼebé ami hasoru daudaun. Ami sempre sadere ba Jeová nia matadalan.” Irmaun Joe no ninia feen sente katak informasaun no vídeo  sira ajuda tebes sira-nia oan atu hakbesik ba Jeová.

7. Tanbasá inan-aman presiza hakaʼas an atu hatudu ezemplu diʼak? (Roma 2:21)

⁷ Prinsípiu 2: Hanorin liuhusi Ita-nia ezemplu. Oan sira haree didiʼak ba inan-aman nia hahalok no dala barak banati-tuir sira. Klaru katak, la iha inan-aman ida mak perfeitu. (Rom 3:23) Maski nuneʼe, inan-aman neʼebé matenek hakaʼas an atu hatudu ezemplu diʼak ba sira-nia oan. (Lee Roma 2:21.) Aman ida koʼalia kona-ba labarik sira hodi dehan: “Sira hanesan esponja neʼebé xupa buat hotu.” Nia hatutan tan: “Ita-nia oan sei hasé ita kuandu ita-nia hahalok la tuir buat neʼebé ita hanorin ba sira.” Tan neʼe, se ita hakarak ita-nia oan hadomi Jeová, ita mós tenke hametin ita-nia domin ba Jeová no mós hatudu neʼe liuhusi ita-nia hahalok.

8-9. Saida mak Ita bele aprende husi Andrew no Emma nia inan-aman?

⁸ Iha dalan oioin ba inan-aman atu hanorin sira-nia oan hadomi Jeová. Irmaun Andrew neʼebé tinan 17 hatete: “Haʼu-nia inan-aman sempre fó-hanoin haʼu katak importante atu halo orasaun. Kalan-kalan, apá halo orasaun ho haʼu maski haʼu halo ona orasaun mesak. Apá no amá sempre fó-hanoin ami: ‘Imi bele koʼalia ba Jeová dala barak iha loron ida.’ Ida-neʼe ajuda haʼu atu haree orasaun nuʼudar buat neʼebé importante. Agora fasil deʼit ba haʼu atu halo orasaun ba Jeová no sente katak Jeová mak Aman neʼebé hadomi haʼu.” Inan-aman sira, hanoin-hetan katak Ita-nia domin ba Jeová bele ajuda Ita-nia oan atu hadomi Jeová.

⁹ Hanoin toʼok kona-ba irmán Emma nia ezemplu. Irmán Emma nia apá husik hela ninia família no mós husik hela debe ba ninia amá. Irmán Emma hatete: “Dala barak amá la iha osan, maibé nia sempre koʼalia kona-ba oinsá Jeová tau matan ba ninia atan sira. Haʼu bele haree liuhusi dalan neʼebé amá halaʼo ninia moris katak nia fiar duni ida-neʼe. Amá aplika buat neʼebé nia hanorin mai haʼu.” Ita aprende saida? Inan-aman bele hanorin oan sira liuhusi sira-nia ezemplu maski hasoru situasaun neʼebé susar.​—Gal 6:9.

10. Inan-aman iha Izraél antigu iha oportunidade saida deʼit atu koʼalia ho sira-nia oan? (Deuteronómio 6:6, 7)

¹⁰ Prinsípiu 3: Koʼalia beibeik ho Ita-nia oan. Jeová haruka ema Izraél antigu atu hanorin beibeik sira-nia oan kona-ba nia. (Lee Deuteronómio 6:6, 7.) Iha tempu neʼebá, inan-aman iha oportunidade barak iha loron ida nia laran atu koʼalia ba sira-nia oan no hanorin sira-nia oan atu hadomi Jeová. Porezemplu, iha Izraél antigu, labarik-mane sira uza oras barak atu ajuda sira-nia aman kuda fini ka koʼa ida-neʼe. Labarik-feto sira uza oras barak iha loron ida nia laran atu ajuda sira-nia inan atu suku roupa no mós halo serbisu seluk iha uma-laran. Bainhira inan-aman sira serbisu hamutuk ho sira-nia oan, sira bele koʼalia kona-ba tópiku importante oioin. Porezemplu, sira bele koʼalia kona-ba Jeová nia hahalok diʼak no hanoin kona-ba oinsá Jeová ajuda sira-nia família.

11. Bainhira mak tempu diʼak atu inan-aman koʼalia ho sira-nia oan?

¹¹ Ohin loron la hanesan neʼe. Iha rai barak, inan-aman no oan sira labele gasta tempu barak hamutuk durante loron.  Karik inan-aman bá serbisu no oan sira bá eskola. Tan neʼe, inan-aman presiza buka tempu atu koʼalia ho sira-nia oan. (Éf 5:15, 16; Flp 1:10) Dalan ida atu halo nuneʼe mak durante adorasaun família. Irmaun joven ida naran Alexander hatete: “Haʼu-nia apá sempre halaʼo adorasaun família nian, no la husik buat ida atu hanetik ami halibur hamutuk. Depois estuda, baibain ami koʼalia halimar hamutuk.”

12. Ulun ba família presiza hanoin-hetan saida durante adorasaun família?

¹² Se Ita mak ulun ba família, saida mak Ita bele halo atu Ita-nia oan gosta adorasaun família? Karik Ita bele estuda livru foun Moris Haksolok ba Nafatin hamutuk ho Ita-nia oan. Livru neʼe bele ajuda Ita atu koʼalia ba malu. Ita hakarak Ita-nia oan atu koʼalia sai ninia sentimentu no laran-susar, tan neʼe keta uza tempu adorasaun família nian atu fó konsellu ka korrije Ita-nia oan. Bainhira Ita-nia oan fó sai buat ruma neʼebé la tuir Bíblia nia prinsípiu, hakaʼas an atu la sai hirus. Duké halo nuneʼe, gaba nia tanba nia fó sai ona ninia sentimentu no mós anima nia atu la taʼuk fó sai ninia hanoin. Ita bele ajuda Ita-nia oan iha dalan neʼebé diʼak liu bainhira Ita hatene saida mak nia sente.

13. Inan-aman sira iha oportunidade saida tan atu ajuda sira-nia oan hakbesik ba Jeová?

¹³ Inan-aman sira, buka oportunidade iha loron ida-idak nia laran atu ajuda Ita-nia oan hakbesik ba Jeová. Ita la presiza hein toʼo tempu neʼebé Ita estuda Bíblia hamutuk mak foin hanorin sira kona-ba Jeová. Inan ida naran Lisa hatete: “Ami haree ba kriasaun sira neʼebé haleʼu ami atu hanorin ami-nia oan kona-ba Jeová. Porezemplu, kuandu ami-nia asu halo buat komik neʼebé halo sira hamnasa, ami esplika katak neʼe hatudu oinsá ita-nia Kriadór mós gosta halo komik no hakarak ita atu moris kontente.”

14. Tanbasá importante atu inan-aman ajuda sira-nia oan hili belun neʼebé diʼak? (Provérbios 13:20)

¹⁴ Prinsípiu 4: Ajuda Ita-nia oan atu iha belun neʼebé diʼak. Bíblia hatudu ho  klaru katak belun sira bele fó influénsia diʼak ka la diʼak ba ita. (Lee Provérbios 13:20.) Inan-aman sira, Ita koñese Ita-nia oan nia belun sira ka lae? Ita hasoru ona sira no gasta tempu hamutuk ho sira ka lae? Oinsá Ita bele ajuda Ita-nia oan atu habelun ho ema sira neʼebé hadomi Jeová? (1 Kor 15:33) Ita bele ajuda Ita-nia oan atu hetan belun neʼebé diʼak, liuhusi konvida irmaun-irmán sira neʼebé iha relasaun diʼak ho Jeová atu ransu hamutuk ho Ita-nia família.​—Sal 119:63.

15. Oinsá inan-aman bele ajuda sira-nia oan atu iha belun neʼebé diʼak?

¹⁵ Hanoin kona-ba esperiénsia husi aman ida naran Tony. Nia esplika kona-ba oinsá nia no ninia feen ajuda sira-nia oan atu iha belun neʼebé diʼak. Nia hatete: “Durante tinan barak, haʼu no haʼu-nia feen konvida irmaun-irmán ho idade oioin no situasaun moris la hanesan atu mai ami-nia uma. Sira han hamutuk ho ami no tuir ami-nia adorasaun família. Neʼe mak dalan neʼebé diʼak atu koñese ema neʼebé hadomi Jeová no serbí Jeová ho kontente. Ami konvida katuas área, misionáriu sira no irmaun-irmán seluk atu hela iha ami-nia uma. Sira-nia esperiénsia, sira-nia laran-manas no sakrifísiu neʼebé sira halo, fó impaktu boot ba ami-nia oan no ajuda sira hakbesik liután ba Jeová.” Inan-aman, hakaʼas an atu ajuda Ita-nia oan atu iha belun neʼebé diʼak.

16. Oinsá se Ita-nia oan lakohi serbí Jeová?

¹⁶ Oinsá se Ita hakaʼas an ona, maibé Ita-nia oan ida dehan katak nia lakohi serbí Jeová? Keta hanoin katak Ita falla nuʼudar inan ka aman. Jeová fó ba ita hotu, inklui ita-nia oan, liberdade atu hili. Se Ita-nia oan deside katak nia lakohi serbí Jeová, keta lakon esperansa katak loron ida nia sei serbí fali Jeová. Hanoin-hetan ai-knanoik kona-ba oan-mane neʼebé sai husi uma. (Lc 15:11-19, 22-24) Mane joven neʼe halo buat oioin neʼebé la diʼak. Maibé ikusmai nia fila  fali. Karik ema balu dehan: “Neʼe mak ai-knanoik deʼit. Neʼe bele akontese duni ka lae?” Sin, bele akontese duni. Neʼe akontese ba irmaun joven ida naran Elie.

17. Oinsá Elie nia esperiénsia anima Ita?

¹⁷ Irmaun Elie hatete kona-ba ninia inan-aman: “Haʼu-nia inan-aman mak Testemuña ba Jeová no sira hakaʼas an atu ajuda haʼu hadomi Jeová no hafolin ninia Liafuan Bíblia. Maibé iha haʼu-nia tempu foin-saʼe haʼu komesa kontra sira.” Elie komesa moris ho oin rua. Ninia inan-aman hakaʼas an atu ajuda nia hakbesik ba Jeová, maibé nia lakohi rona ba sira. Nia sai husi uma, no komesa halo hahalok aat oioin. Maski nuneʼe, dala ruma nia koʼalia kona-ba Bíblia ho ninia belun ida. Elie hatete: “Bainhira haʼu koʼalia beibeik ho haʼu-nia belun kona-ba Jeová, haʼu mós hanoin beibeik kona-ba Jeová. Neineik-neineik fini lia-loos neʼebé uluk haʼu-nia inan-aman kuda iha haʼu-nia laran komesa moris.” Ikusmai, Elie fila fali ba lia-loos. * Ninia inan-aman kontente tebes tanba hakaʼas an atu hanorin nia husi kiʼik kedas atu hadomi Jeová.​—2 Tim 3:14, 15.

18. Ita sente oinsá kona-ba inan-aman sira neʼebé hakaʼas an atu hanorin sira-nia oan hadomi Jeová?

¹⁸ Inan-aman sira, imi iha priviléjiu boot atu haboot jerasaun foun neʼebé sei adora Jeová (Sal 78:4-6) Neʼe la fasil. Ami gaba imi husi laran tanba imi hakaʼas an atu ajuda imi-nia oan. Se imi kontinua hakaʼas an atu ajuda imi-nia oan hadomi Jeová no haboot sira tuir dixiplina no matadalan husi Jeová, imi bele fiar katak ita-nia Aman iha lalehan sei kontente tebes ho imi.​—Éf 6:4.