1-2. Saida mak razaun ida tanbasá ita hakarak estuda livru Apokalipse?

 IMAJINA toʼok se Ita-nia belun konvida Ita atu haree ninia foto tuan sira. Nuʼudar Ita haree foto ida ba ida, Ita la koñese ema barak nia oin. Maibé Ita para no hateke kleur ba foto ida. Tanbasá? Tanba Ita mós iha foto neʼe nia laran. Bainhira Ita haree didiʼak foto neʼe, Ita koko atu hanoin-hetan foto neʼe hasai iha neʼebé, horibainhira no mós sé-sé deʼit mak iha foto neʼe nia laran. Foto neʼe importante ba Ita.

² Livru Apokalipse mak hanesan foto neʼe. Tanbasá? Tanba razaun rua. Primeiru, livru neʼe hakerek ba ita. Apokalipse 1:1 hatete: “Neʼe mak liafuan kona-ba buat neʼebé Jesus Kristu hatudu sai ona. Jesus simu buat sira-neʼe husi Maromak, atu nuneʼe nia bele hatudu sai ba Maromak nia atan sira kona-ba buat neʼebé lakleur tan tenke akontese.” Tan neʼe, informasaun iha livru neʼe laʼós ba ema jerál, maibé ba ita neʼebé serbí Maromak. Nuʼudar Maromak nia atan, ita la hakfodak katak ita hola parte atu kumpre profesia sira neʼebé hakerek iha livru neʼe. Kuandu ita lee livru Apokalipse, ita lee kona-ba buat neʼebé kona ita.

3-4. Bainhira mak profesia sira iha livru Apokalipse sai loos? Neʼe tenke book ita atu halo saida?

³ Razaun segundu mak kona-ba tempu neʼebé profesia sira-neʼe sai loos. Apóstolu João fó sai kona-ba neʼe hodi hatete: “Maromak nia espíritu lori haʼu ba Naʼi nia loron.” (Apok 1:10) Bainhira João hakerek liafuan sira-neʼe  iha tinan 96 EC, “Naʼi nia loron” sei kleur. (Mt 25:14, 19; Lc 19:12) Bíblia nia profesia sira hatudu katak loron neʼe hahú iha tinan 1914 kuandu Jesus sai Liurai iha lalehan. Husi tinan 1914 ba oin, profesia sira iha livru Apokalipse neʼebé mós kona Maromak nia povu, komesa sai loos. Ita moris daudaun iha “Naʼi nia loron”.

⁴ Tanba ita moris iha tempu neʼebé úniku, ita presiza tau atensaun ba konsellu neʼebé hakerek iha Apokalipse 1:3: “Ksolok ba ema neʼebé lee ho lian makaʼas, no rona liafuan husi profesia neʼe, no halo tuir buat neʼebé hakerek iha laran, tanba tempu neʼebé deside tiha ona besik daudaun.” Ita presiza “lee ho lian makaʼas”, “rona liafuan husi profesia neʼe, no halo tuir”. Saida mak liafuan balu neʼebé ita presiza halo tuir?

5. Oinsá mak livru Apokalipse hatudu katak importante atu buka-hatene se Maromak simu ita-nia adorasaun?

⁵ Hahú husi kapítulu primeiru iha livru Apokalipse, ita aprende katak Jesus hatene buat hotu neʼebé akontese iha kongregasaun laran. (Apok 1:12-16, 20; 2:1) Jesus hatudu ida-neʼe liuhusi lia-menon neʼebé nia haruka ba kongregasaun hitu iha Ázia Menór. Iha lia-menon sira-neʼe, Jesus fó matadalan espesífiku ba ema Kristaun iha tempu neʼebá atu ajuda sira adora Jeová iha dalan neʼebé Jeová simu. Informasaun sira neʼebé fó sai iha Jesus nia lia-menon aplika mós ba Maromak nia povu ohin loron. Ita bele aprende saida? Ita-nia Ulun-Naʼin Kristu Jesus hatene didiʼak se ita iha relasaun diʼak ho Jeová ka lae. Jesus dirije no proteje ita, no nia haree buat hotu. Nia hatene buat neʼebé ita presiza halo atu Jeová kontinua simu ita. Jesus fó matadalan saida neʼebé ita presiza atu halo tuir ohin loron?

6. (a) Tuir Apokalipse 2:3, 4, ema Kristaun iha kongregasaun Éfeso iha fraku saida? (b) Ita aprende saida?

⁶ Lee Apokalipse 2:3, 4. Ita labele husik ita-nia domin uluk nian ba Jeová. Jesus nia lia-menon ba ema Kristaun iha kongregasaun Éfeso hatudu katak sira iha ona kbiit atu tahan no sira mós kontinua serbí Jeová maski hasoru susar oioin. Maski nuneʼe, sira husik ona sira-nia domin uluk nian. Sira presiza haburas fali domin neʼe, se lae Jeová sei la simu sira-nia adorasaun. Nuneʼe mós ohin loron, la toʼo atu tahan deʼit susar sira. Ita presiza tahan susar ho motivu neʼebé loos. Maromak la interese deʼit ba saida mak ita halo, maibé nia mós interese ba tanbasá ita halo ida-neʼe. Ita-nia motivu mak importante ba nia. Nia hakarak ita atu adora nia tanba hadomi no hatudu agradese ba nia.​—Prov 16:2; Mc 12:29, 30.

7. (a) Tuir Apokalipse 3:1-3, ema Kristaun iha kongregasaun Sardes iha fraku saida? (b) Ita presiza halo saida?

⁷ Lee Apokalipse 3:1-3. Ita tenke kontinua matan-moris. Ema Kristaun iha kongregasaun Sardes iha fraku seluk. Maski uluk sira serbí Jeová ho laran-manas, maibé ikusmai sira la halo tan ida-neʼe. Tan neʼe, Jesus haruka sira atu “hadeer”. Ita aprende saida? Klaru katak Jeová nunka haluha serbisu hotu neʼebé ita halo ona. (Ebr 6:10) Maski nuneʼe, ita labele hanoin katak tanba ita  serbí ona Jeová iha tempu uluk, ita la presiza tan serbí Jeová agora. Maski ita iha limitasaun barak liu fali uluk, maibé ita presiza kontinua badinas atu halo “Naʼi nia serbisu” no kontinua matan-moris toʼo rohan.​—1 Kor 15:58; Mt 24:13; Mc 13:33.

8. Tuir Apokalipse 3:15-17, saida mak ita aprende husi Jesus nia liafuan ba kongregasaun Laodiseia?

⁸ Lee Apokalipse 3:15-17. Ita tenke adora Jeová ho laran-manas no laran tomak. Ema Kristaun iha kongregasaun Laodiseia iha fraku seluk. Sira-nia adorasaun ba Jeová mak “morna” deʼit. Tanba sira la laran-manas, Jesus hatete ba sira: ‘Imi la kontente no kuitadu liu.’ Sira tenke hatudu laran-manas atu adora Jeová. (Apok 3:19) Ita aprende saida? Se ita-nia laran-manas sai menus, ita tenke hatudu agradese liután ba buat diʼak hotu neʼebé Jeová no ninia organizasaun fó ona mai ita. (Apok 3:18) Ita lakohi buka moris diʼak agora toʼo ita la tau uluk ita-nia adorasaun ba Jeová.

9. Hanesan Jesus nia konsellu ba kongregasaun iha Pérgamo no Tiatira, ita presiza hasees an husi perigu saida?

⁹ Ita labele simu hanorin husi ema neʼebé kontra lia-loos. Jesus korrije ema Kristaun balu iha kongregasaun Pérgamo tanba habelar ema nia ideia no book irmaun-irmán sira atu haketak malu. (Apok 2:14-16) Nia gaba ema Kristaun iha kongregasaun Tiatira tanba hasees an husi “segredu kleʼan husi Satanás” no nia haruka sira atu “kaer metin” ba lia-loos. (Apok 2:24-26) Ema Kristaun sira neʼebé sai fraku no komesa halo tuir hanorin falsu sira presiza arrepende an. Oinsá ho ohin loron? Ita mós tenke hasees an husi hanorin sira neʼebé la tuir Jeová nia hanoin. Karik ema sira neʼebé kontra lia-loos hatudu hahalok katak sira adora Maromak, maibé “sira la moris tuir sira-nia adorasaun”. (2 Tim 3:5) Se ita badinas atu estuda Maromak nia Liafuan, fasil liu ba ita atu hatene no la simu hanorin falsu sira.​—2 Tim 3:14-17; Jud 3, 4.

10. Saida tan mak ita bele aprende husi Jesus nia liafuan ba kongregasaun iha Pérgamo no Tiatira?

¹⁰ Ita labele hola parte, labele simu ka apoia hahalok la morál hotu. Ema Kristaun iha Pérgamo no Tiatira iha fraku seluk tan. Jesus korrije ema Kristaun balu iha kongregasaun rua neʼe tanba la hasees an husi hahalok la morál. (Apok  2:14, 20) Ita aprende saida? Maski ita serbí Jeová ba tinan barak ona no iha priviléjiu oioin, ita labele hanoin katak Jeová sei taka matan deʼit ba hahalok la morál neʼebé ita halo. (1 Sam 15:22; 1 Ped 2:16) Jeová hakarak ita atu kaer metin ba morál neʼebé aas, maski mundu nia morál sai aat ba beibeik.​—Éf 6:11-13.

11. Saida mak ita aprende ona toʼo agora? (Haree mós kaixa “ Lisaun ba ita ohin loron”.)

¹¹ Saida mak ita aprende ona toʼo agora? Ita aprende katak ita presiza buka-hatene se ita adora Jeová iha dalan neʼebé nia simu. Se ita hatudu daudaun hahalok ruma neʼebé halo Jeová la simu ita-nia adorasaun, ita tenke halo kedas mudansa. (Apok 2:5, 16; 3:3, 16) Jesus fó sai buat seluk tan iha ninia lia-menon ba kongregasaun sira. Saida mak neʼe?

12. Saida mak ita aprende husi Jesus nia lia-menon ba kongregasaun iha Esmirna no Filadélfia? (Apokalipse 2:10)

¹² Agora ita sei koʼalia kona-ba Jesus nia lia-menon ba kongregasaun iha Esmirna no Filadélfia. Nia fó-hatene sira atu la sente taʼuk bainhira ema kontra sira tanba Jeová sei fó kolen se sira laran-metin nafatin. (Lee Apokalipse 2:10; 3:10) Ita aprende saida? Ita hatene katak ema sei kontra ita no ita presiza sai prontu atu tahan ida-neʼe. (Mt 24:9, 13; 2 Kor 12:10) Tanbasá importante atu hanoin-hetan ida-neʼe?

13-14. Oinsá mak akontesimentu iha Apokalipse kapítulu 12 kona Maromak nia povu?

¹³ Livru Apokalipse fó-hatene ita katak ema sei kontra Maromak nia povu durante “Naʼi nia loron”, no ita moris daudaun iha tempu neʼe. Apokalipse kapítulu 12 fó sai katak funu mosu iha lalehan lakleur depois Jesus sai Liurai. Miguel ka Jesus Kristu neʼebé hetan ona glória no ninia tropa sira funu hasoru Satanás no anju aat sira. (Apok 12:7, 8) Rezultadu mak Maromak nia inimigu sira-neʼe lakon funu no soe tun tiha ba rai. Ida-neʼe lori susar barak ba rai no mós ba sira neʼebé hela iha rai. (Apok 12:9, 12) Oinsá ida-neʼe kona Maromak nia povu?

¹⁴ Livru Apokalipse konta kona-ba buat neʼebé Satanás halo. Satanás labele ona tama ba lalehan, tan neʼe nia sai hirus tebes ba Kristu nia alin sira neʼebé sei iha rai. Sira reprezenta Maromak nia Ukun no sira “halo serbisu atu fó sasin kona-ba Jesus”. (Apok 12:17; 2 Kor 5:20; Éf 6:19, 20) Oinsá profesia neʼe sai loos daudaun?

15. “Testemuña naʼin-rua” neʼebé temi iha Apokalipse kapítulu 11 reprezenta sé? Saida mak akontese ba sira?

¹⁵ Satanás book Maromak nia inimigu  sira atu ataka Kristu nia alin iha rai neʼebé dirije serbisu haklaken. Irmaun sira-neʼe reprezenta “testemuña naʼin-rua” neʼebé ema oho tiha. * (Apok 11:3, 7-11) Iha tinan 1918, irmaun naʼin-ualu neʼebé dirije organizasaun tama komarka tanba ema duun matak sira. Ema barak hanoin katak irmaun sira-neʼe nia serbisu para ona.

16. Saida mak akontese iha tinan 1919? Saida mak Satanás kontinua halo husi tempu neʼebá?

¹⁶ Profesia iha Apokalipse kapítulu 11 mós fó-hatene katak “testemuña naʼin-rua” neʼe sei moris fali iha tempu badak nia laran. Profesia neʼe sai loos iha dalan neʼebé furak tebes. Sira iha komarka laran la toʼo tinan ida. Iha fulan-Marsu tinan 1919, sira sai husi komarka no ikusmai sira-nia kazu mós kansela tiha. Sira komesa kedas atu dirije fali serbisu haklaken. Maibé neʼe la hapara Satanás atu ataka Maromak nia povu. Hahú husi tempu neʼebá, Satanás book ema atu kontra Maromak nia povu no neʼe hanesan “mota” ida. (Apok 12:15) Tan neʼe, ita ida-idak “presiza tahan susar no iha fiar”.​—Apok 13:10.

17. Maromak nia povu hetan ajuda saida maski Satanás ataka sira?

¹⁷ Apokalipse kapítulu 12 fó sai katak Maromak nia povu sei hetan ajuda balu iha dalan neʼebé sira la espera. Livru Apokalipse esplika katak “rai” sei tolan tiha “mota” neʼebé reprezenta terus neʼebé ema hamosu ba Maromak nia povu. (Apok 12:16) Neʼe akontese duni. Dala ruma parte balu husi Satanás nia mundu hanesan sistema judisiál balu mak salva Maromak nia povu. Dala barak Jeová nia povu manán kazu sira iha tribunál. Rezultadu mak sira iha liberdade balu. Oinsá sira uza liberdade neʼe? Sira aproveita oportunidade hotu atu halo Jeová nia serbisu. (1 Kor 16:9) Neʼe inklui saida deʼit?

18. Saida mak serbisu importante liu iha loron ikus sira-neʼe?

¹⁸ Jesus fó sai nanis katak ninia povu sei “haklaken liafuan diʼak kona-ba Maromak nia Ukun” iha mundu tomak antes mundu nia rohan toʼo mai. (Mt 24:14) Bainhira sira haklaken, sira simu ajuda husi anju sira. Livru Apokalipse  dehan katak anju “lori liafuan diʼak neʼebé iha ba nafatin atu fó sai ba ema neʼebé hela iha rai, ba nasaun, suku, língua no povu hotu”.​—Apok 14:6.

19. Sira neʼebé hadomi Jeová presiza fó sai mensajen saida tan?

¹⁹ Maromak nia povu presiza fó sai liafuan diʼak kona-ba Maromak nia Ukun no mós mensajen seluk tan. Ita presiza apoia anju sira-nia serbisu neʼebé fó sai iha Apokalipse kapítulu 8 toʼo 10. Anju sira-neʼe fó sai susar oioin neʼebé kona ema sira neʼebé lakohi simu Maromak nia Ukun. Entaun, Testemuña ba Jeová haklaken daudaun mensajen tesi-lia nian neʼebé hanesan “jelu-fatuk no ahi”. Ita fó sai kona-ba Maromak nia tesi-lia ba parte oioin husi Satanás nia mundu. (Apok 8:7, 13) Ema presiza hatene katak mundu nia rohan besik ona, atu nuneʼe sira bele halo mudansa iha sira-nia moris no hetan salvasaun iha Jeová nia loron hirus. (Sof 2:2, 3) Maibé ema barak la gosta mensajen neʼe no ita presiza aten-brani atu fó sai ida-neʼe. Durante terus boot, ita sei fó sai mensajen tesi-lia ikus neʼebé makaʼas liu.​—Apok 16:21.

20. Iha lisaun rua tuirmai, ita sei aprende saida?

²⁰ Ita presiza halo tuir duni “liafuan husi profesia neʼe” tanba ita mós hola parte atu kumpre profesia iha livru Apokalipse. (Apok 1:3) Maibé oinsá ita bele tahan ho laran-metin bainhira ema kontra ita no kontinua aten-brani atu haklaken mensajen sira-neʼe? Iha buat rua neʼebé bele hametin ita. Primeiru, buat neʼebé livru Apokalipse fó sai kona-ba Maromak nia inimigu. Segundu, bensaun neʼebé ita sei simu iha futuru se ita laran-metin nafatin. Ita sei koʼalia kona-ba neʼe iha lisaun rua tuirmai.