1. Ema hotu presiza halo desizaun importante saida?

 OHIN loron ema presiza halo desizaun importante. Sira presiza deside atu apoia Maromak Jeová nuʼudar Ukun-Naʼin ba universu ka apoia Maromak nia inimigu Diabu Satanás. Ema hotu tenke hili atu apoia sé no labele neutrál deʼit. Atu bele hetan moris rohan-laek ka lae, neʼe depende ba desizaun neʼebé sira halo agora. (Mt 25:31-33, 46) Durante “terus boot”, sira sei simu marka neʼebé hatudu katak sira sei hetan salvasaun ka sira sei lakon ba nafatin.​—Apok 7:14; 14:9-11; Eze 9:4, 6.

2. (a) Ebreu 10:35-39 anima ita atu halo saida? (b) Oinsá livru Apokalipse bele ajuda ita?

² Lee Ebreu 10:35-39. Se Ita hili atu apoia Jeová nia ukun, Ita halo desizaun neʼebé matenek. Ita mós hakarak atu ajuda ema seluk halo desizaun neʼebé diʼak. Ita bele uza informasaun iha livru Apokalipse atu ajuda sira. Livru furak neʼe fó sai kona-ba buat neʼebé sei akontese ba sira neʼebé kontra Jeová no mós fó sai kona-ba bensaun ba sira neʼebé laran-metin atu apoia Maromak nia ukun. Ita presiza estuda lia-loos importante sira-neʼe. Neʼe sei ajuda ita atu deside metin atu kontinua serbí Jeová. Liután neʼe, ita bele uza buat neʼebé ita aprende ona atu ajuda ema seluk deside atu serbí Jeová no kontinua serbí Jeová.

3. Iha lisaun neʼe, ita sei aprende saida?

³ Iha lisaun neʼe, ita sei koʼalia kona-ba pergunta sira tuirmai neʼe: Ema neʼebé apoia Maromak nia ukun sei hetan bensaun saida? Saida mak sei akontese ba ema neʼebé apoia animál fuik kór-mean neʼebé fó sai iha livru Apokalipse?

4. Grupu saida mak João haree hamriik hamutuk ho Jesus iha lalehan?

⁴ Liuhusi vizaun ida, apóstolu João haree grupu rua neʼebé apoia Jeová nia ukun no sira simu bensaun atu moris ba nafatin. Grupu primeiru iha ema hamutuk naʼin-144.000. (Apok 7:4) Maromak hili sira husi rai atu forma governu ida ka Ukun ida hamutuk Jesus iha lalehan. Sira sei ukun rai tomak hamutuk ho Jesus. (Apok 5:9, 10; 14:3, 4) Iha vizaun neʼe, João haree sira hamriik hamutuk ho Jesus iha Foho Siaun iha lalehan.​—Apok 14:1.

5. Lakleur tan saida mak sei akontese ba Jesus nia alin sira iha rai?

⁵ Husi apóstolu sira-nia tempu toʼo agora, Maromak hili ona ema rihun ba rihun atu sai parte ba ema naʼin-144.000. (Lc 12:32; Rom 8:17) Maibé iha João nia vizaun, nia rona katak ema uitoan husi grupu neʼe sei moris hela iha rai durante loron ikus sira. Antes terus boot komesa, sira sei simu “sinál” ikus neʼebé hatudu katak Jeová simu sira. (Apok 7:2, 3; 12:17) Tuirmai durante terus boot, ema sira-neʼe sei saʼe ba lalehan atu hamutuk ho sira seluk neʼebé sai parte ba ema naʼin-144.000 no mate ona ho laran-metin. Sira sei ukun hamutuk ho Jesus iha Maromak nia Ukun.​—Mt 24:31; Apok 5:9, 10.

6-7. (a) João haree grupu saida tan? Ita hatene saida kona-ba sira? (b) Tanbasá Kristu nia alin sira neʼebé iha rai no mós “ema-lubun boot” hakarak aprende kona-ba Apokalipse kapítulu 7?

⁶ Tuirmai João mós haree “ema-lubun boot”. La hanesan ho ema naʼin-144.000, Bíblia la fó sai ema naʼin-hira mak sai parte ba grupu neʼe. (Apok 7:9, 10) Ita hatene saida kona-ba grupu neʼe? Apokalipse 7:14 hatete: “Sira mak ema neʼebé liu terus boot. Sira fase ona sira-nia roupa no halo mutin ona sira-nia roupa ho Bibi-Oan nia raan.” Depois ema-lubun boot moris liu terus boot, sira sei moris iha rai no hetan bensaun furak oioin.​—Sal 37:9-11, 27-29; Prov 2:21, 22; Apok 7:16, 17.

⁷ Maski ita iha esperansa atu bá lalehan ka moris ba nafatin iha rai, ita presiza fiar katak ita sei haree profesia iha Apokalipse kapítulu 7 sai loos. Iha tempu neʼebá, Maromak nia atan grupu rua neʼe sei kontente tebes. Ita sei haksolok tebes tanba ita hili atu apoia Jeová nia ukun. Saida tan mak livru Apokalipse fó sai kona-ba terus boot?​—Mt 24:21.

8. Oinsá terus boot sei komesa, no ema barak sei halo saida?

⁸ Hanesan temi iha lisaun antes neʼe, lakleur tan mundu nia sistema polítiku sei ataka Babilónia Boot, katak relijiaun falsu hotu iha mundu. (Apok 17:16, 17) Terus boot sei hahú kuandu ida-neʼe akontese. Ema barak sei komesa serbí Jeová iha tempu neʼe ka lae? Lae. Apokalipse kapítulu 6 hatudu katak iha tempu neʼebá, ema neʼebé la serbí Jeová sei buka protesaun husi mundu nia sistema polítiku no komersiál neʼebé Bíblia kompara ho foho sira. Ema sira-neʼe la apoia Maromak nia Ukun, tan neʼe Jeová haree sira nuʼudar inimigu.​—Lc 11:23; Apok 6:15-17.

9. Oinsá mak Jeová nia povu la hanesan ho ema seluk durante terus boot, no neʼe lori rezultadu saida?

⁹ Durante tempu susar neʼe, ema sei  haree katak Jeová nia atan sira neʼebé laran-metin mak la hanesan ho ema seluk. Iha mundu tomak, sira mesak deʼit mak serbí Jeová no lakohi apoia “animál fuik”. (Apok 13:14-17) Ema neʼebé la serbí Jeová sai hirus ba Jeová nia povu tanba sira kontinua laran-metin ba nia. Rezultadu mak grupu nasaun sira sei ataka Maromak nia povu iha mundu tomak. Bíblia bolu ida-neʼe nuʼudar ataka husi Gog husi rai-Magog.​—Eze 38:14-16.

10. Tuir Apokalipse 19:19-21, Jeová sei halo saida bainhira inimigu ataka ninia povu?

¹⁰ Jeová sei halo saida bainhira inimigu sira-neʼe ataka? Jeová hatete: “Haʼu-nia hirus sei lakan makaʼas.” (Eze 38:18, 21-23) Apokalipse kapítulu 19 fó sai buat neʼebé akontese tuirmai. Jeová haruka ninia Oan-Mane atu defende Ninia povu no halakon inimigu. Anju laran-metin sira no mós ema naʼin-144.000 neʼebé Bíblia bolu nuʼudar “tropa lalehan nian” sei apoia Jesus atu kontra inimigu. (Apok 17:14; 19:11-15) Saida mak rezultadu husi funu neʼe? Ema no organizasaun hotu neʼebé kontra Jeová sei lakon mohu.​—Lee Apokalipse 19:19-21.

11. Akontesimentu importante saida mak fó sai iha livru Apokalipse?

¹¹ Ema laran-metin sira sei kontente tebes tanba hetan salvasaun bainhira Maromak halakon ninia inimigu sira. Neʼe mak tempu neʼebé furak tebes. Maski lalehan haksolok bainhira Babilónia Boot lakon, maibé iha buat seluk tan neʼebé lori ksolok boot ba lalehan. (Apok 19:1-3) Neʼe mak “Bibi-Oan nia kazamentu”, no ida-neʼe mak akontesimentu importante neʼebé fó sai iha livru Apokalipse.​—Apok 19:6-9.

12. Tuir Apokalipse 21:1, 2, Bibi-Oan nia kazamentu sei halaʼo bainhira?

¹² Bibi-Oan nia kazamentu sei halaʼo bainhira? Ema hotu neʼebé sai parte ba ema naʼin-144.000 saʼe ona ba lalehan antes funu Armagedon komesa. Maski nuneʼe, neʼe laʼós tempu atu halaʼo Bibi-Oan nia kazamentu. (Lee Apokalipse 21:1, 2.) Kazamentu neʼe sei halaʼo depois funu Armagedon no Maromak nia inimigu hotu lakon ona.​—Sal 45:3, 4, 13-17.

13. Saida mak sei akontese bainhira halaʼo Bibi-Oan nia kazamentu?

¹³ Saida mak sei akontese bainhira halaʼo Bibi-Oan nia kazamentu? Kazamentu halo feto ida no mane ida sai ida deʼit. Nuneʼe mós Bibi-Oan nia kazamentu halo Liurai Jesus Kristu no ninia “noiva” katak ema naʼin-144.000 sei sai ida deʼit. Hahú husi akontesimentu neʼe, ema naʼin-144.000 hamutuk ho Jesus sei ukun mundu tomak durante tinan 1.000.​—Apok 20:6.

14-15. Apokalipse kapítulu 21 kompara ema naʼin-144.000 ho saida? (Haree dezeñu iha livru oin.)

¹⁴ Tuirmai, Apokalipse kapítulu 21 kompara ema naʼin-144.000 ho sidade furak ida neʼebé hanaran “Jeruzalein Foun”. (Apok 21:2, 9) Sidade neʼe iha fatuk 12 nuʼudar ninia fundasaun “no iha fatuk sira-neʼe hakerek tiha Bibi-Oan nia apóstolu naʼin-12 nia naran”. Tanbasá vizaun neʼe dada João nia atensaun? Tanba ninia naran mós hakerek iha fatuk ida. Neʼe mak priviléjiu neʼebé boot tebes.​—Apok 21:10-14; Éf 2:20.

 ¹⁵ Sidade simbóliku neʼe la hanesan ho sidade sira seluk. Ninia dalan boot halo ho osan-mean, portaun 12 halo husi pérola, moru no fundasaun sira hafurak ho fatuk folin-boot oioin, no sidade neʼe haree hanesan kuadradu ho luan no naruk hanesan deʼit. (Apok 21:15-21) Maibé iha buat ida mak falta. João hatete: “Haʼu la haree templu ida iha sidade neʼe nia laran, tanba Maromak Jeová, Ida neʼebé Kbiit Boot Liu Hotu, no mós Bibi-Oan mak sidade neʼe nia templu. Sidade neʼe la presiza loro-matan no fulan atu fó naroman, tanba Maromak nia glória mak fó naroman ba sidade neʼe, no Bibi-Oan mak sidade neʼe nia ahi-oan.” (Apok 21:22, 23) Sira neʼebé sai parte ba Jeruzalein Foun sei hamutuk ho Jeová iha lalehan. (Ebr 7:27; Apok 22:3, 4) Entaun, Jeová no Jesus mak templu iha sidade neʼe.

16. Durante Kristu nia Ukun ba Tinan Rihun Ida, ema sei simu bensaun saida deʼit?

¹⁶ Kristu nia alin sira kontente atu hanoin kleʼan kona-ba sidade neʼe. Maibé ema sira neʼebé iha esperansa atu moris iha rai mós presiza aprende kona-ba sidade neʼe. Durante Kristu nia Ukun ba Tinan Rihun Ida, Jeruzalein Foun sei lori bensaun oioin ba mundu. João haree bensaun sira-neʼe suli sai hanesan “mota neʼebé iha bee moris nian”. No iha mota nia sorin-sorin iha “ai-hun moris nian” no “ai-hun sira-neʼe nia tahan mak ai-moruk hodi kura nasaun sira”. (Apok 22:1, 2) Ema hotu neʼebé moris iha tempu neʼebá sei iha oportunidade atu simu buat diʼak sira-neʼe. Neineik-neineik, ema hotu neʼebé halo tuir Jeová sei sai perfeitu. Sei la iha tan moras no tanis tanba triste.​—Apok 21:3-5.

17. Tuir Apokalipse 20:11-13, sé mak sei hetan bensaun durante Kristu nia Ukun ba Tinan Rihun Ida?

¹⁷ Sé mak sei simu bensaun furak sira-neʼe? Ulukliu ema-lubun boot neʼebé moris liu Armagedon no mós bebé sira neʼebé karik moris iha mundu foun mak sei simu bensaun sira-neʼe. Maibé Apokalipse kapítulu 20 mós promete katak ema mate sira sei moris-hiʼas. (Lee Apokalipse 20:11-13.) Ema laran-metin sira neʼebé “hatudu hahalok loos” no mós “ema neʼebé hatudu hahalok la loos”  neʼebé la iha oportunidade atu aprende kona-ba Jeová, sira sei moris fali iha rai. (Após 24:15; João 5:28, 29) Neʼe katak ema hotu sei hetan moris-hiʼas durante Kristu nia Ukun ba Tinan Rihun Ida ka lae? Lae. Ema sira neʼebé hatudu hahalok aat no lakohi aproveita oportunidade neʼebé iha atu serbí Jeová antes sira mate sei la simu moris-hiʼas. Sira hetan ona oportunidade, maibé sira hatudu katak sira la merese atu moris iha mundu paraízu.​—Mt 25:46; 2 Tes 1:9; Apok 17:8; 20:15.

18. Ema nia moris sei sai oinsá bainhira Kristu nia Ukun ba Tinan Rihun Ida remata?

¹⁸ Bainhira Kristu nia Ukun ba Tinan Rihun Ida remata, ema hotu neʼebé moris iha rai sei perfeitu. La iha ona ema ida neʼebé hetan konsekuénsia aat husi Adão nia sala. (Rom 5:12) Ita sai livre husi Adão nia sala. Iha dalan neʼe mak ema sira iha rai sei “hetan moris” nuʼudar ema perfeitu bainhira Kristu nia Ukun ba Tinan Rihun Ida remata.​—Apok 20:5.

19. Tanbasá presiza koko ba dala ikus?

¹⁹ Ita hatene katak Jesus laran-metin nafatin, maski Satanás koko atu tenta nia. Maibé ema perfeitu hotu sei laran-metin nafatin ba Jeová bainhira Satanás koko sira ka lae? Ema ida-idak iha oportunidade atu hatudu ida-neʼe bainhira Satanás sai husi rai-kuak kuandu Jesus nia Ukun ba Tinan Rihun Ida remata. (Apok 20:7) Sira neʼebé laran-metin durante koko ba dala ikus sei simu moris ba nafatin no ikusmai sei kontente tanba iha liberdade neʼebé loos. (Rom 8:21) Sira neʼebé kontra Jeová sei lakon ba nafatin hamutuk ho Diabu no ninia anju aat sira.​—Apok 20:8-10.

20. Ita sente oinsá kona-ba profesia sira iha livru Apokalipse?

²⁰ Ita sente oinsá depois koʼalia tiha informasaun balu husi livru Apokalipse? Ita kontente tanba moris iha tempu neʼebé profesia sira-neʼe sai loos. Neʼe mós book ita atu konvida ema seluk atu adora Jeová iha dalan neʼebé loos. (Apok 22:17) Ita aprende ona kona-ba buat sira neʼebé sei akontese iha futuru, tan neʼe ho laran-manas ita hakarak koʼalia hanesan apóstolu João neʼebé dehan: “Amen! Mai, Naʼi Jesus.”​—Apok 22:20.