BUAT neʼebé ita halo, saida mak atu hanesan ho profeta sira iha tempu antigu? Iha disionáriu husi Bíblia Sagrada Tradusaun Mundu Foun Mateus-Apokalipse hatete katak profeta mak: “Ema neʼebé Maromak uza atu fó sai nia hakarak no nia liafuan sira ba ema seluk. Dala ruma profeta mós bele fó-hatene nanis buat neʼebé sei mosu iha futuru.” Ita laʼós atu siʼik futuru, maibé ita mak ema neʼebé fó sai Maromak nia liafuan deʼit.—Mateus 24:14.

Atu bele fó sai ba ema seluk kona-ba ita-nia Maromak Jeová no hanorin sira komprende kona-ba Jeová nia hakarak mak priviléjiu furak ida. Ita halaʼo daudaun serbisu neʼe hamutuk ho anju neʼebé “semo iha lalehan”. (Apokalipse 14:6) Maibé, dala ruma susar neʼebé ita hasoru bele halo ita haluha katak serbisu neʼe mak priviléjiu furak ida. Susar saida deʼit mak ita bele hasoru? Karik ita bele hasoru susar hanesan kole, laran-tun, no la hafolin ita-nia an. Profeta sira iha tempu antigu mós hasoru susar sira-neʼe, maibé maski nuneʼe, sira nunka rende an. Jeová mós ajuda sira hodi sira bele kumpre sira-nia knaar. Mai ita haree toʼok ezemplu balu, no haree oinsá mak ita bele banati-tuir sira-nia ezemplu.

Karik tanba halaʼo atividade loroloron nian bele halo ita kole no halo ita la bá haklaken. Ita presiza duni atu deskansa tanba Jesus ho ninia apóstolu sira mós presiza deskansa. (Marcos 6:31) Maibé hanoin toʼok kona-ba Ezequiel. Ema Babilónia kaer nia hamutuk ho ema Izraél seluk husi Jeruzalein ba Babilónia. Iha tempu neʼebá nia simu knaar ida husi Jeová. Jeová haruka nia foti tezolu ida no bahat sidade Jeruzalein iha tezolu neʼe. Tuirmai, Ezequiel tenke latan ho isin karuk iha tezolu nia sorin ba loron 390 no depois, latan fali ho isin sorin loos ba loron 40. Nia halo nuneʼe atu fó sinál katak inimigu sei serka haleʼu sidade neʼe. Jeová hatete ba nia: “Haʼu sei kesi-metin ó ho tali atu ó la bele fila husi sorin ba sorin toʼo loron neʼebé serka neʼe remata.”  (Ezequiel [Yehezkiel] 4:1-8) Karik nia halo nuneʼe dada duni ema Izraél seluk nia atensaun. Ba tinan ida liu, Ezequiel tenke halo tuir knaar todan neʼe. Maibé oinsá mak profeta neʼe bele kumpre ninia knaar?

Ezequiel komprende tanbasá mak Maromak foti nia nuʼudar profeta ida. Tanba bainhira Maromak haruka nia, Maromak hatete ba nia: “Atu [ema Izraél sira] rona ka lakohi rona . . . , sira sei hatene duni katak profeta ida iha hela sira-nia leet.” (Ezequiel [Yehezkiel] 2:5) Ezequiel sempre hanoin kona-ba objetivu husi ninia misaun neʼe, tan neʼe mak nia halo tuir sinál atu fó serka ba Jeruzalein. Nia mak Maromak nia profeta duni! Ikusmai ema fó-hatene ba nia no ema Izraél seluk katak: “Sidade neʼe monu tiha ona!” Husi neʼe ema Izraél sira foin hatene katak iha duni profeta ida iha sira-nia leet.—Ezequiel (Yehezkiel) 33:21, 33.

Ohin loron ita fó avizu ba ema katak Satanás nia mundu besik ona toʼo ninia rohan. Maski ita sente kole, ita kontinua uza ita-nia forsa atu haklaken Maromak nia Liafuan, halo vizita fali, no fó estudu Bíblia ba ema. Nuʼudar ita haree profesia sira kona-ba mundu nia rohan sai loos daudaun, ita haksolok tebes hodi hatene katak Maromak uza ita atu fó sai ninia hakarak ba ema.

Ho Jeová nia espíritu santu nia ajuda ita bele hakaʼas an liután, maibé dala ruma ita bele sai laran-tun tanba ema lakohi simu ita-nia mensajen. Se nuneʼe, diʼak atu hanoin kona-ba profeta Jeremias nia ezemplu. Nia mós tanba fó sai Maromak nia mensajen ba ema Izraél mak ema goza nia, hatún, no koʼalia aat nia. Toʼo loron ida, Jeremias dehan: “Haʼu sei la temi tan kona-ba nia, no haʼu sei la koʼalia tan hodi ninia naran.” Jeremias mós ema hanesan ita, nia mós iha sentimentu. Maibé tanbasá mak nia bele kontinua fó sai Maromak nia mensajen? Profeta neʼe dehan: “Maibé iha haʼu-nia laran, ninia liafuan sai hanesan ahi-lakan neʼebé sulan metin iha haʼu-nia ruin, no haʼu kole ona atu hanetik ida-neʼe; haʼu la bele tahan tan ida-neʼe.”—Jeremias (Yeremia) 20:7-9.

Hanesan neʼe mós bainhira ema lakohi rona ita-nia mensajen, neʼe bele halo ita laran-tun, ita bele luta hasoru sentimentu neʼe liuhusi hanoin kleʼan ba mensajen neʼebé ita hatoʼo daudauk ba ema. Hanoin hanesan neʼe bele sai ‘hanesan ahi-lakan neʼebé sulan metin iha ita-nia ruin’. Se ita mak iha toman atu lee beibeik Bíblia loroloron, ita bele halo ahi neʼe kontinua lakan iha ita-nia laran.

Ema balu sente laran-susar bainhira sira simu knaar ida neʼebé sira la hatene oinsá atu halaʼo. Karik profeta Oséias mós sente hanesan neʼe. Jeová hatete ba nia: “Bá, kaben ho feto-aat ida no hakiak ninia oan sira husi ninia hahalok aat neʼe.” (Oséias [Hosea] 1:2) Hanoin toʼok se Maromak mak haruka ita atu bá kaben, maibé atu kaben ho feto-aat ida, ita bele sente oinsá! Oséias simu deʼit knaar neʼe. Nia bá kaben ho Gomer, no Gomer hahoris oan-mane ida ba nia. Tuirmai, Gomer mós hahoris tan oan-feto no oan-mane ida. Afinál oan rua ikus neʼe laʼós Oséias nia oan. Jeová hatete nanis ona ba Oséias katak aban-bainrua ninia feen neʼe sei bá duni tuir ninia mane sira. Depois, nia sei mai buka fali Oséias. Se ita mak profeta Oséias, ita sei simu fali ita-nia feen neʼe ka lae? Jeová hakarak duni Oséias atu simu fali nia. Laʼós neʼe deʼit, profeta neʼe mós hasai tan osan barak hodi sosa fali nia.—Oséias (Hosea) 2:7; 3:1-5.

Karik Oséias mós la hatene tanbasá mak nia presiza atu halo knaar neʼe. Maski nuneʼe, nia halo tuir ho laran. Buat neʼebé Oséias halo ajuda ita atu komprende kona-ba Jeová nia sentimentu bainhira ema Izraél sira la laran-metin ba nia. Maibé ikusmai ema Izraél balu neʼebé iha laran loos fila duni ba Jeová.

Ohin loron, Maromak la haruka ita atu “kaben ho feto-aat”. Maibé ita bele aprende lisaun importante ida husi Oséias nia ezemplu. Maski dala ruma susar ba ita atu bele haklaken Maromak nia Liafuan “iha ema nia oin no husi uma ba uma”, maibé, Oséias nia ezemplu bele ajuda ita atu simu knaar neʼe ho laran. (Apóstolu 20:20) No karik dala ruma ita sente susar  atu haklaken iha dalan neʼebé foun ba ita. Iha ema barak mak sente hanesan neʼe bainhira sira estuda hela Bíblia ho Testemuña ba Jeová. Sira dehan katak sira gosta estuda Bíblia, maibé kona-ba atu haklaken husi uma ba uma, sira sei nunka bele halo hanesan neʼe. Maibé ikusmai sira haklaken duni.

Ita bele aprende tan lisaun ida husi Oséias nia ezemplu. Tuir loloos Oséias atu kaben ho feto-aat neʼe mak símbolu ida ba ema Izraél, no Oséias bele buka razaun oioin atu la simu knaar neʼe. Se Oséias mak la hakerek kona-ba akontesimentu neʼe, karik laiha ema ida mak hatene nia simu knaar saida deʼit, loos ka lae? Dala ruma ita mós bele hasoru situasaun neʼebé fó oportunidade diʼak ba ita atu haklaken ba ema kona-ba Maromak Jeová, no ita rasik deʼit mak iha oportunidade neʼe. Hanesan Anna husi Estadus Unidus. Nia eskola hela iha eskola sekundária. Loron ida ninia mestra husu estudante hotu atu hakerek sira rasik nia tópiku ida no tuirmai aprezenta ba klase tomak hodi dada estudante seluk atu bele tau fiar ba sira. Tuir loloos Anna bele husik liu deʼit oportunidade diʼak atu haklaken neʼe. Maibé nia sente katak oportunidade diʼak neʼe mai husi Maromak. Tan neʼe nia halo orasaun ba Jeová, no ninia hakarak iha laran sai makaʼas tebes atu uza oportunidade neʼe hodi haklaken. Nia hakerek ninia tópiku ida ho títulu “Evolusaun: Buka toʼok evidénsia sira.”

Bainhira Anna aprezenta ninia tópiku ba klase, feto-oan ida neʼebé fiar ba evolusaun husu pergunta barak tebes ba nia atu prova katak ninia fiar mak loos. Maibé Anna hatán hotu ninia pergunta sira, no neʼe halo ninia mestra gaba tebes nia no fó prémiu ba nia tanba ninia tópiku mak dada liu ema seluk nia atensaun. Komesa husi tempu neʼebá Anna mós esplika liután ba feto-oan neʼebé kontra nia katak Maromak mak kria buat hotu. Anna sente duni katak Jeová mak fó knaar neʼe ba nia tanba Jeová hakarak nia atu uza oportunidade neʼe hodi fó-hatene ba ema seluk kona-ba nia. Anna dehan: “Agora haʼu la taʼuk tan atu haklaken ba ema.”

Maski ita laʼós profeta hanesan iha Bíblia, maibé hodi banati-tuir profeta hanesan Ezequiel, Jeremias, no Oséias sira-nia ezemplu bele ajuda ita atu kumpre knaar neʼebé Jeová fó ba ita. Bainhira halaʼo adorasaun família, ka estuda mesak, diʼak mós atu lee kona-ba profeta seluk tan no banati-tuir sira-nia ezemplu sira.