1-2. Ita presiza halo saida atu Jeová simu ita-nia adorasaun?

 ITA hanoin saida bainhira rona liafuan “adorasaun”? Karik Ita imajina irmaun ida hakneʼak besik ninia kama hodi harohan ba Maromak ka família ida neʼebé halaʼo estuda Bíblia hamutuk ho kontente.

² Iha situasaun rua neʼe, sira hotu halo daudaun atividade atu adora Maromak. Jeová sei simu sira-nia adorasaun ka lae? Sin, se sira halo tuir ninia hakarak, hatudu domin no mós respeitu ba nia. Ita hadomi tebes Jeová. Ita hatene katak nia merese simu ita-nia adorasaun, no ita hakarak adora nia iha dalan neʼebé diʼak liu.

3. Iha lisaun neʼe, ita sei aprende saida?

³ Iha lisaun neʼe, ita sei aprende kona-ba adorasaun neʼebé Jeová simu iha tempu antigu no ita mós sei aprende dalan ualu neʼebé Jeová hakarak ita atu adora nia ohin loron. Bainhira ita estuda kona-ba neʼe, diʼak atu hanoin kona-ba oinsá ita bele adora Jeová ho diʼak liután. Ita mós sei aprende tanbasá adora Jeová iha dalan neʼebé loos halo ita kontente.

4. Oinsá Maromak nia atan sira iha tempu uluk hatudu katak sira hadomi no respeitu Jeová?

⁴ Mane laran-metin sira hanesan Abel, Noé, Abraão no Job hatudu katak sira respeitu no hadomi Maromak. Oinsá? Sira halo tuir Maromak, hatudu fiar no hasaʼe sakrifísiu  ba nia. Bíblia la esplika ho klaru oinsá sira adora Maromak. Maibé klaru katak sira hakaʼas an atu fó glória ba Maromak no Maromak simu sira-nia adorasaun. Tuirmai, Jeová fó Moisés nia Ukun-Fuan ba ema Izraél. Ukun-Fuan sira-neʼe temi matadalan espesífiku kona-ba oinsá atu adora Jeová iha dalan neʼebé nia simu.

5. Jeová hakarak ema Kristaun atu adora nia iha dalan oinsá?

⁵ Depois Jesus mate no moris hiʼas, Jeová la haruka tan ninia atan sira atu halo tuir Moisés nia Ukun-Fuan. (Rom 10:4) Ema Kristaun presiza halo tuir ukun-fuan foun, neʼe mak “Kristu nia ukun-fuan”. (Gal 6:2) Atu halo tuir ukun-fuan neʼe, sira la presiza dekór ka halo tuir ukun-fuan barabarak, maibé sira presiza banati-tuir deʼit Jesus nia ezemplu no halo tuir ninia hanorin. Ohin loron mós, ema Kristaun hakaʼas an atu halo tuir Jesus hodi bele halo Jeová kontente no sira bele “sente kmaan”.​—Mt 11:29.

6. Atu hetan benefísiu husi lisaun neʼe, ita presiza halo saida?

⁶ Bainhira aprende kona-ba dalan oioin atu adora Maromak, husu ba Ita-nia an: ‘Haʼu laʼo ba oin iha dalan neʼe ka lae? Haʼu bele halo neʼe ho diʼak liután ka lae?’ Ita presiza sente kontente ho dalan neʼebé Ita laʼo ba oin, maibé Ita mós tenke hakaʼas an atu halo orasaun ba Maromak hodi ajuda Ita halo mudansa seluk tan.

7. Jeová sente oinsá kona-ba ita-nia orasaun ho laran?

⁷ Ita adora Jeová bainhira ita halo orasaun ba nia. Bíblia kompara ita-nia orasaun ho insensu neʼebé prepara ho didiʼak no hasaʼe iha tenda santu no tuirmai iha templu. (Sal 141:2) Insensu neʼe nia morin halo Jeová kontente. Ita-nia orasaun neʼebé halo ho laran mós bele halo Jeová kontente, maski ita uza deʼit liafuan neʼebé simples. (Prov 15:8; Deut 33:10) Ita bele fiar katak Jeová gosta atu rona bainhira ita fó sai ita-nia domin no agradese ba nia. Nia hakarak ita atu fó sai ita-nia laran-taridu, esperansa no hakarak. Antes halo orasaun ba Jeová, diʼak atu hanoin uluk kona-ba saida mak Ita sei fó sai ba nia. Bainhira Ita halo ida-neʼe, Ita-nia orasaun sei sai hanesan insensu neʼebé diʼak liu neʼebé Ita hasaʼe ba Ita-nia Aman iha lalehan.

8. Iha situasaun saida mak ita bele fó hahiʼi ba Maromak?

⁸ Ita adora Jeová bainhira ita hahiʼi nia. (Sal 34:1) Ita fó hahiʼi Jeová liuhusi fó sai ba ema seluk kona-ba oinsá ita hafolin tebes ninia hahalok furak sira no buat neʼebé nia halo. Ita fó hahiʼi Jeová tanba ita agradese ba nia. Bainhira ita uza tempu atu medita kona-ba buat diʼak hotu neʼebé Jeová halo ona ba ita, ita sei iha razaun barak atu fó hahiʼi ba nia. Haklaken mak tempu diʼak atu hasaʼe “sakrifísiu hahiʼi nian ba Maromak, neʼe katak, liafuan neʼebé sai husi ita-nia ibun”. (Ebr 13:15) Ita presiza hanoin uluk antes halo orasaun ba Jeová, nuneʼe mós ita presiza hanoin uluk buat neʼebé ita sei koʼalia kuandu haklaken. Ita hakarak fó “sakrifísiu hahiʼi nian” neʼebé diʼak liu. Tan neʼe mak ita hakarak koʼalia ho laran bainhira ita fahe lia-loos ba ema seluk.

9. Jeová nia povu hetan benefísiu saida bainhira halibur hamutuk? Konta toʼok Ita rasik nia esperiénsia.

 ⁹ Ita adora Jeová bainhira tuir reuniaun sira. Jeová fó mandamentu ba ema Izraél antigu: “Tinan ida dala tolu, mane hotu tenke bá hodi hamriik iha Jeová, imi-nia Maromak, nia oin iha fatin neʼebé nia sei hili.” (Deut 16:16) Sira tenke husik hela sira-nia uma no toʼos, no la iha ema ida mak tau matan ba buat sira-neʼe. Maibé Jeová promete ba sira: “Ema ida sei la hadau imi-nia rai bainhira imi bá hodi hamriik iha Jeová, imi-nia Maromak, nia oin dala tolu iha tinan ida.” (Éx 34:24) Ema Izraél tau fiar tomak ba Jeová, tan neʼe sira tuir festa sira tinan-tinan. Sira hetan benefísiu oioin. Porezemplu, sira aprende liután kona-ba Maromak nia Ukun-Fuan, sira hanoin kona-ba Jeová nia laran-diʼak no sira kontente tanba sira halibur hamutuk ho maluk fiar-naʼin. (Deut 16:15) Ita mós hetan benefísiu neʼebé hanesan bainhira ita hakaʼas an atu tuir reuniaun sira. Jeová kontente tebes bainhira ita prepara didiʼak atu fó komentáriu neʼebé badak.

10. Tanbasá kanta mak parte importante ba ita-nia adorasaun?

¹⁰ Ita adora Jeová bainhira ita kanta hamutuk ho irmaun-irmán sira. (Sal 28:7) Ema Izraél sente katak kanta ba Jeová mak parte importante ba adorasaun. Liurai David fó knaar ba ema Levi naʼin-288 atu sai kantadór iha templu. (1 Krón 25:1, 6-8) Ohin loron, ita bele fó sai ita-nia domin ba Jeová liuhusi kanta knananuk hahiʼi nian. Ita la presiza iha lian diʼak. Hanoin toʼok komparasaun neʼe: “Ita hotu halo sala dala barak” bainhira ita koʼalia, maibé neʼe la hanetik ita atu koʼalia iha kongregasaun no mós haklaken. (Tgo 3:2) Nuneʼe mós, ita nafatin bele kanta knananuk hahiʼi nian ba Jeová, maski ita sente katak ita-nia lian la diʼak.

11. Tuir Salmo 48:13, tanbasá ita presiza uza tempu atu estuda Bíblia nuʼudar família?

¹¹ Ita adora Jeová bainhira ita estuda Bíblia no hanorin ita-nia oan kona-ba nia. Iha loron Sábadu, ema Izraél la halo serbisu no sira uza loron neʼe atu hametin sira-nia relasaun diʼak ho Jeová. (Éx 31:16, 17) Ema Izraél neʼebé laran-metin hanorin sira-nia oan kona-ba Jeová no Jeová nia laran-diʼak. Ita mós presiza uza tempu atu lee no estuda Bíblia. Neʼe mak parte ba ita-nia adorasaun no ajuda ita atu hakbesik liután ba Jeová. (Sal 73:28) Bainhira ita estuda hamutuk nuʼudar família, ita bele ajuda ita-nia oan atu haburas relasaun diʼak ho Jeová.​—Lee Salmo 48:13.

12. Oinsá Jeová nia haree kona-ba serbisu atu halo sasán ba tenda santu? Ita bele aprende saida husi ida-neʼe?

¹² Ita adora Jeová bainhira ita harii no tau matan ba fatin adorasaun. Bíblia hatete katak harii tenda santu no halo sasán ba tenda santu mak “serbisu santu”. (Éx 36:1, 4) Ohin loron, Jeová mós haree serbisu atu harii Reuniaun-Fatin no fatin adorasaun sira seluk nuʼudar serbisu sagradu. Irmaun-irmán balu uza tempu barak atu halo serbisu konstrusaun. Ita hafolin tebes serbisu neʼebé sira halo atu apoia Maromak nia Ukun. No sira mós halo serbisu haklaken. Sira balu mós kumpre kritéria no hakarak serbí nuʼudar pioneiru. Se nuneʼe, katuas sira bele hatudu katak sira apoia irmaun-irmán sira-neʼe hodi la dada an atu fó  oportunidade ba sira atu foti pioneiru. Ita hotu bele hola parte atu hamoos no tau matan ba fatin adorasaun maski ita iha esperiénsia ka lae.

13. Ita presiza hanoin oinsá kona-ba kontribuisaun neʼebé ita fó atu apoia Maromak nia Ukun?

¹³ Ita adora Jeová bainhira ita fó kontribuisaun atu apoia Maromak nia Ukun. Ema Izraél tenke lori prezente ba Jeová bainhira sira bá fatin adorasaun nian. (Deut 16:16) Sira presiza lori prezente tuir sira-nia kbiit. Hodi halo nuneʼe, sira hatudu katak sira hafolin buat hotu neʼebé Jeová halo ona ba sira. Oinsá ita bele hatudu domin ba Jeová no hafolin ai-han espirituál neʼebé Jeová fó ba ita? Dalan ida mak hodi fó kontribuisaun tuir ita-nia kbiit atu apoia kongregasaun no mós serbisu iha mundu tomak. Apóstolu Paulo hatete: “Maromak kontente bainhira ema hakarak fó buat ruma husi laran, hodi tuir buat neʼebé sira iha, laʼós tuir buat neʼebé sira la iha.” (2 Kor 8:4, 12) Jeová hafolin kontribuisaun neʼebé ita fó ho laran, maski neʼe mak uitoan deʼit.​—Mc 12:42-44; 2 Kor 9:7.

14. Tuir Provérbios 19:17, bainhira ita ajuda irmaun-irmán sira, oinsá Jeová haree ida-neʼe?

¹⁴ Ita adora Jeová bainhira ita ajuda maluk Kristaun sira. Jeová promete atu selu fali ema Izraél neʼebé hatudu laran-diʼak ba ema kiak. (Deut 15:7, 10) Dala ida-idak neʼebé ita ajuda irmaun-irmán sira, Jeová haree ida-neʼe nuʼudar prezente neʼebé ita fó ba nia. (Lee Provérbios 19:17.) Porezemplu, bainhira ema Kristaun iha Filipe haruka prezente ba Paulo iha komarka, Paulo haree ida-neʼe nuʼudar sakrifísiu neʼebé “Maromak simu no monu loos ba Maromak nia laran”. (Flp 4:18) Hanoin kona-ba Ita-nia kongregasaun no husu Ita-nia an: ‘Iha ema ruma neʼebé presiza ajuda ka lae?’ Jeová kontente bainhira ita uza ita-nia tempu, forsa, abilidade no sasán atu ajuda ema seluk. Nia haree ida-neʼe nuʼudar parte ba ita-nia adorasaun.​—Tgo 1:27.

15. Maski ita presiza uza tempu no enerjia atu adora Maromak, maibé tanbasá neʼe la susar?

¹⁵ Maski ita presiza uza tempu no enerjia atu adora Jeová iha dalan neʼebé loos, maibé neʼe la susar liu atu halo. (1 João 5:3) Tanbasá? Tanba ita hadomi Jeová. Imajina labarik ida neʼebé hakarak fó prezente ba ninia apá. Karik nia uza oras barak atu pinta dezeñu ba ninia apá. Labarik neʼe la arrepende tanba uza tempu barak atu pinta dezeñu. Nia hadomi ninia apá no kontente atu fó prezente neʼe ba ninia apá. Nuneʼe mós ho ita, ita kontente atu uza ita-nia tempu no forsa atu adora Jeová iha dalan neʼebé loos tanba ita hadomi nia.

16. Tuir Ebreu 6:10, Jeová sente oinsá kona-ba ita-nia hakaʼas an atu adora nia?

¹⁶ Inan-aman neʼebé hadomi sira-nia oan sei la ezije oan ida-idak atu fó prezente neʼebé hanesan. Sira hatene katak oan ida-idak la hanesan no iha abilidade neʼebé la hanesan. Nuneʼe mós, ita-nia Aman iha lalehan komprende ita ida-idak nia situasaun. Karik Ita bele halo buat barak liu fali maluk Kristaun seluk neʼebé Ita koñese no hadomi. Ka Ita labele halo buat barak hanesan ema seluk, karik tanba Ita-nia idade, saúde ka responsabilidade iha família laran. Keta sai laran-kraik. (Gal 6:4) Jeová sei  la haluha Ita-nia serbisu ba nia. Se Ita hakaʼas an atu adora Jeová ho motivu neʼebé loos no tuir Ita-nia kbiit, Jeová sei kontente ho ida-neʼe. (Lee Ebreu 6:10.) Jeová hatene saida mak Ita hakarak halo ba nia. Nia hakarak Ita atu kontente ho buat neʼebé Ita bele halo atu adora nia.

17. (a) Ita bele halo saida se ita sente susar atu adora Jeová iha dalan balu? (b) Oinsá atividade sira iha kaixa “ Aumenta Ita-nia ksolok” ajuda ona Ita?

¹⁷ Oinsá se ita sente susar atu adora Jeová iha dalan balu neʼebé ita aprende ona iha lisaun neʼe, hanesan estuda mesak ka haklaken? Se ita hola parte beibeik iha atividade sira-neʼe, neʼe sei ajuda ita atu gosta liután no hetan benefísiu husi atividade sira-neʼe. Ita bele kompara ita-nia adorasaun ho ezersísiu ka aprende instrumentu múzika ruma. Se ita treinu dala ruma deʼit, ita sei la laʼo ba oin. Maibé oinsá se ita treinu loroloron? Karik foufoun ita treinu ba tempu badak deʼit, no neineik-neineik ita aumenta tempu atu treinu. Bainhira ita haree rezultadu diʼak husi ita-nia hakaʼas an, ita sei hein namanas no gosta tebes tempu neʼebé ita treinu. Ida-neʼe mós aplika ba ita-nia adorasaun.

18. Saida mak importante liu iha ita-nia moris? No neʼe lori rezultadu saida?

¹⁸ Adora Jeová ho laran tomak mak buat neʼebé importante liu iha ita-nia moris. Se ita halo nuneʼe, ita sei iha moris neʼebé kontente no iha objetivu, no mós ita iha esperansa atu adora Jeová ba nafatin. (Prov 10:22) Ita sente ona dame tanba ita hatene katak Jeová ajuda ninia atan sira bainhira hasoru susar. (Isa 41:9, 10) Ita iha razaun barak atu sente kontente bainhira adora Jeová tanba nia “merese simu glória, [no] respeitu” husi ninia kriasaun hotu.​—Apok 4:11.