1. Saida mak fó influénsia ba ita-nia hahalok?

 MASKI Ita batizmu ba loron balu deʼit ka tinan barak ona, maibé ita hotu hakarak hatudu hahalok neʼebé Jeová gosta. Atu halo nuneʼe, ita presiza kontrola Ita-nia hanoin. Tanbasá? Tanba Ita-nia hanoin bele fó influénsia ba Ita-nia hahalok. Se Ita hanoin beibeik kona-ba hakarak isin nian, ita sei koʼalia no halo buat neʼebé aat. (Éf 4:17-19) Maibé se Ita kontinua hanoin kona-ba buat neʼebé diʼak, Ita sei koʼalia no hatudu hahalok neʼebé halo Jeová kontente.​—Gal 5:16.

2. Iha lisaun neʼe, ita sei buka resposta ba pergunta saida deʼit?

² Hanesan ita aprende ona iha lisaun antes neʼe, ita labele hapara hanoin aat hotu atu tama ita-nia neon. Maibé ita bele deside atu la halo tuir ita-nia hanoin neʼebé la diʼak. Antes ita hetan batizmu, ita presiza para uza liafuan neʼebé aat no la halo tan buat neʼebé Jeová odi. Neʼe mak hakat primeiru no importante liu atu bele hasai hahalok tuan nian. Atu halo Jeová kontente, ita mós tenke halo tuir ninia mandamentu: “Tau fali hahalok foun nuʼudar imi-nia roupa.” (Kol 3:10) Iha lisaun neʼe, ita sei hatán ba pergunta tuirmai: Saida mak “hahalok foun”? Oinsá ita bele tau hahalok foun no la hasai fali ida-neʼe?

3. Tuir Galásia 5:22, 23, saida mak “hahalok foun”, no oinsá ita bele tau ida-neʼe?

³ Bainhira ita hatudu “hahalok foun”, ita banati-tuir Jeová nia hanoin no hahalok. Ita hatudu hahalok neʼebé mai husi espíritu santu no husik espíritu santu fó influénsia  ba ita-nia hanoin, sentimentu no hahalok. (Lee Galásia 5:22, 23.) Porezemplu, ita hadomi Jeová no mós Jeová nia povu. (Mt 22:36-39) Ita haksolok nafatin maski hasoru daudaun susar. (Tgo 1:2-4) Ita mak ema neʼebé buka dame. (Mt 5:9) Ita hatudu pasiénsia no laran-diʼak ba ema seluk. (Kol 3:13) Ita gosta buat neʼebé diʼak no halo ida-neʼe. (Lc 6:35) Liuhusi Ita-nia hahalok, Ita hatudu katak Ita fiar metin ba Jeová. (Tgo 2:18) Ita nafatin hatudu laran-maus maski ema provoka Ita, no nafatin kontrola an maski hetan tentasaun.​—1 Kor 9:25, 27; Tito 3:2.

4. Ita bele haburas hahalok sira neʼebé temi iha Galásia 5:22, 23 ketaketak ka lae? Esplika toʼok.

⁴ Atu tau hahalok foun, ita presiza haburas hahalok hotu neʼebé temi iha Galásia 5:22, 23 no iha eskritura sira seluk. * Hahalok sira-neʼe la hanesan ho roupa oioin neʼebé ita hatais iha tempu neʼebé la hanesan. Tuir loloos, hahalok sira neʼebé temi iha Galásia mós liga malu ho hahalok sira seluk. Porezemplu, se Ita hadomi ema seluk, Ita sei hatudu pasiénsia no laran-diʼak. Atu hatudu hahalok diʼak, Ita tenke sai laran-maus no kontrola an.

5. Iha hanoin hanesan Kristu nian katak sá? Tanbasá ita presiza aprende kona-ba Jesus nia dalan atu halaʼo moris? (1 Korinto 2:16)

⁵ Lee 1 Korinto 2:16. Atu tau hahalok foun, ita presiza iha “Kristu nia hanoin”. Neʼe katak ita presiza aprende kona-ba Jesus nia dalan atu hanoin no banati-tuir ninia hahalok. Jesus hatudu hahalok neʼebé mai husi espíritu santu iha dalan neʼebé perfeitu. Hanesan espellu neʼebé diʼak, Jesus haleno ho loloos Jeová nia hahalok sira. (Ebr 1:3) Bainhira ita kontinua iha hanoin hanesan Jesus, neʼe sei ajuda ita atu halo tuir nia, no haleno ninia hahalok ho didiʼak.​—Flp 2:5.

6. Ita presiza hanoin-hetan saida bainhira ita koko atu tau hahalok foun?

⁶ Karik ita duvida se ita bele banati-tuir Jesus nia ezemplu. Karik ita hanoin: ‘Jesus mak perfeitu. Haʼu labele sai perfeitu hanesan nia.’ Se Ita sente hanesan neʼe, hanoin-hetan pontu sira tuirmai. Primeiru, Jeová kria Ita ho kbiit atu hatudu hahalok hanesan nia no Jesus. Tan neʼe, Ita  bele hili atu banati-tuir sira. Ita bele duni halo ida-neʼe, maski iha dalan neʼebé la perfeitu. (Gén 1:26) Segundu, Maromak nia espíritu santu mak kbiit boot liu iha universu. Ho espíritu santu nia ajuda, Ita bele kumpre buat neʼebé Ita labele kumpre ho Ita-nia kbiit rasik. Terseiru, ohin loron Jeová la ezije Ita atu hatudu hahalok neʼebé mai husi espíritu santu iha dalan neʼebé perfeitu. Aman Jeová sei fó tinan 1.000 ba ema sira neʼebé sei hela iha mundu atu sai ema perfeitu. (Apok 20:1-3) Ohin loron, Jeová hakarak ita atu hakaʼas an tuir ita-nia kbiit no sadere ba nia atu hetan ajuda.

7. Agora ita sei koʼalia kona-ba saida?

⁷ Iha dalan saida deʼit mak ita bele banati-tuir Jesus? Ita sei koʼalia kona-ba hahalok haat neʼebé mai husi espíritu santu. Ita sei aprende husi Jesus nia dalan atu hatudu hahalok sira-neʼe. Ita mós sei haree pergunta balu neʼebé bele ajuda ita analiza ita-nia an no tau hahalok foun iha dalan neʼebé diʼak liután.

8. Oinsá Jesus hatudu domin?

⁸ Jesus hadomi tebes Jeová, tan neʼe nia prontu atu halo sakrifísiu ba ninia Aman no mós ba ita. (João 14:31; 15:13) Jesus hatudu katak nia hadomi tebes ema liuhusi dalan neʼebé nia halaʼo ninia moris. Loroloron nia hatudu domin no laran-sadiʼa maski ema balu kontra nia. Dalan importante ida neʼebé Jesus hatudu domin ba ema mak liuhusi hanorin sira kona-ba Maromak nia Ukun. (Lc 4:43, 44) Jesus mós hatudu domin neʼebé la hanoin an deʼit ba Maromak no ema hodi prontu hetan terus toʼo mate iha ema aat nia liman. Neʼe loke dalan ba ita atu bele hetan moris ba nafatin.

9. Oinsá ita bele hatudu domin hanesan ho Jesus?

⁹ Ita dedika an ba Jeová no hetan batizmu tanba ita hadomi nia. Tan neʼe hanesan Jesus, ita hatudu domin ba Jeová liuhusi hatudu laran-diʼak ba ema. Apóstolu João hakerek: “Se [ema ida] la hadomi ninia maluk neʼebé nia haree, sá tan hadomi Maromak neʼebé nia labele haree.” (1 João 4:20) Ita bele husu ba ita-nia an: ‘Haʼu haburas domin boot ba ema ka lae? Haʼu hatudu laran-sadiʼa ba ema seluk, maski sira hatudu hahalok aat mai haʼu ka lae? Domin book haʼu atu uza haʼu-nia tempu no forsa atu ajuda ema seluk aprende kona-ba Jeová ka lae? Haʼu prontu atu halo ida-neʼe, maski ema barak la hafolin haʼu-nia hakaʼas an no kontra haʼu ka lae? Haʼu buka oportunidade atu uza tempu barak liután atu hanorin ema sai dixípulu ka lae?’​—Éf 5:15, 16.

10. Oinsá Jesus buka dame?

¹⁰ Jesus sempre buka dame. Bainhira ema trata aat nia, nia la selu aat fali ba ema. Liután neʼe, nia iha inisiativu atu halo dame no anima ema atu rezolve sira-nia problema. Porezemplu, nia hanorin sira katak sira tenke hadame malu ho sira-nia maun ka alin se sira hakarak Jeová simu sira-nia adorasaun. (Mt 5:9, 23, 24) Nia ajuda beibeik apóstolu sira atu la haksesuk malu kona-ba sé mak boot liu iha sira-nia leet.​—Lc 9:46-48; 22:24-27.

11. Oinsá ita bele sai ema neʼebé buka dame?

¹¹ Atu sai ema neʼebé buka dame, la toʼo atu hasees an deʼit husi haksesuk malu. Ita presiza iha inisiativu atu hadame malu ho ema seluk no anima irmaun-irmán sira atu rezolve sira-nia problema. (Flp 4:2, 3; Tgo 3:17, 18) Ita bele husu pergunta ba ita-nia an: ‘Haʼu prontu atu  halo saida atu bele hadame malu ho ema seluk? Bainhira irmaun ka irmán ida hakanek haʼu-nia laran, haʼu rai hirus ka lae? Haʼu hein atu ema seluk mak buka dame uluk ho haʼu ka haʼu iha inisiativu atu buka dame maski haʼu sente katak nia mak hamosu problema neʼe? Haʼu anima ema neʼebé diskute malu atu hadame malu ka lae?’

12. Oinsá Jesus hatudu laran-diʼak?

¹² Jesus hatudu laran-diʼak. (Mt 11:28-30) Nia halo nuneʼe hodi hatudu laran-maus no la ulun-toos maski hasoru situasaun susar. Porezemplu, bainhira feto Fenísia ida husu Jesus atu kura ninia oan-feto, foufoun Jesus lakohi halo buat neʼebé feto neʼe husu, maibé bainhira feto neʼe hatudu fiar boot, Jesus hatudu laran-diʼak hodi kura ninia oan-feto. (Mt 15:22-28) Maski Jesus laran-diʼak, maibé nia mós prontu atu fó konsellu kuandu presiza. Dala ruma, nia hatudu laran-diʼak hodi fó konsellu ba ninia belun sira. Porezemplu, bainhira Pedro koko anima Jesus atu la halo tuir Jeová nia hakarak, Jesus korrije Pedro iha dixípulu sira seluk nia oin. (Mc 8:32, 33) Nia halo nuneʼe laʼós atu hamoe Pedro, maibé atu treinu Pedro no fó avizu ba dixípulu sira seluk atu la hatudu hahalok foti an. Klaru katak Pedro sente moe uitoan, maibé nia hetan benefísiu husi dixiplina neʼe.

13. Oinsá ita bele hatudu laran-diʼak?

¹³ Atu bele hatudu laran-diʼak ba ema seluk, dala ruma Ita presiza fó konsellu ba sira. Bainhira Ita halo nuneʼe, Ita presiza banati-tuir Jesus hodi fó konsellu neʼebé bazeia ba Bíblia nia prinsípiu no hatudu laran-maus. Iha hanoin neʼebé pozitivu no fiar katak ema neʼebé hadomi Jeová no Ita, sei simu Ita-nia konsellu neʼebé Ita fó ho laran. Husu ba Ita-nia an: ‘Haʼu brani atu fó konsellu bainhira haʼu haree ema neʼebé haʼu hadomi halo buat neʼebé sala ka lae? Se haʼu presiza fó konsellu, haʼu sei koʼalia ho laran-diʼak ka koʼalia ho hirus? Saida mak motiva haʼu atu fó konsellu? Haʼu fó konsellu ba ema neʼe tanba haʼu la kontente ho nia ka haʼu hanoin nia?’

14. Oinsá Jesus hatudu hahalok diʼak?

¹⁴ Jesus hatene buat neʼebé loos no halo ida-neʼe. Jesus hadomi ninia Aman, tan neʼe nia sempre halo buat neʼebé loos ho motivu neʼebé loos. Ema neʼebé diʼak sempre buka dalan atu ajuda ema seluk no halo diʼak ba ema. La toʼo atu hatene deʼit buat neʼebé diʼak, maibé ita mós tenke halo ida-neʼe ho motivu neʼebé loos. Dala ruma ema halo buat neʼebé diʼak ho motivu neʼebé sala. Porezemplu, Jesus koʼalia kona-ba ema sira neʼebé fó prezente ba ema kiak, maibé sira hakarak ema seluk haree no gaba sira. Maski sira halo buat diʼak, maibé Jeová la kontente ho ida-neʼe.​—Mt 6:1-4.

15. Oinsá ita bele sai ema neʼebé diʼak?

¹⁵ Atu bele sai ema neʼebé diʼak, ita tenke halo buat diʼak ho motivu neʼebé loos no la hanoin an deʼit. Husu ba Ita-nia an: ‘Haʼu hatene buat neʼebé loos no mós halo ida-neʼe ka lae? Saida mak haʼu-nia motivu atu halo buat neʼebé diʼak?’

16. Loroloron Ita presiza halo saida, no tanbasá?

¹⁶ Ita presiza hanoin-hetan katak bainhira hetan tiha batizmu, Ita presiza hakaʼas an atu kontinua tau hahalok foun. Hahalok foun mak hanesan roupa foun  neʼebé Ita presiza tau matan didiʼak. Ita bele halo nuneʼe hodi hakaʼas an loroloron atu hatudu hahalok neʼebé mai husi espíritu santu. Tanbasá? Tanba Jeová mak Maromak neʼebé ativu no ninia espíritu santu mak forsa neʼebé ativu, neʼe katak espíritu santu sei book ita no ajuda ita se ita hakaʼas an atu hatudu hahalok neʼebé mai husi espíritu santu. (Gén 1:2) Tan neʼe hahalok mak importante tebes. Porezemplu dixípulu Tiago hakerek: “Fiar neʼebé la hamutuk ho hahalok mak mate.” (Tgo 2:26) Prinsípiu neʼe mós aplika ba hahalok seluk neʼebé mai husi espíritu santu. Dala ida-idak neʼebé Ita hatudu hahalok sira-neʼe, Ita hatudu katak Maromak nia espíritu ajuda Ita.

17. Ita presiza halo saida, se Ita la konsege hatudu hahalok neʼebé mai husi espíritu santu?

¹⁷ Dala ruma, ema Kristaun neʼebé batizmu ba tinan barak ona la konsege hatudu hahalok neʼebé mai husi espíritu santu. Maibé buat neʼebé importante mak labele rende an. Hanoin toʼok ai-knanoik neʼe. Se Ita-nia roupa favoritu naklees, Ita sei soe kedas ida-neʼe ka lae? Lae. Karik Ita sei hakaʼas an atu hadiʼa parte neʼebé aat. Depois neʼe, Ita sei kuidadu didiʼak roupa neʼe. Nuneʼe mós ho Ita, se Ita la konsege hatudu laran-diʼak, pasiénsia ka domin ba ema seluk, keta sai laran-kraik. Husu deskulpa ho laran, atu nuneʼe Ita bele kontinua iha relasaun diʼak ho ema neʼe. Hakaʼas an atu hatudu hahalok diʼak liu iha futuru.

18. Ita bele fiar metin kona-ba saida?

¹⁸ Ita agradese tebes tanba Jesus fó ezemplu ba Ita atu banati-tuir. Bainhira Ita kontinua banati-tuir Jesus nia hanoin, fasil liu ba Ita atu hatudu hahalok hanesan nia, no neʼe sei ajuda Ita atu tau hahalok foun. Iha lisaun neʼe, Ita aprende hahalok haat deʼit neʼebé sai parte ba hahalok neʼebé mai husi espíritu santu. Diʼak atu uza tempu hodi estuda kona-ba hahalok neʼebé mai husi espíritu santu. Hanoin kleʼan kona-ba oinsá Ita bele hatudu hahalok sira-neʼe. Ita sei hetan informasaun barak iha Livru atu ajuda Testemuña ba Jeová buka informasaun, buka tópiku “Moris Kristaun nian” no tuirmai “Hahalok sira neʼebé mai husi Maromak nia espíritu”. Ita bele fiar metin katak se Ita hakaʼas an atu tau hahalok foun no la hasai fali ida-neʼe, Jeová sei ajuda Ita.