1. Saida mak ema barak nota kuandu tuir reuniaun ba dala primeiru? (Haree mós foto.)

 IMAJINA toʼok feen-laʼen ida foin mak tuir reuniaun ba dala primeiru. Kuandu irmaun-irmán sira simu sira ho laran-diʼak no sira mós haree kongregasaun hatudu domin ba malu, neʼe book tebes sira-nia laran. Bainhira iha dalan atu fila ba uma, feen neʼe dehan ba ninia laʼen: ‘Testemuña sira la hanesan ho ema barak neʼebé ita hasoru ona, haʼu kontente bainhira hamutuk ho sira.’

2. Tanbasá ema balu sidi?

² Domin neʼebé Maromak nia povu hatudu ba malu mak espesiál. Klaru katak Testemuña ba Jeová sira laʼós ema neʼebé perfeitu. (1 João 1:8) Tan neʼe se ita koñese liután ema ida-idak iha kongregasaun, karik ita mós sei nota sira-nia fraku balu. (Rom 3:23) Triste mak ema balu lakohi tan atu serbí Jeová tanba husik ema seluk nia fraku halo sira sidi.

3. Jesus nia dixípulu neʼebé loos sei hatudu hahalok saida? (João 13:34, 35)

³ Haree fali eskritura tema ba lisaun neʼe. (Lee João 13:34, 35.) Oinsá mak ema bele hatene sé mak ema Kristaun neʼebé loos? Liuhusi dalan neʼebé sira hatudu domin ba malu. Bíblia la hatete katak sira tenke perfeitu. Jesus  mós la dehan: ‘Se imi hadomi malu, imi sei hatene katak imi mak haʼu-nia dixípulu.’ Nia dehan: “Se imi hadomi malu, ema hotu sei hatene katak imi mak haʼu-nia dixípulu.” Neʼe katak ita no mós ema neʼebé laʼós parte ba kongregasaun sei hatene Jesus nia dixípulu neʼebé loos liuhusi domin neʼebé sira hatudu ba malu.

4. Ema balu hakarak hatene saida kona-ba ema Kristaun neʼebé loos?

⁴ Ema balu neʼebé laʼós Testemuña karik hanoin: ‘Oinsá mak domin ajuda ita atu hatene sé mak Jesus nia dixípulu neʼebé loos? Oinsá Jesus hatudu domin ba ninia dixípulu sira? Oinsá mak ita bele banati-tuir Jesus nia ezemplu ohin loron?’ Diʼak atu ita mós hanoin kleʼan resposta ba pergunta sira-neʼe. Hodi halo nuneʼe, ita bele hatudu domin liután ba ita-nia maluk fiar-naʼin liuliu bainhira sira halo sala hasoru ita.​—Éf 5:2.

5. Jesus nia liafuan iha João 15:12, 13 katak sá?

⁵ Jesus esplika katak domin neʼebé ninia dixípulu sira hatudu ba malu mak espesiál tebes. (Lee João 15:12, 13.) Jesus fó mandamentu ba sira: “Imi tenke hadomi malu hanesan haʼu hadomi imi.” Neʼe katak sá? Neʼe mak domin neʼebé la hanoin an deʼit no domin neʼe sei book ema Kristaun ida atu mate ba ninia maluk fiar-naʼin se presiza. b

6. Oinsá Bíblia fó sai katak domin mak importante?

⁶ Bíblia fó sai katak domin mak importante. Porezemplu, ema balu nia eskritura favoritu mak hanesan tuirmai: “Maromak mak domin.” (1 João 4:8) “Imi tenke hadomi imi-nia maluk hanesan imi-nia an rasik.” (Mt 22:39) “Ema neʼebé iha  domin, sempre prontu atu fó perdua ba sala barak.” (1 Ped 4:8) “Domin nunka lakon.” (1 Kor 13:8) Versíkulu sira-neʼe no mós versíkulu sira seluk hatudu ho klaru katak importante tebes atu haburas no hatudu domin.

7. Tanbasá Satanás sei nunka bele ajuda ema hatudu domin neʼebé loos ba malu?

⁷ Ema barak husu: ‘Oinsá mak ita bele hatene relijiaun neʼebé loos? Relijiaun hotu hatete katak sira hanorin lia-loos, maibé relijiaun ida-idak hanorin buat neʼebé la hanesan kona-ba Maromak.’ Satanás kria relijiaun falsu barak no neʼe halo susar ba ema atu hatene relijiaun neʼebé loos. Maibé nia nunka bele ajuda ema husi nasaun oioin hatudu domin ba malu nuʼudar maun-alin. Só Jeová deʼit mak bele halo nuneʼe. Neʼe tanba domin mai husi Jeová, no só ema neʼebé Jeová haraik bensaun no simu ninia espíritu santu mak bele hatudu domin neʼebé loos. (1 João 4:7) Tan neʼe mak Jesus dehan katak só ninia dixípulu sira deʼit mak hatudu domin neʼebé loos ba malu.

8-9. Oinsá domin neʼebé Testemuña ba Jeová hatudu ba malu book ema seluk nia laran?

⁸ Hanesan Jesus hatete nanis, ohin loron ema barak hatene ninia dixípulu neʼebé loos liuhusi domin neʼebé sira hatudu ba malu. Porezemplu, irmaun Ian hanoin fali dala primeiru nia tuir reuniaun boot neʼebé halaʼo iha estádiu besik ninia uma. Fulan balu antes neʼe, Ian nonton desportu iha estádiu neʼe. Nia dehan: “Ema neʼebé tuir reuniaun boot la hanesan duni ho ema neʼebé mai atu nonton desportu. Testemuña sira hatudu respeitu, hatais kabeer no sira-nia oan la nakar.” Nia mós dehan: “Laʼós neʼe deʼit, sira haree kontente no iha dame. Haʼu mós hakarak sente hanesan neʼe. Haʼu haluha ona diskursu neʼebé haʼu rona iha tempu neʼebá, maibé haʼu nafatin hanoin-hetan hahalok diʼak neʼebé sira hatudu.” c Hahalok hanesan neʼe mak rezultadu husi domin loos neʼebé ita hatudu ba malu. Tanba ita hadomi irmaun-irmán sira, ita hatudu laran-diʼak no respeitu sira.

⁹ Irmaun John mós sente hanesan kuandu tuir reuniaun ba dala primeiru, nia hatete: “Sira-nia laran-diʼak ba malu book tebes haʼu-nia laran toʼo haʼu hanoin katak sira hotu mak perfeitu. Sira-nia hahalok halo haʼu fiar metin katak haʼu hetan ona relijiaun neʼebé loos.” d Esperiénsia sira-neʼe no mós esperiénsia seluk hatudu katak Jeová nia povu mak ema Kristaun neʼebé loos.

10. Bainhira mak ita iha oportunidade atu hatudu domin Kristaun? (Haree mós nota-rodapé.)

¹⁰ Hanesan temi ona, ita-nia irmaun-irmán mak ema neʼebé la perfeitu. Dala ruma, sira koʼalia no halo buat neʼebé bele hakanek ita-nia laran. e (Tgo 3:2) Iha situasaun hanesan neʼe, ita bele hatudu katak ita hadomi sira liuhusi ita-nia liafuan no hahalok. Saida mak ita bele aprende husi Jesus kona-ba hatudu domin?​—João 13:15.

11. Hahalok saida mak Tiago no João hatudu? (Haree mós dezeñu.)

¹¹ Jesus la ezije ninia dixípulu sira atu hatudu hahalok perfeitu. Duké halo nuneʼe,  Jesus ho domin ajuda sira atu hadiʼa sira-nia hahalok atu nuneʼe sira bele halo Jeová kontente. Iha situasaun ida, apóstolu Tiago no João haruka sira-nia inan atu husu Jesus fó ba sira pozisaun importante iha Maromak nia Ukun. (Mt 20:20, 21) Tiago no João hatudu hahalok foti an no hakarak sai ema neʼebé importante liu.​—Prov 16:18.

12. Tiago no João deʼit mak hatudu hahalok la diʼak ka lae? Esplika toʼok.

¹² Maibé laʼós deʼit João no Tiago mak hatudu hahalok la diʼak iha tempu neʼebá. Haree saida mak apóstolu sira seluk halo. Bíblia hatete: “Kuandu sira naʼin-sanulu seluk rona kona-ba neʼe, sira sai hirus ba maun-alin naʼin-rua neʼe.” (Mt 20:24) Ita bele imajina katak Tiago no João diskute malu makaʼas ho apóstolu sira seluk. Karik sira seluk hatete: ‘Imi hanoin katak imi diʼak liu ka? Imi neʼe sé atu husu pozisaun neʼebé aas liu fali ami? Laʼós imi deʼit mak serbisu makaʼas hamutuk ho Jesus. Ami mós merese simu pozisaun aas hanesan imi!’ Maski ita la hatene ho loloos kona-ba neʼe, maibé sira husik situasaun neʼe hanetik sira atu hatudu domin no laran-diʼak ba malu.

13. Saida mak Jesus halo kuandu apóstolu sira diskute malu? (Mateus 20:25-28)

¹³ Saida mak Jesus halo iha situasaun neʼe? Jesus la sai hirus. Nia la dehan  katak nia sei buka apóstolu neʼebé diʼak liu, neʼebé haraik an liu no mós sempre hatudu domin ba malu. Duké halo nuneʼe, Jesus koʼalia ba sira ho pasiénsia tanba nia hatene katak sira hakarak atu halo buat neʼebé diʼak. (Lee Mateus 20:25-28.) Nia sempre hatudu laran-diʼak ba sira, maski sira kontinua diskute malu kona-ba sé mak boot liu entre sira​—Mc 9:34; Lc 22:24.

14. Jesus nia apóstolu sira sai boot iha komunidade hanesan saida?

¹⁴ Jesus komprende katak ema Izraél nia kultura afeta apóstolu sira-nia hahalok. (João 2:24, 25) Eskriba no ema Farizeu sira hanorin katak só ema neʼebé iha pozisaun aas mak ema neʼebé importante. (Mt 23:6; kompara ho informasaun “Sinagoga​—Fatin neʼebé Jesus no nia dixípulu haklaken” iha Livru Haklaken 1 Abríl 2010, p. 16-18.) Ulun-naʼin relijiaun Judeu mós hanoin katak sira mak diʼak liu fali ema seluk. f (Lc 18:9-12) Jesus komprende katak hanoin hanesan neʼe bele mós afeta apóstolu sira-nia hanoin kona-ba sira-nia an no mós ema seluk. (Prov 19:11) Jesus la espera katak ninia dixípulu sira sei nunka halo sala no nia hatudu pasiénsia kuandu sira halo sala. Jesus hatene katak sira hakarak atu halo buat neʼebé diʼak. Tan neʼe nia ho pasiénsia hanorin sira atu hatudu domin no haraik an duké koko atu sai boot liu fali ema seluk.

15. Saida mak ita bele aprende husi buat neʼebé akontese ba Tiago no João?

¹⁵ Ita bele aprende husi buat neʼebé akontese ba Tiago no João. Sira sala tanba husu pozisaun aas iha Maromak nia Ukun. Maibé apóstolu sira seluk mós sala tanba husik situasaun neʼe halakon sira-nia unidade. Maski nuneʼe, Jesus hatudu laran-diʼak no domin ba apóstolu naʼin-12. Saida mak ita aprende? Buat neʼebé importante laʼós buat neʼebé ema seluk halo ba ita, maibé saida mak ita halo kuandu ema halo sala hasoru ita. Saida mak bele ajuda ita? Bainhira ita sai hirus tanba maluk fiar-naʼin ida, husu ba Ita-nia an: ‘Tanbasá mak haʼu hirus ho buat neʼebé nia halo? Neʼe hatudu katak haʼu iha fraku ruma neʼebé haʼu presiza hadiʼa ka lae? Ema neʼebé hakanek haʼu-nia laran hasoru daudaun problema ka lae? Maski haʼu sente katak haʼu iha razaun loos atu sai laran-kanek, haʼu bele hatudu domin hodi fó perdua ba ema neʼe ka lae?’ Bainhira ita hatudu domin ba ema seluk, ita hatudu katak ita mak Jesus nia dixípulu.

16. Saida tan mak ita bele aprende husi Jesus nia ezemplu?

¹⁶ Jesus nia ezemplu mós hanorin ita atu koko komprende ita-nia maluk fiar-naʼin sira. (Prov 20:5) Jesus bele haree ema nia laran. Maibé ita labele. Maski nuneʼe, ita bele hatudu pasiénsia ba irmaun-irmán sira tanba sira-nia fraku. (Éf 4:1, 2; 1 Ped 3:8) Fasil atu halo nuneʼe se ita koñese sira diʼak liután. Hanoin toʼok ezemplu tuirmai.

17. Katuas área ida hetan benefísiu saida tanba koñese didiʼak maluk fiar-naʼin ida?

¹⁷ Katuas área ida hanoin-hetan irmaun  ida iha Áfrika Leste. Foufoun, katuas área neʼe hanoin katak irmaun neʼe la laran-diʼak. Saida mak katuas área neʼe halo? Nia hatete: “Duké hadook an husi irmaun neʼe, haʼu deside atu koñese nia liután.” Neʼe ajuda katuas área neʼe atu hatene buat oioin husi irmaun neʼe nia moris neʼebé afeta ninia hahalok. Katuas área hatutan: “Kuandu haʼu hatene katak nia hakaʼas an makaʼas atu troka ninia hahalok no kontinua laʼo ba oin, neʼe book haʼu atu hafolin nia. Ami sai belun diʼak.” Bainhira ita koko atu koñese irmaun-irmán sira, neʼe ajuda ita atu hatudu domin ba sira.

18. Pergunta saida deʼit mak ita presiza husu ba ita-nia an kuandu maluk fiar-naʼin ida hakanek ita-nia laran? (Provérbios 26:20)

¹⁸ Dala ruma, ita sente katak ita presiza koʼalia ho maluk fiar-naʼin neʼebé hakanek ita-nia laran. Maibé antes halo nuneʼe, diʼak atu husu ba ita-nia an pergunta sira hanesan: ‘Haʼu komprende didiʼak buat neʼebé akontese ka lae?’ (Prov 18:13) ‘Nia iha duni intensaun atu hakanek haʼu-nia laran ka lae?’ (Ecle 7:20) ‘Haʼu mós halo ona sala neʼebé hanesan ka lae?’ (Ecle 7:21, 22) ‘Se haʼu koʼalia ho nia kona-ba neʼe, neʼe sei hadiʼa situasaun ka halo situasaun sai aat liu?’ (Lee Provérbios 26:20.) Bainhira ita uza tempu atu hanoin kleʼan kona-ba pergunta sira-neʼe, karik ita sente katak diʼak liu hatudu domin no haluha tiha sala neʼebé ita-nia maluk halo mai ita.

19. Saida mak ita hakarak atu halo?

¹⁹ Nuʼudar grupu, Testemuña ba Jeová hatudu ho klaru katak sira mak Jesus nia dixípulu tanba hatudu domin ba malu. Ita ida-idak hatudu katak ita mak Jesus nia dixípulu bainhira ita hatudu domin neʼebé la hanoin an deʼit ba ita-nia irmaun-irmán sira maski sira la perfeitu. Bainhira ita halo nuneʼe, neʼe sei ajuda ema seluk atu hatene relijiaun neʼebé loos no hakarak adora Jeová Maromak neʼebé domin. Mai ita hakaʼas an atu kontinua hatudu domin ba malu nuʼudar ema Kristaun neʼebé loos.