Tanbasá mane neʼebé Boaz bolu nuʼudar “maluk” hatete katak nia ‘bele lakon ninia liman-rohan’? (Rute 4:1, 6)

Iha Bíblia nia tempu, se mane ida neʼebé kaben maibé la iha oan no tuirmai nia mate, neʼe bele hamosu pergunta hanesan: Saida mak sei akontese ba ninia rai? Ninia família nia naran sei lakon ba nafatin ka lae? Moisés nia Ukun-Fuan hatán pergunta sira-neʼe.

Saida mak akontese ba rai neʼebé ninia naʼin faʼan tiha tanba kiak ka ninia naʼin mate? Mane neʼe nia maun-alin ka família neʼebé besik bele sosa fali rai neʼe atu rai neʼe labele sai fali ema seluk nian.​—Lev 25:23-28; Núm 27:8-11.

Oinsá atu mane neʼe nia naran la lakon bainhira nia mate? Ninia maun ka alin tenke kaben fali ho ninia feen atu nuneʼe bele iha oan neʼebé lori mane neʼe nia naran no hetan liman-rohan. Neʼe mak arranju neʼebé hatudu domin ba feto-faluk sira.​—Deut 25:5-7; Mt 22:23-28.

Hanoin toʼok Noemi nia ezemplu. Nia kaben ho Elimelec. Bainhira Elimelec no sira-nia oan-mane naʼin-rua mate, la iha tan mane ida iha família neʼebé bele tau matan ba Noemi. (Rute 1:1-5) Kuandu fila fali ba Judá, Noemi haruka ninia feto-foun Rute atu husu Boaz sosa fali sira-nia rai. Boaz mak Elimelec nia família besik. (Rute 2:1, 19, 20; 3:1-4) Maibé Boaz hatene katak iha família seluk neʼebé mós besik liu no Bíblia la temi ema neʼe nia naran. Mane neʼe hetan oportunidade primeiru atu deside kona-ba sosa fali Elimelec nia rai.​—Rute 3:9, 12, 13.

Foufoun mane neʼe hakarak atu ajuda. (Rute 4:1-4) Nia hatene katak nia presiza hasai osan atu bele sosa fali Elimelec nia rai, maibé nia mós hatene katak Noemi ferik liu ona atu bele koʼus oan. Tan neʼe, rai neʼe sei sai ninian no sai parte ba ninia liman-rohan, no bele lori benefísiu ba nia.

Maibé mane neʼe troka ninia hanoin kuandu nia hatene katak nia presiza kaben ho Rute. Nia dehan: “Haʼu labele sosa fali rai neʼe, tanba neʼe bele halakon haʼu-nia liman-rohan.” (Rute 4:5, 6) Tanbasá nia troka ninia hanoin?

Se mane neʼe ka ema seluk mak kaben ho Rute no Rute tuur-ahi oan-mane ida, oan neʼe mak sei hetan Elimelec nia rai nuʼudar liman-rohan. Oinsá neʼe bele “halakon” mane neʼe nia “liman-rohan”? Bíblia la fó sai razaun, maibé karik iha razaun balu.

• Primeiru, osan neʼebé mane neʼe gasta sei saugati deʼit, tanba ikusmai nia sei la hetan Elimelec nia rai. Rute nia oan-mane mak sei hetan rai neʼe.

• Segundu, nia iha responsabilidade atu tau matan ba Noemi no Rute nia presiza.

• Terseiru, se Rute iha tan oan seluk husi mane neʼe, oan neʼe mós sei simu liman-rohan hamutuk ho mane neʼe nia oan sira seluk.

• Haat, se mane neʼe la iha oan rasik, Rute nia oan-mane mak sei simu Elimelec no mane neʼe nia rai. Entaun kuandu mane neʼe mate, ninia rai sei entrega ba oan-mane neʼebé lori Elimelec nia naran, laʼós ninia oan. Mane neʼe lakohi lakon ninia liman-rohan tanba ajuda Noemi. Nia entrega responsabilidade neʼe ba família seluk neʼebé iha direitu atu sosa fali, neʼe mak Boaz. No Boaz hakarak ajuda tanba nia hakarak atu “mane neʼebé mate ona nia liman-rohan labele lakon”.​—Rute 4:10.

Mane neʼe hanoin deʼit kona-ba ninia liman-rohan no ninia naran. Nia hanoin an deʼit. Maski nia koko makaʼas atu ninia naran la lakon, maibé ohin loron ita la hatene ninia naran. Nia mós la hetan priviléjiu neʼebé Boaz hetan, neʼe mak atu sai parte ba Mesias nia liña jerasaun neʼebé temi iha Bíblia. Mane neʼe hetan rezultadu la diʼak tanba hanoin an deʼit no lakohi ajuda ema seluk.​—Mt 1:5; Lc 3:23, 32.