1. Paulo fó-hanoin ba ema Kristaun atu halo saida?

EMA Kristaun halai-taru atu manán moris. Maski foin mak komesa halai-taru ka halai ona ba tinan barak, ita tenke kontinua halai toʼo rohan. Apóstolu Paulo nia konsellu ba ema Kristaun iha Filipe sei fó ita aten-brani atu halai toʼo rohan. Ema balu neʼebé sai parte ba kongregasaun iha Filipe serbí ona Jeová ba tinan barak bainhira sira simu Paulo nia karta neʼe. Maski sira serbí ona Jeová ho laran-metin, maibé Paulo fó-hanoin ba sira katak sira tenke kontinua tahan hodi halai toʼo rohan. Nia hakarak sira halo tuir ninia ezemplu kona-ba “kontinua halai ho hakarak atu simu kolen”.​—Flp 3:14.

2. Paulo fó konsellu ba ema Filipe iha tempu neʼebé loos. Tanbasá?

² Paulo fó konsellu ba ema Filipe iha tempu neʼebé loos. Bainhira kongregasaun Filipe foin harii, ema fó-terus ba sira. Paulo no Silas simu konvite husi Maromak atu “hakat liu mai Masedónia”. Paulo no Silas toʼo iha Filipe maizumenus tinan 50 EC. (Após 16:9) Sira hasoru feto ida naran Lídia neʼebé “rona no Jeová loke nia laran atu simu” liafuan diʼak. (Após 16:14) Tuirmai nia no ninia umakain hetan batizmu. Maibé, Diabu komesa hamosu problema. Ema iha sidade lori Paulo no Silas bá hasoru majistradu tribunál, no duun katak sira hamosu problema. Rezultadu mak, ema baku Paulo no Silas, hatama sira ba komarka, no ikusmai haruka sira sai husi sidade. (Após 16:16-40) Paulo no Silas rende an ka lae? Lae! Oinsá ho irmaun-irmán sira iha kongregasaun foun neʼe? Sira mós la rende an. Karik sira hetan aten-brani tanba Paulo no Silas nia ezemplu.

3. Saida mak Paulo rekoñese, no ita sei koʼalia kona-ba pergunta saida deʼit?

³ Paulo hakaʼas an atu la rende an. (2 Kor 4:16) Maibé nia  hatene katak atu bele halai toʼo rohan, nia tenke tau fokus nafatin ba ninia kolen. Saida mak ita bele aprende husi Paulo nia ezemplu? Oinsá mak irmaun-irmán sira-nia ezemplu ohin loron hatudu katak ita bele tahan maski hasoru susar? Oinsá mak ita-nia esperansa kona-ba futuru bele hametin ita atu nunka rende an?

4. Oinsá Paulo kontinua okupadu atu halo Jeová nia serbisu maski hasoru susar?

⁴ Hanoin toʼok kona-ba buat hotu neʼebé Paulo halo bainhira nia hakerek karta ba ema Filipe. Momentu neʼe nia hela iha uma ida iha Roma nuʼudar dadur. Nia labele sai husi uma atu bá haklaken. Maibé, nia kontinua okupadu atu haklaken ba ema neʼebé vizita nia no hakerek karta ba kongregasaun sira neʼebé dook. Nuneʼe mós, ohin loron ema Kristaun barak neʼebé labele sai husi uma hakaʼas an atu fahe liafuan diʼak ba ema neʼebé mai sira-nia uma. Sira mós hakerek karta ba uma-naʼin sira neʼebé irmaun-irmán sira labele hasoru kuandu haklaken.

5. Tuir Paulo nia liafuan iha Filipe 3:12-14, saida mak ajuda nia atu tau fokus nafatin ba ninia kolen?

⁵ Paulo la husik buat ruma dada ninia atensaun, inklui buat diʼak ka aat neʼebé uluk nia halo. Tuir loloos, nia hatete katak nia tenke ‘haluha buat sira neʼebé iha kotuk’, atu nuneʼe nia bele “hakaʼas an atu hetan buat sira neʼebé iha oin”, ka halai toʼo rohan. (Lee Filipe 3:12-14.) Saida mak bele dada Paulo nia atensaun? Primeiru, Paulo hetan susesu barak antes nia sai ema Kristaun. Maibé, nia “haree buat sira-neʼe nuʼudar foʼer deʼit”. (Flp 3:3-8) Segundu, maski karik nia sente sala tanba uluk nia fó-terus ba ema Kristaun, maibé nia la husik ida-neʼe hapara nia serbí Jeová. Terseiru, nia la sente katak nia halo ona buat barak ba Jeová no la presiza hakaʼas an tan. Paulo halo serbisu barak ba Maromak maski nia tama komarka, ema baku nia, tuda nia, ró neʼebé nia saʼe rahun, no nia la iha ai-han no roupa. (2 Kor 11:23-27) Maski Paulo halo ona buat barak no hasoru susar barak, nia hatene katak nia tenke kontinua hakaʼas an. Ita mós tenke halo hanesan neʼe.

6. Saida mak “buat sira neʼebé iha kotuk” neʼebé ita presiza haluha?

⁶ Oinsá mak ita bele banati-tuir Paulo kona-ba ‘haluha buat sira neʼebé iha kotuk’? Karik ita balu fó sala ba ita-nia an tanba sala neʼebé uluk ita halo. Se nuneʼe, diʼak atu estuda mesak hodi tau fokus ba Kristu nia sakrifísiu. Se ita estuda, medita, no halo orasaun kona-ba neʼe, karik neʼe sei ajuda ita atu sente kmaan. Karik ita mós sei la fó sala tan ba ita-nia an kona-ba sala neʼebé Jeová perdua ona. Hanoin toʼok kona-ba lisaun seluk neʼebé ita bele aprende husi Paulo. Ita balu karik husik ona serbisu diʼak tanba tau uluk Maromak nia hakarak. Se nuneʼe, ita bele hatudu katak ita haluha “buat sira neʼebé iha kotuk” hodi la hanoin fali buat neʼebé karik ita bele iha. (Núm 11:4-6; Ecle 7:10) “Buat sira neʼebé iha kotuk” mós bele inklui buat neʼebé ita halo ona ba Jeová ka susar neʼebé uluk ita tahan hasoru. Tuir loloos, hodi hanoin fali oinsá Jeová haraik ona bensaun no apoia ita ba tinan barak, neʼe bele halo ita hakbesik liután ba nia. Maibé, ita lakohi hanoin katak buat neʼebé ita halo ona ba Jeová mak toʼo ona.​—1 Kor 15:58.

7. Tuir 1 Korinto 9:24-27, ita presiza halo saida atu bele halai toʼo rohan atu manán moris? Fó toʼok ezemplu.

 ⁷ Paulo komprende didiʼak Jesus nia liafuan neʼebé dehan: “Hakaʼas an makaʼas.” (Lc 13:23, 24) Paulo hatene katak, hanesan Kristu, nia tenke hakaʼas an toʼo rohan. Tan neʼe nia kompara ema Kristaun nia moris hanesan halai-taru. (Lee 1 Korinto 9:24-27.) Ema neʼebé halai-taru kontinua fokus atu halai toʼo rohan no la husik buat ruma dada ninia atensaun. Porezemplu, ema neʼebé halai-taru iha sidade karik halai liuhusi dalan neʼebé iha loja barak no mós buat seluk neʼebé bele dada ninia atensaun. Tuir Ita-nia hanoin, ema neʼebé halai-taru sei para atu haree ba sasán sira iha loja ka lae? Se nia hakarak manán, nia sei la halo ida-neʼe. Iha halai-taru atu manán moris, ita mós tenke hasees an husi buat neʼebé bele dada ita-nia atensaun. Se ita tau fokus ba ita-nia kolen no hakaʼas an atu serbí Jeová hanesan Paulo, ita sei simu kolen.

8. Ita sei koʼalia kona-ba susar tolu saida?

⁸ Iha susar tolu neʼebé bele halo ita laran-kraik. Neʼe mak hein kleur ba ita-nia esperansa atu sai loos, sai fraku tanba sai ferik ka katuas, no hasoru susar ba tempu kleur. Ita bele hetan benefísiu hodi aprende oinsá irmaun-irmán seluk tahan situasaun sira-neʼe.—Flp 3:17.

9. Hein kleur ba ita-nia esperansa atu sai loos bele fó impaktu saida ba ita?

⁹ Hein kleur ba ita-nia esperansa atu sai loos. Baibain ita hakarak atu buat diʼak neʼebé Jeová promete ona sai loos. Jeová nia profeta ida naran Habakuk mós sente hanesan neʼe. Nia fó sai ninia hakarak atu Jeová halakon situasaun aat iha Judá, no Jeová haruka nia atu “hein nafatin”. (Hab 2:3) Maibé, bainhira buat neʼebé ita hein haree hanesan demora atu sai loos, karik ida-neʼe bele hamenus ita-nia laran-manas. Karik ita mós sai laran-kraik. (Prov 13:12) Neʼe akontese ba irmaun-irmán balu maizumenus besik tinan 1914. Iha tempu neʼebá,  ema Kristaun barak neʼebé iha esperansa atu bá lalehan hein atu simu sira-nia kolen iha tinan 1914. Bainhira neʼe la akontese, oinsá mak sira bele tahan situasaun neʼe?

10. Oinsá mak feen-laʼen ida tahan bainhira sira-nia esperansa la sai loos?

¹⁰ Hanoin toʼok ezemplu husi irmaun no irmán laran-metin neʼebé hasoru susar neʼe. Irmaun Royal Spatz hetan batizmu iha tinan 1908 bainhira nia idade 20. Nia fiar metin katak lakleur tan nia sei simu ninia kolen atu bá lalehan. Tuir loloos, bainhira nia deside atu kaben iha tinan 1911, nia hatete ba ninia namorada Pearl: “Ó hatene ona buat neʼebé sei akontese iha tinan 1914. Se ita atu kaben, diʼak atu halo neʼe lalais!” Sira rende an bainhira la simu sira-nia kolen iha tinan 1914 ka lae? Lae, tanba sira-nia fokus mak atu halo Jeová nia hakarak ho laran-metin, laʼós atu hetan kolen. Sira hakaʼas an atu kontinua tahan hodi halai toʼo rohan. Royal no Pearl nafatin serbí Jeová ho laran-metin ba tinan barak toʼo sira mate. Klaru katak ita hein namanas atu haree Jeová halo ninia naran sai santu, hatudu katak ninia dalan atu ukun mak loos no kumpre ninia promesa hotu. Tan neʼe fiar metin bá katak buat sira-neʼe sei akontese tuir tempu neʼebé Jeová deside ona. Antes tempu neʼe mai, diʼak atu ita hotu kontinua okupadu atu serbí Maromak, no nunka sente laran-kraik tanba ita-nia esperansa seidauk sai loos.

11-12. Tanbasá ita bele kontinua serbí Jeová ho laran-metin maski ita sai ferik ka katuas? Fó toʼok ezemplu.

¹¹ Sai fraku tanba sai ferik ka katuas. Ema neʼebé halai-taru presiza forsa atu halai, maibé ita la presiza forsa fíziku atu hametin ita-nia fiar ba Jeová no serbí nia ho laran-manas. Tuir loloos, ema barak neʼebé sai fraku tanba sai ferik ka katuas kontinua hakaʼas an atu serbí Jeová ho kbiit tomak. (2 Kor 4:16) Porezemplu, irmaun Arthur Secord neʼebé idade 88, serbí ona iha Betel ba tinan 55. Agora nia saúde la diʼak. Loron ida, irmán ida hakbesik ba ninia kama atu tau matan ba nia. Irmán neʼe hateke ba irmaun Arthur no ho domin dehan: “Irmaun Arthur, ita halo ona buat barak loos iha Jeová nia serbisu.” Maibé, Arthur la tau fokus ba buat neʼebé nia halo ona. Nia hateke ba irmán neʼe no koʼalia ho oin-midar: “Sin, neʼe loos. Maibé laʼós buat neʼebé ita halo ona mak importante. Tuir loloos, importante liu mak atu kontinua laran-metin.”

¹² Karik Ita serbí ona Jeová ba tinan barak no agora Ita-nia saúde hanetik Ita atu halo buat barak hanesan uluk. Se nuneʼe,  keta laran-kraik. Fiar metin bá katak Jeová hafolin serbisu neʼebé uluk Ita halo ho laran-metin. (Ebr 6:10) No kona-ba agora, hanoin-hetan katak ita-nia laran-metin ba Jeová la depende ba serbisu hira mak ita bele halo. Maibé, ita hatudu ita-nia laran-metin ba nia hodi iha hanoin pozitivu no halo buat neʼebé ita bele tuir ita-nia kbiit. (Kol 3:23) Jeová komprende ita-nia limitadu no la husu ita atu halo liu fali ita-nia kbiit.​—Mc 12:43, 44.

13. Oinsá Anatoly no Lidiya nia esperiénsia fó aten-brani ba ita atu kontinua serbí Jeová maski hasoru susar barak?

¹³ Hasoru susar ba tempu kleur. Jeová nia atan balu tahan susar no ema fó-terus ba sira durante tinan barak ona. Porezemplu, bainhira Anatoly Melnik * tinan 12, ema kaer ninia aman, hatama ba komarka no sai dadur iha rai-Sibéria. Fatin neʼe dook kilómetru 7.000 liu husi rai-Moldova, ninia família nia hela-fatin. Tinan ida liutiha, Anatoly ho ninia inan, no mós ninia avó sira sai dadur iha rai-Sibéria. Liutiha tempu balu, sira bele tuir reuniaun iha suku seluk, maibé rai-malirin loos no sira tenke laʼo iha jelu ba kilómetru 30. Ikusmai, irmaun Anatoly tama komarka durante tinan tolu, dook husi ninia feen Lidiya, no sira-nia oan-feto neʼebé tinan ida. Maski hasoru susar ba tinan barak, Anatoly no ninia família kontinua hamriik metin. Agora Anatoly tinan 82, no nia serbí nuʼudar membru ba Komisaun ba Sukursál iha Ázia Sentrál. Hanesan Anatoly no Lidiya, mai ita hakaʼas an atu serbí Jeová, no kontinua tahan.​—Gal 6:9.

14. Paulo hatene katak nia tenke halo saida atu bele simu ninia kolen?

¹⁴ Paulo fiar metin katak nia bele halai toʼo rohan no simu ninia kolen. Nuʼudar ema Kristaun neʼebé iha esperansa atu bá lalehan, nia hein namanas atu ‘simu kolen neʼebé Maromak bolu nia atu simu, katak moris iha lalehan’. Maibé, atu kumpre ida-neʼe, nia hatene katak nia tenke “kontinua halai”. (Flp 3:14) Paulo uza ai-knanoik neʼebé furak atu ajuda ema Kristaun iha Filipe atu kontinua fokus ba sira-nia kolen.

15. Oinsá Paulo uza ai-knanoik kona-ba sai sidadaun atu anima ema Kristaun iha Filipe?

¹⁵ Paulo fó-hanoin ba ema Filipe sira katak ikusmai sira sei sai sidadaun lalehan  nian. (Flp 3:20, nota) Tanbasá sira tenke kontinua hanoin kona-ba neʼe? Iha tempu neʼebá, ema hakarak tebes atu sai sidadaun Roma nian. * Maibé, ema Kristaun neʼebé iha esperansa atu bá lalehan, sei sai sidadaun ba governu neʼebé diʼak liu, no hetan benefísiu barak liu. Sai sidadaun iha Maromak nia governu mak folin-boot liu se kompara ho sai sidadaun Roma nian. Tan razaun neʼe, Paulo anima ema Filipe sira atu “hatudu hahalok diʼak nuʼudar sidadaun tuir liafuan diʼak kona-ba Kristu”. (Flp 1:27, nota) Ohin loron, Kristu nia alin sira, hatudu ezemplu diʼak tanba kontinua halai hodi hetan kolen atu moris ba nafatin iha lalehan.

16. Maski ita iha esperansa atu moris iha lalehan ka iha rai, tuir Filipe 4:6, 7 ita tenke kontinua halo saida?

¹⁶ Maski ita-nia esperansa mak atu moris ba nafatin iha lalehan ka iha rai, ita hotu tenke kontinua halai atu hetan ita-nia kolen. Maski ita tahan hasoru susar oioin, ita labele hateke ba kotuk ka husik buat ruma hanetik ita atu serbí Jeová. (Flp 3:16) Karik ita sente hanesan ita hein kleur ba ita-nia esperansa atu sai loos, ka sai fraku tanba sai ferik-katuas, ka karik ita hasoru susar ka ema fó-terus ba ita durante tempu kleur. Maski nuneʼe, “keta hanoin resin kona-ba buat ida”. Maibé halo orasaun no harohan ba Maromak, no nia sei fó ita dame neʼebé ita nunka imajina.​—Lee Filipe 4:6, 7.

17. Ita sei aprende kona-ba saida iha lisaun tuirmai?

¹⁷ Hanesan ema neʼebé halai-taru hakaʼas an makaʼas bainhira besik ona rohan, ita mós presiza tau fokus ba ita-nia objetivu atu halai toʼo rohan hodi manán moris. Ita hakarak kontinua halo ida-neʼe agora tuir ita-nia forsa no situasaun. Saida mak ita presiza halo atu bele kontinua halai iha dalan neʼebé loos? Lisaun tuirmai sei ajuda ita atu “buka-hatene loloos buat sira neʼebé importante liu”.​—Flp 1:9, 10.