Sira reprezenta forsa husi lalehan neʼebé hola parte hodi harahun Jeruzalein iha tempu uluk no mós sira neʼebé sei hola parte atu harahun Satanás nia mundu aat neʼe iha Armajedón. Tanbasá mak halo mudansa ba esplikasaun neʼe?

Antes tinan 607 molok Kristu, Jeová halo Ezequiel haree vizaun ida kona-ba buat neʼebé akontese iha Jeruzalein antes sidade neʼe naksobu. Iha Ezequiel nia vizaun, nia haree buat aat barak mak akontese iha sidade neʼe. Tuirmai, nia haree iha ema naʼin-neen, ida-idak kaer “armas atu harahun nian iha sira-nia liman”. Nia mós haree iha ema ida tan hamutuk ho sira, no nia “hatais roupa mutin”. Iha ninia liman, nia kaer “sekretáriu nia tinta-fatin”. (Ezequiel [Yehezkiel] 8:6-12; 9:2, 3) Jeová haruka ema neʼe atu tama ba sidade laran “no tau marka ba ema hotu nia reen-toos neʼebé tanis no halerik tan buat aat hotu neʼebé akontese daudauk iha sidade neʼe”. Tuirmai, Jeová haruka ema naʼin-neen neʼebé kaer armas harahun nian atu oho hotu ema neʼebé laiha marka husi sidade neʼe. (Ezequiel [Yehezkiel] 9:4-7) Ita bele aprende saida husi vizaun neʼe, no ema neʼebé kaer sekretáriu nia tinta-fatin neʼe mak sé?

Ezequiel haree vizaun neʼe iha tinan 612 molok Kristu no foufoun vizaun neʼe sai realidade iha tinan 607 molok Kristu. Iha tempu neʼebá Jeová husik soldadu husi Babilónia harahun Jeruzalein. Liuhusi ema Babilónia sira-neʼe mak Jeová fó kastigu ba ninia povu neʼebé fila kotuk ba nia. (Jeremias [Yeremia] 25:9, 15-18) Maibé saida mak akontese ba ema judeu seluk neʼebé laran-loos, sira neʼebé la apoia buat aat sira neʼebé akontese iha Jeruzalein? Jeová halo arranju ida hodi salva ema sira-neʼe.

Iha vizaun neʼe Ezequiel la hola parte atu tau marka ba ema ka harahun sidade Jeruzalein. Maibé anju sira mak dirije knaar atu harahun sidade neʼe. Liuhusi vizaun neʼe ita bele hatene buat saida mak akontese iha lalehan. Husi lalehan Jeová fó mandamentu ba ninia anju sira hodi halakon ema aat no oinsá atu salva ema laran-loos sira. *

Vizaun neʼe mós sei sai realidade iha futuru. Uluk ita esplika katak ema neʼebé kaer sekretáriu nia tinta-fatin mak reprezenta ema kose-mina neʼebé sei moris hela iha rai. No liuhusi serbisu haklaken mak ita marka daudauk ema neʼebé rona no simu ita-nia mensajen atu hetan salvasaun iha futuru. Maibé tanba komprende liután kona-ba eskritura balu, neʼe book ita atu halo mudansa balu kona-ba esplikasaun neʼe. Tuir Mateus 25:31-33, Jesus mak ida-neʼebé sei tesi lia ba ema durante tempu terus boot nian iha futuru. Iha tempu neʼebá, nia mak sei haketak ema nuʼudar bibi-malae atu hetan salvasaun, no bibi-timur ba mate.

Entaun, ita aprende saida husi Ezequiel nia vizaun neʼe? Ita aprende kona-ba pontu importante lima, neʼe mak:

1. Antes Jeruzalein naksobu, Ezequiel, Jeremias, no Isaías fó avizu ba ema kona-ba saida mak sei akontese ba sidade neʼe. Hanesan neʼe mós ohin loron, Jeová uza grupu kiʼik ida husi ema kose-mina atu hanorin no fó avizu ba ema seluk antes terus boot hahú. Tuir loloos, Maromak nia povu hotu, neʼe mak Naʼi nia atan sira seluk mós hola parte iha serbisu atu fó avizu ba ema.—Mateus 24:45-47.

2. Ezequiel la halaʼo knaar atu tau marka ba ema hodi hetan salvasaun. Ohin loron mós hanesan.  Ita-nia knaar laʼós atu tau marka ba ema, maibé haklaken deʼit Jeová nia mensajen no fó avizu ba ema kona-ba buat saida mak sei akontese iha futuru. Serbisu haklaken neʼe hetan apoiu husi anju sira.—Apokalipse 14:6.

3. Iha Ezequiel nia tempu, ema la simu marka neʼebé tebes iha reen-toos. Ohin loron mós hanesan. Entaun ema presiza halo saida hodi simu marka simbóliku salvasaun nian atu moris liu terus boot? Sira presiza rona ba avizu, haburas hahalok diʼak, dedika sira-nia moris ba Jeová, no apoia ema kose-mina hodi haklaken Maromak nia mensajen. (Mateus 25:35-40) Se sira halo tuir buat sira-neʼe, iha tempu terus boot, sira sei simu marka atu hetan salvasaun ba sira-nia moris.

4. Ema neʼebé kaer sekretáriu nia tinta-fatin reprezenta Jesus. Tan neʼe mak iha tempu terus boot, Jesus mak sei tau marka ba ema-lubun boot sira bainhira nia haketak bibi-malae husi bibi-timur. Tuirmai sira neʼebé simu marka sei simu moris rohan-laek iha rai.—Mateus 25:34, 46. *

5. Ema naʼin-neen neʼebé kaer armas reprezenta Jesus ho ninia tropa husi lalehan. Lakleur tan sira sei halakon hotu nasaun sira no buat aat hotu.—Ezequiel (Yehezkiel) 9:2, 6, 7; Apokalipse 19:11-21.

Informasaun sira-neʼe ajuda ita atu tau fiar liután ba Jeová katak nia sei halakon ema aat deʼit. (2 Pedro 2:9; 3:9) No neʼe mós fó-hanoin ba ita katak importante tebes atu haklaken. Ema hotu presiza duni atu rona Maromak nia avizu antes mundu nia rohan toʼo mai!—Mateus 24:14.