1. Tanbasá Jeová mak Badain Sanan-Rai neʼebé boot liu hotu?

IHA fulan-Novembru 2010 iha rai-Inglaterra, ema fó folin atu faʼan vazu antigu ida husi rai-Xina neʼebé halo husi rai-mean ho presu besik dolar millaun 70. Ida-neʼe halo ita hakfodak tanba badain bele uza rai-mean baibain neʼebé folin-laek hodi halo vazu furak neʼebé folin aas tebes. Maibé, se ita kompara badain neʼe ho Jeová, Jeová mak badain neʼebé iha kbiit liu hotu. Tanba Bíblia dehan katak Jeová uza “rai-rahun iha rai” hodi halo rai-mean neʼe sai mane perfeitu ida, naran Adão. Jeová fó nia kbiit atu bele haleno ninia hahalok furak sira. (Gênesis [Kejadian] 2:7) Bíblia bolu mane neʼe nuʼudar “Maromak nia oan”.—Lucas 3:38.

2, 3. Oinsá mak ita bele banati-tuir ezemplu husi ema Izraél neʼebé arrepende an?

² Maibé bainhira Adão halo sala kontra ninia Kriadór, nia la sai tan Maromak nia oan. Maski nuneʼe, Adão nia oan no bei-oan barak hili nafatin Jeová atu sai sira-nia Ukun-Naʼin. (Ebreu 12:1) Sira haraik-an tebes ba sira-nia Kriadór, hodi nuneʼe mak sira hatudu katak sira hakarak Maromak mak sai sira-nia Aman ka Badain Sanan-Rai nian, laʼós Satanás. (João 8:44) Sira-nia laran-metin ba Maromak halo ita hanoin fali liafuan husi ema Izraél neʼebé arrepende an ba Jeová, sira dehan: “Oh Jeová, Ita mak ami-nia Aman. Ami mak rai-mean, no Ita  mak ami-nia Badain Sanan-Rai nian, ami hotu mak serbisu husi Ita-nia liman.”—Isaías (Yesaya) 64:8.

³ Ohin loron, ema neʼebé adora Jeová iha dalan neʼebé loos mós hakaʼas an atu hatudu haraik-an no halo tuir Jeová. Sira sente katak bolu Jeová nuʼudar Aman mak priviléjiu boot ida ba sira, no sira hakarak nia mak sai sira-nia Badain Sanan-Rai nian. Ita sente ita mak rai-mean neʼebé mamar hodi Maromak bele halo ita sai vazu neʼebé folin-boot tebes ba nia ka lae? Ita iha pasiénsia atu haree irmaun-irmán sira nuʼudar buat neʼebé Jeová kumu hela no seidauk forma toʼo ramata ka lae? Atu ajuda ita hodi bele iha hanoin neʼebé loos, mai ita koʼalia kona-ba oinsá mak Jeová hili ema neʼebé nia atu forma, tanbasá mak nia hakarak hadiʼa sira-nia hahalok, no oinsá mak nia kumu sira hanesan rai-mean.

4. Oinsá mak Jeová hili ema sira neʼebé nia dada ba ninia an? Fó toʼok ezemplu balu.

⁴ Bainhira Jeová haree ema, nia la haree husi liʼur, maibé nia haree husi laran ema neʼe hanesan saida. (Lee 1 Samuel 16:7b. ^[1]) Ita bele haree ezemplu ida husi dalan neʼebé nia forma kongregasaun kristaun iha tempu uluk. Iha tempu neʼebá, nia dada ba ninia an no ba ninia Oan-Mane, ema oioin neʼebé ema seluk la hafolin. (João 6:44) Ezemplu ida mak kona-ba ema farizeu ida naran Saul. Foufoun nia mak ema neʼebé “koʼalia kontra Maromak no fó-terus no koʼalia aat ninia povu”. (1 Timóteo 1:13) Maibé kuandu Jeová haree Saul nia laran, Jeová la sente katak nia mak rai-mean neʼebé folin-laek. (Provérbios [Amsal] 17:3) Nia haree Saul nuʼudar buat neʼebé bele forma sai sanan-rai folin-boot ida hodi haklaken Maromak nia naran “ba nasaun sira, liurai sira, no ba Izraél nia oan sira”. (Apóstolu 9:15) Iha mós ema seluk neʼebé Jeová hili hodi forma sai buat neʼebé espesiál ba nia atu uza, sira mak hanesan ema neʼebé uluk lanu-teen, morál aat, no naʼok-teen. (Roma 9:21; 1 Korinto 6:9-11) Bainhira ema sira-neʼe estuda Maromak nia Liafuan, neʼe halo sira tau fiar liután ba Jeová no husik Jeová mak forma sira-nia moris.

5, 6. Oinsá mak fiar ba Jeová nuʼudar ita-nia Badain Sanan-Rai nian bele troka ita-nia sentimentu kona-ba (a) ema iha ita-nia haklaken-fatin? (b) ita-nia irmaun-irmán sira?

⁵ Ita fiar katak Jeová iha duni kbiit atu haree ema nia laran no dada ema neʼebé loos. Tan neʼe mak ita labele tesi lia ba ema iha ita-nia haklaken-fatin ka husi ita-nia kongregasaun. Ita haree toʼok Michael nia ezemplu. Uluk, nia hasoru beibeik ona Testemuña ba Jeová. Nia dehan: “Haʼu sempre lakohi simu no finje la liga sira. Haʼu hatudu hahalok aat tebes ba sira! Maibé ikusmai haʼu hasoru família ida no haʼu admira tebes tanba sira iha hahalok neʼebé diʼak. Tuirmai, iha loron ida haʼu hakfodak, tanba haʼu foin hatene katak sira mós Testemuña ba Jeová! Sira-nia hahalok book haʼu atu buka-hatene kona-ba tansá mak haʼu la gosta Testemuña. Afinál haʼu foin hatene katak haʼu la gosta sira tanba haʼu rasik mak laiha interese atu buka-hatene no rona deʼit ema nia koʼalia, maibé neʼe la tuir realidade.” Tanba Michael hakarak buka-hatene liután kona-ba sira, nia hahú estuda Bíblia. Ikusmai nia hetan batizmu no serbí Jeová tempu-tomak.

⁶ Se ita mak rekoñese katak Jeová mak ita-nia Badain Sanan-Rai nian, neʼe bele troka ita-nia sentimentu kona-ba ita-nia irmaun-irmán sira. Ida-neʼe sei ajuda ita atu komprende katak sira seidauk perfeitu. Jeová mós haree sira hanesan neʼe. Nia haree sira-nia laran no nia nunka fokus kona-ba sira-nia hahalok neʼebé la perfeitu, tanba nia hatene katak ema sira-neʼe bele troka iha futuru. (Salmo [Mazmur] 130:3) Ita bele banati-tuir Jeová nia haree kona-ba irmaun-irmán sira. Ita mós bele serbisu hamutuk ho ita-nia Badain Sanan-Rai nian atu ajuda ita-nia irmaun-irmán sira laʼo ba oin. (1 Tesalónika 5:14, 15) Liuliu katuas kongregasaun sira tenke hatudu ezemplu neʼebé diʼak iha dalan sira-neʼe.—Éfeso 4:8, 11-13.

7. Tanbasá mak Ita hafolin dixiplina husi Jeová?

⁷ Karik ita rona ona ema koʼalia hanesan neʼe: ‘Agora iha oan ona mak haʼu foin komprende katak dixiplina neʼebé uluk inan-aman fó, iha folin-boot tebes ba haʼu.’ Loos duni, bainhira ita sai boot mak ita foin hafolin dixiplina, tanba dixiplina mak hahalok domin ida ba ita. (Lee Ebreu 12:5, 6, 11.) Jeová hadomi tebes ita hanesan ninia oan, tan neʼe mak nia fó dixiplina ka hadiʼa ita-nia hahalok ho pasiénsia. Nia halo nuneʼe tanba nia hakarak ita atu sai matenek no kontente hodi hadomi fali nia hanesan ita-nia Aman. (Provérbios [Amsal] 23:15) Nia la gosta atu haree ita terus, no nia mós la gosta haree ita mate husi sala neʼebé ita simu husi Adão.—Éfeso 2:2, 3.

8, 9. Ohin loron, Jeová uza saida hodi hanorin ita, no oinsá mak Jeová sei hanorin ita liután iha futuru?

⁸ Antes ita koñese Jeová, karik ita iha hahalok barak neʼebé Jeová la gosta. Maibé Jeová ajuda ita hadiʼa hahalok sira-neʼe no agora ita iha fali hahalok neʼebé furak tebes. (Isaías [Yesaya] 11:6-8; Koloso 3:9, 10) Ohin loron, Jeová uza paraízu espirituál nian hodi hadiʼa hela ita-nia hahalok sira. Neʼe mak kondisaun neʼebé úniku tebes iha Maromak nia povu nia leet, tanba iha paraízu neʼe ita sente seguru no hakmatek maski mundu neʼe aat tebes. Ita balu mai husi família neʼebé laiha domin no laiha unidade, maibé iha paraízu espirituál neʼe, agora ita bele sente fali domin husi ita-nia irmaun-irmán sira. (João 13:35) Tan neʼe ita mós aprende oinsá atu hatudu fali domin ba ema seluk. Maibé importante liu mak agora ita hatene ona Jeová no ita mós sente nia hadomi ita hanesan aman ida.—Tiago 4:8.

⁹ Iha mundu foun, ita sei hetan bensaun barak liután husi paraízu espirituál neʼe. No iha tempu neʼebá, Maromak nia governu sei ukun mundu tomak hodi sai paraízu. Ita sei sai haksolok tebes tanba Jeová sei kontinua atu hadiʼa ita-nia hahalok no hanorin ita. (Isaías [Yesaya] 11:9) Jeová mós sei halo ita-nia neon no isin sai perfeitu fali hodi ita bele komprende didiʼak no halo tuir ninia matadalan sira iha dalan neʼebé perfeitu. Tan neʼe, mai ita kontinua husik Jeová atu hadiʼa ita-nia hahalok sira, no mai ita hatudu ba Jeová katak ita hafolin duni dalan neʼebé nia ajuda ita ho domin.—Provérbios (Amsal) 3:11, 12.

10. Oinsá mak Jesus hatudu sai Badain Sanan-Rai Boot Liu Hotu nia pasiénsia no matenek?

¹⁰ Jeová mak hanesan badain sanan-rai neʼebé matenek tebes. Nia komprende ita ida-idak. Nia hatene ita-nia fraku, no nia kumu ita hanesan rai-mean tuir ita-nia situasaun ida-idak. (Lee Salmo [Mazmur] 103:10-14. ^[2]) Ita bele hatene oinsá Jeová sente kona-ba ita liuhusi Jesus. Hanoin fali kona-ba oinsá Jesus sente bainhira ninia apóstolu sira hatudu sira-nia fraku hodi haksesuk malu kona-ba pozisaun. Se ita mak iha neʼebá, ita sente oinsá kona-ba apóstolu sira-nia hahalok? Karik ita bele sente katak sira mak ema neʼebé ulun-toos. Maibé Jesus la sente hanesan neʼe kona-ba sira. Jesus hatene katak se nia mak fó konsellu iha dalan neʼebé diʼak no ho pasiénsia ba sira, no se sira mak halo tuir ninia haraik-an, sira-nia hahalok neʼe bele kumu sai hahalok neʼebé diʼak. (Marcos 9:33-37; 10:37, 41-45; Lucas 22:24-27) Bainhira Jesus hetan tiha moris-hiʼas, apóstolu sira-neʼe simu espíritu santu husi Maromak, no sira la hanoin tan kona-ba sé mak boot liu. Maibé sira fó atensaun liu kona-ba halo serbisu neʼebé Jesus fó ona ba sira atu halo.—Apóstolu 5:42.

11. Iha dalan saida deʼit mak David hanesan rai-mean neʼebé mamar, no oinsá mak ita bele banati-tuir ninia ezemplu?

¹¹ Ohin loron, Jeová uza ninia Liafuan, espíritu santu, no kongregasaun kristaun hodi hadiʼa ita-nia hahalok. Oinsá mak Bíblia bele ajuda ita? Ita presiza lee no hanoin kleʼan no husu Jeová ajuda ita atu uza informasaun neʼebé ita lee iha ita-nia moris. Liurai David hatete: “Haʼu hanoin-hetan Ita bainhira haʼu iha haʼu-nia kama leten,  haʼu hanoin kleʼan kona-ba Ita durante kalan-boot.” (Salmo [Mazmur] 63:6) Nia mós dehan: “Haʼu sei hahiʼi Jeová, ida neʼebé fó ona konsellu ba haʼu. Durante kalan mós haʼu-nia hanoin sira korrije haʼu.” (Salmo [Mazmur] 16:7) David hanoin kleʼan kona-ba Jeová nia konsellu no nia husik konsellu sira-neʼe hodi hadiʼa ninia hanoin no sentimentu. Dala ruma konsellu sira-neʼe makaʼas, maibé nia simu nafatin. (2 Samuel 12:1-13) David hatudu duni ezemplu neʼebé diʼak ba ita kona-ba haraik-an no hodi halo tuir Jeová. Tan neʼe, husu ba ita-nia an: ‘Bainhira haʼu lee Bíblia, haʼu medita kona-ba buat neʼebé haʼu lee, no haʼu husik konsellu husi Maromak atu troka haʼu-nia hanoin no sentimentu ka lae? Haʼu bele halo liután neʼe ka lae?’—Salmo (Mazmur) 1:2, 3.

12, 13. Oinsá mak Jeová uza espíritu santu no kongregasaun atu hadiʼa ita-nia hahalok sira?

¹² Espíritu santu mós bele ajuda ita iha dalan oioin. Porezemplu, espíritu santu bele ajuda ita atu iha Jesus nia hahalok sira, tanba hahalok sira-neʼe mai husi Maromak nia espíritu santu. (Galásia 5:22, 23) Hahalok ida husi espíritu santu mak domin. Ita hadomi Maromak no hakarak halo tuir nia no husik nia hadiʼa ita-nia moris tanba ita hatene katak ninia mandamentu sira diʼak ba ita. Espíritu santu mós bele fó kbiit ba ita atu sees husi mundu nia hahalok no hanoin sira. (Éfeso 2:2) Bainhira apóstolu Paulo sei joven, nia halo tuir hahalok husi ema judeu sira-nia ulun-naʼin relijiaun neʼebé foti-an tebes. Maibé espíritu santu ajuda nia troka ninia hahalok sira-neʼe. Nia hatete: “Tanba iha buat hotu haʼu hetan forsa liuhusi nia neʼebé fó kbiit mai haʼu.” (Filipe 4:13) Tan neʼe mak ita presiza husu beibeik espíritu santu, no Jeová sei hatán ba ita-nia orasaun sira-neʼe.—Salmo (Mazmur) 10:17.

¹³ Jeová mós uza kongregasaun no katuas sira atu ajuda hadiʼa ita-nia hahalok sira. Porezemplu, se katuas sira mak haree katak ita iha fraku ruma, sira sei hakaʼas an atu ajuda ita, maibé laʼós ho sira-nia matenek rasik. (Galásia 6:1) Antes atu ajuda ita, ho haraik-an sira halo orasaun uluk ba Jeová hodi husu nia atu ajuda sira komprende ita-nia situasaun no iha matenek. Tuirmai sira uza Bíblia no ita-nia livru sira atu buka informasaun neʼebé bele ajuda ita. Tan neʼe mak bainhira katuas ida mai atu fó konsellu diʼak ho domin  ba ita, porezemplu, kona-ba ita-nia hatais, ita tenke hanoin-hetan katak liuhusi konsellu sira-neʼe mak Maromak hatudu domin ba ita. Se ita mak simu konsellu sira-neʼe, ita hatudu katak ita mak hanesan rai-mean neʼebé mamar hodi Jeová bele kumu, no neʼe sei lori diʼak ba ita-nia an.

14. Maski Jeová iha kbiit atu kontrola rai-mean sira, maibé oinsá mak nia hatudu respeitu ba ita-nia direitu atu hili?

¹⁴ Bainhira ita hatene ona oinsá mak Jeová hadiʼa ita-nia hahalok, neʼe bele ajuda ita atu iha relasaun neʼebé diʼak ho irmaun-irmán sira, no troka mós ita-nia hanoin kona-ba ema iha ita-nia haklaken-fatin, inklui mós ita-nia estudante Bíblia. Iha tempu antigu, bainhira badain ida atu buti rai-mean, nia la keʼe rai-mean no forma kedas rai-mean neʼe. Nia presiza hamoos, hasai fatuk no buat foʼer seluk husi rai-mean. Jeová, Badain Sanan-Rai neʼebé Boot Liu mós halo hanesan neʼe bainhira atu ajuda ema troka sira-nia hahalok. Nia la obriga ema atu troka kedas sira-nia hahalok tanba nia iha respeitu ba ema nia direitu atu hili. Nia hatudu sai ninia matadalan neʼebé santu ba ema liuhusi hakat ba hakat. Nia husik ema mak deside atu halo tuir ninia matadalan sira-neʼe.

15, 16. Oinsá mak estudante Bíblia sira bele hatudu katak sira hakarak husik Jeová atu hadiʼa sira-nia moris? Fó toʼok ezemplu.

¹⁵ Haree toʼok ezemplu ida kona-ba Tessie husi Austrália. Fasil ba nia atu simu buat neʼebé Bíblia hatete. Maibé nia ladún laʼo ba oin iha lia-loos, no nia mós la tuir reuniaun sira. Irmán neʼebé estuda ho nia halo orasaun ba Jeová no deside atu la estuda tan Bíblia ho nia. Maibé nia hakfodak bainhira nia ba estuda ho Tessie ba dala ikus, no Tessie koʼalia sai ninia sentimentu ba nia. Tessie hatete katak nia sente laran-makerek tebes tanba nia sei gosta joga osan. Maibé agora nia deside ona atu para husi ninia toman aat neʼe.

¹⁶ Lakleur deʼit Tessie komesa tuir reuniaun no hadiʼa ninia hahalok sira, no neʼe halo ninia kolega uluk nian hamnasa goza nia. Liutiha tempu uitoan nia mós hetan batizmu no serbí nuʼudar pioneiru regulár maski nia mós presiza tau matan ba ninia oan sira. Loos duni, bainhira estudante Bíblia sira halo mudansa ba sira-nia moris atu halo tuir Jeová, nia mós sei hakbesik ba sira no forma sira sai ema neʼebé folin-boot ba nia.

17. (a) Saida mak Ita gosta kona-ba Jeová sai nuʼudar Ita-nia Badain Sanan-Rai nian? (b) Lisaun tuirmai ita sei koʼalia kona-ba saida?

¹⁷ Ohin loron, sei iha buat furak barak mak badain sira halo ho liman husi rai-mean. Jeová mós sei forma nafatin ita didiʼak ho pasiénsia liuhusi ninia konsellu no nia mós tau hela atensaun atu haree oinsá ita simu konsellu sira-neʼe. (Lee Salmo [Mazmur] 32:8. ^[3]) Ita bele sente ka lae katak Jeová hatudu ninia interese ba ita ida-idak? Ita hatene ka lae katak Jeová forma hela ita ho kuidadu tebes? Entaun, ita tenke iha hahalok saida hodi bele sai hanesan rai-mean neʼebé mamar hodi Jeová bele forma ita? Ita tenkesér hasees an husi hahalok saida deʼit hodi la sai hanesan rai-mean neʼebé toos no susar ona atu forma? Oinsá mak inan-aman bele serbisu hamutuk ho Jeová atu forma didiʼak sira-nia oan? Lisaun tuirmai sei fó resposta ba pergunta sira-neʼe.