Ita husik Badain Sanan-Rai neʼebé Boot Liu atu forma Ita ka lae?
“Haree bá! Hanesan rai-mean iha badain sanan-rai nia liman, nuneʼe mós imi iha haʼu-nia liman.”—JEREMIAS (YEREMIA) 18:6.
KNANANUK: 23, 22
1, 2. Tanbasá mak Maromak haree Daniel nuʼudar “ema neʼebé iha folin-boot tebes”, no oinsá mak ita bele banati-tuir Daniel?
BAINHIRA ema Babilónia kaer ema judeu ba toʼo sira-nia rai, ema judeu sira bele haree iha sidade neʼe nakonu ho estátua oioin no ema mós adora anju aat sira. Maibé, ema judeu sira neʼebé iha laran-metin hanesan Daniel ho ninia belun naʼin-tolu, sira la husik ema Babilónia atu troka sira-nia moris. (Daniel 1:6, 8, 12; 3:16-18) Daniel ho ninia belun naʼin-tolu simu deʼit Jeová nuʼudar sira-nia Badain Sanan-Rai nian no deside atu kontinua adora deʼit Jeová. Kuaze iha Daniel nia moris tomak, ema Babilónia neʼebé ho hahalok ladiʼak sira-neʼe mak haleʼu nia, maibé Maromak nia anju hatete katak Daniel mak “ema neʼebé iha folin-boot tebes”.—Daniel 10:11, 19.
2 Iha tempu antigu, badain sanan-rai bele halo rai-mean atu sai buat naran deʼit tuir ninia hakarak. Ohin loron, ema neʼebé adora Jeová rekoñese katak nia mak Ukun-Naʼin neʼebé boot liu hotu no nia mak iha kbiit atu troka ema no nasaun sira. (Lee Jeremias [Yeremia] 18:6. [1]) Maromak mós iha direitu atu troka ita ida-idak, maibé nia nunka obriga ita. Nia hakarak ita atu halo tuir nia ho laran. Lisaun neʼe sei koʼalia kona-ba pergunta tolu oinsá mak ita bele sai hanesan rai-mean neʼebé mamar nafatin iha Maromak nia liman: (1) Oinsá mak ita bele hasees an husi hahalok toos neʼebé bele hanetik ita simu Maromak nia konsellu? (2) Oinsá mak ita bele haburas hahalok neʼebé bele ajuda ita atu sai mamar nafatin hodi halo tuir Jeová? (3) Oinsá mak inan-aman bele hakruʼuk ba Jeová bainhira hanorin sira-nia oan?
HASEES AN HUSI HAHALOK NEʼEBÉ HALO TOOS ITA-NIA LARAN
3. Hahalok saida deʼit mak bele halo toos ita-nia laran? Fó toʼok ezemplu.
3 Provérbios (Amsal) 4:23 hatete: “Proteje bá ó-nia laran, neʼe mak buat importante liu hotu neʼebé ó tenke proteje, tanba ó-nia moris depende ba ó-nia laran.” Atu proteje ita-nia laran la bele sai toos, ita tenke sees husi hahalok hanesan foti-an, toman atu halo sala, no fiar-laek, tanba se ita la kuidadu, hahalok sira-neʼe bele haburas hahalok kontra nian. (Daniel 5:1, 20; Ebreu 3:13, 18, 19) Ezemplu ida mak kona-ba Liurai Uzias husi rai-Judá. Foufoun, Uzias halo tuir no iha relasaun neʼebé diʼak ho Maromak. Maibé “bainhira nia hetan ona kbiit, ninia laran sai foti-an tebes”. Nia sai foti-an toʼo nia halo buat sira neʼebé só amlulik sira deʼit mak bele halo, neʼe mak sunu insensu iha templu laran. Bainhira amlulik sira hatete ba nia katak nia halo ona buat neʼebé sala, nia sai hirus tebes ho sira. Ho ida-neʼe, Jeová hamoe liurai foti-an neʼe hodi halo nia hetan moras-lepra toʼo nia mate.—2 Crônicas (Tawarikh) 26:3-5, 16-21; Provérbios (Amsal) 16:18.
4, 5. Saida mak bele akontese se ita la kontrola didiʼak hahalok foti-an? Fó toʼok ezemplu ida.
4 Hahalok foti-an bele halo ita hanoin katak ita diʼak liu fali ema seluk no neʼe bele halo ita lakohi atu simu konsellu sira husi Bíblia. (Roma 12:3; Provérbios [Amsal] 29:1) Neʼe mak buat neʼebé akontese ba katuas kongregasaun ida naran Jim. Nia la konkorda ho katuas sira seluk kona-ba problema ida husi kongregasaun. Nia konta fali, dehan: “Haʼu hatete ba irmaun sira-neʼe katak sira laiha domin, no haʼu laʼo sai kedas husi reuniaun katuas nian neʼe.” Maizumenus fulan neen liutiha, nia muda fali ba kongregasaun seluk, maibé sira la foti nia sai fali katuas ida. Jim hatete katak nia la simu buat neʼebé akontese ba nia. Nia dehan: “Haʼu-nia laran rahun. Haʼu fiar katak haʼu mak loos, tan neʼe haʼu sai husi lia-loos.” Jim la halo tan buat ida iha lia-loos ba tinan sanulu. Ikusmai nia hatete katak iha tempu neʼebá, nia foti-an tebes, no neʼe halo nia mós komesa duun Jeová ba buat neʼebé akontese ba nia. Maski irmaun sira vizita nia beibeik no koko atu ajuda nia ba tinan barak, maibé nia lakohi simu sira-nia ajuda.
5 Jim dehan: “Iha tempu neʼebá, haʼu sempre hanoin beibeik katak haʼu la sala, sira mak sala.” Esperiénsia kona-ba Jim hatudu katak se ita mak iha hahalok foti-an, bainhira ita halo sala, hahalok neʼe bele halo ita sai rai-mean neʼebé toos hodi buka deʼit razaun atu defende ita-nia an. (Jeremias [Yeremia] 17:9) Uluk, iha ona irmaun ka irmán ida hakanek Ita ka lae? Ita lakon ona priviléjiu ruma ka lae? Iha tempu neʼebá, Ita halo saida? Ita hatudu hahalok foti-an iha tempu neʼebá ka lae? Ka Ita hanoin liu kona-ba hadame malu ho Ita-nia maluk no laran-metin nafatin ba Jeová?—Lee Salmo (Mazmur) 119:165; [2] Koloso 3:13.
6. Saida mak bele akontese se ita halo sala beibeik?
6 Se ema ida halo sala, no subar beibeik ninia sala, karik neʼe bele halo susar ba nia atu simu konsellu husi Bíblia. Se nuneʼe, fasil ba nia atu monu ba sala seluk. Hanesan irmaun ida hatete katak tanba halo beibeik sala, ikusmai nia sente hanesan toman tiha. (Eclesiastes [Pengkhotbah] 8:11) Iha tan irmaun ida seluk neʼebé uluk iha toman atu haree beibeik pornografia, ikusmai nia dehan: “Haʼu mós komesa iha hahalok muramura kona-ba katuas kongregasaun sira.” Ninia toman neʼe estraga duni ninia relasaun diʼak ho Jeová. Maibé ikusmai ema seluk kaer toman ninia hahalok neʼe no katuas sira ajuda fali nia. Ita hatene katak ita hotu ema sala-naʼin. Maibé se ita mak haree katak ita komesa hatudu hahalok muramura ba sira neʼebé fó konsellu ita, ka buka razaun atu defende ita-nia sala duké husu Jeová atu fó perdua ba ita no ajuda ita, neʼe hatudu katak karik ita-nia laran sai toos daudaun ona.
7, 8. (a) Oinsá mak ema Izraél hatudu katak tanba sira-nia fiar-laek mak halo toos sira-nia laran? (b) Ita bele aprende saida husi neʼe?
7 Fiar-laek mós bele halo toos ita-nia laran. Ita bele haree ezemplu neʼe husi ema Izraél sira. Bainhira Jeová lori sira sai husi rai-Ejitu, sira haree milagre oioin neʼebé Jeová halo. Maski nuneʼe, iha tempu neʼebé sira besik toʼo ona rai promete nian, sira-nia laran sai toos ba Jeová. Tanbasá? Tanba sira laiha fiar ba Jeová. Duké tau fiar nafatin ba Jeová, sira sai taʼuk no muramura hasoru Moisés. Laʼós neʼe deʼit, sira mós hakarak fila fali ba rai-Ejitu, rai neʼebé sira sai atan ba ema. Jeová sente laran-kanek tebes no dehan: “Toʼo tempu hira tan mak povu neʼe la hatudu respeitu ba haʼu.” (Números [Bilangan] 14:1-4, 11; Salmo [Mazmur] 78:40, 41) Hodi nuneʼe mak sira neʼebé laran-toos no fiar-laek mate iha rai-fuik maran.
8 Ohin loron, ita mós besik ona atu tama mundu foun, no ita-nia fiar mós hetan daudauk koko. Tan neʼe mak diʼak atu buka-hatene beibeik ita-nia fiar metin ka lae. Porezemplu, buka-hatene toʼok ita-nia fiar kona-ba Jesus nia liafuan neʼebé hakerek iha Mateus 6:33. Husu ba ita-nia an: ‘Planu no desizaun sira neʼebé haʼu halo hatudu katak haʼu tau fiar duni ba Jesus nia liafuan neʼe ka lae? Tan deʼit atu hetan tan osan, haʼu falta reuniaun no la bá haklaken ka lae? Se haʼu-nia serbisu mak aumenta barak liután, haʼu sei halo saida? Haʼu husik deʼit mundu neʼe mak atu kontrola haʼu-nia moris ka hanetik haʼu atu serbí Jeová ka lae?’
9. Tanbasá mak ita tenke “kontinua koko” ita-nia fiar, no oinsá mak ita bele halo nuneʼe?
9 Se ita mak la rona ba Bíblia nia avizu kona-ba hasees an husi ransu neʼebé ladiʼak, ransu ho ema neʼebé kongregasaun hasai, ka kona-ba atividade halimar nian, neʼe bele halo toos ita-nia laran. Se ida-neʼe mak akontese daudauk iha ita-nia moris, ita tenke halo saida? Urjente tebes atu buka-hatene ita-nia fiar! Bíblia dehan: “Kontinua koko imi-nia an atu hatene se imi hela iha fiar ka lae, kontinua haree didiʼak imi ema oinsá.” (2 Korinto 13:5) Uza Bíblia atu korrije beibeik ita-nia hanoin no simu konsellu neʼe ho laran.
SAI RAI-MEAN NEʼEBÉ MAMAR NAFATIN
10. Saida mak bele ajuda ita atu sai mamar nafatin hanesan rai-mean iha Jeová nia liman?
10 Maromak uza ninia Liafuan, kongregasaun, no haklaken atu halo mamar ita. Bíblia mak hanesan bee neʼebé halo rai-mean bele mamar nafatin. Hodi nuneʼe mak bainhira ita lee Bíblia loroloron no medita, ita bele sai mamar nafatin iha Jeová nia liman atu nia bele forma ita. Jeová fó mandamentu ba liurai sira husi rai-Izraél atu hakerek fali Maromak nia Ukun-Fuan sira no lee fali loroloron. (Deuteronômio [Ulangan] 17:18, 19) Apóstolu sira mós hatene katak lee no medita didiʼak eskritura sira importante tebes ba serbisu haklaken. Bainhira sira hakerek karta ruma, sira sempre uza Eskritura Lia-Ebraiku, no iha tempu sira bá haklaken, sira mós anima ema seluk atu lee no medita eskritura sira. (Apóstolu 17:11) Hanesan neʼe mós ho ita ohin loron, ita hatene katak importante tebes atu lee no medita didiʼak kona-ba Maromak nia Liafuan loroloron. (1 Timóteo 4:15) Halo hanesan neʼe bele ajuda ita atu iha hahalok haraik-an, no fasil mós ba Jeová atu forma didiʼak ita.
Aproveita didiʼak ajuda husi Jeová bele ajuda ita sai mamar nafatin hanesan rai-mean (Haree parágrafu 10-13)
11, 12. Oinsá mak Jeová uza kongregasaun hodi forma ita tuir ita ida-idak nia presiza? Fó toʼok ezemplu.
11 Jeová hatene ita ida-idak nia presiza, no nia uza kongregasaun hodi forma ita tuir presiza sira-neʼe. Hanesan ho Jim, nia sai mamar fali tanba katuas ida koko ajuda fali nia. Jim dehan: “Nia nunka duun ka kritika katak haʼu mak kria problema neʼe rasik. Nia hatete katak nia hakarak tebes atu ajuda haʼu.” Fulan tolu liutiha, katuas neʼe konvida Jim bá tuir reuniaun. Jim dehan: “Kongregasaun simu fali haʼu ho Yehuwa Tidak Dapat Dipersalahkan’ no ‘Melayani Yehuwa dengan Loyal’ neʼebé hetan husi Menara Pengawal 15 Novembru 1992.)
diʼak no irmaun-irmán sira-nia domin ajuda tebes haʼu hodi troka haʼu-nia hanoin. Haʼu komesa komprende katak haʼu-nia sentimentu la importante. Ho irmaun-irmán no haʼu-nia feen nia ajuda, neineik-neineik haʼu hametin fali haʼu-nia relasaun ho Jeová.” Jim mós dehan katak informasaun husi ita-nia livru sira mós fó laran-manas tebes ba nia. (Informasaun hanesan ‘12 Liutiha tempu balu Jim sai fali katuas ida, no komesa husi tempu neʼebá nia mós ajuda ona irmaun sira seluk hodi rezolve problema neʼebé hanesan no hametin fali sira-nia fiar. Ikusmai Jim hatete: “Uluk haʼu hanoin katak haʼu iha relasaun neʼebé metin ho Jeová maibé tuir loloos lae! Haʼu sente triste tebes hodi husik haʼu-nia hahalok foti-an taka haʼu-nia matan hodi haree deʼit ba ema seluk nia sala, duké fó atensaun ba buat neʼebé importante liu.”—1 Korinto 10:12.
13. Serbisu haklaken bele ajuda ita haburas hahalok saida deʼit, no neʼe bele lori rezultadu saida?
13 Oinsá mak serbisu haklaken bele forma ita atu sai ema neʼebé diʼak liután? Haklaken ajuda ita atu haburas hahalok haraik-an no hahalok sira seluk neʼebé mai husi espíritu santu. (Galásia 5:22, 23) Se ita mak hatudu hahalok hanesan Kristu nian iha serbisu haklaken, neʼe sei halo ema atu gosta rona ba mensajen neʼebé ita hatoʼo ba sira, no karik neʼe mós bele troka sira-nia hahalok. Porezemplu, iha rai-Austrália, iha Testemuña naʼin-rua koko atu haklaken ba feto ida iha ninia uma, maibé feto neʼe hirus tebes no hatudu hahalok ladiʼak ba sira. Sira naʼin-rua rona no hatudu respeitu nafatin ba nia. Ikusmai, feto neʼe sente ladiʼak kona-ba ninia hahalok neʼe no nia hakerek karta ida ba ita-nia sukursál no husu deskulpa ba ninia hahalok foti-an neʼe. Nia hatete: “Haʼu hatudu hahalok beik tebes iha ema naʼin-rua nia oin neʼebé haklaken hela Maromak nia Liafuan ba haʼu no haʼu koko atu duni fali sira.” Husi esperiénsia neʼe ita bele haree katak importante tebes atu iha hahalok neʼebé mamar bainhira ita haklaken ba ema. Loos duni, serbisu haklaken laʼós deʼit bele ajuda ema seluk, maibé bele ajuda mós ita atu haburas hahalok neʼebé diʼak.
HAKRUʼUK BA JEOVÁ BAINHIRA HANORIN OAN SIRA
14. Inan-aman tenke halo saida se sira hakarak forma didiʼak sira-nia oan?
14 Labarik barak iha hahalok haraik-an no gosta atu aprende buat foun. (Mateus 18:1-4) Tan neʼe mak diʼak ba inan-aman atu ajuda oan aprende kona-ba lia-loos no rai lia-loos iha sira-nia neon no laran bainhira sira sei kiʼik. (2 Timóteo 3:14, 15) Maibé atu hetan susesu, inan-aman rasik tenke rai uluk lia-loos iha sira-nia laran no moris tuir lia-loos iha moris loroloron nian. Tanba, se inan-aman mak halo hanesan neʼe, oan sira mós bele sente rasik saida mak moris tuir lia-loos, laʼós rona deʼit. Nuneʼe mós bainhira inan-aman atu fó dixiplina ba sira, sira bele sente katak inan-aman halo hanesan neʼe tanba sira hadomi oan no Jeová mós hadomi sira.
15, 16. Oinsá mak inan-aman bele hatudu katak sira tau fiar ba Maromak, se kongregasaun hasai sira-nia oan?
15 Maski inan-aman hanorin ona lia-loos ba oan, maibé ikusmai balu bele husik Jeová ka kongregasaun hasai. Ida-neʼe sei halo família triste tebes. Irmán ida husi Áfrika Súl hatete: “Bainhira kongregasaun hasai haʼu-nia maun, haʼu sente hanesan nia mate. Haʼu-nia fuan rahun tebes!” Iha tempu neʼebá, nia ho ninia inan-aman halo saida? Sira halo tuir Bíblia nia matadalan. (Lee 1 Korinto 5:11, 13.) Inan-aman neʼe hatete: “Ami hakarak halo tuir Bíblia, tanba ami hatene katak halo tuir Maromak nia matadalan sempre lori diʼak ba ema hotu. Ami haree arranju hasai husi kongregasaun mak dixiplina domin ida husi Jeová no Jeová nunka fó dixiplina neʼebé makaʼas liu ba ita. Tan neʼe ami la ransu tan ho ami-nia oan neʼe. Bainhira presiza tebes atu koʼalia kona-ba problema família nian mak ami foin kontaktu ho nia.”
16 Sira-nia oan-mane neʼe sente oinsá? Ikusmai nia dehan: “Haʼu hatene katak haʼu-nia família laʼós odi haʼu, maibé tanba sira hakarak halo tuir Jeová no ninia organizasaun.” Nia mós dehan: “Bainhira só Jeová deʼit mak bele ajuda no ita presiza tebes ninia perdua mak ita foin hatene katak ita presiza tebes nia.” Hanoin toʼok ninia família nia ksolok bainhira nia fila fali ona ba Jeová. Tan neʼe, se ita mak sempre halo tuir Jeová nia matadalan, buat hotu sei laʼo ho loos no lori ksolok ba ita.—Provérbios (Amsal) 3:5, 6; 28:26.
17. Tanbasá mak ita tenke halo tuir Jeová iha ita-nia moris tomak, no oinsá mak halo hanesan neʼe diʼak ba ita?
17 Profeta Isaías fó-hatene nanis katak loron ida ema judeu neʼebé iha Babilónia sei arrepende an hodi hatete: “Oh Jeová, Ita mak ami-nia Aman. Ami mak rai-mean, no Ita mak ami-nia Badain Sanan-Rai nian, ami hotu mak serbisu husi Ita-nia liman. Keta sai hirus makaʼas, oh Jeová, no keta hanoin-hetan ami-nia sala sira ba nafatin. Favór ida, hateke ba ami, tanba ami hotu mak Ita-nia povu.” (Isaías [Yesaya] 64:8, 9) Se ita mak haraik-an no sempre halo tuir Jeová, ita mós sei sai hanesan ema neʼebé iha folin-boot tebes ba nia hanesan Daniel. Jeová mós sei kontinua atu uza ninia Liafuan, espíritu santu, no kongregasaun hodi forma toʼo loron ida ita bele sai ninia oan neʼebé perfeitu.—Roma 8:21.
^ [1] (parágrafu 2) Jeremias 18:6 ‘Oh umakain Izraél, haʼu mós bele halo ba imi hanesan ho buat neʼebé badain sanan-rai neʼe foin halo, loos ka lae?’ Jeová dehan. ‘Haree bá! Hanesan rai-mean iha badain sanan-rai nia liman, nuneʼe mós imi iha haʼu-nia liman, oh umakain Izraél.’
^ [2] (parágrafu 5) Salmo 119:165 Ema neʼebé hadomi Ita-nia ukun-fuan hetan dame barak; no la iha buat ida mak bele halo sira sidi.