Jeová “hanoin imi”
OINSÁ mak ita bele fiar ba liafuan sira iha leten neʼe? Razaun ida mak tanba Bíblia rasik mak koʼalia liafuan sira-neʼe. Iha 1 Pedro 5:7 hatete: “Entrega imi-nia laran-susar hotu ba nia, tanba nia hanoin imi.” Evidénsia saida mak hatudu katak Maromak Jeová iha duni interese ba ita?
MAROMAK TAU MATAN ITA-NIA PRESIZA LOROLORON NIAN
Jeová hatudu ezemplu katak nia . . . laran-diʼak no laran-luak
Maromak Jeová iha hahalok furak barak tebes. Se ita mak iha belun, ita mós hakarak sira atu iha hahalok furak. No se ita mak hatudu laran-diʼak no laran-luak ba malu, ita mós sei sai belun neʼebé besik. Iha ita-nia moris loroloron nian, ita bele haree katak Jeová mak Maromak neʼebé diʼak no laran-luak duni. Porezemplu, “nia halo loro-matan saʼe ba ema aat no mós ema diʼak, no halo udan tun ba ema laran-loos no mós ema aat”. (Mateus 5:45) Tanbasá mak presiza loro-matan no udan? Tanba liuhusi buat sira-neʼe mak Maromak Jeová ‘fó ema ai-han barak no halo nakonu sira-nia laran ho ksolok’. (Apóstolu 14:17) Loos duni, Jeová halo mundu neʼe iha dalan neʼebé bele fó hahán oioin hodi ita bele han no sente haksolok.
Maibé tanbasá mak sei iha ema barak hamlaha nafatin? Neʼe tanba ukun-naʼin sira sempre buka podér polítiku nian no mós buka osan duké hanoin kona-ba oinsá atu hadiʼa povu nia moris. Lakleur tan Jeová sei rezolve problema sira-neʼe hodi troka dalan ukun aat neʼe ho fali ninia Ukun lalehan nian, neʼebé ninia Oan-Mane mak Ukun. Toʼo ona tempu neʼebá, la iha tan ema ida mak sai hamlaha. Maibé ohin loron mós Jeová tau matan daudaun ba ninia povu. (Salmo [Mazmur] 37:25) Neʼe hatudu duni katak nia hanoin ita, loos ka lae?
JEOVÁ LA KARAK BA NINIA TEMPU
Jeová hatudu ezemplu katak nia . . . la karak ba ninia tempu
Belun neʼebé diʼak sempre gasta tempu ho ita. Karik nia sei gasta tempu barak atu koʼalia ho ita kona-ba buat neʼebé nia no ita gosta atu halo. Nia mós sei rona didiʼak ba ita bainhira ita koʼalia sai ita-nia problema ka susar ba nia. Jeová halo hanesan neʼe ka lae? Nia halo duni. Nia rona ba ita-nia orasaun. Tan neʼe mak Bíblia fó laran-manas ba ita hodi “la kole atu halo orasaun” no “halo orasaun beibeik”.—Roma 12:12; 1 Tesalónika 5:17.
Oras hira mak Jeová uza atu rona ba ita-nia orasaun? Ezemplu ida husi Bíblia bele fó resposta ba ita-nia pergunta neʼe. Antes Jesus atu hili ninia apóstolu sira, “nia halo orasaun ba Maromak kalan tomak”. (Lucas 6:12) Iha ninia orasaun, karik nia koʼalia kona-ba dixípulu ida-idak nia naran, sira-nia hahalok diʼak no fraku sira, no ita mós bele fiar katak nia husu ninia Aman nia ajuda atu hili ema sira-neʼe hodi sai ninia apóstolu. Tan neʼe, toʼo tiha loro-matan atu sai fali, Jesus hatene katak nia hili ona ema neʼebé serve duni atu sai ninia apóstolu sira. Jeová mak “Maromak neʼebé rona ba orasaun”, nia gosta tebes atu rona ba orasaun hotu neʼebé ita hatoʼo ho laran. (Salmo [Mazmur] 65:2) Maski ema bele uza tempu neʼebé naruk tebes hodi halo orasaun kona-ba sira-nia problema, maibé Jeová nunka haree ba oras.
MAROMAK PRONTU ATU FÓ PERDUA
Jeová hatudu ezemplu katak nia . . . prontu atu fó perdua
Dala ruma belun bele sente susar atu fó perdua ba malu. Ema balu hakotu sira-nia relasaun diʼak ho sira-nia belun neʼebé sira habelun ba tinan barak ona tan deʼit sira sente susar atu fó perdua ba malu. Jeová la hanesan neʼe. Bíblia anima ema hotu neʼebé arrepende an ho laran atu husu perdua husi Jeová, “tanba nia sei fó perdua iha dalan neʼebé boot”. (Isaías [Yesaya] 55:6, 7) Saida mak book Jeová prontu atu fó perdua?
Jeová mak Maromak neʼebé iha domin boot liu hotu. Nia hadomi tebes ema mak nia fó ninia Oan-Mane Jesus hodi salva ema husi sala no mate. (João 3:16) Maibé Jeová mós uza Jesus nia sakrifísiu atu halo buat seluk tan. Nia uza sakrifísiu neʼe atu fó perdua ba ema neʼebé nia hadomi. Tan neʼe mak apóstolu João hatete: “Maromak mak laran-metin no iha hahalok loos, no tan neʼe se ita fó sai ita-nia sala, nia sei perdua ita husi ita-nia sala hotu.” (1 João 1:9) Tanba Jeová fó perdua ba ita mak ita bele kontinua atu iha relasaun neʼebé diʼak ho nia. Ida-neʼe book tebes ita-nia laran, loos ka lae?
NIA PRONTU ATU FÓ AJUDA
Jeová hatudu ezemplu katak nia . . . prontu atu fó ajuda
Belun neʼebé loos sempre prontu atu fó ajuda bainhira ita presiza sira-nia ajuda. Jeová halo hanesan neʼe ka lae? Bíblia dehan: “Maski [Maromak nia atan ida] sidi, maibé nia sei la monu toʼo oin taka rabat ba rai, tanba Jeová kaer metin ninia liman hodi nia bele hamriik fali.” (Salmo [Mazmur] 37:24) Jeová fó duni ajuda oioin ba ninia atan sira. Haree toʼok esperiénsia husi illa St. Croix iha Tasi Karibe tuirmai neʼe.
Iha feto joven ida, ninia kolega eskola fó susar ba nia tanba ninia fiar, nia lakohi halo kontinénsia ba bandeira. Halo tiha orasaun ba Jeová, nia deside katak nia sei hasoru problema neʼe. Iha aprezentasaun ida iha eskola nia hili atu koʼalia tópiku ida kona-ba kontinénsia bandeira. Nia hatete katak nia foti ninia desizaun bazeia ba istória ida iha Livru Istória husi Bíblia kona-ba Sadrak, Mexak, no Abednego. Nia dehan, “Jeová proteje mane ebreu naʼin-tolu neʼe tanba sira lakohi adora estátua.” Aprezentasaun hotu tiha, ninia kolega eskola naʼin-11 simu livru neʼe husi nia. Nia bele sente duni katak Jeová mak fó kbiit no matenek ba nia hodi fó sasin neʼebé diʼak kona-ba tópiku sensitivu neʼe, no neʼe halo nia sente kontente tebes.
Se ita mak iha duvida ruma kona-ba Jeová hanoin ita ka lae, hanoin kleʼan kona-ba Salmo (Mazmur) 34:17-19; 55:22, no 145:18, 19. Bele husu mós Testemuña seluk neʼebé serbí Jeová ba tempu kleur ona kona-ba oinsá mak Jeová tau matan ba sira. Se ita presiza Maromak nia ajuda, halo orasaun ba nia. Ita sei haree duni oinsá mak Jeová sei hatudu katak nia hanoin ita.