IHA Bíblia ita bele lee liafuan barak husi ema neʼebé “iha sentimentu hanesan ita”. (Tgo 5:17) Porezemplu, fasil ba ita atu komprende apóstolu Paulo bainhira nia koʼalia liafuan sira iha Roma 7:21-24: “Bainhira haʼu hakarak halo buat neʼebé loos, buat neʼebé aat mós hamutuk ho haʼu. . . . Haʼu mak ema neʼebé kuitadu loos!” Apóstolu Paulo nia liafuan halo ita sente kmaan uitoan tanba nia mós presiza luta hasoru ninia fraku sira hanesan ita.

Paulo mós fó sai ninia sentimentu seluk. Iha Galásia 2:20, nia hatete katak Jesus “hadomi [nia] no fó nia moris ba [ninia] diʼak”. Paulo fiar metin ida-neʼe! Ita mós iha sentimentu hanesan neʼe ka lae? Tuir loloos, dala ruma ita ladún sente hanesan neʼe.

Se ita sente la iha folin tanba sala sira neʼebé ita halo uluk, karik ita sei la fiar katak Jeová hadomi ita no fó perdua ona ba ita, no neʼe bele halo susar ba ita atu haree Jesus nia sakrifísiu nuʼudar prezente ba ita rasik. Jesus hakarak duni ita atu haree ninia sakrifísiu hanesan neʼe ka lae? Se nuneʼe, saida mak bele ajuda ita atu halo ida-neʼe? Mai ita haree resposta ba pergunta rua neʼe.

Jesus hakarak ita haree ninia sakrifísiu hanesan prezente ba ita rasik. Oinsá mak ita hatene? Hanoin toʼok kona-ba situasaun iha Lucas 23:39-43. Mane ida tara hela iha ai-riin iha Jesus nia sorin. Nia fó sai katak uluk nia halo sala ruma. Sala neʼebé nia halo karik todan tanba baibain kriminozu neʼebé aat tebes mak simu kastigu neʼe. Mane neʼe hanoin barak no husu Jesus: “Hanoin-hetan haʼu bá kuandu Ita tama iha Ita-nia Ukun.”

Oinsá mak Jesus hatán? Imajina toʼok nuʼudar nia neineik-neineik fila ninia ulun atu haree mane neʼe. Maski Jesus sente moras tebes, maibé nia oin-midar ba mane neʼe no dehan: “Haʼu hatete loloos ba ó ohin, ó sei hamutuk ho haʼu iha Paraízu.” Tuir loloos, karik Jesus bele fó-hanoin deʼit katak Oan-Mane husi Ema mai “atu fó ninia moris hodi sosa fali ema barak”. (Mt 20:28) Maibé nia la halo ida-neʼe. Nia hatete katak ninia sakrifísiu neʼe ba mane neʼe duni. No tanba nia uza liafuan “ó” no “haʼu”, neʼe hatudu ninia laran-diʼak ba mane neʼe. Jesus mós hatudu benefísiu ba mane neʼe rasik, neʼe mak atu moris iha paraízu.

Jesus hakarak mane neʼe atu simu Jesus nia sakrifísiu nuʼudar prezente ba nia an rasik. Se Jesus sente hanesan neʼe ba kriminozu ida neʼebé seidauk iha oportunidade atu serbí Maromak, oinsá tan ho ema Kristaun neʼebé batizmu no serbí daudaun Maromak? Se nuneʼe, saida mak bele ajuda ita hanoin pozitivu kona-ba ita-nia an, maski uluk ita halo sala?

Apóstolu Paulo nia knaar atu haklaken halo nia fiar katak Jesus mate ba nia. Oinsá? Nia esplika: “Haʼu fó agradese ba ita-nia Naʼi Kristu Jesus, neʼebé fó kbiit mai haʼu, tanba nia haree haʼu nuʼudar ema neʼebé laran-metin hodi fó knaar mai haʼu atu halo ninia serbisu, maski uluk haʼu koʼalia aat Maromak no fó-terus ba ninia povu no haʼu foti an.” (1 Tim 1:12-14) Knaar neʼe halo Paulo fiar katak Jesus hadomi nia no tau fiar ba nia. Jesus mós fó knaar ba ita atu haklaken. (Mt 28:19, 20) Neʼe bele ajuda ita fiar katak Jesus mós mate ba ita ka lae?

Albert, neʼebé kongregasaun hasai besik tinan 34 no foin fila fali ba Jeová, hatete: “Haʼu-nia sala sempre iha haʼu-nia oin. Maibé bainhira haʼu haklaken, haʼu sente hanesan apóstolu Paulo. Jesus fó knaar mai haʼu atu haklaken. Neʼe halo haʼu kontente no iha hanoin pozitivu kona-ba haʼu-nia an, haʼu-nia moris no haʼu-nia futuru.”—Sal 51:3.

Allan, neʼebé halo krime no violénsia antes aprende lia-loos, hatete: “Toʼo agora haʼu nafatin hanoin kona-ba buat aat neʼebé haʼu halo ba ema. Dala ruma, haʼu sente laran-kraik tebes. Maibé haʼu fó obrigadu ba Jeová tanba ema sala-naʼin hanesan haʼu bele lori liafuan diʼak ba ema seluk. Bainhira haʼu haree oinsá ema sente kona-ba liafuan diʼak, haʼu bele haree katak Jeová diʼak tebes no hatudu domin ba ema. Haʼu sente katak nia uza haʼu atu ajuda ema seluk neʼebé mós halo buat aat iha sira-nia moris.”

Bainhira ita hola parte iha serbisu haklaken, ita bele fokus ba buat neʼebé diʼak no hanoin pozitivu. Ita bele fiar katak Jesus hatudu laran-sadiʼa, domin no fiar mai ita.

Antes Jeová halakon Satanás nia mundu aat neʼe, karik ita-nia laran sei duun nafatin ita tanba ita-nia sala uluk. Saida mak bele ajuda ita luta hasoru sentimentu sira-neʼe?

Jean, neʼebé dala ruma sente laran-kraik tanba moris ho oin rua bainhira nia sei joven, hatete: “Haʼu gosta tebes katak ‘Maromak mak boot liu fali ita-nia laran.’” (1 João 3:19, 20) Ita mós bele sente kmaan tanba Jeová no Jesus hatene didiʼak katak ita mak ema sala-naʼin deʼit. La haluha katak, Jesus nia sakrifísiu laʼós ba ema perfeitu, maibé ba ema sala-naʼin neʼebé arrepende sira-nia sala.—1 Tim 1:15.

Se ita hanoin kleʼan kona-ba dalan neʼebé Jesus haree ema sala-naʼin sira, no se ita hakaʼas an atu kumpre knaar neʼebé nia fó mai ita, ita bele fiar metin katak Jesus fó ninia moris nuʼudar sakrifísiu ba ita rasik. Ita bele hatete hanesan apóstolu Paulo neʼebé dehan: Jesus “hadomi haʼu no fó nia moris ba haʼu-nia diʼak”.