1. Tuir Koloso 2:4, 8, oinsá mak Satanás koko atu kontrola ita-nia hanoin?

SATANÁS hakarak ita atu kontra hasoru Jeová. Atu kumpre ninia planu, nia koko atu troka dalan neʼebé ita hanoin atu bele iha hanoin hanesan ninian. Nia koko lohi ita hodi aproveita ita-nia hakarak sira atu ita bele laʼo tuir nia.​—Lee Koloso 2:4, 8.

2-3. (a) Tanbasá ita presiza tau atensaun ba avizu neʼebé hakerek iha Koloso 2:8? (b) Saida mak ita sei aprende iha lisaun neʼe?

² Satanás bele lohi duni ita ka lae? Sin, bele duni! Hanoin-hetan, Paulo hakerek avizu iha Koloso 2:8 ba ema Kristaun sira neʼebé espíritu santu hili ona, laʼós ba ema neʼebé la fiar. (Kol 1:2, 5) Iha tempu neʼebá, ema Kristaun iha perigu laran, no ohin loron, ita hasoru perigu neʼebé boot liu. (1 Kor 10:12) Tanbasá? Satanás soe tun tiha ba rai no nia koko makaʼas atu lohi Maromak nia povu neʼebé laran-metin. (Apok 12:9, 12, 17) Liután neʼe, ita moris daudaun iha tempu neʼebé ema aat no bosok-teen sira “sai aat liután”.​—2 Tim 3:1, 13.

³ Iha lisaun neʼe, ita sei koʼalia kona-ba oinsá Satanás uza “hanorin bosok neʼebé la iha folin” atu troka ita-nia hanoin. Ita sei koʼalia kona-ba Diabu nia “lasu” ka “planu aat” tolu. (Éf 6:11; nota) No iha lisaun tuirmai, ita sei koʼalia kona-ba oinsá atu hadiʼa rezultadu aat husi Satanás nia influénsia ba ita-nia hanoin. Primeiru, mai ita koʼalia kona-ba saida mak ita bele aprende husi Satanás  nia dalan atu lohi ema Izraél depois sira tama ba rai neʼebé Maromak promete ona.

4-6. Tuir Deuteronómio 11:10-15, ema Izraél presiza aprende dalan foun saida atu halo toʼos iha rai neʼebé Maromak promete?

⁴ Satanás ho matenek tenta ema Izraél atu adora estátua. Oinsá? Nia hatene katak ema Izraél presiza ai-han, nia aproveita ida-neʼe atu book sira halo tuir nia. Bainhira ema Izraél tama ba rai neʼebé Maromak promete, sira presiza aprende dalan foun atu halo toʼos. Uluk kuandu iha rai-Ejitu, ema Izraél uza bee husi Mota Nilo atu rega sira-nia toʼos. Maibé iha rai neʼebé Maromak promete, la iha mota boot, tan neʼe atu halo toʼos sira presiza sadere ba udan-been no mós mahobeen. (Lee Deuteronómio 11:10-15; Isa 18:4, 5) Entaun, ema Izraél presiza aprende dalan foun atu halo toʼos. Neʼe la fasil tanba ema barak neʼebé iha esperiénsia atu halo toʼos mate ona iha rai-fuik maran.

⁵ Jeová esplika ba ninia povu katak sira-nia situasaun troka ona. Nia mós fó avizu ba ninia povu, no karik avizu neʼe haree hanesan la iha ligasaun ho serbisu halo toʼos. Jeová dehan: “Kuidadu bá atu imi la husik imi-nia laran dada imi atu laʼo sees no adora maromak sira seluk no hakruʼuk ba sira.” (Deut 11:16, 17) Tanbasá mak Jeová fó avizu kona-ba adorasaun ba maromak falsu sira bainhira koʼalia daudaun kona-ba dalan foun atu halo toʼos?

⁶ Jeová hatene katak ema Izraél sei hetan tentasaun atu aprende dalan foun atu halo toʼos husi povu jentiu sira neʼebé  hela haleʼu sira. Tuir loloos, nasaun viziñu sira iha esperiénsia barak liu fali ema Izraél, no Maromak nia povu bele aprende husi sira, maibé ida-neʼe perigu ba sira. Toʼos-naʼin Kanaan adora maromak Baal no sira-nia adorasaun neʼe fó influénsia ba sira-nia hanoin. Sira fiar katak Baal mak naʼin ba lalehan no nia mak fó udan. Jeová lakohi ninia povu atu fiar ba hanorin falsu sira-neʼe. Maski nuneʼe, ema Izraél hili beibeik atu adora Baal. (Núm 25:3, 5; Juís 2:13; 1 Reis 18:18) Agora, mai ita haree oinsá mak Satanás bele lohi ema Izraél.

7. Ema Izraél iha rai neʼebé Maromak promete hetan koko iha dalan oinsá?

⁷ Lasu primeiru neʼebé Satanás uza mak aproveita sira-nia hakarak atu udan tun. Husi fulan-Abríl nia rohan toʼo Setembru, udan ladún tun iha rai neʼebé Maromak promete. Sira presiza tebes udan atu bele kontinua moris no iha toʼos neʼebé buras, baibain udan komesa tun iha fulan-Outubru. Satanás lohi ema Izraél atu fiar katak adora maromak falsu hanesan povu jentiu sira, bele lori rezultadu diʼak. Ema jentiu sira fiar katak sira-nia maromak sei halo udan tun se sira halo serimónia relijiaun nian. Ema Izraél neʼebé la laran-metin ba Jeová fiar katak sira presiza adora Baal atu hapara bailoro naruk.

8. Lasu segundu saida mak Satanás uza? Esplika toʼok.

⁸ Lasu segundu neʼebé Satanás uza mak aproveita sira-nia hakarak atu halo hahalok la morál. Nasaun jentiu sira adora sira-nia maromak hodi halo hahalok seksuál oioin neʼebé foʼer. Neʼe inklui feto no mane neʼebé faʼan an iha templu. Ema jentiu sira-neʼe simu hahalok omoseksuál no sala seksuál seluk tan no haree buat sira-neʼe nuʼudar baibain deʼit. (Deut 23:17, 18; 1 Reis 14:24) Sira fiar katak hodi halo serimónia neʼebé la morál, neʼe sei book sira-nia maromak atu halo rai sai buras. Ema jentiu nia serimónia neʼebé la morál dada ema Izraél nia atensaun no book sira atu adora Baal. Maibé realidade mak sira husik Satanás atu lohi sira.

9. Tuir Oseias 2:16, 17, oinsá mak Satanás halo povu haluha kona-ba Jeová?

⁹ Lasu terseiru neʼebé Satanás uza mak halo sira haluha kona-ba Jeová. Iha profeta Jeremias nia tempu, Jeová fó sai katak profeta falsu sira halo Maromak nia povu haluha Ninia naran “tanba Baal”. (Jer 23:27) Maromak nia povu la uza tan Jeová nia naran no troka ida-neʼe ho naran Baal, neʼebé signifika “Naʼin” ka “Patraun”. Ida-neʼe halo susar ba ema Izraél atu halo diferensa entre Jeová no Baal, tan neʼe fasil ba sira atu kahur adorasaun ba Jeová no adorasaun ba Baal.—Lee Oseias 2:16, 17 no nota-rodapé.

10. Lasu saida deʼit mak Satanás uza ohin loron?

¹⁰ Satanás uza lasu neʼebé hanesan ohin loron. Nia lohi ema hodi aproveita ema nia hakarak, habelar sala seksuál, no mós halo ema haluha kona-ba Jeová. Mai ita koʼalia uluk kona-ba lasu terseiru.

11. Oinsá mak Satanás halo ema haluha kona-ba Jeová?

¹¹ Satanás halo ema haluha kona-ba Jeová. Depois Jesus nia apóstolu  sira mate, ema Kristaun balu neʼebé kontra Maromak komesa habelar hanorin falsu. (Após 20:29, 30; 2 Tes 2:3) Ema Kristaun sira-neʼe komesa subar Maromak loos nia identidade. Porezemplu, bainhira sira kopia Bíblia, sira la uza tan Maromak nia naran no troka ho liafuan “Naʼi”. Hodi halo nuneʼe, sira halo susar ba lee-naʼin sira atu hatene katak Jeová la hanesan ho “naʼi” sira seluk neʼebé temi iha Bíblia laran. (1 Kor 8:5) Sira uza liafuan “Naʼi” atu refere ba Jeová no Jesus, neʼe halo susar ba ema atu komprende katak Jeová no Jesus la hanesan no sira iha pozisaun neʼebé la hanesan. (João 17:3) Ikusmai, neʼe hamosu doutrina Trindade, neʼebé la mai husi Bíblia. Rezultadu mak ema barak hanoin katak Maromak mak mistériu no susar atu hatene nia. Neʼe mak lia-bosok neʼebé aat tebes.—Após 17:27.

12. Saida mak relijiaun falsu habelar, no hanesan temi iha Roma 1:28-31 rezultadu mak saida?

¹² Satanás aproveita ema nia hakarak atu halo hahalok la morál. Iha ema Izraél nia tempu, Satanás uza relijiaun falsu atu habelar hahalok la morál. Ohin loron, nia mós halo buat neʼebé hanesan. Relijiaun falsu sira tolera no mós halo ema hanoin katak hahalok la morál mak buat neʼebé normál. Rezultadu mak ema barak neʼebé hatete katak sira serbí Maromak la halo tuir ninia matadalan kona-ba morál. Apóstolu Paulo esplika iha ninia karta ba ema Roma kona-ba rezultadu husi hahalok la morál. (Lee Roma 1:28-31.) “Buat neʼebé la diʼak” neʼebé Paulo temi inklui sala seksuál oioin hanesan omoseksuál. (Rom 1:24-27, 32; Apok 2:20) Importante tebes atu kaer metin ba Bíblia nia hanorin!

13. Lasu saida tan mak Satanás uza?

¹³ Satanás aproveita ema nia hakarak. Normál ba ita hotu atu hakarak aprende skill balu neʼebé bele ajuda ita atu sustenta ita no ita-nia família nia presiza. (1 Tim 5:8) Baibain, ita bele aprende skill hanesan neʼe liuhusi eskola no sai estudante neʼebé badinas. Maibé ita tenke kuidadu. Sistema edukasaun iha nasaun barak la hanorin  deʼit kona-ba skill maibé mós ema nia filozofia. Eskola anima estudante sira atu la fiar Maromak no la hafolin Bíblia. Sira mós hanorin katak ema matenek tenke fiar katak moris mai husi evolusaun. (Rom 1:21-23) Hanorin sira-neʼe labele ajuda ema hatene Maromak.—1 Kor 1:19-21; 3:18-20.

14. Ema nia filozofia haburas hahalok saida?

¹⁴ Ema nia filozofia kontra malu ho Jeová nia prinsípiu neʼebé loos. Ida-neʼe la ajuda ema haburas hahalok sira neʼebé mai husi espíritu santu, maibé haburas “hahalok sira neʼebé husi isin”. (Gal 5:19-23) Neʼe book ema atu sai foti an no loko an, no rezultadu mak “ema sei hadomi deʼit sira-nia an”. (2 Tim 3:2-4) Hahalok aat sira-neʼe la hanesan duni ho laran-maus no haraik an neʼebé Maromak hakarak ninia atan sira atu haburas. (2 Sam 22:28) Ema Kristaun balu neʼebé eskola boot komesa halo tuir mundu nia hanoin duké Maromak nian. Mai ita koʼalia kona-ba ezemplu ida.

15-16. Saida mak Ita aprende husi irmán ida nia esperiénsia?

¹⁵ Irmán ida neʼebé serbí tempu-tomak durante tinan 15 liu hatete: “Nuʼudar Testemuña neʼebé hetan ona batizmu, haʼu lee no rona ona avizu kona-ba perigu atu tuir universidade, maibé haʼu lakohi tau atensaun ba avizu neʼe. Haʼu hanoin katak konsellu neʼe la kona haʼu.” Susar saida mak irmán neʼe hasoru? Nia hatete: “Haʼu gasta tempu no forsa barak atu estuda toʼo la iha tempu atu halo orasaun ba Jeová hanesan uluk, haʼu sai kole tebes toʼo haʼu la sente haksolok  kuandu koʼalia kona-ba Bíblia bainhira haklaken, no haʼu mós kole demais toʼo la prepara ho didiʼak ba reuniaun. Maibé ikusmai haʼu rekoñese katak universidade estraga haʼu-nia relasaun diʼak ho Jeová, no haʼu deside atu para. Haʼu halo nuneʼe duni.”

¹⁶ Oinsá edukasaun iha universidade afeta irmán neʼe nia hanoin? Nia hatán: “Haʼu sente moe atu rekoñese katak universidade hanorin haʼu atu fokus deʼit ba ema seluk nia fraku, liuliu irmaun-irmán sira-nia fraku, no hakarak sira atu halo buat neʼebé liu fali sira-nia kbiit, no hadook an husi sira. Presiza duni tempu barak atu halakon hanoin neʼe. Esperiénsia neʼe hanorin haʼu katak perigu tebes atu la rona ba avizu neʼebé Ita-nia Aman lalehan nian fó mai ita liuhusi ninia organizasaun. Jeová hatene didiʼak haʼu. Haʼu triste tanba la rona kedas ba Jeová!”

17. (a) Ita presiza deside metin kona-ba saida? (b) Ita sei koʼalia kona-ba saida iha lisaun tuirmai?

¹⁷ Ita presiza deside metin atu nunka husik “filozofia no hanorin bosok neʼebé la iha folin” husi Satanás nia mundu atu lohi ita. Keta husik Satanás lohi ita ho ninia lasu sira. (1 Kor 3:18; 2 Kor 2:11) Keta husik Satanás halo ita haluha kona-ba Jeová. Moris tuir Jeová nia morál neʼebé loos. No keta husik Satanás lohi ita atu la rona ba Jeová nia matadalan. Entaun saida mak Ita bele halo se Ita sente katak Satanás nia mundu afeta ita-nia hanoin? Lisaun tuirmai sei hatudu oinsá Maromak nia Liafuan bele ajuda ita atu hadiʼa hanoin no toman neʼebé “metin hanesan moru”.—2 Kor 10:4, 5.