1-2. (a) Ezemplu saida mak hatudu katak ita moris mai ho presiza atu hetan kmaan no mós iha kbiit atu fó kmaan? (b) Saida mak bele halo labarik ida laran-kanek?

EMA hotu moris mai ho presiza atu hetan kmaan no mós bele fó kmaan. Porezemplu, bainhira labarik ida halimar no monu no ninia ain-tuur kanek, nia sei tanis no halai ba ninia inan ka aman. Inan-aman labele kura kedas kanek neʼe, maibé bele fó kmaan. Sira husu nia saida mak akontese, hamaran ninia matan-been, hatoʼo liafuan neʼebé fó kmaan no domin, no karik tau ai-moruk balu. Lakleur deʼit labarik neʼe la tanis tan no karik kontinua halimar. Liutiha tempu balu, ninia kanek sei sai diʼak.

² Maibé, dala ruma, oan sira sente kanek iha dalan neʼebé aat liu. Sira balu sai vítima ba abuzu seksuál. Karik sira hetan abuza dala ida deʼit ka durante tinan barak. Bainhira sira hetan abuzu seksuál, neʼe hakanek sira-nia emosaun ba tempu kleur. Dala ruma, ema neʼebé abuza labarik hetan kastigu. Maibé balu haree hanesan la hetan kastigu. Maski ema neʼebé abuza labarik hetan kedas kastigu, maibé labarik bele sente nafatin laran-kanek bainhira sira boot.

3. Tuir 2 Korinto 1:3, 4, saida mak Jeová nia hakarak, no ita sei hetan resposta ba pergunta saida deʼit?

³ Saida mak bele ajuda ema Kristaun ida neʼebé hetan abuzu seksuál bainhira sei labarik no laran-kanek nafatin? (Lee 2 Korinto 1:3, 4.) Jeová nia hakarak mak ninia bibi-malae sira simu domin no kmaan neʼebé sira presiza. Entaun mai ita buka resposta ba pergunta tolu: (1) Tanbasá mak sira neʼebé hetan abuzu seksuál bainhira labarik presiza hetan kmaan? (2) Sé mak bele fó kmaan ba  sira? (3) Oinsá mak ita bele fó kmaan ba sira?

4-5. (a) Tanbasá importante atu komprende katak labarik la hanesan ho ema boot? (b) Se labarik ida hetan abuzu seksuál, nia bele tau fiar ba ema seluk ka lae? Esplika toʼok.

⁴ Ema balu neʼebé sai vítima ba abuzu seksuál kuandu sei kiʼik, karik nafatin presiza hetan kmaan maski tinan barak liu ona. Tanbasá? Buat primeiru neʼebé ita presiza komprende mak labarik la hanesan ho ema boot. Abuzu seksuál afeta labarik sira iha dalan neʼebé la hanesan ho ema boot. Hanoin toʼok ezemplu sira tuirmai.

⁵ Labarik sira presiza sente besik no tau fiar ba ema neʼebé haboot no tau matan sira. Neʼe sei halo labarik sente seguru no sei tau fiar ba ema hotu neʼebé hadomi sira. (Sal 22:9) Triste mak baibain labarik sira hetan abuzu seksuál iha sira-nia uma no sira neʼebé abuza labarik mak membru família, ka família nia belun sira. Bainhira labarik hetan abuza seksuál husi ema neʼebé nia tau fiar, ida-neʼe sei halakon ninia fiar ba ema seluk, dala ruma ba tinan barak.

6. Tanbasá abuzu seksuál mak hahalok neʼebé aat tebetebes?

⁶ Labarik sira labele proteje sira-nia an rasik, no abuzu seksuál mak hahalok neʼebé aat tebetebes. Obriga labarik atu halo buat seksuál nian antes sira sai boot no komprende kona-ba buat seksuál nian entre kaben-naʼin sira bele estraga labarik sira. Bainhira ema ruma abuza labarik iha dalan seksuál, neʼe bele halo labarik iha hanoin neʼebé sala kona-ba buat seksuál. Neʼe sei halo labarik sira sente la iha folin no lakon fiar ba ema seluk.

7. (a) Tanbasá fasil ba ema atu lohi no abuza labarik sira no saida mak sira hatete atu lohi labarik sira? (b) Lia-bosok sira-neʼe lori rezultadu saida?

⁷ Labarik sira seidauk hatene ho didiʼak oinsá atu halo desizaun ka rekoñese perigu no hasees an. (1 Kor 13:11) Tan neʼe, fasil loos ba ema atu lohi no abuza sira. Ema neʼebé abuza labarik bosok labarik ho liafuan sira hanesan, labarik mak sala, labarik tenke rai segredu kona-ba buat neʼebé akontese ona, ema sei la rona no ajuda sira se sira fó sai kona-ba neʼe, ka hahalok seksuál entre ema boot no labarik mak normál. Lia-bosok sira-neʼe bele estraga labarik sira-nia kbiit atu hanoin, no presiza tinan barak atu labarik sira komprende katak buat sira-neʼe mak lia-bosok. Labarik sira-neʼe sei sai boot ho sentimentu katak sira la iha folin ka la merese atu hetan domin no kmaan.

8. Tanbasá ita bele fiar katak Jeová bele fó kmaan ba sira neʼebé hetan abuza seksuál?

⁸ Agora ita komprende tanbasá vítima ba abuzu seksuál terus ba tinan barak. Neʼe mak krime neʼebé aat tebetebes. Hahalok aat neʼe hatudu ho klaru katak ita moris iha loron ikus sira, no ema sei “la hadomi malu” no mós “ema aat . . . sei sai aat liután”. (2 Tim 3:1-5, 13) Satanás nia planu mak aat tebes no triste bainhira ema halo tuir Satanás nia hakarak. Maski nuneʼe, Jeová forsa boot liu fali Satanás ka ema neʼebé halo tuir Satanás. Jeová hatene Satanás nia planu sira. Ita mós bele fiar katak Jeová hatene susar neʼebé ita hasoru no nia bele fó kmaan ba ita. Ita agradese tebes tanba serbí “Maromak neʼebé fó kmaan ba ema iha situasaun hotu. Nia fó kmaan ba ita iha ita-nia susar hotu, atu nuneʼe ita bele fó kmaan  ba ema seluk iha sira-nia susar hotu ho kmaan neʼebé ita simu ona husi Maromak”. (2 Kor 1:3, 4) Se nuneʼe, sé mak Jeová uza atu fó kmaan?

9. Tuir Liurai David nia liafuan iha Salmo 27:10, saida mak Jeová sei halo ba oan sira neʼebé inan-aman la ajuda kuandu sira sai vítima ba abuzu seksuál?

⁹ Ema neʼebé presiza hetan kmaan mak oan neʼebé inan-aman la ajuda kuandu sira sai vítima ba abuzu seksuál ka oan neʼebé sai vítima ba abuzu seksuál husi belun ka família. Liurai David hatene katak Jeová sempre fó kmaan. (Lee Salmo 27:10.) David fiar katak Jeová sei sai Aman ba sira neʼebé hetan terus husi família. Oinsá? Nia uza ninia atan sira neʼebé serbí nia ho laran-metin. Ita-nia irmaun-irmán sira iha kongregasaun mak hanesan família ba ita. Porezemplu, Jesus hatete katak ema neʼebé adora Jeová hamutuk ho nia mak ninia alin, feton no inan.—Mt 12:48-50.

10. Saida mak Paulo esplika kona-ba ninia knaar nuʼudar katuas kongregasaun?

¹⁰ Hanoin toʼok ezemplu sira kona-ba oinsá kongregasaun bele sai hanesan família. Apóstolu Paulo mak katuas kongregasaun neʼebé badinas no laran-metin. Nia hatudu ezemplu diʼak, no nia mós hatete ba ema seluk atu banati-tuir nia hanesan nia banati-tuir ona Kristu. (1 Kor 11:1) Paulo esplika kona-ba ninia knaar nuʼudar katuas kongregasaun hodi dehan: “Ami hatudu laran-diʼak no tau matan didiʼak ba imi, hanesan inan neʼebé fó-susu no tau matan didiʼak ba ninia oan.” (1 Tes 2:7) Katuas kongregasaun sira mós bele koʼalia ho laran-diʼak bainhira uza Bíblia atu fó kmaan ba ema.

11. Saida mak hatudu katak laʼós katuas kongregasaun deʼit mak bele fó kmaan ba ema seluk?

¹¹ Entaun, katuas kongregasaun deʼit mak bele fó kmaan ba sira neʼebé sai vítima ba abuzu seksuál ka lae? Lae. Ita ida-idak iha responsabilidade atu “kontinua fó aten-brani ba malu”. (1 Tes 4:18) Irmán  Kristaun neʼebé maduru bele anima irmán seluk neʼebé presiza hetan kmaan. Tuir loloos, Jeová kompara ninia an hanesan inan ida neʼebé fó kmaan ba ninia oan-mane. (Isa 66:13) Bíblia mós temi kona-ba feto sira neʼebé fó kmaan ba ema seluk iha tempu susar. (Job 42:11) Ita bele fiar katak Jeová sente kontente tebes atu haree feto Kristaun ohin loron fó kmaan ba irmán Kristaun neʼebé hasoru daudaun terus. Iha situasaun balu, karik katuas kongregasaun sira sei husu irmán maduru ida atu ajuda irmán neʼebé hasoru terus. *

12. Saida mak ita labele halo?

¹² Bainhira ita ajuda irmaun ka irmán, kuidadu atu la husu kona-ba buat neʼebé sira lakohi atu fó sai. (1 Tes 4:11) Entaun, saida mak ita bele halo ba sira neʼebé presiza ita-nia ajuda no kmaan? Mai ita koʼalia kona-ba dalan lima husi Bíblia neʼebé bele ajuda ema seluk.

13. Tuir 1 Reis 19:5-8, saida mak Jeová nia anju ida halo ba Elias no oinsá mak ita bele banati-tuir anju neʼe?

¹³ Halo buat ruma atu ajuda ema neʼebé terus. Bainhira profeta Elias halai husi ema neʼebé hakarak oho nia, nia laran-kraik tebes no husu atu mate deʼit. Jeová haruka ninia anju ida atu vizita Elias. Anju neʼe fó buat neʼebé Elias presiza. Nia fó Elias ai-han no anima nia atu han. (Lee 1 Reis 19:5-8.) Istória neʼe hanorin ita lia-loos ida katak dala ruma, buat kiʼik neʼebé ita halo, fó ajuda boot ba ema neʼebé simu ita-nia ajuda. Karik ita bele fó ai-han, prezente simples, ka hakerek karta neʼebé hatudu katak ita hanoin no hadomi sira. Maski la fasil ba ita atu koʼalia ho ema kona-ba sira-nia sentimentu, maibé ita nafatin bele halo buat ruma atu ajuda sira.

14. Lisaun saida mak ita bele aprende husi Elias?

¹⁴ Ajuda sira atu sente seguru no kmaan. Ita mós bele aprende lisaun seluk husi Elias. Liuhusi milagre, Jeová ajuda Elias atu laʼo dook toʼo Foho Horeb. Karik Elias sente seguru iha fatin dook neʼe, neʼebé Jeová halo aliansa ho ninia povu tinan atus ba atus liubá. Karik ikusmai nia sente hakmatek tanba dook husi ema sira neʼebé koko atu oho nia. Saida mak ita bele aprende? Se ita hakarak fó kmaan ba sira neʼebé sai vítima ba abuzu seksuál, karik diʼak atu ajuda uluk sira atu sente seguru. Porezemplu, katuas sira presiza hanoin-hetan katak karik irmán neʼebé hasoru daudaun susar sente seguru liu atu koʼalia iha uma no hemu xá, duké koʼalia iha Reuniaun-Fatin. Maibé karik ema seluk la hanesan neʼe.

15-16. Rona didiʼak katak sá?

¹⁵ Rona didiʼak. Bíblia fó matadalan neʼebé klaru hodi dehan: “Ema hotu tenke lalais atu rona, la ansi atu koʼalia.” (Tgo 1:19) Ita mak rona-naʼin neʼebé diʼak ka lae? Karik ita hanoin, rona didiʼak katak tuur metin, hateke ba ema neʼe, no nonook deʼit. Maibé atu rona didiʼak, ita presiza halo buat seluk tan. Porezemplu, ikusmai Elias fakar sai ninia sentimentu hotu ba Jeová, no Jeová rona didiʼak ba nia. Jeová bele komprende katak Elias sente taʼuk, sente mesamesak, no sente katak serbisu hotu neʼebé nia halo mak saugati deʼit. Ho domin, Jeová ajuda nia atu tahan hasoru ninia sentimentu. Nia hatudu katak nia rona didiʼak ba Elias.—1 Reis 19:9-11, 15-18.

 ¹⁶ Oinsá mak ita bele hatudu laran-sadiʼa no hanoin ema bainhira rona didiʼak? Dala ruma, ita-nia liafuan neʼebé diʼak bele hatudu sai ita-nia sentimentu. Karik ita bele hatete: “Haʼu sente triste ho buat neʼebé akontese ba Ita. Loloos, ema labele trata labarik hanesan neʼe.” Karik Ita mós bele husu pergunta ida ka rua atu ajuda Ita komprende liután buat neʼebé Ita rona. Karik Ita bele husu, “Bele esplika liután buat neʼebé Ita hatete?” ka “Buat neʼebé haʼu komprende husi Ita-nia liafuan mak . . . Neʼe loos ka lae?” Liafuan sira hanesan neʼe bele halo ema neʼe sente katak Ita rona didiʼak, no koko atu komprende nia.—1 Kor 13:4, 7.

17. Tanbasá ita presiza pasiénsia no “la ansi atu koʼalia”?

¹⁷ Maibé kuidadu hodi “la ansi atu koʼalia”. Keta korta ema neʼe hodi fó matadalan ka korrije ninia hanoin. Hatudu pasiénsia bá! Elias sente estrese no laran-triste bainhira nia fakar sai ninia sentimentu ba Jeová. Maibé depois Jeová hametin Elias nia fiar, Elias fakar sai tan ninia sentimentu ho liafuan neʼebé hanesan. (1 Reis 19:9, 10, 13, 14) Ita aprende saida? Dala ruma, ema neʼebé hasoru susar fakar sai sira-nia sentimentu dala barak. Ita hakarak atu rona ho pasiénsia hanesan Jeová. Duké koko fó solusaun atu rezolve sira-nia problema, ita hatudu domin no laran-sadiʼa.—1 Ped 3:8.

18. Oinsá mak ita-nia orasaun bele fó kmaan ba sira neʼebé terus?

¹⁸ Halo orasaun hamutuk ho ema neʼebé terus. Karik susar ba ema neʼebé depresaun atu halo orasaun. Karik ema neʼe sente la merese atu hakbesik ba Jeová. Se ita hakarak atu fó kmaan ba ema hanesan neʼe, ita bele husu atu halo orasaun hamutuk ho nia, no temi ninia naran iha orasaun. Ita bele fó sai ba Jeová katak ita no irmaun-irmán hotu  hadomi tebes nia. Ita bele husu Jeová atu ajuda nia sente kalma no kmaan. Orasaun hanesan neʼe bele fó kmaan duni.—Tgo 5:16.

19. Saida mak bele ajuda ita atu fó kmaan ba ema seluk?

¹⁹ Hili liafuan neʼebé bele kura no fó kmaan. Hanoin uluk antes koʼalia. Liafuan neʼebé koʼalia sai antes hanoin uluk bele hakanek. Maibé liafuan neʼebé diʼak bele kura. (Prov 12:18) Tan neʼe, halo orasaun ba Jeová atu ajuda ita hili liafuan neʼebé diʼak no fó kmaan. Hanoin-hetan katak Jeová nia Liafuan mak iha kbiit boot tebes.—Ebr 4:12.

20. Irmaun-irmán balu neʼebé sai vítima hanoin saida kona-ba sira-nia an, no ita hakarak fó-hanoin sira kona-ba saida?

²⁰ Irmaun ka irmán neʼebé sai vítima ba abuzu seksuál karik hanoin katak sira mak foʼer, la iha folin ka ema la hadomi sira. Maibé hanoin hanesan neʼe la loos! Tan neʼe, ita presiza uza Maromak nia Liafuan atu fó-hanoin sira katak sira mak folin-boot ba Jeová. (Haree kaixa “ Hetan kmaan husi Eskritura”.) Hanoin-hetan oinsá anju ida ho laran-diʼak hametin Daniel bainhira nia sente fraku no laran-kraik. Jeová hakarak Daniel hatene katak nia iha folin-boot duni. (Dan 10:2, 11, 19) Nuneʼe mós, ita-nia irmaun-irmán sira neʼebé hasoru susar mak folin-boot ba Jeová!

21. Saida mak sei akontese ba ema aat sira neʼebé la arrepende an?

²¹ Bainhira ita fó kmaan ba ema seluk, ita fó-hanoin sira kona-ba Jeová nia domin. No ita labele haluha katak Jeová mak Maromak justisa nian. Jeová hatene ema ida-idak neʼebé sai vítima ba abuzu seksuál. Jeová haree buat hotu, no nia sei fó kastigu ba ema aat sira neʼebé la arrepende an. (Núm 14:18) Entaun, mai ita hakaʼas an atu hatudu domin ba sira neʼebé sai vítima ba abuzu seksuál. Liután neʼe, ita mós sente kmaan hodi hatene katak Jeová sei kura vítima hotu neʼebé hetan abuza husi Satanás no ninia mundu. Lakleur tan, buat aat sira-neʼe sei nunka mosu tan iha ita-nia neon no laran.—Isa 65:17.