KUANDU ema hatudu laran-diʼak ba ita, neʼe hametin ita no halo ita sente kmaan. Ita agradese tebes hodi hatene katak ema seluk hanoin ita. Ita ida-idak gosta se ema seluk hatudu laran-diʼak ba ita, entaun oinsá mak ita bele haburas hahalok neʼe?

Ita hatudu laran-diʼak hodi hanoin no hatudu interese ba ema seluk liuhusi ita-nia liafuan no hahalok. Tan neʼe, laran-diʼak la refere deʼit ba liafuan hanesan favór ida ka obrigadu. Domin neʼebé kleʼan no hanoin ema seluk book ita atu hatudu laran-diʼak neʼebé loos. Laran-diʼak hanesan neʼe mak hahalok ida neʼebé mai husi espíritu santu no ema Kristaun presiza haburas hahalok neʼe. (Galásia 5:22, 23) Ita tenke haburas laran-diʼak, entaun mai ita haree oinsá mak Jeová no ninia Oan-Mane hatudu laran-diʼak no oinsá mak ita bele halo tuir sira-nia ezemplu.

Jeová hatudu laran-diʼak no hanoin ema hotu, inklui mós “ema neʼebé la fó agradese no ema aat”. (Lucas 6:35) Porezemplu, Jeová “halo loro-matan saʼe ba ema aat no mós ba ema diʼak, no halo udan tun ba ema laran-loos no mós ba ema aat”. (Mateus 5:45) Ema neʼebé la rekoñese katak Jeová mak sira-nia Kriadór mós simu Jeová nia laran-diʼak no hetan buat neʼebé sira presiza atu moris no dala ruma bele moris kontente.

Dalan neʼebé Jeová ajuda Adão no Eva kuandu sira halo tiha sala mak ezemplu kapás kona-ba hatudu laran-diʼak. Adão no Eva “suku hamutuk ai-figeira tahan no kesi neʼe haleʼu sira-nia knotak”. Maibé Jeová hatene katak sira sei presiza roupa diʼak hodi bele moris iha jardín Eden nia liʼur tanba nia fó-malisan ba rai no “ai-tarak no duʼut aat” moris. Tan neʼe, Jeová hatudu laran-diʼak ba sira hodi halo “roupa naruk husi animál nia kulit”.​—Génesis 3:7, 17, 18, 21.

Maski Jeová hatudu laran-diʼak ba “ema aat no mós ba ema diʼak”, maibé nia hatudu laran-diʼak liuliu ba ninia atan sira neʼebé laran-metin. Porezemplu, iha profeta Zacarias nia tempu, anju ida hanoin barak tanba ema para atu harii fali templu iha Jeruzalein. Jeová rona ba anju neʼe hodi hatán ho “laran-diʼak no ho liafuan neʼebé fó kmaan”. (Zacarias 1:12, 13) Jeová mós hatudu laran-diʼak ba profeta Elias. Loron ida, Elias sente laran-kraik tebes no hakarak atu mate deʼit. Jeová hatene kona-ba Elias nia sentimentu no haruka anju ida atu hametin nia. Maromak hametin Elias hodi fó-hatene nia katak nia la mesak. Ikusmai, Elias bele kontinua halo ninia knaar tanba Jeová fó liafuan kmaan no ajuda neʼebé nia presiza. (1 Reis 19:1-18) Jeová nia atan ida-neʼebé mak hatudu laran-diʼak hanesan Jeová?

Bainhira Jesus haklaken iha rai nia hatudu laran-diʼak no hanoin ema seluk. Nia nunka tarata aat ka obriga ema. Jesus hanoin ema seluk hodi dehan: “Mai besik haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi. . . . Tanba haʼu-nia ai-leba fasil atu lori.” (Mateus 11:28-30) Ema laʼo tuir Jesus ba fatin oioin tanba nia hatudu laran-diʼak. Jesus “hanoin tebes” ema, tan neʼe nia fó-han ba sira, kura sira neʼebé moras no aleijadu, no hanorin sira “buat barak” kona-ba ninia Aman.​—Marcos 6:34; Mateus 14:14; 15:32-38.

Jesus hatudu laran-diʼak liuhusi dalan neʼebé nia komprende ema seluk nia sentimentu. Jesus simu ho “laran-diʼak” ema hotu neʼebé buka nia, maski nia hakarak deskansa. (Lucas 9:10, 11) Porezemplu, kuandu feto ida ho moras raan suli kona Jesus nia roupa tanba hakarak hetan kura, Jesus la hirus nia, maski feto neʼe la moos tuir ukun-fuan. (Levítico 15:25-28) Jesus hanoin feto neʼe tanba nia moras ona ba tinan 12, no dehan ba nia: “Haʼu-nia oan-feto, ó-nia fiar mak halo ó sai diʼak. Laʼo ho dame bá, no ó-nia moras todan neʼe diʼak ona.” (Marcos 5:25-34) Jesus mak laran-diʼak tebes.

Ezemplu sira neʼebé temi iha leten hanorin ita katak laran-diʼak neʼebé loos hatudu liuhusi hahalok. Jesus mós hanorin nuneʼe iha ninia ai-knanoik kona-ba ema Samaria neʼebé laran-diʼak. Iha tempu neʼebá ema Judeu no ema Samaria haree malu ladiʼak. Maski nuneʼe, ema Samaria iha Jesus nia ai-knanoik hanoin mane Judeu neʼebé monu iha naʼok-teen sira-nia liman, neʼebé hetan baku no besik atu mate. Laran-diʼak book ema Samaria hodi halo buat ruma. Nia falun mane neʼe nia kanek sira no lori nia ba uma ida. Ema Samaria selu uma-naʼin atu tau matan ba mane neʼe no nia mós prontu selu tan se presiza.​—Lucas 10:29-37.

Baibain ita hatudu laran-diʼak liuhusi hahalok, maibé ita mós bele hatudu liuhusi liafuan sira neʼebé fó kmaan. Tan neʼe, Bíblia dehan maski “hanoin resin mak halo ema sente laran-todan, maibé liafuan neʼebé diʼak mak halo ema sente laran-haksolok”. (Provérbios 12:25) Laran-diʼak no hahalok diʼak bele book ita atu koʼalia buat neʼebé anima ema seluk no neʼe sei ajuda sira atu sente kontente. * Se ita koʼalia liafuan sira ho laran-diʼak ita hatudu katak ita hanoin ema seluk, no mós ajuda sira atu bele tahan hasoru susar sira.​—Provérbios 16:24.

Ema hotu iha abilidade atu hatudu laran-diʼak tanba “Maromak kria ema tuir ninia ilas”. (Génesis 1:27) Ezemplu ida mak kona-ba Júlio, nia mak tropa Roma nian neʼebé lori apóstolu Paulo ba Roma no “hatudu laran-diʼak ba Paulo no fó lisensa ba nia atu bá hasoru ninia belun sira no sira tau matan ba nia” iha sidade Sidon. (Apóstolu 27:3) Liutiha tempu neʼe, ema neʼebé hela iha Malta hatudu “laran-diʼak” ba Paulo no sira seluk iha ró neʼebé rahun no sunu ahi atu sira haneruk. (Apóstolu 28:1, 2) Ema sira-neʼe halo buat neʼebé diʼak. Maibé atu halo Jeová kontente ita presiza hatudu laran-diʼak iha tempu hotu, laʼós dala ruma deʼit.

Jeová hakarak ita hatudu laran-diʼak iha situasaun hotu iha ita-nia moris. Tan neʼe,  Jeová dehan ba ita atu ‘tau hahalok laran-diʼak nuʼudar ita-nia roupa’. (Koloso 3:12) Maibé dala ruma susar atu sempre hatudu laran-diʼak. Tanbasá? Karik ita dada an tanba ita moe, la fiar an, ema fó-terus ita ka ita sei hanoin an uitoan. Maibé se ita halo orasaun hodi husu espíritu santu no hakaʼas an atu banati-tuir Jeová, nia sei ajuda ita atu hatudu laran-diʼak.​—1 Korinto 2:12.

Ita presiza haburas liután hahalok laran-diʼak ka lae? Husu ba ita-nia an: ‘Haʼu rona didiʼak ba ema seluk ka lae? Haʼu tau atensaun ba ema seluk nia presiza ka lae? Horibainhira mak haʼu hatudu laran-diʼak ba ema neʼebé laʼós haʼu-nia família ka belun diʼak?’ Tuirmai, ita bele halo planu sira hanesan, koñese diʼak liután ema seluk, liuliu sira iha ita-nia kongregasaun. Hodi halo nuneʼe ita bele hatene sira-nia situasaun no presiza. Tuirmai, hakaʼas an atu hatudu laran-diʼak ba ema seluk iha dalan neʼebé ita mós hakarak sira hatudu laran-diʼak ba ita. (Mateus 7:12) Jeová sei haraik bensaun hodi ajuda ita atu haburas laran-diʼak se ita husu ninia ajuda.​—Lucas 11:13.

Kuandu apóstolu Paulo koʼalia kona-ba hahalok neʼebé hatudu sai katak nia mak Maromak nia serbisu-naʼin, nia inklui hahalok “laran-diʼak”. (2 Korinto 6:3-6) Paulo hatudu interese ba ema seluk liuhusi hahalok no liafuan neʼebé laran-diʼak, tan neʼe ema gosta besik nia. (Apóstolu 28:30, 31) Ita mós bele book ema atu simu lia-loos liuhusi ita-nia laran-diʼak. Se ita hatudu laran-diʼak ba ema hotu, inklui mós sira neʼebé kontra ita, ita bele book sira atu hatudu laran-maus no la hirus tan ba ita. (Roma 12:20) Ikusmai, karik sira gosta rona Bíblia nia mensajen.

Ita bele fiar katak iha futuru, iha Paraízu, ema neʼebé moris hiʼas sei kontente tebes atu simu laran-diʼak husi ema seluk, karik neʼe mak primeiravés ba sira. Ida-neʼe sei book sira atu hatudu laran-diʼak ba ema seluk. Ema neʼebé lakohi hatudu laran-diʼak no ajuda ema seluk labele kontinua moris iha Paraízu. Maibé Maromak sei fó moris ba nafatin ba sira neʼebé hatudu domin no laran-diʼak ba malu. (Salmo 37:9-11) Ita sei sente seguru no dame iha Paraízu. Maibé antes ita tama ba Paraízu, ita bele hetan benefísiu saida hodi hatudu laran-diʼak?

Bíblia dehan: “Mane neʼebé laran-diʼak lori buat diʼak ba ninia an rasik.” (Provérbios 11:17) Ema gosta hakbesik ba ema seluk neʼebé hatudu laran-diʼak, no neʼe book sira atu mós hatudu laran-diʼak. Jesus hatete: “Buat neʼebé imi sukat ba ema, nuneʼe mós ema sei sukat ba imi.” (Lucas 6:38) Tan neʼe fasil ba ema laran-diʼak atu hetan belun diʼak no la lakon belun sira-neʼe.

Apóstolu Paulo anima irmaun-irmán sira iha kongregasaun iha Éfeso atu “hatudu laran-diʼak ba malu, hanoin malu, perdua malu ho laran”. (Éfeso 4:32) Bainhira ema hotu iha kongregasaun hatudu laran-diʼak, kongregasaun sei iha unidade no sai metin liután. Ita sei nunka koʼalia liafuan kroʼat, kritika malu ka hatún malu, maski ho liafuan komik. Ita uza ita-nia liafuan atu ajuda ema seluk, duké habelar gosip. (Provérbios 12:18) Rezultadu mak kongregasaun sei serbí Jeová ho ksolok.

Loos duni, ita hatudu laran-diʼak liuhusi liafuan no mós hahalok. Se ita hatudu laran-diʼak ita haleno ita-nia Maromak Jeová nia domin no laran-luak. (Éfeso 5:1) Ita hametin ita-nia kongregasaun no dada ema seluk ba adorasaun neʼebé loos. Mai ita hakaʼas an atu sai ema neʼebé hatudu laran-diʼak.